SERMON HKBP RESSORT AJIBATA
SABTU 30 Januari 2016, JAMITA TU MINGGU SEXAGESIMA 31 Januari 2016.
DIPILLIT DEBATA TAGAN DI BORTIAN DOPE.
(Jeremia 1: 4 – 10)
I.
Patujolo.
Ndang na mura mamillit gabe parhalado ala ndang ulaon na mura ulaon ni
parhalado. Sian angka pengalaman laho mamillit manang pabangkithon na gabe
parhalado. Molo sian sundut na umposo dipabangkit gabe parhalado, didok nasida
alasanna: Ndang rade dope au gabe parhalado, ala godang dope sian sundut na
tumua na gumodang pengalamanna sian au. Alasan na asing, ndang tarbagi au dope
tingkingki, dari pada gabe partuktuhan tumagon ma na asing lului hamu, dohot
angka alasan na asing. Sian sundut na tumua, alasan nasida: Nunga matua au, ai
n dang adong sian sundut na umposo na hobas mula ulaon di huria i (yang muda
pasti lebih energik). Tu angka generasi muda i nama na gabe sipatujoloon tu
angka tingki na mangihut” ninna. Toho ma songon na nidok ni na parjolo i: “Horbo
ni Padang Bolak manggagat di balian. Molo nunga ndang di roha, sai godang do
sidalian”.
II.
Hatorangan.
1. Ay. 4 – 5. Na ro ma hata ni Jahowa... Hata ni Tuhan
Jahowa na ro tu si Jeremia. Sada fungsi ni “Panurirang” ima gabe pasahathon
hata manang tona ni Tuhan Jahowa (Bhs. Ind: Perpanjangan Lidah Allah). Hata ni
Tuhan Jahowa na pinasahatNa i tu naposoNa, i do na gabe sipasahatonna tu angka
na torop. Nang pe si Jeremia manghatahon hata i, ala ndada na sian roharohana
sambing i, alai hata ni Tuhan Jahowa do i na pinasahatNa marhite si Jeremia. Ia
hata ni Tuhan Jahowa i, songon on: “Tagan so hujadihon dope ho di bortian, nunga
hutanda hian ho; jala tagan so ruar dope ho sian ampuan ni natorasmu, nunga
huparbadiai hian ho: Hupabangkit ho gabe panurirang tu angka bangso”. Ndada hombar tu lomo ni roha ni jolma hape na
gabe naeng gabe parhobas di Tuhan i, nang pe di partingkian si nuaeng on adong
na pinaloas ni Debata gabe naposoNa (ima na ginoaran naposo na so haposan).
2.
Dipillit
Debata do si Jeremia gabe naposoNa. Dipillit lapatanna, adong na mamillit (Subjek)
jala adong na dipillit (Objek). Debata manodo jala mamillit si Jeremia gabe
panurirang, pasahathon Hata ni Tuhan Jahowa tu angka na torop/bangsoNa. Tong do
adong alasan ni si Jeremia dipamilliton i, songon godang ni sidalian ni halak
di partingkian sinuaeng on. Tingkos jala tutu do alasan ni si Jeremia i: “Iale Tuhan Jahowa,
ida ma, ndang huboto mangkatai, ai na bajar dope ahu”, ay. 6. Alus ni si Jeremia, alus serep ni roha do i, siala
adong panandaion na tangkas taringot tu hadirionna dohot tu hajongjonganna na naeng
gabe ingkon gabe sahalak panurirang jala marhalado di adopan ni Debata Jahowa.
Jolma na bajar dope si Jeremia hatiha dipillit gabe naposo ni Debata. Ramba
naposo na so tubuan lata, halak naposo na so pola godang umboto hata.
3. Debata Jahowa do na mamillit, ndada holan na
mamillit Ibana. Ndang dipasombu Debata mangula angka na pinillitNa ia so molo
jumolo dibohali Ibana. I do na gabe ojahan manang sipeopon ni si Jeremia
dipamilliton ni Debata Jahowa di ibana. “... Ai manang tudia pe ho
husuru, ingkon tusi ho laho, jala manang aha hutonahon tu ho, ingkon i do
hatahononmu” ay. 7. Jala ndada holan dibohali
sambing, alai adong do jaminan pandonganion ni Debata Jahowa di si Jeremia,
jala i ma na gabe paposhon rohana laho mangula angka ulaon na pinasahat ni
Debata tu si Jeremia: “Unang ho mabiar
maradophon nasida, ai sai ahu do donganmu, paluahon ho, ninna Jahowa. Dung i
dipatoltol Jahowa ma tanganna, jala dijama pamanganku, jala ninna Jahowa mandok
ahu: Ida ma nunga sahat hulehon angka hatangku tu bagasan pamanganmu”, ay. 8 –
9.
4. Dungi dipabangkit Debata Jahowa ma si Jeremia
gabe Panurirang, ay. 10. Debata do na pabangkithon si Jeremia gabe naposoNa. “Ida
ma, hupabangkit do ho sadarion...” Marhite ay. 10 on, gabe tangkas ma taboto konsep Padan Na Robi dohot
saonari taringot na pabangkithon na gabe parhobas di adopan ni Debata. Konsep
Padan Na Robi: Debata sandiri do langsung manodo, mamillit dohot pabangkithon na
gabe parhaladoNa. Di partingkian nuaeng on, tarajumi jala tahaporseai do na
Debata do na mamillit jala pabangkithon angka parhalado di tongtonga ni huria i
marhite angka parhalado nang angka ruas ni huria.
III.
Panutup.
Tuhan Debata do hape na manodo, mamillit jala
pabangkithon angka parhalado na marhobas di huriaNa. Ndada holan i, jala Ibana
do na mambohali dohot na manjamin ngolunta gariada tahe disarihon saluhut angka
na ringkot di naposoNa. Ala ni i, adong adong na gabe sidalian di hita laho
manjua parsuruon ni Debata. Hombar tu si, dohonku, dohononta ma: “Di son do ahu
Tuhan, suru ma ahu”.
Pdt. Ahab Tambun, STh – HKBP Ressort Ajibata.
Komentar
Posting Komentar