Acara Parmingguon Di Jabu

HKBP Bongbongan Resort Bongbongan (Sektor VIII)

Minggu 13 Juni 2021.

 

01. Marende BE No. 559: 1 - 2     “Debata Na Songkal”

Ø   Debata na songkal Sitolu sada, di sogot ni ari hupuji GoarMi

Debata na songkal Siparasi roha, Sitolu sada, Na badia i

 

Ø    Debata na songkal, surusuruanMu, saluhut marsomba pasahat tumpalMi

  Angka na badia ro tu adopanMu, mamujimuji salelengna i. Amen.

 

02. Votum – Introitus – Tangiang:

U  : Marhitehite goar ni Debata Ama dohot goar ni AnakNa Tuhan Jesus Kristus, dohot goar ni Tondi Porbadia na tumompa langit dohot tano on. Amen.  Na mamolus do anggo portibi on rap dohot na pinangido ni rohana, alai na mian ro di saleleng ni lelengna do na mangulahon lomo ni roha ni Debata. Haleluya!

R  : (Mangendehon): Haleluya, Haleluya, Haleluya!

U  : Martangiang ma hita! Ale Tuhan Debata jala Amanami ! Sai urupi ma hami, asa unang mandele hami, uju ro hapogoson tu hami, jala asa unang magopo hubahen hami silehonlehonMu na denggan i, uju ro pasupasuM tu hami. Ramoti hami, asa unang marpos ni roha hami tu arta na di hasiangan on. Lehon di hami haporseaon asa dohot hami parjambar di siteanon ni angka na porsea di Ho marhitehite Tuhan Jesus Kristus, Tuhannami. Amen.

 

03. Marende BE No. 497: 1               “Di Na Humolso Rohangki” 

Ø  Di na humolso rohangki pasari hangoluanki
Tibu bolongkononku pe, holsongku sasude
Ai i didokkon Jesus i Tuhanta na di Surgo i
Sumarihon ngolumi, denggan sudena i.

 

04. Patik: 

U  : Tatangihon ma Patik ni Debata di Minggu II (Paduahon) DUNG TRINITATIS, i ma Patik III dohot Lapatanna. Patik Patoluhon: Ndang jadi dohonon goar ni Debata, ianggo so ture dalanna. Ai hona uhumNa do sogot angka na marsineang di goarNa. Dia do lapatan ni i?

 

R:   On do: Ingkon dihabiari rohanta Debata jala ingkon holong rohanta di Ibana, asa unang hita olo mamurai manang manolonnolon manang marujarujaran na roa, manang manmgansi marhite goar ni Debata; ai di na tarsosak dohot tangiang dohot pujipujian do sidohonon goar ni Debata.

 

U  : I do sahatna. Antong rap mangido gogo ma hita sianTuhan Debata!

 

R  : Ale Tuhan Debata, sai pargogoi ma hami mangulahon na hombar tu PatikMi. Amen.

 

 

05. Marende BE No. 222:  1      “Tu Jolo Ni Tuhanku”                   

Ø  Tu jolo ni Tuhanku huboan diringkon, Ibana do Rajangku sigomgom rohangkon

Sai guru di Ibana sudena langkangki, sai asi ni rohaNa pature bogashi.

 

06. Manopoti Dosa:

U  : Ale Debatanami, na marasiroha jala na badia, Amanami, marhitehite Tuhan Jesus Kristus! Manang piga hali hami ro tu joloM, huhilala hami, ringkot do asi ni rohaM di saluhut hami halak pardosa. Ala ni i do umbahen na hupaserep hami dirinami sadari on di joloM, jala huparhatopot hami, tung na jotjot do hami manimbil sian angka dalanMu na badia songon birubiru na lilu.

 

H:  Sai unang pabali hami sian joloM ala ni dosanami i, ai ndang dihalomohon rohaM hamatean ni angka pardosa, alai hamubson ni rohana do lomo ni rohaM, asa mangolu.

 

U:   Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di GoarMu na badia i. Amen. Bagabaga ni DebataTaringot tu hasesaan ni dosanta:  Ro ma hamu tu Ahu, asa mangolu tondimuna, ninna Tuhan Jahowa. Tung sura rara dosamuna songon abit bunga dapdap, bontar do bahenonHu songon itak; nang pe rara songon abit hasumba, gabe songon hapas do muse. Hasangapon ma di Debata na di ginjang !

R  : Amen. 

                                                      

07. Marende BE No. 182: 1               “Tu Jolom O Debatangku” 

Ø Tu joloM o Debatangku sai use do rohangkon

Sai pasiat tangianghu dohot iluilungkon.

 

08. E p i s t e l :

U  : Hata ni Debata turpuk Epistel di Minggu II DUNG TRINITATIS sadari on, tarsurat  di Markus 4: 26 – 34: Dung i didok ma: On ma pangalaho ni harajaon ni Debata: Songon pambahen ni halak na manaburhon boni tu haumana.

 

H:  Na modom do ibana bornginna jala dungo ia arianna; na martumbur do anggo boni i laos marbuhutano, so pamotoan ni parhauma i.

 

U:  Ai sian gogona sandiri dipatubu tano i jumolo hauna, dung i biurna, dung i eme na porngis i di bagasan biurna i.

 

H:  Alai disi dilehon parbuena, mamintor disuru ma panabi, ai nunga ro gotilon.

U:  Dung i didok ma: Tu aha ma pasumanonta harajaon ni Debata; tu dia ma umpamahononta?

 

H: Suman tu batu ni siarum ma! Ai bonina na sinaburhon tu tano, i do na ummetmet sian nasa batu ni suansuanan.

 

U:   Alai dung sinaburhon, simbur ma i tubu, gabe tumimbo sian nasa ingkau rata jala balga ma dangkana, pola tarbahen do pidong na martongatonga langit marasar di linggomna i.

 

H:   Jadi marhitehite lan umpama sisongon on dihatahon nasida hata i, marguru tu na tarjangkon nasida.

 

U:   Alai ndang adong dihatahon tu nasida so marhitehite umpama; alai pulik do dipatorang saluhutna tu siseanna.Ido sahatna. Martua do angka na tumangihon Hata ni Debata jala na umpeopsa. Amen.

 

09. Marende BE No. 714: 1               “Tuhan Na Marmahan Hami”          

Ø  Tuhan na marmahan hami togu hami ruasMon
Lehon dameMi di hami angka na hinophopMon
Tuhan Jesus Sipalua, parmahani ruasMon
Tuhan Jesus Siparmahan, parmahani ruasMon

 

10. Manghatindanghon Haporseaon:

U  : Tahatindangkon ma haporseaontai, songon na hinatindanghon ni donganta sahaporseaon di sandok portibi on. Rap ma hita mandok!: AhuPorsea…..            

 

11.       Tangiang Pangondianon

 

12.       Marende BE No. 501: 2        “Sai Ditogutogu Jesus”

Ø Sai diiringiring Jesus au na gale situtu, ditungkoli do langkangku,

Diparmudu au burju. Molo loja au mardalan, nang maheu tondingki
LehononNa aek na tio sian batu mamak i. LehononNa aek na tio sian batu mamak i.

 

13. JAMITA:  Psalmen 20: 1 – 10     (Dijaha Sian Bibel)

Dongan Sahaporseaon di bagasan Jesus Kristus Tuhanta i....

Tapanghilalahon dope na tongtong dialusi Debata pangidoanta? Sian haporseaonta ingkon dohononta tongtong do satia Debata tu hita angka na manghaporseai Tuhan Debata. Ndang na so marbinege Debata tu angka joujounta, tongtong do rade Tuhanta i tumangihon alualunta manang sadihari pe. Ndang boi soadahononta alus ni Debata di angka pangidoanta. Manang na boha pe borat ni hamaolon na taadopi, ndang tuk holan gogonta laho mangadopi lumobi pasidunghon i, ingkon tapasahat tu Debata do, asa Ibana mangurupi hita. Di bagasan turpuk on nunga patar dipanghilalahon Parpsalmen pangaramotion dohot  pandonganion ni Debata. Molo mardonganhon Tuhan Debata sai hamonangan do tongtong na gabe parjambaranna, monang maralohon angka musu ima ragam ni angka hamaolon na rongom di ngoluna. Panindangion ni parpsalmen na sian pengalamanna na sai tongtong mangido pangaramotion dohot pangurupion sian Tuhan Debata, i do na mansai arga di hita asa hita na gabe ingkon sitiruonta di bagasan ngolunta.

Unang ganggu hita, adong do Debata na sai tongtong rade mandongani jala manogunogu hita asal ma tongtong marhaporseaon tu Ibana hita. Ayat 2, ima na gabe sitiopan ni halak na sai tongtong manghaporseai Debata Jahowa: “Sai dialusi Jahowa ma ho di ari hagogotanmi”. Dilehon Debata do tu hita hagogoonNa. Angka dia ma i, ditongos panumpahion, ditungkoli do hita. Didok muse: “Dilehon sisubut roham jala dipasaut nasa sangkapmi”. Sisubut roha lapatanna angka na mambahen las rohanta, marhite hasasaut ni na tapingkiri. Ihut tu si, molo adong halak na olo mangondihon hita dohot na mangalehon semangat tu hita lam tamba do gogo dohot semngat laho mangula ulaonta. Ise na boi mangondihon hita? Angka alealenta dohot sisolhotta? Boi do i, alai tarbatas do gogona. Debata do anggo na mangondihon hita, na gabe pangalualuanta huhut na mangurupi hita.

 

Aha ma na masa tu hita dung ditumpahi Tuhan Debata hita? Dung dilehon Tuhan i pangurupionna tu hita jala gabe marhamonangan hita mangadopi ragam ni angka parungkilon i, ingkon tarida do i di bagasan ngolunta, “Mariaia ma hita di ngolunta siala pambahenan ni Tuhan Debata na patupahon hamonangan na gabe hatuaonta”. Antong unang ma hita mandele dohot mabiar mangadopi angka na masa di ngolu on. Manang aha pe na masa manang dia pe na taula ingkon do jumolo pasahatonta tu Debata. Marhite tangiang dohot pos ni roha  di bagasan haporseaon do hita boi manjalo pangurupion sian Tuhan Debata. Ala ni i, dung martangiang hita ingkon lam tamba do panghirimonta, lam martamba nang angka hagogoonta ala tahilalahon, sahat do tu Debata tangiangta i, gabe moru boban ni ngolunta. Molo taadopi pe angka ragam ni hasusaan, ingkon adong do di hita panandaon na tangkas tu Tuhan Debata, songon Parpsalmen on di ayat 7: “Nuaeng pe huboto tangkas na tinumpahan ni Jahowa miniahanna i, sai alusanna do ibana sian angka langit habadiaonNa i marhitehite angka pangabahan ni hatuaon ni siamunNa” (Sekarang aku tahu, bahwa TUHAN memberi kemenangan kepada orang yang diurapi-Nya dan menjawabnya dari sorga-Nya yang kudus dengan kemenangan yang gilang-gemilang oleh tangan kanan-Nya).  Saluhut do hita manghilalahon pangontak ni pandemi Covid-19 na so haru tangkas taboto sadihari ujungna. Sipata olo do soluk tu pingkiran na mandok: Naung ditinggalhon Tuhan Debata do hami ulaning? Marhite haporseaponta na togu tu Tuhan Debata, tadok ma: Ndang ditinggalhon Tuhan Debata hita.  Tongtong ma tahalaputi laho padengganhon parsombaonta tu Tuhan Debata, asa Ibana tongtong mangaramoti, mandongani, mangurupi lumobi mangalehon tu hita hamonangan sian saluhut ragam ni angka ragam ni parungkilon dohot hamaolon na taadopi. Amen.

 

14. Marende BE No. 792: 1....           “Pasupasu Hami O Tuhan”   (P. Pelean)

Ø   Pasupasu Hami o Tuhan, sai usehon dameMi

Sai ampehon tanganMi Tuhan, lehon tu au gogoMi

Di portibi on baen ma au Tuhan, habaoran ni las ni roha

Tu na marsak i tu na dangol i, gabe pangapuli i

Pasupasu Hami o Tuhan, sai usehon dameMi

Sai ampehon tanganMi Tuhan, lehon tu au gogoMi.                  

 

15. Pangujungi:

U       :  Rap martangiang ma hita di tangiang “Ale Amanami”

U+R  :  (Mangendehon) Amen, Amen, Amen.

 

===============================

SELAMAT HARI MINGGU. TUHAN MEMBERKATI.