Di sada tingki
didapothon Nai Freddy ma Am. Freddy tu lapo na tongon marsatur amantana i di
lapo i donot donganna. Didok Nai Freddy ma tu amantana i: "Weee…. Tahe…. amang ni gellengku Am. Ni Freddy on, na boha nama hita. Ai tung lao ma ho nian marsoban. Ai ndang diboto ho nunga habis sobanta. Ai boi do pakkeon pat ni hodamuna i bahenon
mangalompa? Na boha do amaama songon ho?”.
“Olo omak ni Freddy... jolo mate jolo on”, ninna amanta i lambok
mangalusi. “Jolo mate... jolo mate... manang na ho ma hupamate”, ninna inanta i
mardongan muruk di lapo i. Maila do Am. Freddy umbege muruk ni inanta di lapo
i, laos meret ma Am. Freddy sian lapo i mulak tu jabuna. Dung sahat di jabu
dipareso ma tutu, na so adong be soban
sipangkeonasida. Borhat ma Am. Freddy tu tombak naeng mambuat soban, diboan ma
kampak laho marsoban. Alai di na mardalan i ibana tu tombak laho mambuat soban,
sai dipingkirpingkiri ibana ma ila ni rohana ala ni parmuruk ni inantana i
nangkin na di lapo i. "Ai
na so boi be ulaning denggan dihatahon parsonduk bolonkon tu ahu, pola manaon
hailaon iba di lapo i?", ninna Am. Freddy di bagasan rohana.
Dung sahat di
tombak i, di na naeng manaba sada hau Am. Freddy huhut maranganangan, gabe runsur (tergelincir) ma
patna. Tuani do mintor hatop ditiop ibana sada hau na gelleng sitiopanna gabe
ndang madabu ibana alai molo kampakna i laos malua sian tanganna jala madabu tu
lombang i. Hundul ma amanta i huhut mamingkiri na masa tu ibana mamungka sian muruk
ni inanta i sahat tu na masa tu dirina di harangan i jala lam biar ma rohana.
Sai dipingkiri Am. Freddy ma: "Boha ma banenonku mamboan soban hape kampak
pe nunga mago, suda ma au annon remengan ni inantaku muse", ninna rohana.
Hape na so panagamanna pintor ro ma sahalak natuatua mandapothon ibana, ninna ma: "Aha do na mambahen
marsak roham amang?. Dialusi Ama. Ni Freddy ma: "I ma da ompung…., diboto ho do na di bagas rohaki. Na marsak situtu do ahu, ala mago kampakku. Naeng
tarsulandit ahu nangkin gabe madabu kampak i tu lombang an. I do mambahen sai marsak
ahu, gabe sai disonggahi
inantakku ma ahu annon di jabu, molo mulak ahu sian tombak on hape
ndang mamboan soban".
Huhut patuduhon
kampak na sian Perak didok ompung i: "On do kampakmi?". Alus ni Am.
Freddy: "Ndang ompung... ndang songoni kampakku na madabu i". Dipatudu natuatua i ma muse
kampak sian Perunggu: "On do..?". Diialusi Am. Freddy "Ndang
ompung...”. Patoluhalihon, dipatudu ompung i muse kampak sian Mas: "On do kampakmi...?". Di bagasan hajujuron tong do dialusi Am. Freddy:
"Ndang kampakku i ompung, ai sian bosi do kampakku...".
Dungi
ninna natuatua i ma: “Halak na
jujur do hape ho. Na…. on do kampak mi”, dilehon ma kampakna na madabu tu lombang i. Dungi didok natuatua i ma muse tu Am. Ni Freddy i: “Ala halak na jujur do ho, hulehon ma
di ho parbue ni hajujuronmi: Boan ma dohot kampak na tolu on", ninna natuatua i ma tu Am. Freddy jala las situtu ma rohana.
Dungi marsoban ma ibana jala diboan ma deba soban i mulak tu huta. Dung sahat Am. Freddy di jabu
dilehon ma tu inantana i kampak jala longang ma antong inantana i mangida
kampak na tolu i lumobi kampak mas i. Disungkun Nai Freddy ma sian dia do asa
adong kampak na binoan ni amantana i. Denggan jala jojor do dipatorang Am.
Freddy sude na masa i dohot parjumpangannna tu sahalak natuatua na di tombak i.
Umbege cerita i, marsogotna i, tibu di manogot ni ari lao ma inantana i tu
tombak i, tujuanna laho manjumpai jala mangido arta tu natuatua i, ala gila
harta do inanta i. Di na mangalului natuatua i Nai Freddy, hape lilu ma ibana
di tombak i ai so hea didalani ibana i, laos ndang diboto be mulak tu huta.
Hape amantana nunga sai busisaon mangalului Nai
Freddy di jabu dohot di huta. Ai ndang hinata, sadari
manipat ndang tarida Nai Freddy on di jabu dohot di huta. Ai ndang parmisi Nai
Freddy laho tu tombak i.
Sahat tu bot ni ari
sai tarpaima amanta i, alai so marnamulak inanta i. Ujungna tubu ma tu roha ni Am.
Freddy mangalului inantana i tu
tombak i. Ndang sadia leleng laos pajumpang muse tu natuatua na jumpangna
nantoari. Disungkun natuatua i ma muse Am.
Freddy: "Aha do na niluluanmu muse di son amang...?". Denggan ma dialusi Am. Freddy: "Ra… na ro do inantakku
tu tombak on, hape laos lilu, ndang diboto ibana mulak tu jabu”. Huhut mamboan
sahalak anakboru, ninna natuatua i ma: "On do inantami?". Hatop ma
dialusi Am. Freddy : "I do, on ma ibana". Mansai songgot ma roha ni
natuatua i di dok ma: "Bah... boasa songon i ho amang?, Nantoari jujur hian do ho tu
ahu?". Didok Am. Freddy ma mangalusi: "Molo hudok, ndang i, lehononmu
ma tu ahu 3 halak nai, songon kampak nantoari i. Sian jabu sada do huboan, hape
mulak gabe opat. Ndang habalanjoan au sude i!". Haaa...... haaaaa.........
Weekend dan selamat melanjutkan aktivitas
masing-masing.
Komentar
Posting Komentar