Jamita tu Minggu XII Dung Trinitatis, Tanggal 23 Agustus 2015.

Josua 24: 1 - 2a + 14 - 18.

Alai Anggo Au Dohot Donganku Sajabu ingkon Jahowa Do Oloannami.

Patujolo.      

Dung taripar bangso Israel sian batang aek Jordan, dipaluhut si Josua ma sude marga ni Israel tu Sikem, jala dipio angka sintua ni Israel, angka indukna, angka panguhum dohot angka juara tulis, jala dipatindang di jolona. Asa naeng tangkas jolo sulingkitanna roha ni bangsoi manang na marsihohot do rohanasida mangoloi Debata manang na muba do roha nasida dungkon sahat nasida tu tano pinarbagabaga i. Ala diboto ibana do songon dia hatangkangon ni roha ni bangso i, na mura marungutungut jala mura mubauba. Hape kondisi dohot situasi di Kanaan nunga andul marasing martimbanghon saleleng nasida di pardalanan parhorsihan leleng ni 40 taon i. 

Andorang so masuk bangso Israel tu tano bagabaga i, marpindapinda do inganan nasida, alai dung di tano Kanaan nasida nunga dapotan tano dohot huta bahen inganan nasida. Mangan nasida sian porlak anggur dohot hau jetun (Jos. 24:13). Kondisi inganan na dumenggan jala na maduma i boi mambahen nasida talpe tu na manadinghon Debata Jahowa na sinomba nasida nasaleleng on. Ima Jahowa, Debata ni ompunasida si Abraham, Isak dohot Jakob. Dalan laho padasiphon pangokuon ni bangso i do umbahen na dipapungu si Josua angka luhutan ni bangso i, asa sai marsihohot mangoloi Debata Jahowa. Unang marbalik nasida tu debata ni halak Amori i manang tu debata ni ompunasida di bariba ni batang aek dohot uju di Misir nasida.

Hatorangan.

Ayat 1 - 2a. Andorang so masuk bangso Israel tu tano bagabaga i, ima tano Kanaan dipaluhut/dipapungu si Josua ma sude marga ni halak Israel di sada inganan di Sikem jala dijou angka pengetuai ni bangso i, ima:  Sintua ni Israel, angka indukna, angka panguhum dohot angka juaratulis jala dipajongjong di adopan ni Debata Jahowa. Maksud dohot tujuan ni si Josua patupahon i, laho paingothon (me-matri) tu roha ni saluhut bangso israel asa unang olo mangoloi debata sileban, lumobi debata na sinomba ni halak Amori na mangingani tano Kanaan andorang so nasida. Ulaon na maol do laho mangilahon i, ala pasti adong dope angka ulaula na so hinalomohon ni Debata Jahowa di si ala sipelebegu hian na mangingani huta i (Kanaan).

Ayat 14. Mansai gomos disosoi si Josua asa: "Unang marsomba debata sileban nasida, debata na sinomba ni halak Amori na mangingani tano i hian, alai asa marhabiaran jala marsomba tu Debata Jahowa saluhut marga ni halak Israel". Tangkas do i di paingot si Josua: "Onpe sai habiari hamu ma Jahowa, sai marsihohot rohamuna mangoloi Ibana di bagasan hasintongan...". Manghabiari  Debata Jahowa marlapatan do i mangula jala marparange hombar tu lamo ni rohaNa. Manghabiari Debata Jahowa marlapatan do i, marsomba holan tu Ibana ndang adong si sombaon na asing, asing sian Debata na manogihon nasida haruar sian parhatobanan Misir.

Ayat 15. Habisuhon ni si Josua selaku pemimpin mansai tung bagas laho mandodo roha ni bangso i taringot tu hasatiaon na marsihohot holan tu Debata Jahowa. Na mansai arga jala torop manghalomohon ima haputusan na tepat (sangat tepat sekali) na haruar sian roha parbagasan. Hasil ni proses pamingkirion asa sahat tu haputusan na mansai denggan situtu. Jumolo didok ibana do: “Pillit hamu ma sadarion manang ise naeng oloanmuna”. Na marlapatan; ise ma na gabe sioloan nasida? (Ind: Beribadah kepada siapa?). Molo pe didok di son pillit namarlapatan do i paboa ndang bangso i mamillit Debata alai Debata do mamillit bangso i. Ima marhite angka na binahen ni Debata tu nasida naung jumolo di patorang si Josua di jolo ni turpuk on (Jos. 24:1-13). Asa molo didok pe “mamillit” na marlapatan asa ditontuhon tu ise do na gabe siihuthonon nasida. Ndang dihalomohon rohana haputusan na holan satongkin (bersifat sementara atau kepentingan sesaat), manang haputusan sian roha na tomputompu (emosional) alai naeng ma marhite sian pergumulan. Haputusan marhite sian ala naung dipanghilalahon nasida pambahenan ni Debata di ngolu nasida. Molo dung dapot haputusan na marojahan tu angka pambahenan ni Debata dapot ma parbue na denggan jala di bagasan roha mauliate jala marpangoloion tu Debata na mangalehon angka na ringkot tu ngolu ni jolma angka ragam ni angka na denggan. Pambahenan ni Debata boi diboto jala dihilala si Josua sian panghataion dohot pambahenanna tu bangso i. Parbue ni haporseaonna do dihatahon, jala marhite panandaionna na tangkas dompak Debata Jahowa, dimangmanghon ibana do: “Alai anggo ahu dohot donganhu sajabu, ingkon Jahowa do oloannami”. Sada pernyataan sekaligus keputusan na mansai denggan sian sahalak partogi na manggomgomi bangsona na boi mamboan jala paubahon situasi ni na ginomgomanna. Gabe tudosan na uli, sikap sitiruon do dilehon. Ndada masalah suara na gumodang laho mangoloi Jahowa songon mamillit sahalak panggomgomi di tongatonga ni negaranta on, alai panandaon dohot pangoloion di bagasan parsitutuon dohot biar mida Jahowa do na niigil sian siihuthon Ibana. 

Ayat 16-18. Panandaon nasida tu Debata Jahowa na mansai tangkas; na manogihon nasida dohot ompu nasida ruar sian tano Misir,  dohot na mangalehon tanda angka na bolon, huhut na mangaramoti di sandok dalan nabinolus nasida, jala na namangonjar saluhut halak Amori (ayat 17-18), umbahen na gabe  margogo nasida mandok: “Dao ma i sian hami, anggo tung manadinghon Jahowa laho mangoloi angka debata sileban”. Jala on ma haputusan dohot pernyataan na mansai denggan situtu sian angka situan na torop i, manguduti manang me respon pernyataan ni si Josua. Mansai denggan do parmahanion ni si Josua tu angka na pinarmahanna ima bangso ni Debata, Israel.

          Sipahusorhusoron.

          Alai anggo ahu dohot donganku sajabu, ingkon Jahowa do oloan nami. Ingkon habiaranta Jahowa, Debatam jala oloanmu Ibana, jala maruari ma hita tu Ibana. Tahaburjuhon ma, mangaradoti angka tona di Debata Jahowa, ro di angka panindangionNa dohot aturanNa angka naung tinonahonNa tu hita. Amen.