SERMON HKBP RESSORT AJIBATA
Sabtu, Tanggal 13 Juni 2015. Jamita tu Minggu, tgl 14 Juni
2015.
Psalmen 92: 2 – 5 + 13 – 16.
1. Marragam do cara dohot pambahenan na pinangke
ni jolma laho patoranghon dohot patolhashon aha na di bagasan rohana. Adong do halak papuashon na di bagasan rohana
i marhite andung, adong marhite na manghatai, adong marhite na manurat, adong
marhite ende dohot tangiang. Di tingki patolhashon aha na di bagas roha ni
sasahalak i, tarida do dohot kondisi ni halakna marhite isi na pinatolhasna i.
Sian bahasana dohot carana boi do botoonta manang na las do rohana manang na marsak
do.
2. Marhite turpuk on dipabotohon tu hita di
patolhas per-Psalmen na di bagas rohana i, marhite angka ende pujian tu Tuhan
Debata. Ima angka ende Psalmen on. Uju jumpa masa hasusaan di bagasan ngoluna,
tongtong do ibana mamuji Debata. Ai bagian ni angka ngolu ni na porsea tu
Debata Jahowa do angka isi ni Psalmen on. Saluhut angka parsorion na masa di
ngolu ni jolma apala mansai nalnal dipataridahon marhite Psalmen on. Angka
ragam ni pangidoan tu Tuhan Debata sitompa Saluhut jumpang hita do di Psalmen
on. Nang pe secara partingkian nunga mansai dao “cara hidup” ni par-Psalmen
dohot tu cara hidup tu hita si nuaeng on, nang pe naung marganti angka generasi
alai molo impola na hinalomohon ni Debata sian angka na porsea hot do i sahat
ro di nuaeng on.
3. “Na
denggan situtu do...” Di sada tingki hea ma di jalo sahalak dakdanak
hepeng tu tulangna, jala dilehon tulangna i. Mansai las situtu ma roha ni
dakdanak on, marinjakinjak ma ibana ala ni las ni rohana maradu so diingot be
mandok mauliate tu tulangna na mangalehon hepeng i tu dakdanak i. Songoni do
nang turpuk on. Ndang mungkin hatindanghonon ni parPsalmen “Na denggan situtu
do laho mamuji Debata Jahowa”, molo ndang hea dirajumi ibana dibahen Debata na
denggan di bagasan ngoluna. Holan halak na porsea do olo mandok mauliate ala
pambahenan ni Debata. Holan angka halak na porsea do mananda asi ni roha dohot
denggan basa ni Debata na manumpahi angka na denggan di bagasan ngoluna, songon
ngolu ni parPsalmen on. Halak no so mananda asi ni roha dohot denggan basa ni
Debata dirimpu do ala ni gogona dohot ala ni hamaloanna laho patupahon
saluhutnana na adong di ibana i. Saleleng songoni dope pangantusion ni sasahalak
laho mangalapati ngolu on, olo do madabu tu sikap ginjang ni roha manang
angkuh, sombong.
4. “Ai
nunga dipalas ho rohangku marhitehite pambahenanmu...”. Mansai ringkot
situtu mambahen las ni roha ni dongan. “Saluhut na pinangido ni rohamu,
sibahenon ni halak tu hamu, ima bahen hamu tu nasida...” (Pdts: Mat. 7: 12).
Gumodang do ngolunta on ngolu “Sitau”. Tapangido naeng angka na denggan bahenon
ni donganta tu hita, hape hita pe ndang tabahen angka na denggan tu angka
donganta. Marhite turpuk on, diarahon jala diajari do hita mambahen na denggan
jumolo tu angka donganta, maniru pambahenan ni Debata di bagasan ngolunta on.
Tauji ma jolo, sai jumolo hita mambahen angka na denggan, mambahen las ni roha
ni donganta. Asa tong bahenon ni donganta tu hita si songoni. Tarimangi ma jolo di bagasan ngolunta on, “Dia
do gumodang tabahen las ni roha ni angka donganta sian (daripada) hansit ni
rohana?. Hea do tapalas roha ni donganta, boha carana? Paridianna pe so hea tapalas, apalagi ma rohana. Marhite ay. 5 i
dihatindanghon parPsalmen i do “Dipalas
Debata rohana”. Gabe jamita na mangolu do panghatindanghonon ni parPsamen
on sahat tu tingki on, sahat ro di tingki na naeng ro dope. Marhite angka angka
pambahenanta tabahen ma las ni roha ni angka donganta alai jumolo ma roha ni
Tuhan Debata, Jesus Kristus nang dohot Tondi Parbadia marhite angka pambahenan
nang angka pujipujian. Amen.
Komentar
Posting Komentar