PARPUNGUAN BODARI

PARNINGOTAN ARI HATUTUBU

NI TUHAN JESUS

 

 

TOPIK:

AI NAUNG BINSAR DO PANONDANG I DI HAGOLAPON

 

 

 

 

 

 

 

 

 

 

 

 

 

HURIA KRISTEN BATAK PROTESTAN

 

Kamis, 24 Desember 2020

01.  PAMUHAI:

U  :  Huria na hinaholongan ni Tuhan Jesus Kristus na marpungu do hita di borngin on laho mamestahon parningotan ari hatutubu ni Tuhan Jesus Kristus. Na ro do Ibana manopot hita jolma pardosa, dirumari do diriNa jala disolukhon rupa ni hatoban, gabe suman tu jolma do Ibana jala rumang jolma dapot di Ibana.

R  : Mariaia do tondingku mida Debata Sipalua ahu. Ai ditatap do haetehon ni naposoNa on.

U  :  Naeng bongot ma hita tu parsaoran na badia rap dohot Debata. Alani tama do hita mandok mauliate tu Tuhan Jesus Kristus Raja ni huria i, na mangalehon partingkian na uli di hita. Antong manjonok ma hita jala marunduk ni roha di adopan ni Debata, AI NAUNG BINSAR DO PANONDANG I DI HAGOLAPON. Tapangiar ma soaranta mamuji Tuhanta pardengganbasa i, marende ma hita.

02. Marende BE No. 48: 1, 2            RIA MA HITA SASUDE  BL. 16

v  Ria ma hita sasude mamuji Debata.

     Girgir ma parendenta be, ai i do na tama, ai i do na tama. (Jongjong).

v  Diungkap Debatanta i banuaginjang i.

                   Disuru do AnakNa i, hangoluanta i, hangoluanta i.

 

03. VOTUM – introitus – tangiang:

U  :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Porbadia na tumompa langit dohot tano on. Amen. Bangso na mardalani di bagasan haholomon marnida sada  panondang na bolon. Binsar do sada panondang di angka na mangingani tano na nilinggoman ni hamatean. Marrongoman bangsoM ro sian lomona di ari parporanganMu; marpahean habadiaon, songon nambur sian ampuan ni andos torang ro do tu Ho paranganMu angka na umposo. Haleluya! Martangiang ma hita:  Ale Debata, Ama na di banua ginjang! Pujipujian, hasangapon dohot hamauliateon husombahon hami tu Ho, marningot silehonlehonMi na balga i tu hami jolma na di pardangolan on, i ma AnakMu, Jesus Kristus, na sinuruMi sian banua ginjang ala ni hami. Gabe na dangol do Ibana jala na pogos, pola  tubu Ibana di bara ni Betlehem, asa mamora hami. Sai rajai jala togutogu hami marhitehite TondiM, asa lam huida hami godang ni holong ni rohaM na pinapatar ni AnakMi. Amen.                                                  (Hundul).

04. Marende BE No. 51: 1               TOLE PUJI MA TUHANTA BL. 31           

v Tole puji ma Tuhanta, tu Ibana ma rohanta;

Asa girgir parendenta, ale dongan Kristen i.

 

05. E p i s t e l :

U  : Tabege ma Hata ni Debata turpuk epistel di parpunguanta bodari on i ma na tarsurat di Titus 2: 11 – 15, songon on ma didok di si: Ai nunga tarida asi ni roha ni Debata, sibahen haluaon ni saluhut jolma.

R  : Diajari do hita, asa tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on.

U  : Laos diajari do hita, paipaimahon hatuaon na tahirim i dohot hapapatar ni hasangapon ni Debata na balga i dohot Kristus Jesus, Sipalua i.

R  : Ai dilehon do diriNa humophop hita, asa ditobus hita sian nasa hajahaton, asa urasonNa di diriNa bangso naung Ibana nampunasa, na olo manghapadothon angka ulaon na denggan.

U  : I ma hatahon, paingothon jala ajarhon sian nasa gomos ni roham! Unang ma adong na marhu ni roha mida ho! I do sahatna: Martua ma angka na tumangihon Hata ni Debata jala na umpeopsa. Amen.

 

06. Marende BE No. 61: 1, 2           NA TAU LAS NI ROHA BL. 2

v Na tau las ni roha hatutubu ni Jesus Sipalua haholonganhi,

Jesus Sipalua haholonganhi.

v  Tung godang do dosa pangunjunan pe

Mangarsahi hita paima mate be, mangarsahi hita paima mate be.

 

07.  Liturgi I: Panompaon

       Prolog: Huaso dohot hagogoon ni Debata do jumadihon na so adong hian gabe adong. Debata do pargogo na so hatudosan, na manompa langit, laut, portibi on ro di isina sudena. Ditompa Tuhan Debata saluhutna marhite huasoNa, holan didok Ibana: “Jadi ma ho, gabe manjadi do tutu”. 

No.	Kategori	Liturgi	No.	Kategori	Liturgi
1.	SM	1 Musa 1: 1 – 2	5.	INA	Job 33: 3 – 4
2.	SM	1 Musa 1: 3 – 4	6.	INA	2 Musa 15: 8
3.	RENA	1 Musa 1: 14 - 15	7.	AMA	Psalmen 33: 8–9
4.	RENA	Psalmen 33: 6–7	8.	AMA	Psalmen 33: 13–14

 

08. Marende Sian BE. No. 733: 1                DULO MA AU ON O TUHAN               

v  Dulo ma au on o Tuhan, bege anggukhon.

Ro do Ho tu angka dongan, topot nang au on.

Jesus Tuhan bege anggukhon.

Ro do Ho tu angka dongan, topot nang au on.

 

09. Liturgi II: Hadosaon ni Jolma.

Prolog: Alai ulok do na umbisuk sian nasa na manggulmit di ladang, angka na jinadihon ni Debata Jahowa, jadi didok ma mandok boruboru i: Atehe tongon do didok Debata, na so jadi panganonmuna sian saluhut hau angka na di porlak on? Dipaotooto ulok i ma jolma i, gabe mardosa.

 

No.	Kategori	Liturgi	No.	Kategori	Liturgi
1.	SM	Jesaya 9: 1	5.	INA	Rom 6: 23
2.	SM	Jesaya 9: 2	6.	INA	Rom 5: 18
3.	RENA	Jesaya 60: 1 – 2	7.	AMA	Epesus 5: 8
4.	RENA	Jesaya 60: 3 – 4	8.	AMA	Rom 13: 11 – 12

 

10.  Marende BE No. 62: 2       HALALAS NI ROHA GODANG BL. 172

v Ai saborngin on do binsar bintang di na holom i.

Sumondangi hagolapon, na di rohanta i.

Hasangapon di Debata, laos dame, dame, dame ma di jolma.

Lomo ni roha ni Debata do hita jolma on.

 

11. Liturgi III: Panurirangon Haluaon.

Prolog:  Songon sintongna mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel?

 

No.	Kategori	Liturgi	No.	Kategori	Liturgi
1.	SM	Kolosse 1: 12	5.	INA	Jesaya 49: 13
2.	SM	Kolosse 1: 13	6.	INA	Jesaya 49: 15
3.	RENA	Jesaya 49: 6	7.	AMA	Sakarias 9: 9
4.	RENA	Jesaya 49: 8	8.	AMA	Mika 5: 1

12. Marende BE No. 58 : 4, 5  MARTUMBUR TUNGKOTUNGKO BL. 123

v  Pinuji ma Jahowa na asi roha i.

Dilehon do AnakNa hangoluanta i.

Girgir ma hita on mamuji Debatanta ala basaninon.

v  O Jesus Tuhannami naung ro tu tano on

Tu pardangolannami di hasiangan on asi ma rohaMi

Sai togu tondinami tu hasangaponMi.

 

13.  Liturgi: Hatutubu ni Mesias (Sipalua)

Prolog: Jadi songon naung pinatimbo ni si Musa ulok i di halongonan, songon i naeng patimboon Anak ni jolma, asa dapotan hangoluan na salelenglelengna ganup na porsea di Ibana. Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.

No.	Kategori	Liturgi	No.	Kategori	Liturgi
1.	SM	Lukas 2: 1 – 2	5.	INA	Lukas 2: 9 – 10
2.	SM	Lukas 2: 3 – 4	6.	INA	Lukas 2: 11 – 12
3.	RENA	Lukas 2: 5 – 6	7.	AMA	Lukas 2: 13 – 14
4.	RENA	Lukas 2: 7 – 8	8.	AMA	Lukas 2: 15 – 16

 

14: MARENDE : BE. No. 54 : 1 – 2         “SONANG NI BORNGIN NA I”      

v  Sonang ni borngin na i, uju ro Jesus i. Sonang modom do halak sude,

       Holan dua na dungo dope;  mangingani Anakna, Jesus Tuhanta i.

v  Denggan ni bornginna i, uju ro Jesus i. Tu parmahan di Betlehem i,

            Dipaboa na di surgo i; nunga ro Sipangolu, Jesus Tuhanta i.

 

15.  Liturgi IV: Ro Marsoma Tu Posoposo i.

Prolog: Nunga tubu Mesias i, ima Tuhan Jesus Kristus Sipalua di Bara Ni Pinahan di Huta Betlehem. Tinogihon ni hagogoon ni Tuhan Debata, marhite sada bintang ro do parhapistaran sian purba manopot jala marsomba tu Posoposo na imbaru sorang i.

No.	Kategori	Liturgi	No.	Kategori	Liturgi
1.	SM	Mateus 2: 1	5.	INA	Mateus 2: 7
2.	SM	Mateus 2: 2	6.	INA	Mateus 2: 8
3.	RENA	Mateus 2: 3 – 4	7.	AMA	Mateus 2: 9
4.	RENA	Mateus 2: 5 – 6	8.	AMA	Mateus 2: 11

 

16. Marende Sian BE. No. 49: 6      SAI RO MA TU BARA  BL. 47

v   Tung aha ulaning denggan ni rohaM,

Silehononnami baen las ni rohaM

Ndang sere, ndang perak, ndang pinangidoM,

            Ai roha na ias sambing do lomoM.

 

17. Liturgi V:  Parange Di Bagasan Tuhan Jesus

Prolog:   Nunga tabege barita taringot tu Sipalua i jala dapotan poda hita  sian Ibana. Ala ni i, tatanggali ma jolma na buruk i, isara di pangalaho najolo, ai laho mago do i hinorhon ni angka hisaphisap sipaotooto. Alai tapaimbaru ma hadirionta di bagasan Tondi ni Tuhan i!

No.	Kategori	Liturgi	No.	Kategori	Liturgi
1.	Parhalado	Pilipi 2: 5 – 6	5.	Parhalado	Kolosse 4: 4 – 6
2.	Parhalado	1 Korint 6: 19-20	6.	Parhalado	Rom 12: 11 – 12
3.	Parhalado	Galatia 2: 20–21	7.	Parhalado	Kolosse 3: 16 – 17
4.	Parhalado	Kolosse 3: 12-14	8.	Parhalado	1 Korint 10: 31

 

18. Marende BE No. 49: 1...  SAI RO MA TU BARA  BL. 47  (Pel. I Huria)

v  Sai ro ma tu bara di Betlehem on, hamu na porsea, hatop ma tuson

Marnida halasan ni rohanta i, Tinongos ni Ama na di surgo i.                     

v  O ida hamu ma di bara inon, Dakdanak na tubu disi borngin on

Uli do rupaNa, mataNa tiur, o bereng Ibana, ho gabe tiur !             

---- Musik ----

v  Las roha Maria, nang Josep disi, marnida na metmet, na sorang tusi

Marsomba tu patNa do parmahan i, di ginjang marende pardisurgo i.

v  Pasinggang ma totmu hamuna sude, marnida parmahan marsomba muse

Marende hamu na marlas roha i, maniru suruan na di ginjang i.     

---- Musik ----

v  Sai dok ma, O Anak ni Debata i, Ho ro sian ginjang dibaen asiMi

Di hami sudena na mardosa on, mambaen haluaon di hami tongtong         

           

19. JAMITA: Jesaya 9: 1 – 6

20. Marende BE No. 75: 1… NAUNG BINSAR DO PANONDANG I BL. 206

            (Pelean II tu STT/Sikola Pandita).

v  Naung binsar do panondangi, na mangatasi sasude, na olo marsinondang

Sondangan ni do sasude, na di na holom i dope, malungun di na torang

Jesus, tulus ma sangkapMu, sondanganMu nasa jolma asa unduk di Debata

v  Ho do mangapul rohangkon, o Raja ni portibi on, saleleng au mangolu

Sai Ho ma parjambaranki, ndang olo au lohotan ni sude na olo salpu

Tu Ho ro do au na lea na porsea di hataMu mangidohon panumpakMu

---- Musik ----

 

v  Tung ise pasonangkon au, manang tu dia pe au lao, sasada Ho huboto

Panghilalahon holong ni rohaM di au na bojok i, na pogos jala oto

Unang loas au be lilu hinophopMu do tondingku, ingkon Ho do tioponku.

v  Las do rohangku mida Ho, o Jesus Kristus na dung ro, mamboan hangoluan

Naeng pujionku Ho tongtong, saleleng au di tano on, nang di banua ginjang

Sangap, sangap di goarMu Ho Rajangku huendehon hamuliaonMu, Tuhan.

 

21. PANGUJUNGI:  (Jongjong)

U   : Nunga tabege Hata ni Debata na pabotohon tu hita: AI NAUNG BINSAR DO PANONDANG I DI HAGOLAPON. Tuhanta i do panondang di bagasan ngolunta. Na ro do Ibana manondangi hagolapon marhite holongNa asa hita na mardalan di bagasan hagolapon marnida hatiuron na binoan ni Tuhanta asa dapotan las ni roha hita songon las ni roha di gotilon, songon parolopolopon di na marbagi tabantaban. Antong angka naung manjalo hatiuron i patut do manghatindanghon i di bagasan ngolunta. Unang be mangolu dibagasan hagolapon. Hata ni Debata mandok: ”Marburi ma hamu, urasi hamu dirimuna, paholang hamu ma hinaroa ni pambahenanmuna sian jolo ni matangKu, pasohot hamu ma manjahati. Guruhon hamu ma mambahen na denggan, lului hamu ma uhum, pintori hamu na nirupa, patingkos hamu ma uhum tu nasopot so marama, ondingi hamu angka na mabalu.”

R  : Ale Tuhan Debata, sondangi ma hami asa gabe panondang hami di portibi on.

U  :  Kristus do Tuhan naung ro tu portibi on laho paluahon dohot sumondangi hita saluhut na tinompaNa. Martua ma angka na porsea di Jesus Kristus ai Ibana hatuaon i. Ibana do hagogoonta di angka parungkilonta, Ibana do na manongtong asa manang ise na mian di bagasan Tuhan Jesus dapotan hatongtongon saleleng ni lelengna, Ibana do Raja Dame na padamehon hita tu Debata Ama. Alani mangolu ma hamu dibagasan dame rap dohot na humaliang. Ibana ma na mangaramoti langkanta di bagasan panghirimon na imbaru. 

R  : (Mangendehon) BE No. 597a: 2 BARITAHON DI DOLOK

v  Baritahon di dolok di rura di sude inganan,

Baritahon di dolok naung tubu Kristus i.

Di na pinabangkitMu au gabe naposoM,

Patau ma au Tuhanku marhobas di joloM.

Baritahon di dolok……….

 

22. Tangiang Pelean + Tangiang Ale Amanami + Pasupasu.

“Selamat Ari Natal”