Sermon Parhalado HKBP Bongbongan Ressort Bongbongan.
Jamita tu Partangiangan. Epistel Minggu
Letare, 19 Maret 2023
Psalmen 5: 8 - 13
Marlas Ni Roha Ma Hamu"
1. Di bagasan pardalanan ni
parngoluan on pasti do taadopi angka ragam ni parsorion manang hamaolon na boi
mambahen hita olo gabe gale. Alai baliksa, ndada holan ragam ni hamaolon
taadopi di bagasan ngolunta, las ni roha pe boi do tahilala jala tahangoluhon.
Ala ni i, boi ma dohohon pardalanan ni ngolu ni hajolmaon ingkon mangadapi
arsak ni roha songoni nang las ni roha. Arsak ni roha dohot las ni roha i do na
marganti sorin songgop di ngolu ni hajolmaon. Halak na porsea dohot halak na so porsea, saluhut do
tahe ingkon mangadopisa. Alai songon halak na porsea hita ingkon rajumanta do
jala ingkon hatindangkononta do: “Gumodang do angka las ni roha songgop di
bagasan ngolunta ala pasupasu dohot pambahenen ni Tuhan Debata di bagasan ngolu
ni halak na porsea”. I ma haporseaon jala i do na tutu situtu. Ala jonok Tuhan i
tu ahu, songoni nang ahu jonok tu Tuhan i”.
2. Molo jonok Tuhan i tu ahu jala ahu
pe lam hupajonok hadiriongku tu Tuhan i, tontu ingkon taruli do ahu di bagasan ngolungku
sian ragam ni pasupasu na sian Tuhan i, ala tarajumi Tuhan Debata do mual ni
nasa na uli di bagasan ngolunta (Patudos: Jakobus 1: 17, “Saluhutna
silehonlehon na denggan, nasa ulibasa na mauliutus, i ma na ro sian ginjang,
sian Ama ni na tiur,…”). I do na naeng sipapataron
ni parpsalmen on tu saluhut angka na porsea di sandok portibi on. Molo tahaposi
jala tahaporseai Tuhan Debata jumpangan angka las n iroha ma hita di bagasan
pardalanan ni ngolunta. Ndada holan las ni roha, alai angka na tapangido di
bagasan tangiangta sai dijamothon Tuhan Debata do hita sian angka ragam ni nasa
parmaraan. Mandok mauliate ma hita tu Tuhan Debata ala ni saluhut pambahenanNa
di bagasan ngolunta marhite AnakNa Tuhan Jesus Kristus.
3. Marhite tangiang dipasahat parpsalmen
on do saluhut angka parsorionna/na hinolsohon ni rohana tu Tuhan Debata pargogo
na so hatudosan i di bagasan haporseaon na togu. Ala boha? Ala godang na
marsogo ni roha tu ibana. Nunga gabe bangko di portibi on, molo adong sidok na
tingkos jala siulahon na denggan gabe sisogo do i. Di bagasan pasrsitutuon do
dipasahat parpsalmen angka parsorionna i tu Debata pargogo na so hatudosan i.
Ndang tarpatudos parpsalmen hagogoon ni Debata tu angka nasa hagogoon na adong
di portibi on. Termasuk tu hagogoon ni jolma na sai holan mangasan pikiranna
sandiri dohot angka sinadonganna. Di hatindanghon parpsalmen do na boi jala tuk
pangalualuan. Di ganup tingki, arian nang bodari pe sai tongtong do dihatindanghon
parpsalmen do pambahenan dohot panarihonon ni Tuhan Debata di bagasan
pardalanan ni ngoluna.
4. Di hatindangkon parpsalmen on do marhite
tangiangna, pambahenan ni Tuhan Debata do patauhon mangadopi parsorion ni
ngoluna: “Alai ianggo ahu, sian godang ni asi
ni roham sai bongotanku do bagasmu, marsomba dompak bagas ni habadiaonmi,
mangkabiari Ho.” Mangolu holan ala asi ni roha ni
Tuhan Debata. Diparhatutu parpsalmen on do, di na mardalanan ibana di hasiangan
on mansai ringkot adong na manogunogu, na mandongani, na manarihon dohot na patupahon
dalan di angka pardalanan ni ngolu on, asa unang sala dalan apalagi sala
langka. Alai naeng ma pardalanan ni ngolu ni angka na manghaporseai Tuhan Debata
pargogo na so hatudosan i, ingkon mardalan jala mangolu hombar tu angka na
hinalomohon ni Tuhan i. Lapatanna, Tuhan Debata do paturehon dalan na tigor
sidalanan ni angka na porsea tu Ibana. I do asa didok ibana di ayat 9 i, “Ale
Jahowa sai togu ma ahu marhite hatigoranMu ala ni angka na mangonggop ahu, sai
pahornop ma dalanMu di jolongku”. On ma pangidoan ni parpasalmen di
bagasan tangiangna jala di bagasan parsitutuon. Haruar sian roha parbagasan,
ndada ala ni pangidoan hasomalan di bagasan tangiang, ala naung tangkas
ditanda ibana huaso, hagogoon dohot pambahenan ni Tuhan Debata parasi roha i di
bagasan ngoluna.Ndada holan di hata na mandok “ahu porsea” alai di pataridahon
marhite parsitutuon di bagasan tangiangna.
5. Tuhan Debata do na manongtong silehon angka na mambahen las ni roha. Na gabe sungkunsungkun. Adong do las ni roha na so sian Tuhan Debata? Alusna: Adong. Molo jumpang hita pe angka na boi mambahen las rohanta na marharoroan sian portibi on, taingot ma: Parsatongkinan do i. Angka si las ni roha na sian portibi on, angka na marharoroan sian hagogoon ni portibi on. Dihangoluhon halak angka na so mananda Tuhan Debata do i. Manang diulahon halak na marhaporseaon tu hagogoon ni portibi on. I do asa olo nasida marubat tu datu. Molo mogo pananggana laho manungkun na malo ni portibi on. Angka i pangalaho ni angka na so marhaporseaon tu Tuhan Debata. Alai molo angka halak na porsea tu Tuhan Debata ndada songoni. Angka si las ni roha, isara ni ganjang ni umur, hahipason, malum sian parsahiton, habisuhon, hapistaran, hamoraon, hasangapon, hagabeon dohot angka na asing na tau mambahen las ni rohanta marharoron sian Tuhan Debata. Molo tajalo sian Tuhan Debata angka na mambahen las ni rohanta, unang lupa hita mandok mauliate tu adopanNa na badia i, asa manongtong Ibana patupahon angka las ni roha di bagasan ngolunta ganup. Amen.
Pdt. A. Tambun, STh - HKBP Ressort Bongbongan P. Siantar.
Komentar
Posting Komentar