Tertib Acara Partangiangan
Bona Taon HKBP
Bongbongan Ressort Bongbongan
Distrik V
Sumatera Timur
Topik: “Ulahon ma haluaonmu
mardongan biar dohot lomos ni roha/
Kerjakanlah keselamatanmu dengan
takut dan gentar” (Pilippi 2: 12).
Rabu, tanggal 15 Pebruari 2023.
Masuk pukul 18.00 WIB.
Di Sopo Serba Guna HKBP
Bongbongan.
I.
Mandok Hata:
1. Protokol :
2. Utusan Naposobulung :
3. Utusan Ina :
4. Utusan Ama :
5. Panitia :
6. Parhalado :
II.
Kebaktian
1. Joujou Parsaoran tu Debata: (P = Paragenda).
P: Hamuna angka dongan sahaporseaon! Sadari on, ari Rabu tanggal
15 Pebruari 2023. Marpungu do hita, huria HKBP Bongbongan mandok mauliate tu Tuhanta
Pardenggan basa i, na paloashon hita marlas ni roha mamuji Ibana. Diramoti
Tuhanta do hita manalpuhon taon 2022, jala nunga dipabongot Tuhan Debata hita
tu taon 2023 on. Ala ni i, tung tama situtu do hita mandok mauliate tu adopan ni
Tuhan Debata jala mangido pangaramotionNa di na mamungka nang di na mandalani
taon 2023 on. Taparade ma rohanta asa masuk hita tu Parsaoran Na badia di
adopan ni Debata. Tapake tingkinta satongkin laho martangiang na hohom (Saat
Teduh)…….. Amen!
2. Marende sian BE. No. 66: 1 + 3 Debata baen donganmi
♫ Debata baen
donganmi/Lao mangula ulaonmu/Baen Ibana haposanmu
Sai
paserep rohami/Debata baen donganmi/Debata baen donganmi.
(Jongjong)
♫ Debata baen
donganmi/Sai na saut do ulaonmu/Sai na tulus do sangkapmu
Jala sonang rohami/Debata baen donganmi/Debata
baen donganmi.
3. Votum – Introitus – Tangiang: (P = Paragenda, R = Ruas,
S = Sude).
P: Marhitehite goar ni Debata Ama dohot goar ni AnakNa Tuhan
Jesus Kristus dohot goar ni Tondi Parbadia, na manompa langit dohot tano on. Amen.
R: Mandok mauliate ma hamu tu Jahowa, ai na basa do Ibana, ai
ro di salelenglelengna do Asi ni rohaNa i.
P: Sai urupi ma hami ale Jahowa Debatanami. Sai tumpahi ma ngolunami
hombar tu asi ni rohaM.
R: Sai halomohon Jahowa, jadi lehononNa ma tu ho pinangido ni rohaM.
Pasahat ma dalanmu tu Jahowa jala haposi Ibana asa Ibana paturehon.
P: Taoloi ma Jahowa marhitehite las ni roha, ro be ma hita tu joloNa
marhitehite olopolop.
R: Jahowa do Debata; Ibana do na jumadihon hita, jala Ibana
nampuna hita, bahen bangsoNa dohot birubiruNa.
P: Martua ma ganup na manghabiari Jahowa, na marparange di angka
dalanNa. Sai panganonta do na niula ni tanganta, martua ma hita jala sonang.
S: Tapuji ma Jahowa, ai Pardenggan basa do Ibana; taendehon ma
goarNa, ai hasudungan ni rohanta do Ibana.
P: Martangiang ma hita! Ale Tuhan Debata, huboto hami do,
ndada ala ni gogo dohot habisuhonnami umbahen na tarbahen hami tolhas tu taon
2023 on, alai huparhatopot hami do holan ala asi ni rohaM sambing do. Hupasahat
hami ma ngolunami dohot nasa hangoluannami tu Ho laho mandalani ariari ni ngolunami
sipasahatonMu tu hami di taon 2023 on. Manang di bagasan las ni roha manang
arsak ni roha hami, holan Ho sambing ma huhaposi hami. Ala ni i, sai lam patogu
ma haporseaonnami holan tu Ho sambing, asa tongtong hami marsigantung tu Ho.
Unang mandele hami molo ro pangunjunan tu hami. Hupagomgomhon hami ma huriaMon
tu adopanMu na badia i, asa anggiat lam tu sadana hami laho mamparbuehon godang
angka na denggan tu saluhut halak nang tu humaliang hami pe. Hupasahat hami ma
tangiang nami on tu Ho, marhitehite Tuhan Jesus Kristus Anak haholongan ni
rohaM.
S: Amen!
4. Marende sian BE. No.
504: 1 + 3 Ditogu Tuhan Jesus
au
♫ Ditogu Tuhan Jesus au/i do na mangapuli au/
Di ganup dalan nang
tung maol/tanganna do tongtong huhaol/
Ditogutogu Jesus au/tanganna sai maniop au/
Tongtog ma siseanNa au/paima boi tu surgo
lao.
♫ Gomos ditiop tanganki/so tung na silap langkangki/
Di nasa parsorionki/Ibana
haporusanki/
Ditogutogu Jesus au/tanganna
sai maniop au/
Tongtog ma siseanNa
au/paima boi tu surgo lao.
5. Manjaha Hata ni Debata: Psalmen 99: 1 - 9
P: Jahowa do Raja, angka hitir ma angka bangso; marhabangsahon
kerubim Ibana, humuntal ma tano on.
R: Tongam do Jahowa di Sion, jala timbul do Ibana gumomgom sude
angka bangso.
P: Pujionnasida ma sogot goarna na timbul jala na songkal, na badia
do Ibana.
R: Dohot hagogoon ni raja na mangkaholongi uhum. Nunga dipahot
Ho hasintongan, nunga dipamasa Ho uhum dohot hatigoran di Jakkob.
P: Patimbul hamu ma Jahowa Debatanta i, jala marsinggang ma hamu
tujolo ni sidegedegean ni patna, na badia do Ibana.
R: Si Musa dohot si Aron di tongatonga ni angka malimna, jala
si Samuel di tongatonga ni angka sijou goarna, manjoujou do nasida tu Jahowa,
jadi Ibana mangalusi nasida.
P: Di bagasan ombun na marsijongjong Ibana mangkatai tu nasida,
diradoti nasida do angka panindangionna i dohot patik na nilehonna i tu nasida.
R: Ale Jahowa, Debatanami, Ho do mangalusi nasida, Debata na marpamuati
do Ho di nasida, jala parlulu di pambahenannasida.
S: Sai patimbul hamu ma Jahowa Debatanta i, jala marsinggang
ma hamu di dolokna na badia i, ai na badia do Jahowa Debatanta i.
P: I do sahatna. Martua do angka na tumangihon hata ni Debata
jala na umpeopsa.
S: Amen.
6. Marende sian BE. No. 69: 1 - 2 ”Ungkap bahal na umuli”
♫ Jesus, sai urupi hami/dohot di taon baru on/
Paimbaru
gogonami/mangihuthon Ho tongtong/
Pasupasu ma
muse/na porsea sasude.
♫ Pingkiranku, ulaonku/tau pasangap Ho ma i/
Dungo manang
modom ahu/Ho tongtong di lambungki/
Nang lao ruar
masuk pe/Ho ma donganki muse.
7. Renungan Situasional:
Mandok Mauliate Tu Debata
(P = Paragenda, B = Baoa, Pr
= Parompuan, S = Sude)
P: Mandok mauliate ma hita tu Debata na sun badia i, ala
denggan ni basaNa dohot asi ni rohaNa na so tardodo hita mangaramoti ngolunta.
Mansai balga situtu do holong ni roha ni Tuhan Debata mangaramoti hita lumobi
na sumarihon ngolunta sian taon naung salpu sahat tu taon 2023 on.
B: Dilehon do las ni roha dohot panghirimon na mangolu tu hita
ganup marsadasada, nang pe olo ro marombasombas arsak ni roha nang las ni roha
taadopi di taon naung salpu. Tutu, ndang tarasam hita denggan basa ni Jahowa mangaramoti
ngolunta. Alani i, patut do pujionta Ibana jala taoloi na nidokNa.
P: Pangarimpunan ni na denggan na boi tahajongjonghon, ima: Boi
do denggan manjalo hangoluan angka jolma i marhite na mamparsaulihon sipanganon
dohot siinumon jala ndang adong na mate anturaparon. Dipasonang do rohana
mangihutihut sandok angka ulaonna di hasiangan on saleleng ngoluna. Silehonlehon
ni Debata do i tu ibana; ai i do jambarna.
Pr: Angkup ni i, molo dilehon Debata tu manang ise hamoraon dohot
sinamot, diloas ibana mangan dohot mambuat jambarna sian i, huhut marlas ni
roha diulaonna, silehon-lehon ni Debata do i. Ai ndang sadia dipaingot-ingot
rohana angka ari ni ngoluna, ala naung nialusan ni Debata ibana marhite sian
las ni rohana.
P: Jahowa do silehon tua dohot ragam ni angka pasupasuNa tu
hita, Ibana do hatuaonta. Soara ni olopolop dohot hatuaon marsaringar di undungundung
ni angka partigor: Siamun ni Jahowa do sibahen hamonangan dohot las ni roha di
hita. Hamu ale angka na manghabiari Jahowa, marhaposan tu Ibana ma hita! Ibana
ma tutu Pangurupi dohot lombulombunta di pardalanan ni ngolunta ganup ari.
B: Dingot Jahowa do hita: Ibana ma tutu mamasumasu ngolunta. Ibana
do mamasumasu nang sude ruas ni huria dohot parhalado ni HKBP Bongbongan on;
martua ma hita jala sonang.
P: Ibana mamasumasu angka na manghabiari Jahowa, angka na metmet
dohot angka na magodang. Sai ambaambaan ni Jahowa do pasupasuNa tu hita dohot
tu pinomparta sogot.
Pr: Martua ma ganup na manghabiari Jahowa, na lomo roha situtu
di angka patikNa! Sangap ma pinomparna i sogot di tano on, dapotan pasupasu ma
sundut ni angka partigor sogot.
S: Hamoraon marlobilobi di bagasan jabuna, jala hot do
hatigoranna i ro di salelenglelengna. Ida ma, sai songon i do tongon dapotan pasupasu
ganup jolma na manghabiari Jahowa. Amen.
8. Marende sian BE. No. 434: 1 - 2 Tuhan Jesus Bereng Au
(Papungu Pelean)
♫ Tuhan Jesus
bereng au di son/ro ma au marsomba tu joloM/
Mansai leleng au manjua/ndang
tarbahen au martua/
Dilului Ho, ale Tuhan au/diihuthon
Ho au tu na dao/
Naung dapotan au di Ho, Tuhan/di son
do au/
Sae dosangku dibaen
Tuhanki/monang au dibaen mudarNa i/
Gogo do dilehon Tuhanki/di au, di au.
♫ Mago au dibaen portibi on/daging, tondi dohot rohangkon/
Holan Jesus paluahon/saluhut na
tinaluhon/
Gok do au nuaeng di Tuhanki/sirang
ahu sian dosangki/
Lam jonok tu Ho, ale Tuhan sai
taiti au/sae dosangku dibaen Tuhanki/
Monang au dibaen mudarNa i/gogo
do dilehon Tuhanki di au, di au.
9. Jamita:
10. Marende sian BE. No. 213: 1… Dung Sonang Rohangku
(Papungu
Pelean Amplop)
♫ Dung sonang rohangku dibaen Jesus i/Porsuk pe hutaon di son/
Na pos do rohangku
di Tuhanta i/dipasonang tongtong rohangkon/
Sonang do,
sonang do/dipasonang tongtong rohangkon.
♫ Nang
dihaliangi sibolis pe au/naeng agohononna muse/
Naung mate Tuhanku mangolu ma
au/utanghi nunga sae sasude/
Sonang do, sonang do/dipasonang
tongtong rohangkon.
= M u s i k =
♫ Diporsan Tuhanku sandok dosangki/bolong tu
na dao do dibaen/
Nang sada na so jujuronNa be i/na
martua tondingku nuaeng/
Sonang do, sonang do/dipasonang
tongtong rohangkon.
♫ Mangolu nang mate di
Jesus do au/Ibana haporusanki/
HataNa sambing do partogi di au/ai na
tau haposanku do i/
Sonang do, sonang do/dipasonang tongtong
rohangkon.
11. Tangiang Pangondianon: (Sahalak Parhalado)
12. Marende sian BE. No. 476: 2-3 Ndada au guru di au
♫ Ndang di au di Tuhan Jesus/daging dohot rohangki/
Saluhutna hupasahat/tu
Ho, Jesus Tuhanki/
Ndang be au guru di au/Jesus na humophop au,
nampuna au/
Tung saleleng
au mangolu/Jesus do nampuna au.
♫ Ulaonku nang artangku/pangke
ma baen sangapMi/
Diusehon
Ho mudarmu/tung tanda do holongMi/
Ndang
be au guru di au/Jesus na humophop au, nampuna au/
Tung
saleleng au mangolu/Jesus do nampuna au.
13. Borhatborhat mandalani Taon 2023 mangasahon Debata (Jongjong)
P: Huria na hinaholongan ni Tuhan Jesus Kristus! Nunga
dipaloas Debata hita bongot tu taon 2023 on. Basabasa ni Tuhan Debata do i tu
hita ganup marsadasada, si hamauliatehononta. Ala ni i, ingkon pangkeonta do
taon 2023 on di bagasan hasatiaon tu Ibana marhite ngolunta nang pambahenanta
pe.
R: Alai anggo ahu dohot donganku sajabu, ingkon Jahowa do oloan
nami.
P: Sai jagahon dirim asa uang dihalupahon roham Jahowa naung manogihon
ho ruar sian taon 2022 bongot tu taon 2023 on.
R: Alai anggo ahu dohot donganku sajabu, ingkon Jahowa do oloan
nami.
P: Ingkon habiaranmu Jahowa, Debatam, jala oloanmu Ibana. Jala
maruari ho tu goarNa. Ingkon burju ho mangaradoti angka taon di Jahowa, ro di
angka panindangionNa dohot aturanNa angka naung tinonahonNa tu ho.
R: Alai anggo ahu dohot donganku sajabu, ingkon Jahowa do oloannami.
P: Unang meret buku patik ni Jahowa sian pamanganmu, sai pikirpikiri
ma i arian dohot borngin, asa diradoti ho jala dipatupa ho hombar tu sude na
tarsurat di bagasan i, asa maruntung ho di angka dalanmu, jala marmulia
parulanmu. Amen.
14. Tangiang Pelean + Tangiang Ale Amanami + Pasupasu
III.
Makan Bersama.
Komentar
Posting Komentar