Unang Ho Mabiar, Debata Do
Mandongani.
1. Marende : Sian B.E No. 2: 3
2. Tangiang Pamuhai
3.
Turpuk : Lukas 1: 30 – 31.
Jala
didok surusuruan i ma tu nasida: Unang ho mabiar, ale Maria; ai dapotan asi ni
roha do ho di Debata! Gabegabean ma ho, tubuan anak ma ho; Jesus ma bahenonmu
Goarna!
4.
Hatorangan.
Nunga
tung mansai leleng diparsinta si Ultop naeng mangallang jagal manuk. Alai ndang
barani si Ultop mangido tu omakna. Di borngin ni ari topet andorang so modom
dope manghatahatai ma si Ultop on dohot omakna. Dibaranihon si Ultop ma mandok
tu omakna: “Oma... nunga mansai sihol rohangku mangallang jagal manuk, taseat ma
sada manukta i ate omak”. Di dok omakna i ma mangalusi: “Hubege naeng ro do
tulangmu tumopot hita, pas tingki ro ma tulangmu, taseat manukta i da Ultop”.
Mintor dialusi si Ultop: “Olo oma, tutu da. Alai tulang na bandal i do oma na
naeng ro, na leleng tamat sian kuliahna i?”, ninna si Ultop.“I do.., mungkin
naeng tammat nama ra tulangmi sian sikolana umbahen mandok ro tu son”, ninna omakna i tu si Ultop.
Ndang
sadia leleng, hira saminggu dung manghatai si Ultop dohot omakna, ro ma tulang
ni si Ultop i. Dituktuhi tulangna i ma jabu. “Ito... ito... di jabu do hamu?”,
ninna tulangna i. Di buka si Ultop ma pintu dibereng ibana ma jala didok ibana:
“Horas tulang...” huhut dijalang jala didok asa masuk tu jabu. “Satongkin da
tulang asa hujou jolo omak”, ninna Si Ultop tu tulangna i. Alai na dipingkiri
si Ultop: Nunga ro be tulang maneat manuk nama. Sian pintu ni dapur didok si
Ultop ma tu omakna: “Oma... oma... nunga ro be tulang, taseat ma?”. Ala antar
dao do omak ni si Ultop on di pudi ni jabu i mangula, hurang tangkas dibege.
Alai tulang ni si Ultop i nunga mabiar
umbege hata ni si Ultop i. Dihalaputi omak ni si Ultop do nian mulak tu
jabu, ala nunga ro ibotona i. Alai di tonga dalan dope omakna i, dipagogo si Ultop ma manungkun omakna muse: “Nunga ro
be tulang oma... taseat ma”. Huhut mardalan dialusi omakna i ma: “Olo... seat
ma... buat mudarna da”. Lam mabiar ma
tulang ni si Ultop i, ala ni biarna gabe lari ma ibana marimbusi
ditinggalhon ma si Ultop i. Ndang jadi be nasida mangallang jagal manuk, ai nunga
lari be datulang.
Unang Ho mabiar...
Ima hata ni Surusuruan di turpuk on laho paposhon roha ni si Maria. Onom bulan
dung pajumpang Surusuruan ni Debata dohot si Sakarias, disuru Debata ma
pardisurgo Gabariel tu Nasaret, sada huta na di luat Galilea; manopot sada anak
boru na margoar si Maria, oroan ni sahalak dolidoli na margoar si Josep. (Bnd.
ay. 26 – 27). Tarsonggot jala mabiar do si Maria di tabi ni Surusuruan i, ala na
so sian panagamanna ditopot Debata marhite SuruanNa jolma pardosa. Alai, ndang
dipasombu Surusuruan i si Maria lalap di bagasan biar dohot ganggu ni roha, ala
mintor dipabotohon Surusuruan i harorona manopot si Maria. Ai barita las ni
roha do na pinaboa ni Surusuruan i tu si Maria: “...dapotan asi ni roha do ho di Debata. Gabegabean ma ho, tubuan anak
ma ho; Jesus ma bahenonmu Goarna”. Bangkona do i, molo adong na naeng masa
olo do ganggu jala gaor rohanta gabe mabiar hita laho mangadopi na naeng masa
i, ala ndang taantusi aha na naeng masa. Songon tulang ni si Ultop di ginjang
mabiar jala lari marimbusi ala ndang diantusi lapatan ni hata ni si Ultop i, di
na nidokna: “Oma...
oma... nunga ro be tulang, taseat ma?”. Dirimpu tulangna i do ibana naeng
seatonnasida, hape manuk do. Adong pandohan di hata Indonesia na mandok: “Berani
karena benar, takut karena salah”. Molo so sala do hita unang pola mabiar
hita. Nang di angka na naeng sibolusanta di ngolu on pe, unang mabiar hita asal
ma tongtong tajalo panorangion sian Tuhan i, na tongtong rade mangalehon gogo
tu angka na gale jala mangalehon pangurupion tu halak angka na talup manjalo
pangurupion di angka dalan na naeng siboluson.
Naeng masa ma tanda halongangan
bolon di portibi on marhite si Maria, jala marhite i tulus sangkap ni Debata,
ai naeng sorang Sipalua sian sahalak anak boru. I do na pinabotohon ni
pardisurgo Gabriel i. Mansai maol situtu do dilapati si Maria na ni dok ni
Surusuruan i tu ibana:
“Gabegabean ma ho, tubuan anak ma ho ...”,
hasasaut ni i ndada dung marhasohotan nasida (si Maria dohot si Josep), alai di
tingki masa tunangan i dope. Halongangan
bolon do na naeng masa tu si Maria, na so dung hea masa dipamasa Tuhan Debata.
Gabegabean sada anak boru jala tumubuhon sada anak. Secara adat, parungkilon
bolon do i di tongatonga ni keluarga ni si Maria. Autsugari masa i ditongatonga
ni halak batak, ingkon padaraton do i sian paradaton manang sian parsahutaon.
Molo gabegabean borunta (ala ni sangkap ni daging), hape anakboru dope, ra olo
do gabe stress angka ina, gariada tahe olo dope didok: “Mulai saonari, huanggap
ma ho tilahangku da”. Na masa di turpuk
on ulaon hahomion ni Debata do, gabegabean na sian Tondi Parbadia, ndada ala ni
sangkap ni daging dohot mudar. Tongtong ingkon tahaporseai, “Ndang adong na boi
mangambati sangkap ni Debata, manang hagogoon dia pe i”. Olo do di tingkina be
tahirim masa angka tanda halongangan naeng patupaon ni Debata di ngolunta, hape
maol do taantusi hasasaut ni tanda halongangan i. Ndang masuk akal. Dao andul
sian na piningkiran ni jolma pambahenan ni Debata di bagasan ngolunta, ima
tanda halongangan (Mujizat).
Haunduhon dohot
pangoloion ni si Maria di hata
ni Surusuruan i, mansai marlapatan situtu (Ind: Mempunyai peranan penting)
di hasasaut ni bagabaga ni Debata ala porsea si Maria di hata ni Surusuruan i.
Godang do
ragam ni angka na mambahen mabiar hita laho mandalani jala mangadopi ngolu on,
isara ni: sahit, bencana alam, perekonomian keluarga, kegagalan usaha nang ala
ni pangalaho ni ianakkon. Na patut do i, alai songon si Maria i, hita pe (saluhut
na porsea), unang pola be mabiar jala tahuton laho mandalani ngolu siap
ari, asal ma tongtong hita porsea di Hata ni Debata Jahowa dohot
dipangaramotionNa, ala tongtong do didongani jala diramoti Ibana hita. Molo
Jahowa do donganta, gabe tubu ma panghirimon na mangolu, hiras ni roha jala
semangat laho mandalani parngoluon on, nangpe sonson di jolonta ragam ni angka
hamaolon. Molo mardonganhon Debata do hita, botoonta do dia ma na naeng jala
ingkon ulahononta angka ulaon na hombar tu hata ni Debata. Jala tongtong adong
roha biar (mangoloi) maradophon Jahowa di ngolu on. “Ai dilehon
Debata do tu hita tondi hagogoon, tondi haholongon, tondi pangarajaion diri,
ndada tondi hatahuton” (2 Timoteus 1: 7). Amen.
5. Sipahusorhusoron:
a. Songon dia do sikap ni halak na porsea mangadopi
angka na naeng masa di ngoluna?
b. Sadia bagas ma panghorhon ni pandonganion ni
Tuhan Debata di bagasan ngolunta?
6. Marende : Sian B.E No. 428: 1 + 3
7. Tangiang Pangondianon
8. Marende : Sian B.E No. 178: 1
9. Tangiang Panutup.
Komentar
Posting Komentar