Jamita Minggu Pentakosta I, tanggal 08 Juni 2025.

Johannes 14: 15 – 26.

Topik: Ulaon Ni Tondi Parbadia Di Ngolu Ni Angka Na Porsea

14: 15 Molo na holong rohamuna di Ahu, radotanmuna do angka patikku.

14: 16 Jala pangidoonku ma tu Ama i, asa dilehon tu hamu sada Pangondian na asing, asa I mandongani hamu salelengna i.

14: 17 I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana.

14: 18 Ndang tadingkononku hamu so marama; na ro ma Ahu mandapothon hamu.

14: 19 Saotik nari nama, jadi ndang be idaon ni portibi on Ahu, alai idaonmuna do Ahu; ai na mangolu do Ahu, hamu pe mangolu do!

14: 20 Di na sadari i ma botoonmuna, Ahu di bagasan Damang jala hamu di bagasan Ahu jala Ahu di bagasan hamu.

14: 21 Manang ise na maniop angka patikki jala diradoti, i do na holong roha di Ahu. Alai dihaholongi Damang i do na holong roha di Ahu; Ahu pe, holong do rohangku di ibana jala papataronku ma Ahu tu ibana.

14: 22 Jadi didok si Judas ma (ndada si Iskariot i): Dia do alana, Tuhan, umbahen na holan tu hami papataronmu dirim, ndada tu portibi on?

14: 23 Dung i ninna Jesus ma mangalusi ibana: Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana.

14: 24 Na so holong roha di Ahu, ndang radotan ni i hatangku. Ndang Ahu nampuna hata na binegemuna i, Ama i na marsuru Ahu do!

14: 25 I ma huhatahon tu hamu, tagan rap dope Ahu dohot hamu.

14: 26 Alai anggo Pangondian i, i ma Tondi Parbadia, sisuruon ni Ama i marhitehite Goarhu, ajarhonon jala paingothonon ni I do tu hamu nasa na huhatahon i tu hamu!

Hamu angka dongan hinaholongan ni Tuhan Jesus Kristus.

Hataridaan ni pangulaon ni Tondi Parbadia di ngolu ni angka na porsea, mangihuthon turpuk on, ima: Gabe parholong ni roha jdohot mangaradoti Patik ni Tuhan i. Ndang boi holan di hata mandok: Holong do rohangku tu ho, huhaholongi do ho, alai ingkon tapataridahonon do i marhite angka pambahenan dohot angka parangenta be. Di sada huta adong ma sada keluarga na hurang denggan amanta i dohot inantana. Amanta on, parjujii na utusan. Jotjot do amanta on mulak tu jabuna mareak torang ari holan ala ni na marjuji dohot donganna. Molo ndang marjuji sai holan na mabuk ma amanta on. Songoni do huroha halak parjuji dohot parmitu ndang adong be rohana mulaulaon. Pangalahona mamaksa inantana asa dilehon inantana i hepeng laho jujihononna manang laho mabuk. Molo mangido hepeng amanta on tu inantana, ndang boi so dilehon inanta i. Molo so dilehon inantana i hepeng i olo do sampe lalu tangan amanta on tu inanta i. Hinorhon ni i gabe sai jotjot ma tubu parbadaan sahat ma tu na so marsipangkulingan nasida.

Ala parjuji dohot parmabuk do amanta on, ndang na hea on marminggu apalagi tu partangiangan. Tung so adong be dirajumi ibana adong pasupasu sian na tumangihon hata ni Debata, tung holan sian hasomalanna i nama dietong ibana haroroan ni angka las ni roha. Hape di sada tingki, sian na so tarjua ni amanta on, ingkon bongot ma amanta on tu gareja ala ni pamasumasuon ni berena. I nama lojana ibotona mangelek amanta on, didok ibotona mangelek: “Molo sahali on ingkon rap do hita mangudurhon beremon tu gareja pamsumasuon ni beremon.” Sian na so tarjua ingkon gabe marminggu ma amanta on jala tung diatur ma asa hira na badia berengon ni halak. Jala godang do halak na tarsonggot mamereng ibana ala holan sahali i dope amanta on marminggu di bagasan na tolu taon i. Hape di tingki marjamita amang pandita i, tung hona hian tu tohana jamita i, ala dijamitahon amanta pandita i taringot tu hasadaon dohot holong ni roha. Ingkon tarida do jumolo holong I di bagasan keluarga. Unang ma berengon di luar mansai denggan jala uli, hape di ruma tangga ndang marsipanghulingan, ninna isi ni jamita i.

Dung mulak sian parmingguan i diuduti nasida ma pardalananna manuju tu inganan parpestaan i. Alai dung haruar sian gareja pe nunga didapothon amanta on inantana i. Tarida ma tutu parbue ni jamita I di hadirion ni amanta on, sian pangkulingna dohot pambahenan ni amanta on salelng di pesta i. Dung sae pesta mulak ma nasida tu jabuna. Dung salpu mangan bodari, manghatai ma amanta on tu ripena: Didok ma: “Inang, boru ni rajanami! Nunga tung mardosa ahu hape salelng on tu ho ala mansai godang na hubahen sogo ni roham saleleng on. On pe marpangulahi ma roham mida ahu dohot  angka hahuranganku na sai laon. Mulai bodari on, muba nama ahu. Hupature pe pangalahongku, burju nama ahu tu ho jala burju nama ahu mangula angka siulaon”.

Tutu do antong mulai ma tarida hamubaon ni roha di amanta on, patar ma hinatabo dohot hinadenggan ni parsaoran nasida di ruma tangga nasida. Gabe sai rap nama nasida tu dolok dohot tu toruan. Di sada tingki didok amanta on ma tu inantana i, ingkon rap ma hita jolo tu onan laho mangallang na tabo dohot belanja. Satolop do antong inantana i jala mansai las situtu rohana di hamubaon ni amantana i.  Partingkian maronan di nasida sahali saminggu do. Jala antar lumayan do dao ni huta nasida tu onan, ingkon jolo mardalan do 3 kilometer, dungi pe asa dapot inganan mambuat motor sewa (angkot). I dope na jolo. Saut ma antong nasida laho tu onan, jala di na mardalan i nasida, dipatorang amanta on do panolsolionna di pangalahona na saleleng on. “On pe boru ni rajanami, ingkon ture nama pangalahongku, na so tupa be marsak ho bahenonku. Jala ingkon hophoponku ma ho manang aha pe na masa. Molo adong halak na mangganggu ho dohononku ma: Langkahi dulu mayat saya, songon na di tipi i. Pos ma roham angka las ni roha nama jaloonmu sian ahu jala ingkon hosaku nama na gabe taruhanna jala ingkon berkorban do ahu humopphop ho”, ninna amanta on.

I do somalna, molo tabo angka panghataion, ndang nihilala nunga dapot inganan mambuat motor sewa. Masuk ma nasida tu motor i laho borhat tu onan. Dung sahat nasida di onan, jolo mangallang na tabo do nasida dung i pe asa laho belanja manuhor situhoron na ringkot tu jabu. Di sip e nunga tarida hamubaon ni amanta on, didongani do belanja jala olo maniopniop karanjang inaganan ni belanja i. Jala dung hira singkop belanja nasida borhat ma nasida manadingkon onan i mulak tu jabu. Dung turun muse sian motor, mardalan ma nasida 3 kilo meter manopot jabunasida. Hape hira diparsitongaan ni dalan, pas di tekongan na so sian panagaman tompu ma ro gompul naeng mamolgak nasida. Hira na pintor naeng disoro ni gompul i do nasida, alai gabe jumolo do amanta on mabiar. Diboto hamu do tu dia lao? Ahu pen dang huboto. Sarupa hita. Alai udut ni carita on mandok, ala ni biar ni amanta on, gabe manjangkit ma ibana tu sada hau na tongon adong di pinggir dalan i lao paluahon diri sandiri. Alai molo inantana i tading do di toru, ala ni biarna maradu pingsan laos galdap tu tano i. Didapothon gompul i do inanta i, alai anggo di roha ni amanta on laho polgahonna nama ripena i. Dianggo gompul i ma inanta i: Dianggo parnianggoanna, dianggo muse pinggolna pola songon na leleng. Ala leleng dianggo gompul i, pinggol ni inanta i, gabe tubu ma tu roha ni amanta on, pasti do adong dihusiphon gompul i tu ripena i. Hape holan songon i do dibahen gompul i, dungi ditadinghon gompul i, mulak gompul I tu ramba i. Dung mulak gompul I tu ramba i, songon dia ma muse amanta na di ginjang hau i? Di roha ni amanta on, nunga tung marsigorgor huhut didok, aha ma nuaeng dihusiphon gompul i tu inantaki?. Dung i turun ma ibana sian hau i jala didapothon ma ripena na tongon pingsan dope. Alai sai dipaksa amanta i ma asa hatop sadar, dihutur, dijou goarna, diapus pardompahanna. Nian ndang pola sadia leleng mintor sadar do ripena i. Disungkun amanta i ma: Aha do dihusiphon gompul i tu ho? Sai hohom do inanta i, ai heran ibana sadihari gompuli marhusip tu ahu, ninna rohana dibagasan. Dipaduahali amanta on muse manungkun: Aha do dihusiphon gompul i nangkin tu ho? Sai dipaksa amanta on ingkon adong alusna, mulai ma antong dikarang inantana i alusna. Disungkun amanta on ma patoluhalihon: Aha do dihusiphon nagkin tu ho? Didok inantana i ma, i mada gabe lam huingot adong do hape dihusiphon gompul i tu ahu: “Didok gompul i nangkin: Holan hata do di amantami”.

Hamuna angka dongan na hinaholongan dibagasan Jesus Kristus Tuhanta i.  

Rumang ni pangalaho songon na di amanta i, boi masa do i dihadirionta di partingkian nuaeng on, apalagi tu angka ama. Jotjot do haruar sian pamanganta mandok holong do rohangku di ho, huhaholongi do ho ninta tu angka inanatanta be dohot tu angka ianakkonta be. Jala sai olo do hita ama mandok: Ama do kepala ruma tangga, ama do mangatur di jabu on. Sai jotjot do sipodaon talehon, alai boi do holan hata i di hita. Antong, apala na rumingkot pangulaon do ndada holan hata. Ala ni i, gabe parholong ni roha ma hita tu Tuhan Debata nang tu angka dongan jolma. Maniru pambahenan ni Tuhan Debata dohot Tuhan Jesus Kristus taulahon ma holong ni roha i di ngolunta siganup ari asa tarida pangulaon ni Tondi Parbadia marhite angka na ngolu ni na porsea. Amen. 

Lihat juga di:  https://youtu.be/WBaaIZAsNc8?si=TderMVfiAbPdLgNq