PARMINGGUON
Dohot
PARNINGOTAN
DI ANGKA NAUNG MONDING
DI HKBP RESORT BONGBONGAN
Minggu, 21 Nopember 2021
Ev.: Psalmen 90: 1 – 12 Ep.: Pangungkapon 1: 4 – 8
TOPIK:
AJARI MA HAMI MAMILANGI ANGKA ARIARINAMI
01. Joujou Marsomba tu Debata: (U: Uluan, L: Liturgis, R:
Ruas, S: Sude)
L: Hamu dongan sahaporseaon, asi ni roha ma di hamu dohot dame sian Amanta i dohot
sian Kristus Jesus Tuhanta i. Sadari on tanggal 21 Nopember 2021, sahat ma
hita tu Minggu Ujung Taon Parhuriaon. Nunga itabolus sataon parhuriaon, naeng masuk ma hita tu mingguminggu Advent,
managam haroro ni Tuhanta paduahalihon dohot mangarade diri mamestahon Pesta
Parningotan Hatutubu ni Tuhanta Jesus Kristus.
R: Mauliate ma di Ho Ale Tuhan, na umpasupasuhon
di hami ragam ni pasupasu pardagingon nang partondion
L: Ndang tagamon so godang na masa na taadopi
be di bagasan na sataon on. Pasingki-pasorin ro arsak, parungkilon, sahit,
suang songonin las ni roha songgop tu ngolunta. Sipata jut rohanta alani na
masa, alai laos di tingki na asing, mengkel do hita al alas rohanta. Ndang
adong hape na hot di tano on. Nunga tibu hian i nian dipaingothon Tuhanta tu
hita. Na jotjot do hita lupa di hata ni Tuhanta dohot dibagabagaNa.
R: Mauliate
ma di Ho Ale Tuhan, ala monang do hami maralohon angka na masa i saluhutna.
L: Na marsalpuan do angka taon, marsorin do
angka na masa, alai na hot do anggo hata ni Tuhanta. Asa, molo tapatupa
sadarion, marningot angka donganta naung
jumolo marujung ngolu i, na paingothon hita do i dibagabaga ni Tuhan Jesus na
mandok:
R: Ida ma, sai na dongananKu do hamu rasirasa
ro ajal ni hasiangan on.
L: Pangkirimon na mangolu diparjumpangan ni
angka na porsea, angka naung jumolo i rap dohot na mangolu nuaeng nang haduan,
di Harajaon ni Tuhanta na pinarade ni Jesus Kristus, i do na tapatupa
sadarion. Antong, tapuji ma Tuhanta,
marende ma hita “HUBOAN MA DIRINGKU”
02. Marende BE No. 464: 1- 3
“Huboan Ma Diringku” BL. 313
Ø
Huboan ma diringku, Tuhan hibul tu Ho.
Ai au ditobusMu, umbaen tarbaen au ro.
Pagalak ma rohangku dison managam au.
TondiMi ma suru, na boi manggomgom au.
Ø
Ho Sipalua ahu, sun hinagogoMi. HataM do huhaposi,
Na so boi muba i. Pagalak ma rohangku dison managam au.
TondiMi ma suru, na boi manggomgom au.
----- Musik/Ay. 3 jongjong ----
Ø
Ias do au diburi Ho ale Tuhanhi.
Naeng dohot parulanhuHombar tu hataMi.
Pagalak ma rohangku dison managam au.
TondiMi ma suru, na boi manggomgom au.
03. VOTUM – introitus – tangiang:
L: Marhitehite Goar ni Debata Ama dohot Goar ni AnakNa Tuhan
Jesus Kristus dohot Goar ni Tondi Parbadia, na tumompa langit dohot tano on. Amen. Songon
duhutduhut do saluhut daging jala songon bungabunga ni duhutduhut i do saluhut
hasangapon ni jolma. Nunga malos duhutduhut i jala nunga marurus bungabunga i,
alai na hot do Hata ni Tuhan i ro di saleleng ni lelengna. Sai burju ma ho rasi
rasa mate, dung i lehononKu ma tu ho tumpal hangoluan. Haleluya
R: (Mangendehon): BE No. 852: 1 “Haleluya HKBP (3x)” BL. 852
Ø
Haleluya, Haleluya, Haleluya!
L: Martangiang ma
hita! Ale
Tuhan Jesus, Tuhan ni angka na mate dohot angka na mangolu! Ho do nampuna hami,
manang mangolu manang mate pe hami. Nang pe mardalan hami di rura ni linggoman
ni hamatean, ndang huhabiari hami be hamatean, ai Ho do dongannami. Ndang
tartiop hamatean manang tanoman be hami, ai Ho do Tuhannami naung humophop
hami, jala Ho nampuna hami. Ro hami nuaeng tu Ho mangido:
Sahat tu Ho ma tondinami dohot dagingnami, asa di Ho hami manang na mangolu
manang na mate pe. Sai tiop ma tangannami, urupi hami marhitehite panghophopMi,
asa sahat hami tu hangoluan na so ra suda. Amen. (Hundul)
04. Marende BE No. 267: 6 “O TUHAN SULINGKIT MA AU”
BL 100
Ø
Tu Ho, o Tuhanhu au lao dung suda
bohalhu di son
Pargogo, parbasa do
Ho
Ramoti, dongani, urupi ma hami sai togu au on
Ramoti, dongani, urupi ma hami sai togu au on
05. Patik:
L: Patik ni Debata di hita di
Minggu Ujung Taon Parhuriaon dohot
Parningotan di angka naung monding, ima na tarsurat di Konfessi HKBP Bindu 15: Songon on ma tarsurat di si: Tahaporseai jala tahatindanghon do: Hamatean i, ima ujung ni ngolu ni jolma di portibi on,
maradian ma ibana sian sandok ulaonna. Adong haluaon di angka na porsea paboa
Jesus Kristus naung hehe i do pangoluhon jolma i
sian na mate, Ibana do Tuhan ni na mangolu dohot na mate.
R: Martua do na mate di bagasan Tuhan i na satia ro di
ujungna.
L: Dipatupa huria i do parningotan di angka na monding laho
padungohon haporseaonta marningot ajalta sandiri huhut padohothon panghirimon
di hamonangan ni Kristus manaluhon hamatean, songoni nang panghirimon di banua
ginjang sambulo ni tondinta dohot di
hadodomu ni na porsea i dohot Tuhan Debata sahat tu na ro Jesus Kristus
paduahalihon
R: Marhite poda on:
Taondolhon do panghirimon di haluaon ni jolma sian angka na mate di bagasan
Jesus Kristus. Taalo do pingkiran na mandok boi na mangolu manjalo pasupasu
sian na mate.
L: Taalo do pingkiran na mandok paboa na adong pardomuan ni na
mate dohot na mangolu, marhite tangiang (mendoakan arwah-arwah). Taalo do
pingkiran na mandok ingkon pajongjong tugu laho pasangaphon na monding, dalan
pangalapan pasupasu tu pinomparna. Jala marhite poda on: Tatulak do sude rumang ni na pinodahon ni ugamo hasipelebeguon lumobi poda taringot
tu tondi na mandok: tading do tondi ni na mate i, jala tondi ni na mate i gabe
begu dohot sumangot
R: Di parningotan di na monding siparateatehononhon do mandok mauliate
tu Debata.
L: Di na marningot ulaon na denggan uju di ngoluna, alai ndang na
mangigil pasupasu dohot tanda siarsiaran sian naung monding i. I do
sahatna. Antong rap mangido gogo ma hita sian Tuhan Debata!
S : Ale Tuhan Debata, sai pargogoi
ma hami mangulahon na hombar tu PatikMi! Amen.
06. Marende BE No. 174: 1, 3 “TOROP DOPE NA SIAT I” BL. 184
Ø
Torop do pe na siat i di hasampuran rea
I pe hamu pardosa i sai olo ma porsea
Ai Debata manjou hamu tu hasonangan situtu
Hamu, hamu dijou Debatamu.
(Jongjong)
Ø Pardosa ho didok
roham, na so tama be dohot?
Ndang pola
ala ni dosam, umbaen na sundat bongot
Ai nunga sae do dosam i, digarar Tuhan
Jesus i
Naung sae, naung sae, naung sae do dosami.
07. MANOPOTI DOSA:
L: Tatopoti ma dosanta na godang i tu adopan ni
Debata, martangiang
ma hita! Ale Tuhan Debata, Amanami, Pargogo na so hatudosan, Parasiroha
mida hami na dangol on! Na ro do hami tu joloM manopoti dosanami na godang i.
R: Ale Tuhannami, mansai godang do dosa dohot pangalaosionnami di adopanMu. Tung jotjot do
hami mangulahon na so lomo ni rohaM na mambahen ingkon hona uhum hami ala ni i. Mauliate ma dipasahat
rohanami tu Ho, ai diramoti Ho do hami
tongtong, i do umbahen sahat hami
tu ujung ni Taon Parhuriaon on. Ale Tuhan,
binsan huingot hami asi ni rohaMi sadari on, sai suru TondiM paubahon rohanami, asa unang be hudatdati hami
mangulahon angka dosa.
L: Di bagasan hajahaton do hami tubu jala
ndang adong haporseaon di bagasan rohanami hian, saluhut do hami manimbil sian
angka dalanMu. Mansai godang do pangalaosionnami di PatikMu. Alai ingot ma
hami, ale Tuhan, ala ni denggan ni basaM dohot asi ni rohaM.
R: Ale Tuhannami, di Minggu Ujung Taon Parhuriaon sadari on, huingot hami do angka
hinaholongan ni rohanami naung jumolo dijou Ho tu lambungMu. Ndada na mandele hami ala hamatean i, alai
na rungka do rohanami marningot ajalnami be. Na ingkon borhat do hami songon angka dongannami i, alani i, binsan
diloas Ho do pe hami mangolu di hasiangan on, sai lam patandahon ma tu hami asi
ni rohaM dohot denggan ni basaM asa tung muba rohanami jala sai hutundalhon
hami nasa ulaon na so hinalomohon ni rohaM.
L: Sai unang paingotingot angka dosa ni
haposoonnami dohot pangalaosionnami; sai ingot ma hami hombar tu asi ni rohaM
dohot denggan ni basaM ala ni GoarMu. Ale Tuhan Jesus, marpamuati ma rohaM di
dosanami na godang i! Amen.
(Tangiang na hohom... Musik BE No. 171: -(saayat)-
Bagabaga
ni Debata Taringot tu hasesaan ni
dosanta: Parasiroha jala pardengganbasa do Jahowa, lambat tarrimas jala parasiroha
godang. Ndang dibahen tu hita hombar tu angka dosanta, jala ndang dibaloshon tu
hita hombar tu angka hajahatonta. Songon asi ni roha ni amaama mida angka
anakna, asi ni roha ni Jahowa di angka na manghabiari Ibana. Hasangapon ma di Debata na di ginjang!
S: Amen.
(Hundul)
08. Marende BE No. 209: 2 “NA SONANG AU” BL 136
Ø
Na sonang
au bolong do
sasude na
mangarsahi au
Las rohangki nuaeng nang sogot pe diapul Jesus au
Ndang huholsohon be ngolungku sude do guru di Amangku
Na sonang au, na sonang au
09. E p i s
t e l :
L: Hata ni Debata
turpuk Epistel di Minggu Ujung Taon Parhuriaon sadari on, tarsurat di Pangungkapon 1: 4 – 8, songon on ma tarsurat di si: “Ahu surat ni si Johannes
mandapothon na pitu huria na di Asia: Asi ni roha ma di hamu dohot dame sian
Ibana na mangolu i, naung mangolu hian jala na naeng ro, nang sian na pitu Tondi
na di adopan ni habangsana.
R: Nang sian
Jesus Kristus, Sitindangi haposan i, na parjolo tubu sian angka naung mate,
Sigomgom angka raja ni tano on! Ibana do mangkaholongi hita jala dipalua hita
sian dosanta marhitehite mudarNa.
L: Dijadihon do hita gabe harajaon hamalimon di Debata, AmaNa i: Di Ibana
ma hasangapon dohot hagogoon ro di salelenglelengna! Amen.
R: Ida
ma, na ro ma Ibana di bagasan ombun! Idaon ni nasa mata do Ibana, nang angka
naung manullang Ibana, gabe mangangguhi be ma saluhut bangso ni tano on mida
Ibana. I ma tutu. Amen.
L: Ahu do Bonana jala Ujungna, ninna Tuhan Debata, Debata nuaeng, Debata
naung adong hian, na naeng ro i, Sigomgom saluhutna.
I do sahatna. Martua do angka na tumangihon Hata ni Debata jala na umpeopsa.
S: Amen.
10. Marende BE No. 229: 1 - 2 “SAI MARTUA DO SUDENA” BL. 181
Ø Sai martua do
sudena na so sauduran i
Dohot halak na sumurut sian na porsea i
Na so olo mangihuthon tahi ni na jahat i
Na so olo sahundulan dohot panginsahi i
(Jongjong)
Ø Sai tongtong lomo
rohana mida pangajaran i
Na nilehon ni Jahowa gabe sioloan i
I do songon hau na denggan na di lambung
aek hape
Sai ramos tongtong ibana na so olo malos
be
11.
MANGHATINDANGHON HAPORSEAON:
L : Tahatindangkon ma haporseaonta i,
songon na hinatindangkon ni donganta sahaporseaon di sandok portibi on. Rap ma
hita mandok:
R : Ahu Porsea…..
(Hundul).
12. TINGTING:
13. PARNINGOTAN DI ANGKA
NAUNG MONDING
U: Huria ni Tuhanta na hinaholongan, di naung sahat hita nuaeng tu Minggu
Ujung Taon Parhuriaon sadari on, tama do
ingotonta angka donganta na itahaholongi naung marujung ngolu jala maradian
sian angka ulaonna di hasiangan on.
Marende sian Buku Ende No. 334: 1 Nasa Jolma Ingkon Mate.
Ø Nasa jolma ingkon mate, ingkon mago
sibuk i
Na mangolu ingkon mate, asa tung denggan muse
Daging on do gabe bangke, jala ingkon do malangke
Asa sogot bangkit i, tu hasangaponna i.
U: Tatangihon ma goar nasida angka naung
jumolo marujung
ngolu sian tongatonganta, mamungka sian Minggu tanggal 22 Nopember
2020 sahat tu Minggu sadari on, tanggal 21
Nopember 2021.
No. |
Goar/Marga |
Tubu |
Marujung
Ngolu |
Tutup Umur |
01. |
|
|
|
|
02. |
|
|
|
|
U: Di ujung ni ajal nasida, disoarahon ma tu
hita na tading dope di hasiangan on. Anggiat ma marpanghorhon i tu haporseaonta
na mandok : “Nunga hupasidung
paraloan na denggan i, nunga hupaujung parlojongonhi; ramot hubahen haporseaon i. Diri nama di jolongku tumpal hatigoran,
silehonon ni Tuhan, Paruhum na tigor i, di ari sogot i tu ahu; alai ndada holan
tu ahu, tu saluhutna do tahe, angka na mangkaholongi hapataronNa i” 2 Timoteus 4: 7 – 8.
R : Lehonon
ni Tuhan i ma Tumpal Hangoluan tu nasida angka
na porsea jala naung sahat tu lambung ni Ama i.
U : Jongjong ma hita saluhutna tapatuduhon
ma
haporseaonta, paboa Tondi ni Tuhan i do naung manjou angka na hinaholongan ni rohanta
i, jala na manjou hita muse asa masipaidaan di lambung ni Tuhanta.
S : Mangendehon
BE
No. 347: 1 – 3, “Sai
Masipaidaan” BL 11
Sai masipaidaan do na porsea i dung sahat be langkana
Tu hasonangan i, tu hasonangan i, tu hasonangan i
Antong burju ma hita mangalo dosa i sai unang tading hita
Di tongan dalan i, di tongan dalan i, di tongan dalan i. (Hundul).
14. Tangiang
Pangondianon:
15. Marende BE No. 772: 1... “TUHANHU DO PATURE DALANHI” (P. P. Ia, Ib)
Ø Tuhanhu do pature dalanhi, Tuhanhu do patiur langkangki
Sian nasa rohangki hupasahat ngolungki
Tuhanhu do patiur langkangki
Ø Tuhanhu do pature dalanhi, Tuhanhu do patiur langkangki
Hulului do Tuhanhi, surut ma na holom i
Tuhanhu do patiur langkangki
-----Musik-----
Ø Tuhanhu do pature dalanhi, Tuhanhu do patiur langkangki
Hupasahat diringki tu tangan ni Tuhanhi
Tuhanhu do patiur langkangki
16. Jamita: Psalmen 90: 1 - 12
17.
Marende BE No. 232: 1... “JESUS
URUPI” (Pelean II) BL 116
Ø
Sian sude parulian na
arga sada huboto hutiop tongtong
Jesus Tuhanhu Ho arta na arga na
mangatasi sudena antong
Tangkup Tuhanmu tung tiop hataNa sai pangasahon ma bagabagaNa
Ø
Naeng ho pistar?
Sai
dapothon Tuhanmu nasa na hurang sai boan tusi
Tu pamodaiNa paunduk rohaMu asa tiur sasude bogasmi
Tangkup Tuhanmu tung tiop hataNa sai pangasahon ma bagabagaNa
-----Musik-----
Ø
Naeng ho tigor?
Pangasahon Tuhanmu na tuminggalhon
sangapNa sude
Na gabe jolma pasaehon dosamu golom ma aithon pangkophopNa i
Tangkup Tuhanmu tung tiop
hataNa sai pangasahon ma bagabagaNa
Ø Naeng ho
mangolu salelenglelengna? Di Tuhan
Jesus do jumpang ho i
Nunga torang ditaluhon sibolis nang
hamatean sigomgom sude
Tangkup Tuhanmu tung tiop hataNa sai pangasahon ma bagabagaNa.
18. Tangiang Pelean + Tangiang Ari
Parningotan di angka na mate + Ale
Amanami + Pasupasu.
Selamat Hari Minggu
“MOMENTOMORI”.
Komentar
Posting Komentar