Jamita Partangiangan: 1 Musa 32: 13 – 21.

Dongan sahaporseaon na hinaholongan di bagasan Jesus Kristus...

Ndang adong nanggo sahalak jolma pe na tubu tu hasiangan ndang hea marsala. Na pasti nunga gabe bangko ni hajolmaon hea marsala saleleng ibana mangolu, nang pe sasintongna ndang hea dihalomohon jolma i madabu ibana tu bagasan hasalaan. I do na masa di bagasan turpuk jamita on, sahalak na margoar si Jakob manolsoli hasalaanna tu hahana si Esau. Dipasahat si Jakob ma saluhut parsorionna i tu Jahowa, ai mabiar ibana molo pajumpang dohot hahana si Esau. Nunga disadari si Jakob dosana i tu hahana si Esau, ala dijalo si Jakob: “Pasupasu Sahala Siangkangan sian amongna si Ishak”. Nunga adong 20 taon nasida ndang pajumpang, si Jakob dohot si Esau. Gabe hira dilele halinu do si Jakob maradophon hahana si Esau. Di bagasan roha dohot pingkiran ni si Jakob, ingkon bunuon ni si Esau do si Jakob dohot sude keluarga dohot pinomparna. Gabe dipasahat si Jakob ma saluhut biar ni rohana i tu Tuhan Debata, asa anggiat nian sai tongtong diramoti Tuhan Debata si Jakob. 

 

Nunga marbalik roha ni si Jakob, nunga muba be rohana. Dipingkiri si Jakob ma laho mansubut roha ni hahana si Esau i. Di sada tingki disangkapi si Jakob ma pasahathon silehonlehon tu hahana si Esau, asa anggiat nian marpangulahi roha ni si Esau tu anggina si Jakob i. Disuru si Jakob ma suruanna 2 rombongan laho mandapothon hahana si Esau. Tiap rombongan adong ma juru bicara laho manghatahon tona ni si Jakob tu hahana si Esau i. Dipatupa songoni, molo mintor pajumpang nasida na dua (Jakob dohot Esau) biar roha ni si Jakob tubu muruk manang rimas ni hahana si Esau. Ima sada hamaloon manang habisuhon ni si Jakob, marhite 2 rombongan pasukan na sinuru ni si Jakob mamboan silehonlehon anggiat dao roha na pangarimason sian si Esau. Asa anggiat nian boi lambok jala marpamuati roha ni si Esau pajumpang dohot anggina si Jakob i.  Rombongan na parpudi (patoluhon), ima rombongan ni si Jakob dohot keluargana.

 

Dongan sahaporseaon na hinaholongan di bagasan Jesus Kristus...

Angka on ma silehonlehon ni si Jakob laho manubut roha ni hahana si Esau i: 200 hambing boruboru, 20 hambing tunggal. 200 birubiru boruboru, 20 birubiru tunggal. 30 unto panusuan rap dohot anakna. 40 lombu jala 10 jonggi. 20 halode boruboru dohot anakna. (Amang godangna i...). Disuru si Jakob ma suruanna, “Pajolo hamu ma taripar... Tona ni si Jakob tu angka pemimpin ni rombongan i: “Molo pajumpang ho dohot dahahang si Esau i, jala disungkun ho, naposo ni ise do ho, jala lao tu dia ho, jala ise nampuna na di jolomon? Dohononmu ma: Si Jakob naposomi do nampunasa, sileholehonna do i tu rajangku si Esau, jala ihut do ibana di pudinami”. Jumpang do pardomuan i jala saut do pardamean i, sian ”niat baik” ni si Jakob. Dung i marlojong ma si Esau manjumpangkon ibana, dihaol ma rungkungna i, jala diumma ibana, jadi tangis be nasida (1 Musa 33: 4).

 

Marhite turpuk jamita on, saluhut ma hita marsiajar parade diri laho mardame, asa olo jala rade mardame. Maniru pambahenan ni Tuhan Jesus, sai tongtong marpangulahi rohaNa mida hahurangan ni angka na mamburai Ibana. Mansai arga situtu do roha na masihaholongan di bagasan parhahamaranggion. Mansai arga do hita halak na porsea ditobus Tuhanta Tuhan Jesus sian dosa dohot hamatean, gabe halak na pinaluaNa hita. Hombar tu si gabe boi ma nian saluhut halak naung tinobus ni Tuhan i, patalu rohana be asa anggiat tubu hasadaon dohot hadameon di tongatonga ni keluarganta ganup. Memang di sude keluarga/na marhahamaranggi do tubu angka parsalisian, alai unang ma parsalisian i mambahen ndang mardomu manang “mardomu di tano rara”. Tapatutoru ma rohanta ala ni Tuhan i, asa ditingkina patimboonna hita jala asa jumpang di hita hasadaon dohot hadameon na sian Tuhanta i. Taingot ma hata ni Debata na mandok: Unang ma talu ho dibahen hajahaton, alai taluhon ma hajahaton i marhitehite na denggan” (Rom  12: 21). Asa jumpang angka na ummuli na dumenggan di hita tu joloan on nang tu angka pinomparta pe. Amen.