SERMON HKBP RESSORT AJIBATA
Sabtu, Tanggal 11 Juli 2015. Jamita tu Minggu VI Dung Trinitatis,
12 Juli 2015.
Amos 7: 7 - 15
1.
Gabe
naposo ni Debata ndada masalah pilihan, alai masalah “panjouon” do i manang “panggilan”.
Lapatanna, nang pe sasahalak ndang hea mamparsinta (bercita-cita) gabe naposo
ni Debata, alai boi masa do di sada tingki dipake Debata laho manjou jala mamillit
sasahalak i gabe naposoNa. Marragam cara na binahen ni Debata laho manjou jala
mamillit naposoNa. Nang pe torop naposo
ni Debata alai marragam do cara na pinatupa ni Debata laho manjou dohot mamillit
i. Saluhut naposo ni Debata sian ragam ni “latar belakang” na marasing, adong
sian parmahan dorbia, adong sian pangula manang partani, adong sian panjala
dengke dohot angka na asing ragam ni profesi ni hajolmaon.
2.
Si Amos
na sian Tekoa, ndada sahalak na berpendidikan formal alai sahalak parmahan do
ibana, alai dijou jala dipillit Debata do ibana laho mangulahon parsuruon ni
Debata na mansai borat situtu. Si Amos dijou Debata laho pasahathon kritikan
taringot “kesenjangan sosial” di tongatonga ni bangso Israel. Boi dohonon na
mamora lam mamora jala na pogos i lam marpogos. Gabe adong jurang pemisah
antara ni horong masyarakat kelas menengah ke atas dohot horong masyarakat kelas
bawah. Horong ni masyarakat partani dohot parmahan (na dianggap hatiha i kelas
bawah) gabe tersingkir tu pedalaman. Nunga
dao pangalaho ni bangso i sian roha holong. Adong na mangalele anggina huhut
patioptiop podang (1: 11). Adong na manggadis partigor ala ni perak dohot na
pogos i ali ni sipatu sapasang (2: 6), dohot mangarupa na pogos jala papisatpisat na metmet
(4: 1).
3.
Si Amos
na so sian kalangan ni keluarga ni panurirang, alai sian sahalak parmahan jala na
papungupungu parbue ni antajau dipillit Debata laho manurirangi di tongatonga
ni bangso Israel. Andorang so turpuk on nunga dipataridahon Debata Jahowa
pangungungkapon tu si Amos: 1. Sihapor. Ida ma jumadihon sihapor Ibana, di
mulana i martumbur ma duhutduhut ni panabian,... siap digagat suansuanan ni
tano i. Alai martangiang ma si Amos: Ale Tuhan Jahowa, sai marpamuati ma
rohaM!. Jadi marpangulahi ma roha ni Jahowa, ndang jadi saut. 2. Api. Dipio
Tuhan Jahowa ma api laho manorui. Martangiang muse ma si Amos: Ale Tuhan
Jahowa, pasadi ma. Jadi marpangulahi ma
roha ni Tuhan Jahowa taringot tu si; ndang jadi saut, ninna Tuhan Jahowa.
4.
Patoluhalihon
dipataridahon Tuhan Jahowa ma tu si Amos Tali rambu na marpungga. Dungi ninna
Tuhan Jahowa ma tu si Amos: Aha do na niidam, ale Amos?. On ma pangungkapon na
patoluhon sian lima pangungkapon na pinapatar ni Debata tu si Amos. Molo
tataringoti angka pangungkapon nunga pasti marisi taringot tu na naeng masa di
tingki na jonok molo so adong hamubaon ni roha. Tali rambu na marpungga
manggombarhon uhuman ni Debata na naeng masa tu halak Israel ala ni angka dosa
nasida. Jongjong do Tuhan i di atas ni... marlapatan do i Tuhan i sandiri
pajongjong uhuman. Sada parik na rahis situtu sinasap manggombarhon ojahan na mansai
togu situtu. Sungkunsungkun ni Debata: Aha do na niidam ale Amos? Marlapatan
diigil Debata do sian angka jolma asa lam tangkas marnida jala manghilala
pambahenan ni Debata marhitehite uhuman. Molo pe diuhum Debata jolma i, ndada
na naeng mangaripashon jolma alai asa anggiat adong panandaon na tangkas tu
Debata jala adong hamubaon ni roha.
5.
Sikap
ni malim Amasia (Na so sitiruon).
Dua tindakan ni malim Amasia na so pola
sitiruon: 1. Melapor malim i tu raja Jerobeam. Pangalahon on patuduhon karakter
na lobi mangharingkothon Raja sian Debata. Malim Amasia di pihak kerajaan
(pemerintahan), Amos di pihak ni Debata. Pangalaho ni malim Amasia mangharingkothon
manang holan mangalului pangomoan dohot posisi aman tu dirina sandiri.
Pangalaho ni Amos ndang mabiar mida raja, alai mabiar maradophon Debata.
Tangkas do diboto panurirang Amos angka hamaolon na naeng siadopanna laho
pasahathon tona ni Debata tu bangso i, alai ingkon masa do i asa saut sangkap
ni Debata. Ai tangkas do diboto panurirang Amos: Tongtong do mangula Debata
laho pajongjong hatigoran. Hombar tu si: Rap dohot panurirang Amos pasidohot ma
hita patulushon sangkap ni Debata.
Komentar
Posting Komentar