Sermon HKBP Ressort Bongbongan - Distrik V Sumatera Timur
Jamita tu Minggu tanggal 31 Januari 2021.
Ev.: Lukas 4: 31 – 37. Ep.: Psalmen 111: 1 –
10.
Gok Huaso Do Hata Ni Tuhan I.
Patujolo.
Andorang so
turpuk on dibaritahon do taringot tu na so dijangkon angka pangisi ni huta
Nasaret Tuhan Jesus. Huta Nasaret, ima huta hagodangan ni Tuhan Jesus. Nian
tangkas do diboto jala diparhatutu Tuhan Jesus: Tung na so marsangap do angka panurirang anggo di luat hagodanganna
(Lukas 4: 24). Ndada holan i, gariada dipabali do Tuhan Jesus sian huta
Nasaret. Hehe do nasida, dipabali
Ibana sian huta i, ditogu ma Ibana tu tolping ni dolok, ojahan ni hutanasida i,
laho manggulangkon Ibana sian i (Ay. 29). Ndang diloas Debata marmara
angka na di Ibana. Ndang saut tahi ni angka pangisi ni luat Nasaret i, na naeng
manggulangkon Tuhan Jesus sian tolping ni huta Nasaret i, Alai mamolus do Ibana sian tongatonganasida, laso laho sian i (Ay.
30). Dungkon ni i, tuat ma Tuhan Jesus tu huta Kapernaum, na di luat Galilea
jala diajari
Tuhan Jesus ma angka pangisi ni luat Kapernaum, i ma turpuk jamita on. Godang
do angka ulaon na niula ni Tuhan Jesus jala godang do angka tanda halongangan na pinatupa ni Tuhan
Jesus uju di ngoluna di portibi on, na so he masa dope. Molo didok tanda
halongangan (Mujizat), adong na masa, na so hea masa dope jala saluhut na
marnidasa di bagasan roha na longang.
Hatorangan
ni ayat.
Ay. 31. Huta
Kapernaum.
Huta Kapernaum, Capharnaum manang Kfar Nahum, lapatanna Kota Nahum, ndang pola sian aek Jordan dohot
Tao Gennesaret (Nuaeng: Ditanda halak Danau
Kinneret). Parhutaan (kota) on dipajongjong taon 150 SM. Sada kota na
istimewa di tingki ngolu ni Tuhan Jesus dohot ala ni panghobasion ni Tuhan
Jesus. Ganup ari Sabat, jotjot do Tuhan Jesus mangajar di luat on. Di huta Kapernaum
on godang do angka Tanda Halongangan na
pinatupa ni Tuhan Jesus. Boru ni si Jairus dipangolu (Markus 5: 21 - 43). Dipabali
Tuhan Jesus tondi na hodar sian sahalak uju di Parguruan/Sinagoge (Lukas 4: 31
– 37). Dipamalum Jesus Na Sarion (Markus 2: 1 - 12). Panjalaon Deke na pinatupa
ni SiseanNa dibagasan Tanda Halongangan (Lukas 5: 1 - 11). Dipamalum Tuhan
Jesus Naposo ni Induk ni Soldadu Romawi (Matius 8: 5 - 13). Dirham (rupia) sian
baba ni ikan sibahenon gabe guguan
(Matius 17: 24 - 27). Dipamalum Tuhan Jesus anak ni parpangkat di Kapernaum
(Yohanes 4: 43 - 54). Di huta Kapernaum on nunga godang dipamalum Tuhan Jesus
angka na marsahit dohot godang angka tanda halongangan na asing dipatupa Tuhan
Jesus.
Ay. 32 – 37 Dipabali
Tuhan Jesus tondi Na Hodar.
Di huta Kapernaum,
jumpa masa ari sabat mangajari do Tuhan Jesus di parguruan (Sinanoge). Longang
do saluhut halak na umbegesa ala marsahala situtu jamita ni Tuhan Jesus. Alai
adong ma di parguruan i sahalak na marsahit ala ni na sinonggopan ni tondi na
hodar. Didapothon na marsahit i ma Tuhan Jesus jala dibagasan soara na gogo
didok ibana ma tu Tuhan Jesus: “Oe Jesus na sian Nasaret, marhua Ho tu
hami! Na ro do Ho hape mangago hami! Hutanda do Ho; na badia ni Debata do Ho!”.
Longang situtu do angka natorop i umbege jala marnida pambahenan ni Tuhan
Jesus. Hata na haruar sian sahalak na sinonggopan ni tondi na hodar i, ndada
marharoroan sian ibana i alai marharoroan sian tondi na hodar na songgop i do
i. Tondi na hodar mananda Tuhan Jesus Kristus, gariada dihatindanghon do ia
Tuhan Jesus i: Hutanda do Ho; na badia
ni Debata do Ho! Hata ni Tuhanta di Jakobus 2: 19 didok: “Na porsea do ho, adong Debata sisadasada.
Taho ma i; dohot do angka sibolis porsea disi, jala angka dotdot!”. Tangkas do
ditanda sibolis i dohot angka tondi na hodar i Debata dohot Tuhan Jesus Kristus
dohot Tondi Parbadia. Persoalanna ndang olo nasida (sibolis dohot tondi na
hodar) marsomba tu Tuhan i. Boha ma ia hita? Tatanda do Tuhan i jala boha do ia
parsombaonta tu Tuhan i?
Disonggak Tuhan
Jesus do ibana: ”Alai disonggahi Jesus do
ibana, didok ma: Sip ho! Ruar ma ho sian ibana! Jala tu tongatonga i ma
disampathon tondi na hodar i ibana, laho ruar; ndang mahua ibana dibahen”. Marhite
na binahen ni Tuhan Jesus on, pabotohononna tu torop halak di tingki i nang tu
partingkian nuang on: Parjolo, margogo jala marhuso jala marsahala do Hata ni
Tuhan Jesus. Songon sahalak pamodai angka natoras tu angka ianakkonna,
parhalado tu angka ruasna ingkon margogo jala marsahala do angka hata/poda na
tapasahat i. Hagogoon ni poda targantung tu halak na mangalehon poda i do.
Margogo situtu do hata manang poda na pinasahat ni Tuhan Jesus ala memang naung
dipajongjong Tuhan Jesus do diriNa gabe tiruan. I do na naeng siihuthonon jala
siulaon ni angka naposo/parhalado ni Tuhan Jesus Kristus ingkon tapajongjong do
dirinta gabe tiruan asa gabe margogo jala marsahala situtu angka poda na
tapasahat i. Paduahon, longang do
saluhut halak na umbegesa jala na marnidasa. Molo angka ulaon na somal do,
ndang longang halak marnida i. Molo angka ulaon naung he masa do na pinatupa ni
Tuhan Jesus i, ndang tanda halongangan i. Ulaon na pinatupa ni Tuhanta Tuhan
Jesus angka na masa jala na so hea masa dope i. Holan di bagasan Tuhan Jesus do
i boi masa, marhite huaso dohot hagogoon na sian Ama i. Patoluhon, dung na masa i, gabe sar ma barita i. Gabe “rarat” ma
barita i tu sandok halak na adong di sandok luat Galilea. Gabe sar ma barita
pangulaon ni Tuhanta Tuhan Jesus, margogo
podana dohot marsala jamitana
jala dipatupa tanda halongangan marhite pabali
tondi na hodar.
Dipatupa
Tuhan Jesus pe i asa godang do halak na porsea tu Debata marhite angka ulaon
dohot angka pambahenan na pinatupa ni Tuhan Jesus, asa anggiat torop halak
manjalo haluaon na sian Debata Jahowa di bagasan Jesus Kristus Tuhanta i.
Panutup.
1.
Boha do pamingkirionta taringot tu
barita masa na adong di turpuk on? Boasa boi disonggopi tondi na hodar halak na
marpungu di parguruan/Sinagoge. Unang tubu tu pingkiranta molo di gareja ndang
ro tondi na hodar manang dao sian tondi na hodar. Tu angka parpunguan ni halak
na porsea i pe ro do Sibolis dohot angka tondi na hodar i laho manaiti halak na
porsea i asa marbalik sian Tuhan Jesus asa olo mangoloi parsuruon ni sibolis
manang ulaon hajahaton.
2.
Binahen ni dosa do asa gabe boi hita
disonggopi tondi na hodar, songon sahalak na masa di turpuk on. Alai taingot
ma, molo sian Tuhanta ndang dilehon tu hita tondi na hodar. Molo songgop pe
angka tondi na hodar tu sasahalak ndada marharoroan sin Tuhanta i, alai sian
sibolis do i hinorhon ni pangalantap ni dosa i di bagasan jolma i. Tangkas do
taboto jala tahaporseai, ia silehonlehon ni Debata Tondi hagogoon do dohot
tondi pangarajaion diri (2 Timoteus 1: 7).
3.
Nunga tangkas boi taboto jala
taantusi na pinatupa ni Tuhan Jesus di bagasan turpuk on. Molo naeng margogo
jala marsahala angka poda dohot jamita na tapatolhas i di bagasan
panghobasionta jumolo ma tapajongjong dirinta bahen tiruan tu angka na di
humaliang hita songon na pinatupa ni Tuhan Jesus di bagasan turpuk on. Margogo
jala marsahala ma saluhut parhaladona laho mambaritahon barita na uli jala dao
ma angka tondi na hodar sian hita parhalado nang sian ruas ni hurianta pe.
Catt.: …………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………………
Komentar
Posting Komentar