Sermon Parhalado HKBP Ajibata; Jamita tu Partangiangan.
Sermon Parhalado HKBP Ajibata, Jamita Tu
Partangiangan:
Kristus
Do Pardengganan Dohot Haluaonta
(Kolosse 1: 15-23)
1 Patujolo
Mansai
arga do panghophopon ni Debata tu portibi on marhitehite Jesus Kristus, pola
mate Ibana di dolok golgata laho pasaehon saluhut dosanta. Ibana do Anak ni
Debata na gabe jolma holan mamorsan dosa ni saluhut hajolmaon. Hinorhon ni i
gabe taruli hangoluan saleleng ni lelengna saluhut halak na olo manghaporseai
jala marhatopothon Debata do mual ni haluaon i di bagasan Jesus Kristus.
Pangantusion si songoni do na pinatorang ni Apostel Paulus tu Huria Kolosse di
bagasan turpuk jamita on. Dipataridahon Apostel Paulus do parsitutuonna
marmahani Huria Kolosse “gabe sahalak ulaula” ni Debata ibana. Apostel Paulus
rap dohot si Timoteus dipodai jala ditangianghon nasida do huria Kolosse (1:
1). Digoari nasida do huria on Huria na badia, tardok istimewa ala memang tung
marasing situtu do huria on martimbanghon huria na asing angka na di
humaliangna. Polin do haporseaon nasida, ndang olo mubauba atik pe adong poda
haliluon (aliran sesat) nanaeng manegai haporseaon nasida di hatiha i. Mandok
mauliate do Apostel Paulus ala parsitutuon dohot parsihohotan ni huria i manghaporseai
Tuhan Jesus: “Ai hubege hami do barita ni
haporseaonmuna di Kristus Jesus, nang holong ni rohamuna mida saluhut na badia”
(ay. 4).
2 Hatorangan
Jesus
do suman ni Debata, marlapatan do i di bagasan Tuhan
Jesus do hita mananda Debata. Di Padan Na Robi dipaatandahon do Debata na so
tardungdung (na transenden), alai di bagasan hadirion ni Tuhan Jesus gabe boi
do Debata rap dohot jolma (immanen). Di bagsan tangiang pe sai somal do dabege:
“Ale Tuhan Debata na di banua ginjang, di banua ginjang pe Ho (transenden) alai
jonok do Ho di angka na manjou GoarMu (immanen)”. Dipatuduhon i do na so adong
be pembatas dohot Debata. Ibana do patujolo ni nasa na tinompa.
Andorang ndang ojak dope tano on, nunga adong Tuhan Jesus Kristus. Ima
patuduhon hajongjongan manang eksistensi ni Jesus Kristus ndang dos dohot angka
na tinompa na asing. Di bagsan Ibana do ditompa saluhut. Marhitehite
hadirion ni Tuhan Jesus naeng patar ulaon dohot huaso ni Debata sitompa
saluhutna. Ndang adong sian naung tinompa i na so sian pamotoan ni Tuhan Jesus.
Na tarida dohot na so tarida. Godang dope angka na tinompa ni Debata na so
tarida marhite pamerenganta, alai patar do i saluhutna di adopan ni Tuhan
Jesus. Jesus di jolo ni saluhut.
Ibana do bonana dohot ujungna (alpa dohot omega). Ibana na boi padomuhon
(memperdamaikan) nasa na tinompa dohot Debata. Ndang adong sian saluhut angka
na tinompa i na boi mangulahon ulaon i. Dipasahat Debata tu Tuhan Jesus huaso laho
padomuhon (Ptd: Tuhan Jesus hadomuan na
disuru Debata... B.E No. 62: 3), mangarahon dohot manogu saluhut na tinompa
i tu Debata. Jesus do ulu ni Huria.
Huria ima hataridaan ni pamatang ni Kristus (tubuh Kristus - Soma Kristo) di portibi on. Di 1 Korint 3: 11 didok apostel Paulus:
“Jesus do Ulu dohot ojahan ni Huria ni Debata di saluhut portibi on”. Laos
dipatangkas apostel i muse di 1 Korint 12: 12 – 24 “Hasadaon ni huria i, songon
hasadaon ni pamatang ni jolma, di angka ragam ni ulaonna be, alai sada do
ianggo ulu i. Ala ni ndang patut jolma pajongjonghon dirina gabe dasor ni
huria, nang pe tarajumi jala tahaporseai do dipake Debata do jolma i gabe
ulaula ni Debata di tongatonga ni huria i. Ibana do parjolo hehe sian angka
naung monding i. Sasintongna molo tahatai taringot tu Kristus, na manghatai
taringot tu hangoluan do hita ndada
hamatean (Ingot hata ni Tuhan Jesus di Joh. 11: 25: “Ahu do haheheon dohot hangoluan;
na mangolu do na porsea di Ahu, nang pe mate ibana!”). Ndada hamatean
be na gabe ujung ni pardalanan ni jolma, alai sorop ni hamatean i nunga ditaluhon Tuhan Jesus
marhite haheheonNa sian na mate. Hamatean ni daging ndang gabe sihabiaran be di
halak na porsea, alai gabe sada dalan do i manopot na manongtong i/hangoluan na
so ra suda (Hamatean parhitean lao
manopot Jesuski. Dohot au ingkon mamolus, asa sahat au tu si... B.E. 535:
1). Jesus do nampuna hagogoon. Di bagasan ha-DebataonNa di bagasan
hasitolusadaon, di si do hagogoonNa. Mangatasi nasa haogogoon na adong di
portibi on. Mangalehon pos ni roha dohot jaminan tu saluhut angka na porsea. Di
saluhut na sa huaso dohot hagogoon na adong di portibi on na sipata mambahen
ganggu halak na mangihuthon Kristus, alai ingkon ingot do hita di huaso dohot
hagogoon ni na sun hinagogo i laho mangurupi angka na olo joujou tu hagogoon ni
Jesus Kristus. Jesus do pardengganan.
Mamungka sian Padan Na Robi dung madabu jolma na parjolo i tu dosa gabe adong
batas/jarak/jurang pemisah ni jolma dohot Debata na sun Badia i. Dipillit Debata
do jolma gabe “dalan pardomuan” ni Debata dohot jolma. Dipatupa Debata do
marhite; Panurirang, Malim dohot Raja, alai ndang singko saluhutna i.
Dipasingkop ma marhitehite haroro ni Tuhan Jesus Kristus, laho pasaehon dosa ni
jolma i, Ibana ma na ingkon mate di hau pinarsilang na di dolok Golgata laho
patupahon pardengganan i/pardomuan dohot Debata.
3 Aplikasi.
1.
Tuhan Jesus Kristus do Anak ni Debata na
ro tu portibi on. Ibana do parhitean ni Debata Jahowa laho patupahon haluaon ni
jolma sian angka dosa. Marhite Tuhan Jesus tongtong do mangula Debata nang
Tondi parbadia mandongani dohot mamasumasu ngolu ni halak na porsea. Ido na
ingkon sihatindanghononta di adopan ni Debata. Unang be ganggu hita di
pardengganan dohot haluaon na binahen jala nabinoan ni Jesus Kristus. Di 1
Timoteus 2: 5-6 didok: “Ai sada do
Debata, sada do nang pangulu ni Debata dohot jolma, i ma jolma Kristus Jesus i.
Dilehon do diriNa, bahen tobus humongkop saluhut, i ma sihatindanghonon di tingki hadenggananna”.
2. Marmahani,
manjamothon dohot manangianghon i do ulaon jala sihobason ni huria asa tongtong
hot manghaporseai Tuhan Jesus. Sipodaon do angka ruas ni huria asa
marpanghrimon na mangolu. Di tingki na parpudi on somal do tabege sian ruas ni
hurianta na mandok: “Tumabo do marminggu di huria na asing martimbanghon di
HKBP, tabo begeon jamitana!. Hape molo sinungkun nasida: songon dia ma huroa di si? Ndang huboto, ninna do. Hak nasida do i
sebagai ruas na mauas di hata ni Debata. Unang mintor tauhumi nasida, alai mansai
ringkot situtu do panogunoguon tu nasida. Denggan do arahononta nasida mananda
songon dia do sintuhu ni parhuriaon, lumobi mangarahon tu pangantusion na
tangkas taringot tu huria marhite angka ruhutruhut dohot angka aturan ni Huria
i.
Komentar
Posting Komentar