Jamita Minggu Kantate, tanggal 18 Mei 2025.

Ulaon Ni Apostel 11: 1 – 18.

(Dilehon Debata Hamubaon Ni Roha)

11: 1 Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata.

11: 2 Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma:

11: 3 Bongot do ho hape tu angka halak na so tarsunat, jala rap mangan do ho dohot nasida!

11: 4 Alai jojor sian mulana ma dipatorang si Petrus na masa i, ninna ma:

11: 5 Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku.

11: 6 Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit.

11: 7 Jadi hubege ma soara na mandok tu ahu: Hehe ma ho, Petrus; seseati ma, pangan ma!

11: 8 Alai ningku ma: Tongka, Tuhan! Ai ndang dung hudai na ramun manang na so ias.

11: 9 Alai mangalusi ma soara i paduahalihon sian ginjang: Unang ramun dok naung niiasan ni Debata!

11: 10 Ro di tolu hali do masa songon i dung i ditait ma saluhutna i muse tu ginjang.

11: 11 Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu.

11: 12 Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i.

11: 13 Dibaritahon ma tu hami, naung niidana surusuruan i jongjong di bagasan jabuna, na mandok tu ibana: Suru ma tu huta Joppe, manjou si Simon na margoar Petrus!

11: 14 Hatahonon ni i do tu ho hata na tau paluahon ho ro di sandok isi ni jabum!

11: 15 Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i.

11: 16 Disi ma huingot hata ni Tuhan i na nidokna i: “Aek do dididihon si Johannes, alai Tondi Parbadia do didihononhon tu hamu!”

11: 17 Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?

11: 18 Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu!

Hamu angka dongan na hinaholongan ni Tuhan Jesus Kristus.

Asa ummura antusanta turpuk on, ingkon jumolo do jahaonta jala antusanta sian bindu 10. Di si dipaandar do, pandidion na pinatupa ni si Petrus tu sada keluarga na sian sipelebegu manang non Jahudi, ima na margoar si Kornelius. Sahalak letnan berkebangsaan Italia, ala na disuru Tondi Parbadia. Jala laos mangan  do si Petrus di si jala marborngin. Hape di halak Jahudi, subang bolon do molo mangallang indahan ni halak na so Jahudi, ai dietong nasida do i gabe ramun. Hape na masa di bindu 10 i, ala parsuruon ni Debata do i, gabe dididi si Petrus ma si Kornelius dohot keluargana, saruma tangga.

Di bagasan turpuk on adong tubu persoalan na mansai rongking. Di ayat 2 - 3 didok, gabe dibadai angka na porsea sian Jahudi ma si Petrus siala bongot si Petrus tu bagas ni na so marsunat jala rap mangan nasida. Memang, ganup parhosingan manang hamuabaon jotjot do i gabe madabu tu parsoalan. Molo hamubaon di angka hasomalan dohot angka aturan didok angka natuatua na jolo ma i: "Nunga mumpat talutuk, sega gadugadu, nunga sega uhum na buruk ala nunga ro na imbaru". Boi do i patubu hamaolon di tongatonga ni tatanan ngolu ni masyarakat nang di huria. Mansai umbuk do ra di Taon 2025 on, patupahon angka hamubaon apalagi haimbaruon, hombar tu orientasi Tahun Transformasi di sude bidang, songon na disurathon di Buku Panduan Tahun Transformasi i, na mandok: "...merubah bentuk dan penampilan secara menyeluruh dan dramatis”. Perubahan secara menyeluruh mencakup budaya, gaya kepemimpinan, strategi, struktur, sistem dan prosedur, birokrasi dan skil laho patupahon angka na ummuli jala na dumenggan tu joloan ni ari. Ala ni i, transformasi na nidokna martudutudu tu hamubaon tu hadengganon dohot pahembanghon hamajuon di tongatonga ni huria nang ruas ni huria pe seiring dohot tuntutan hamajuon zaman.

Hamu angka dongan hinaholongan ni Tuhan Jesus Kristus.

Pinargogoan ni Tondi Parbadia marbisuk do si Petrus gabe jumpang ni si Petrus alusna. Gabe dipatorang si Petrus ma tu angka apostel na di Jerusalem, paboa na Debata do na marsuru ibana gabe olo ibana patupahon pandidion tu  sakeluarga (ay. 12 -15). Jala Tondi Parbadia do na manonggopi asa rap mangan dohot keluarga ni si Kornelius jala patupahon pandidion tu nasida. Songon na sinonggopan ni Tondi Parbadia angka apostel i di masa ni ari Pentakosta i, songon i ma Tondi Parbadia manonggoni si Kornelius sakeluarga.

Didok si Petrus ma (ay.17): “Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?”. Alus na mansai lambok jala tingkos do na pinatolhas ni si Petrus tu angka natorop i. Ndang margogo ibana mangambat sangkap ni Debata. “Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu!”. Mamungka sian i gabe hehe ulaon marbarita nauli manang penginjilan tu angka sipelebegu, ndang holan tu halak Jahudi be. Nuaeng gabe sahat nang tu hita.

Di 1 Musa 12: 2 - 3 didok Tuhan Debata do tu si Musa songon on: “Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho. Jala pasupasuonku angka na mamasumasu ho, jala toruanku angka na mamburai ho, jala dapotan pasupasu marhitehite ho saluhut angka bangso ni tano on.”  Pasupasu ni Tuhan Debata ndada holan tu halak Israel alai dohot do tu saluhut bangso dohot houm na adong di sandok portibi on. Alai tutu, ingkon hatindanghononta do bangso Israel do na parjolo taruli pasupasu ni Debata jala marhite bangso Israel do gabe dohot saluhut bangso dipasupasu Tuhan Debata. Na so mungkin do dapotan pasupasu angka jolma, bangso dohot houm di sandok portibi on molo so jumolo bangso Israel dipasupasu Tuhan Debata. Ndada holan i, dohot do haluaon dohot hangoluan na pinatupa ni Tuhan Debata marhite Tuhan Jesus Kristus.  Na so mungkin do dapotan haluaon dohot hangoluan angka jolma, angka  bangso dohot houm di sandok portibi on molo so jumolo bangso Israel dapotan haluaon dohot hangoluan na pinatupa ni Tuhan Debata marhite Tuhan Jesus Kristtus. Pasupasu, haluaon dohot hangoluan na pinatupa ni Tuhan Debata sifatna universal, berlaku tu saluhut bangso di portibi on. 

Ala ni i, hamu angka dongan, tatiru ma si Petrus na olo patupa hamubaon na manghorhon hamajuon dohot perkembangan na mansai balga. Sada terobosan na mansai denggan situtu, ndada ala sian roharohana sambing,  alai ala parsuruon ni Tondi Parbadia do. Boha do asa masa Transformasi i? Ingkon tinggil do hita tu soara ni Tondi Parbadia. Ai ndang tarambati manang ise pe sangkap ni Tuhan Debata jala ndang tarambati hogogoon ni portibi on hagogoon ni Tondi Parbadia. Ala ni i, tung lam tapatinggil ma sipareon ni tondinta dohot panghilalaanta tu soara ni Tondi Parbadia, asa tarbahen hita angka haimbaruan, asa dapot hamajuon. Asa tinggil hita tu ulaon ni Tondi Parbadia, lam marsitutu ma hita martangiang di bagasan Tondi. Tondi do anggo Debata; asa angka na martangiang tu Ibana, patut martangiang di bagasan Tondi dohot hasintongan (Johannes 4: 24).

Hamu angka dongan hinaholongan ni Tuhan Jesus Kristus.

Songon na masa di bagasan turpuk on, ditongatonga ni panghobasion ni angka Apostel i, lumobi na niadopan ni Apstel Petrus. Boha do hadirion dohot sikap ni halak na porsea laho mangadopi angka parsoalan na tubu di tongatonga ni huria? Tajalo ma bisuk sian Tuhanta i, songon na pinatupa ni si Petrus di bagasan turpuk on. Tahobasi ma angka ulaonta di tongatonga ni huria marhite na mangido gogo dohot habisukon na sian Tuhan Debata asa didongan Tondi Parbadia hita di ganup angka sihobasanta lumobi marbisuk hita laho mangadapi angka parsoalan na tubu di tongatongan ni ngoluanta, rumatanganta lumobi di tongatonga ni huria. Molo so boi pe hita laho patupahon angka na ummuli na dumenggan uju masa angka parsoalan di tongatonga ni huria unang ma hita gabe panggunturi manang propokator. Molo so boi mambahen hadameon unang gabe sibahen hagunturon. Asa  mar-Kantate hita di bagasan ngolunta, songon goar ni Minggunta Kantate, na marlapatan: Endehon hamu ma di Jahowa ende na imbaru. Mar-Kantate manang marende do nasida mamuji Debata, ala ni aha? Ala dohot do hape tu halak sipelebegu dilehon Debata hamubaon ni roha, asa mangolu! Ala nunga ungkap be haluaon dohot hangoluan i tu sude jolma di sandok portibi on. Boasa ingkon marende? Ala marhagogon situtu do parendeon di ngolu ni halak na porsea, i do umbahen na didok di Jakobus: “…asa marende ma angka na marlas ni roha”. (Jak. 5: 13). Manang tu ise pe, manang sian bangso dia pe, manang sian na pogos, manang na mora, tu angka baoa dohot parompuan, na berkulit putih manang kulit hitam, asal olo paubahon rohana jala porsea di Tuhan Jesus Kristus pasti do malua sian dosa dohot hamatean. Ala ni i, unang ma adong sian hita na mandok, na so talup halak na asing manjalo haluaon dohot hangoluan na sian Tuhan Debata ai hita pe najolo bagian ni horong ni sipelebegu do manang non Jahudi. Ai tu sude bangso, houm, marga dohot luat do diparade Tuhan Jesus angka siparsaulihonon ni angka na porsea sian harajaon ni Debata. Amen.