Acara Partangiangan Keluarga HKBP
Ressort Lumban Julu
Bulan Februari 2020.
Topik: Martu Do Halak Na Mangulahon Hata Ni Debata.
(Andorang
So Masuk: Martangiang Na Hohom).
1. Marende Sian BE. No. No. 6: 2 +
4 Puji Jahowa Na Sangap Bl. 56
2. Puji Jahowa sigomgom sude
parluhutan,
Na manogihon ho songon niiring ni
tangan,
Dohot hosam songon hombar tu
roham sai diramoti Ibana.
4. Puji Jahowa situmpak sude
ulaonmu;
Ai ditumpakhon tu ho tongtong
hangoluanmu,
Ingot ma i denggan basaNa do i,
tomutomuna sambing do.
2. Votum – Introitus –
Tangiang (U = Uluan; K = Keluarga; S = Sude).
U: Marhitehite Goar ni Debata Ama dohot Goar ni
AnakNa, Tuhan Jesus Kristus dohot Goar ni Tondi Parbadia. Tapungka ma partangiangan
on.
S: Amen.
U: Ungkap hamu ma di ahu angka bahal ni hatigoran,
asa hubongoti angka i laho mamuji Jahowa.
K: On do bahal ni Jahowa, bongotan ni angka
partigor do i sogot.
U: Mandok mauliate ma ahu di Ho, ala naung dialusi
Ho ahu, jala manjadi hatuaonku.
K: Batu naung binolongkon ni angka pande bagas,
i ma jadi batu parsuhi.
U: Sian
Jahowa do i masa, halongangan do i anggo di matanta.
K: Ari on do na jinadihon ni Jahowa,
marolopolop jala marlas ni roha ma hita di si.
U: Iale Jahowa, sai manumpak ma Ho! Iale Jahowa
sai Ho ma mambahen manjadi! Dipasupasu ma na ro marhitehite goar ni Jahowa, dipasupasu
ma angka na sian bagas ni Jahowa. Haleluya... Martangiang ma hita: Ale Debata
Jahowa Pardenggan basa huhut parasi roha na sumurung! Mauliate mardongan
pujipujian disombahon rohanami tu adopanMu na sun badia i, ala ni asi dohot holong ni rohaM na do na mandongani
jala na mangaramoti pangisi ni bagas on. Di borngin na holom on on, ro hami tu
joloM mamuji pasangaphon gaorMu na sun badia i, marhite partangiangan keluarga
on. Antong tatap ma punguannami na metmet on, ro ma Ho tu tongatonganami jala saor
ma Ho tu hami. Pasupasu ma keluarganami on jala solukhon ma tu hami roha dame. Jagai
jala ramoti ma hami saluhutna, ala ni asi dohot holong ni rohaM di bagasan goar
ni AnakMu Jesus Kristus, Tuhannami. Amen.
3. Marende BE. No. 232: 1 Jesus Urupi BL.
116
1. Sian sude parulian na arga, sada
huboto hutiop tongtong
Jesus Tuhanku Ho arta na arga, na mangatasi sudena antong
Tangkup Tuhanmu tung tiop hataNa, sai pangasahon ma bagabagaNa.
4. Manjaha Hata Ni Debata: Psalmen 15: 1 – 5.
U: Ale Jahowa, ise do na jadi sorang di
bagasan undungundungmu? Ise do na jadi mian di dolok ni habadiaonmi?
K: Halak na sun
burju marpangalaho dohot siulahon hatigoran, jala sidon na sintong sian bagasan
rohana.
U: Halak na so
olo mangkata tundal, na so olo mambahen hajahaton tu donganna, jala na so olo
mambahen haurahon tu sisolhotna.
K: Halak na
mansoadahon na lea, jala dipasangap do angka na mangkabiari Jahowa; halak na so
olo manguba naung sinumpahonna, nang tung marharugian ibana.
U: Halak na so
olo paanakkon hepengna, jala na so olo manjalo sisip mangalo na lidang roha i.
Halak na mangulahon si songoni, ndang tagamon
humordit salelenglelengna. I do sahatna. Martua do angka na tumangihon
hata ni Debata, jala na umpeopsa.
S: Amen.
5. Tangiang:
6. Marende BE. No. 248: 1... Saleleng
Ho Di Tano On BL. 18
1. Saleleng ho di tano on, patigor
ma roham
Paingotingot ma tongtong, nidok
ni Debatam.
2. Sai songon hau na denggan ho,
ramos parbue ni
Bulungna pe na uli do, antong sai tiru i.
7. Renungan: Ulaon
Ni Apostel 20: 35
“Sandok hupatuduhon tu hamu, ingkon songon i do iba mulaulaon
laho mangurupi angka na so margellok, marningot hata ni Tuhan Jesus, ai Ibana
do mandok: “Martuaan do na mangalehon sian na manjalo!”
Dongan sahaporseaon di bagasan Jesus Kristus Tuhanta i...
Dipajongjong Apostel Paulus do
dirina gabe tiruan tu saluhut halak na di humaliangna mangihuthon naung binahen
ni Tuhan Jesus. Di turpuk on, tangkas do diarahon jala diajari hita asa
mangulahon ulaon asi ni roha manang marsilehonlehon, marhite na olo jala rade hita
mangurupi angka halak na patut siurupan. Ndada ulaon na mura ulaon i, jala
ndang tubu sandiri i tu bagasan roha ni sasahalak, alai halak na olo jala rade
marsilehonlehon ima halak naung pinangkulingan ni Tondi jala na mananda
pambahenan ni Debata di bagasan ngoluna. Patupahon angka ulaon asi ni roha
manang marsilehonlehon ndada ulaon na paburnangburnang diri i, alai ulaon pamujion
dohot na pasangaphon Tuhan i do hita di si marhite na olo hita mambagi pasupasu
na sian Tuhan i, na adong di hita tu angka halak na di humaliangta. Didok hata
ni Tuhanta di Galatia 6: 10, “Antong,
binsan sadihari dope, taulahon ma na denggan di saluhut halak, alai gumodang ma
tu donganta sahaporseaon!”.
Mansai tangkas do dihatindangkon
angka panurat ni Evanggeleum i taringot tu hadirion dohot ngolu ni Tuhanta
Jesus
Kristus,
ima ngolu na marsilehonlehon, songon sada bagian ulaon asi ni roha. Dilehon Tuhan Jesus do hamamalum
ni sahit tu angka na marsahit marhite marhite ulaon na olo
Ibana mangubati, tu halak na sarion, na mapitung, na pangpang, na ni
inganan ni tondi na hodar dohot angka sahit na asing. Gariada dilehon
Ibana
hangoluan tu si Lassarus
naung sanga mate i. Ndada holan i, dilehon Tuhan
Jesus do mangan angka na anturaparon. Dilehon Tuhan
Jesus do haluaon tu angka na torop dohot tu sandok portibi on. Dilehon Tuhan
Jesus do sipaingot dohot hangoluan na gabe siparsaulihonon ni
saluhut halak na olo tumangihonsa jala porsea. “Gabe
didok Jesus ma tu ibana: Ahu do dalan i dohot hasintongan dohot hangoluan.
Ndang adong na sahat tu Ama i, ia so marhite sian Ahu”, Johannes 14: 6.
Dongan sahaporseaon di bagasan Jesus Kristus Tuhanta i...
Nunga tangkas taboto marhite jamita on na
pinatupa ni Tuhan Jesus dohot na niulahon ni Apostel Paulus. Songon dia ma hita
di tongatonga ni rumatangga on? Torop do jolma nuaeng, ndang olo be marsilehonlehon
alai holan na manjalo nama manang holan naeng papunguhon,
digoari ma i holan sitau. Loja hita mangula ulaonta asa lam godang artanta.
Godang halak mambahen suhatsuhat ni hatuaon marhite arta manang sinamot na di
portibi on. Dia do hatuaon na jumpang hita sian pasupasu na tajalo sian Tuhanta
i?. “Suhatsuhat
ni hatuaon di halak na porsea, ndada ala ni godang ni arta na pinapunguna, alai
sahat tu dia do panghorhon ni arta i di ngolunta dohot di ngolu ni halak na
adong di humaliangta”. (Ukuran kebahagian
bagi orang yang beriman adalah: Bukan berdasarkan berapa banyak harta yang dia
kumpulkan, tetapi sejauh mana harta yang kita miliki menjadi berkat bagi kita
dan berkat terhadap orang lain juga”.
Nunga
dibahen Tuhan Jesus ngoluNa gabe tiruan tu hita jala ihut tu si dipatuduhon
Apostel Paulus do pangihuthononna di Tuhan Jesus, anggiat olo jala
rade hita
marsilehonlehon asa gabe pasupasu hita huhut habaoran ni pasupasu tu angka na humaliang. Ai i do
dihalomon Tuhan i sian hita. Ndada ingkon hepeng na boi talehon, na asing pe boi
do. Isara ni: Pangurupion marhite pingkiran (solusi) di angka na sipingkiran
na borat di donganta. Didok angka na malo: Halak
na olo marsilehonlehon, “gabe mambahen sehat do angka saraf di utohutok, mangkorhon tu
las ni roha jala mambahen dame pangkilalaan”. Na asing muse mandok, ”Jumpang hita do
las ni roha ala na mangalehon sinamot tu sasahalak, sian holan na
mamangke sinamot
i tu diri niba
sandiri. Ai
sipata olo do iba marsak ala ni sinamot i”.
Dongan sahaporseaon di bagasan Jesus Kristus Tuhanta i...
Manang
ise halak na olo ringgas marsilehonlehon, sai mangkorhon tu las ni roha do i. Apostel Paulus
manurat, ”Dihaholongi Debata do na las roha mangalehon”. Lapatanna, i ma taringot
halak Kristen na ringgas mangurupi dongan sahaporseaon na susa (2
Korint 9: 7). Ndang didok
Apostel Paulus: Halak
na olo
marsilehonlehon
ndada ala ni las ni rohana, alai las rohana ala na marsilehonlehon. Marhite na marsilehonlehon i gabe manghorhon las ni roha ma i. Manghorhon
pasupasu ma i, ai lehonon ni Debata Jahowa ma ragam ni pasupasuNa, asa adong
muse bahenonna silehonlehon tu halak na asing. I do asa didok: “Martuaan
do na mangalehon sian na manjalo”. Amen.
8. Marende BE. 672: 1.... Tung Godang Situtu (Papungu Pelean).
1. Tung godang situtu ulaonmu antong, dipasahat Tuhanta tu ho
Ndang adong be tingkim, marnalemba tahe ngolumi bahen tiruan tongtong
Sai patupa ma i ala ni Tuhan i, so mangkirim balosna tu ho.
Debata do marnida na niulami, manang na adong parbue ni i.
9. Rap mandok: Tangiang Ale Amanami.
10. Marsijalangan.
Pdt. A. Tambun, STh – HKBP Rest. Lumban Julu.
Komentar
Posting Komentar