Haburjuhon Ma Mamuji Tuhan Debata.

(1 Rajaraja 8: 22 – 23 + 41 – 43)

Patujolo.

            Mamuji dohot pasangaphon Debata Jahowa ndada holan di tingki partangiangan sektor na pinatupa ni huria dohot di bagas joro siganup minggu, alai na rumingkot ingkon gabe sihangoluhononta do pamujian tu Debata di ngolunta siganup ari, marsadasda (secara pribadi) nang pe marhite punguan (maupun secara komunitas). Dihangoluhon bangso Israel do ngolu partangiangan dohot pasahat pujipujian marningot saluhut pambahenan ni Debata di sandok pardalanan ngolunasida. Ala pambahenan ni Debata tama do saluhut na tinompa ro marsomba dohot mamuji Debata Jahowa. Ia pambahenan ni Debata sumarihon angka na ringkot di angka na tinompaNa i, mangaramoti, manogunogu huhut mangalehon angka na denggan dohot las ni roha di angka na mamuji goar ni Debata Jahowa na sun badia i.

Hatorangan.

1.      Marhite turpuk on diarahon jala dipatuduhon do tu hita, pamujion marhite tangiang ni Raja Salomo di bagas joro ni Debata. Di ay. 21 i, didok: “Dung i jongjong ma raja Salomo di adopan ni langgatan ni Jahowa...”. Langgatan Ni Jahowa manang Bagas joro ima inganan manang bagas na badia. Inganan partangiangan. Inganan mangalap bohal ni partondion ni halak na porsea. Inganan ni Debata laho pasahathon ragam ni angka pasupasu partondion nang pardagingon tu saluhut halak na olo jala rade mamuji pasangaphon goarNa na badia i. Bagas joro ima, inganan parsaoran ni saluhut halak na porsea na so mangida status manang jenjang sosial angka ruas ni huria (Status/jenjang sosial, ima: Na sangap dohot na lea; Na mora dohot na pogos; Na hipas dohot na marsahit;  Baoa manang parompuan; Na magodang manang dakdanak, saluhutna i ndang mardia imbar di adopan ni Debata Jahowa. Bagas joro ima inganan parsaoran dohot pamujion tu Debata. Saluhut halak do ingkon mamuji Debata pasangaphon goar ni Debata Jahowa. Na badia do bagas joro i jala ingkon badia do bagas joro i, ala na badia do Debata Jahowa na bongot jala mian di bagas joro i. Marhite parsaoran na badia di bagas joro i, gabe diparbadia i ma pangalaho dohot pambahenan ni saluhut halak  naung bongot jala na ruar sian i.

2.      Mansai denggan situtu do mamuji Debata, siala: “...Ndang adong Debata na tudoshon Ho di banua ginjang dohot di banua tonga on... (ay. 23). Nang parpsalmen dihatindanghon do na mansai na denggan do mamuji dohot pasangaphon Debata marhite Psalmen 92: 2: “Na denggan situtu do na mamuji Jahowa dohot mangendehon goarmu, ale Natumimbul!”. Ala ni i, saluhut jolma ingkon pasahathon pujipujianna dompak Debata, lumobi angka na porsea. Ingkon rajumanta jala ingkon tahaporseai do: “gumodang do angka na porsea mandai asi ni roha, pangurupion dohot pasupasu ni Debata”. Songon partogi ni bangso Israel, dirajumi raja Salomo do godang asi ni roha ni Debata manogunogu dohot manarihon ngolu ni bangso i, ala ni i gabe diarahon ibana ma bangso i pasahathon pujipujian tu Debata. Halak na olo mamuji Debata, ima halak na porsea tu Debata, angka na mangongkuhon hagogoon ni Debata, jala nunga tangkas i dihilala halak na na manghaporsea Ibana. Marhite pamujion tu Debata tangkas do di si dipatuduhon roha haunduhon dohot haserepon maradophon Debata. Saluhut do halak manghilala jala mandai pambahenan ni Debata di ngoluna, alai ndang sude halak patuduhon pangalaho na denggan di adopan ni Debata di angka parangena siganup ari marhite na mamuji dohot pasangaphon Debata.

3.      Dapotan pasupasu do halak na olo jala rade mamuji Debata. Halak angka na porsea di Debata do angka na sai olo mamuji jala pasangaphon Debata. Dipasupasu Debata do ngolu ni angka halak sisongoni, gariada tahe mardapotdapot do gogo di sarihon Debata di nasida.  Di bagasan haporseaon, dohononta ma hagogoon ni angka na porsea i marharoroan holan sian Debata sambing do.   Nang  pe  dokdok angka sitaononna, ndang olo talu ibana ala pos situtu do rohana

di Debata. Angka na sinuan di bagasan bagas joro ni Jahowa, marbunga do nasida di bagasan angka alaman ni Debatanta. Ia ngolu ni angka na porsea songon hau na sinuan ni Debata do nasida. Disarihon, diramoti, dipaias, dirantingi jala dipauliuli marhite tangan ni Debata sandiri, ala ni asi ni rohaNa.

Panutup.

Taharingkothon ma ngolu partangangan i, songon Raja Salomo diharingkothon do na martangiang. Tuhan Jesus pe sipartangiang do nang pe Anak ni Debata Ibana jala diajari do hita martangiang. Nang apostel Jakobus pe dihaporseai ibana do gogo ni tangiang i, di na nidokna: Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana. Molo adong na marsahit di hamu, dijou ma angka sintua ni huria i; asa ditangiangkon ibana; didampol ma ibana dohot miak marhitehite Goar ni Tuhan i. Amen.