Jamita Epistel: Minggu, 25 Oktober 2015.

Jeremia 3: 11 - 18

Patujolo.

Tinallik bulung sihupi, pinarsaung bulung sihala. Unang sumolsol di pudi, ndada sipaingot na so ada. Ima umpasa ni angka natuatua na pinatupa ni ompunta sijolojolo tubu. Tanggung jawab ni natuatua do laho mangajari, paingothon, mamodai dohot maminsang angka ianakkonna. Tujuanna, asa anggiat anak na hasea saluhut angka ianakkonna i. Sasintongna, sahalak natuatua (orangtua) ndada bertanggung jawab holan tu angka ianakkonna sandiri (tubuna), alai dohot do nang tu angka ianakkon ni halak manang ianakkon ni angka donganna na adong di humaliangna. Lapatanna, sundut na tumua ingkon bertanggung jawab laho mamodai dohot patureturehon angka sundut na umposo asa lam tu majuna. Turpuk jamita on, hata sipaingot manang sosososo tu bangso Israel laho paubahon roha asa tung anggiat marpangulahi roha ni Debata mida pangalahonasida.

Hatorangan.

Mardongan roha muruk dipaingot Debata Jahowa do bangsoNa marhite panurirang Jeremia uju ginomgoman ni Raja Josia bangso Israel (3: 6). Di angka hahurangan dohot angka pangalaosion ni bangso Israel maradophon Debata Jahowa tongtong do di bagasan gok holong ni roha do Debata. Molo tung pe dipaingot Debata Jahowa nasida marhite naposoNa ala ni holong ni rohaNa do i. Ala tongtong do dao umbalga holong ni Debata sian rimasNa. Sada do tujuan ni Debata ima: asa anggiat marhamubaon roha ni halak Israel, asa marhite hamubaon i gabe tubu roha na marpamuati sian Debata Jahowa mida bangso na pinillitNa i. Asi dohot holong ni roha ni Debata maradophon bangsoNa dogombarhon songon hubungan ni ama tu ina (Pasutri), patuduhon holong ni roha na ingkon marhasatiaon. Israel (Israel Selatan) dohot Juda (Israel Utara), digombarhon songon 2 (dua) halak na marhahamaranggi na so satia tu Tuhan Debata ala marbalik nasida sian adopan ni Debata jala marsomba tu angka debata ganaganaan dohot tu nasa dolok na buntul dohot tu toru ni nasa hau rata (ay. 6).

Dijou mulak, i do na gabe sintuhu ni hata ni Tuhan Jahowa na pinaandar marhite turpuk on.  Manang boha pe muruk ni Tuhan Debata Jahowa di panjouonNa i asa anggiat marbalik nasida tu Tuhan Jahowa tongtong do i ala ni balga holong dohot asi ni rohaNa. Parasi roha jala pardengganbasa do Jahowa, lambat tarrimas jala parasi roha godang. Ndang tongtong Ibana manorui, jala ndang gotos rohana saleleng ni lelengna (Psalmen 103: 8 – 9). Joujou asa marhamubaon ni roha jala marbalik tu Tuhan Jahowa dipasahat do i tu saluhut halak naung sanga tumadinghon Jahowa, asa mangolu jala marpanghirimon asa dapotan tua sian Sion (ay. 14). Jala molo olo jala rade do nasida mulak marsomba holan tu Tuhan Jahowa, Tuhan i sandiri mangalehon angka parmahan di tongatonga nasida, na boi manogihon, mangarahon lumobi manguluhon nasida tu angka dalan na hinalomohon ni roha ni Debata.

Panimpuli.

Hamubaon ni roha jala ro marsomba holan tu Debata Jahowa, i do na pinangidoNa sian bangso Israel nang sian hita pe. Ia hona uhuman pe Israel, ndada dalan ni Debata laho mangambolongkon alai asa hot do hita asianNa di bagasan balga ni holong ni rohaNa. Di pangontak ni uhuman i, dijagai jala diramoti do hita jala dipaimaima do hamubaon ni roha jala ingkon mulak marsomba tu Ibana asa anggiat marpangulahi rohaNa jala asa taruli di angka ragam ni asi ni roha ni Debata di pardalanan ni ngoluna.