Jumat, 14 Juni 2013

Sermon & Arisan Parhalado HKBP Ajibata, Jamita Tu Partangiangan:

Sermon & Arisan Parhalado HKBP Ajibata, Jamita Tu Partangiangan:

Jesus Kristus Do Paluahon
Galatia 4 : 4 – 9
        Pamuhai
Pamurahon hita laho mangantusi turpuk jamita on, mansai ringkot situtu do botoonta taringot tu situasi ni huria Galatia. Apostel Paulus manongos surat Galatia on tu halak na imbaru Kristen dope, na sian sipele begu hian (Gal. 2: 2). Dung ditadinghon Apostel Paulus huria Galatia, pintor adong do ajaran na mandok: Ia halak Kristen ingkon do mangulahon parsunaton (Gal 5: 3). Ajaran on marharoroan sian haIak Kristen Jahudi na mansai togu marsitiopan (tergantung) tu Patik. Di keadaan na songoni ma ditongos Apostel Paulus Surat Galatia on. Ndada ala na mangulahon patik asa gabe dipintori halak na porsea. Asa gabe songon siparorot do patik i, mamboan hita tu Kristus, asa sian haporseaon hita dipintori (Gal. 3: 24). Ai sian asi ni roha do, umbahen na malua hamu, dalan haporseaon; jala ndada binahenmuna, silehonlehon ni Debata do. Nda tung sian parulaon i, asa unang adong na mamuji diri (Epesus 2: 8-9). Asa umbagas tasigati ma marhite hatorangan na di toru on.   
        
        Hatorangan ni ayat
Ay. 4.      Alai dung dapot gok ni tingkina...  (pleroma diterjemahkan: genap waktunya = gok tingkina = jumpang tingkina). Hata i marlapatan do hombar tu angka saluhut pangaradeon (persiapan) naung singkop.  Memang asi ni roha ni Debata Jahowa mardalan do ganup ari, ganup partingkian jala tahilala do i, ndang hea dibatasi partingkian dohot inganan. pleroma (hagogok ni tingkina), partingkian naung singkop dohot pangaradeon na binuhul ni Debata marhite haroroNa tu portibi on di bagasan Tuhan Jesus Kristus. Na mangolu do hita di bagasan partingkian i, alai di Debata ndang marlaku partingkian ai Ibana do Alpha dohot Omega. Martingki be do luhutna na tinompa. “Untuk segala sesuatu ada masanya, untuk apapun di bawah langit ada waktunya”. Hombar tu partingkian i ma diaturhon Debata sangkap patudohon dohot mangalehon asi ni roha-Na marhite hatutubu ni Tuhan Jesus sian sahalak parompuan.
Ay. 5.      Asa ditobus angka na  ginomgoman ni patik...    Pangantusion na sala na sian halak Jahudi ala ni na mangulahon ruhutruhut ni patik do nasida  umbahen dapot haluaon. Ndada dapot haluaon sian na mangulahon patik. Ndada jumpang haluaon sian pangulaon ni jolma. I do umbahen na tubu Jesus Kristus sian boruboru ginomgoman ni patik i. Marhite i ma gabe torang di hita saluhutna haroro ni Tuhan Jesus tu portibi on, ai marhite naung hona bura Ibana gabe malua hita sian bura ni patik i (Gal. 3: 13). Saluhut do jolma ginomgoman ni patik i, Kristen Jahudi dohot Kristen non Jahudi (Rom 2: 14 – 15), ala ni i saluhut jolma do ditobus Kristus sian bura ni patik i. Manang ise na mangalului haluaon marhite na mangulahon patik, ndang dapotan haluaon. Alai manang ise manjalahi haluaon marhite manghaporseai Jesus Kristus angka i ma na pinalua dohot ditobus jala mian di bagasan haluaon i.   “..asa tajalo ruhut paramaon..”. Di (Bhs. Indonesia: ...supaya kita diterima menjadi anak...). Marasing do sasintongna pandohan di Bibel dohot di Alkitab taringot tu hata i, alai sarupa do anggo lapatanna dohot tujuanna. Halak na porsea di Debata Sitolu Sada i angka i do na targoar manjalo ruhut paramaon sian Tuhan Debata. Ai nasa na tinogihon ni Tondi ni Debata angka i do anak ni Debata (Rom 8: 14). Naung manjalo ruhut paramaon i do naung gabe anak ni Debata; nunga malua sian bura ni patik i jala gabe anak sitean bagabaga haluaon.
Ay. 6       Ala anak hamu... Nunga diain Debata angka na porsea gabe anak-Na ala ni Tuhan Jesus na gabe pardengganan, pardomuan dohot pardamean i. Nunga diposisihon angka na porsea tu sada inganan na imbaru. Na tarihot hian nasida tu gomgoman ni patik i (hatoban) gabe masuk tu posisi ha-anak-on (merdeka). Tondi Parbadia do na mangula di saluhut halak umbahen na tarbahensa gabe porsea. Tondi i do mambahen halak na porsea gabe anak ni Debata. Ndada ala ni ulaonta manang pambahenanta umbahen na gabe anak ni Debata hita. Tondi naung sinuru-Na i do tu angka na porsea gabe tau manjouhon: “Abba, lapatanna Ale Amang”. Marhite panjouon Abba/Ale Amang; adong di si hubungan na mansai denggan. Hubungan parsaoran ni iankkon tu amana. Posisi ni halak na porsea sebagai anak: mangharingkothon sahalak ama na marmudumuduhon ianakkonna (pelindung/penganyom). Posisi ni Debata sebagai Ama: na so sihabiaron alai na ingkon sipasangapon.
Ay. 7       Dibahen i, ndang be hatoban ho;...  Apostel Paulus mangondolhon/padamoshon tu saluhut roha ni ruas ni huria Galatia, ndang hatoban be nasida alai nunga gabe berubah posisi gabe anak. Ndada ulaon na mura paubahon sian hatoban gabe anak mata. Status hatoban, ndang taruli di arta teantean asi ni roha ni Debata na binoan ni Tuhan Jesus Kristus. Status anak do na gabe dipatau manjalo siteanon i asi ni roha dohot haluaon na sian Debata (Gal. 3: 29). Ala ni i do umbahen pola diharingkothon Apostel Paulus padamoshon roha ni ruas na di Galatia. Nang pe naung anak nasida ndada na mandok ndang ringkot be ulahononnasida patik i. Ai gabe siparorot do patik i, ndada dalan tu haluaon.
Ay. 8       Dipatorang Apostel Paulus do hamubaon na masa di tongtonga nasida, andorang so Kristen dohot dung Kristen halak Galatia. Na jolo (andorang so Kristen) ndang ditanda nasida Debata jala angka na so Debata do disomba jala dipaolooloinasida tagan di sihapelebeguon nasida. Alai nuaeng (dung Kristen) nunga ditanda nasida Debata jala nunga gabe anak ni Debata nasida. Na jolo ndang diantusi nasida dope habalgaon ni Debata, hasangapon-Na dohot asi ni roha-Na, ai so dipatandahon i tu na so bangso Israel (Rom 9; 4 – 5). Ia i na tinanda nasida, i do dihaposi jala dihabiari nasida jala songon hatoban biar ni roha nasida.  
Ay. 9.      Alai anggo nuaeng ditanda hamu do Debata...  Nunga ditanda nasida Debata jala nunga pasidohot nasida parnampunasa di asi ni roha ni Debata di bagasan Jesus Kristus. Alai mansai tangkas do dipaingot Apostel Paulus nasida marhite ay. 9 on marhite pandohan: ”Marhua ma hamu marbalik muse... asa oloan muna angka i muse...”. Marharoroan sian hasipelebeguon do anggo angka ruas ni huria na adong di Galatia jala ndang diulahonnasida patik mangihuthon halak Israel. Alai nunga adong be patik na sian Debata na ingkon siulaon jala siradotannasida (1 Musa 2; 16 – 17). Asa unang be nian nasida marbalik tu hasomalan dohot bangkobangko uju di sihapelebeguon.  
       
        Panimpuli
           Nunga dipalua Debata hita marhite huaso-Na  na gogo i di bagasan Jesus Kristus sian gomgoman dohot bura ni patik i. Dos dohot huria Galatia, songoni do hita saluhut halak Kristen ditobus jala dipalua sian dosa dohot hamatean marhite hagogok ni tingkina ro Jesus Kristus tu portibi on. Haroro ni Tuhan Jesus tu portibi on saguru di Debata do, lapatanna haroro ni Jesus tu portib on marharoroan sian tahi dohot sangkap ni Debata sandiri do. Haroro ni Jesus Kristus tu portibi on ima songon sada bentuk kepedulian mardongan asi ni roha ni Debata tu jolma pardosa i.  Di suru Debata do Anak-Na Jesus Kristus paluahon hita marhite na mangain hita gabe anakNa, jala gabe tama hita mandok Abba/Ale Amang tu Ibana, ala ni i tajangkon, tahaporseai jala tapuji, tasomba ma Ibana. Ai dipalua Anak i hita, gabe malua situtu do hita. Unang be mulak hita tu bakobako hasipelebeguon. Amen.

Tidak ada komentar:

Poskan Komentar