DEBATA MANONDANGI BANGSONA, LAHO PAULIULIHON ANGKA NA
TINOMPA
(Pangungkapon
22: 1 – 5).
Molo
naeng arahononmu torop jolma tu surgo hasonangan i, unang pabiarbiar nasida marhite hinajorbut dohot hinabernit ni uhuman tu jolma i ala ni
dosa, alai pabotohon ma hinadenggan dohot hinatabo ni surgo hasonangan i tu nasida. Di
mulana pe, tu inganan na sonang do dipataru Debata Jahowa jolma na tinompaNa i.
Marhite turpuk on dipabotohon jala diarahon do hita mananda hinadengan manang
hinatabo ni inganan i na pinatupa ni Tuhan Debata di angka jolma halomoan i.
Debata Jahowa sandiri do na patupahon jala mangalehon i tu jolma. Debata Jahowa
do na manompa nasa na adong di hasiangan on dohot patupahon hangoluan di
portibi on. Jala na parpudi, andorang so ari paradianan ditompa Ibana do jolma
tumiru rupaNa; baoa dohot boruboru. Ditogihon Debata ma nasida tu sada porlak
naung dipinauli ni Debata hian jala diojakhon Debata nasida di si asa adong
mangula jala mangaramoti porlak i dohot angka na asing na tinompa ni Debata
(Patudos: 1 Musa 2: 15). Sangkap dohot tujuan ni Debata Jahowa di hajolmaon
sangkap hatuaon do. Molo tung songgop pe ragam ni angka hasusaan na ro sian
portibi on do i, ala panghorhon dohot hinajorbut ala dosa i. Jala ingkon
haporseaonta do: Molo diloas Debata pe angka ragam ni hasusaan i
masa, laho patoguhon haporseaon ni angka na porsea tu Ibana do asa sai
tongtong marsihohot jala manghirim tu Tuhan Debata Jahowa.
2.
Hatorangan.
2.1. Debata
Do Silehon Aek Hangoluan.
Saluhut
do hita umbotosa, guna ni aek tu angka na mangolu. Molo so adong aek, ndang
adong hangoluan. Ala ni i do nang di tingki laho manodo sada inganan na naeng
parhutaan di halak Batak ingkon sai jumolo do dilului haroroan ni aek. Molo so
adong do mual di inganan i, olo do sundat di si gabe parhutaan. Mansai ringkot do di saluhut angka na mangolu aek,
lumobi di angka jolma. Di buku na margoar: Nipi ni Ama Ringkot taringot tu
Parsorion Ni Aek, na kinarang ni Arsenius
Lumbantobing. Dipatorang do di si taringot tu hasadaon ni aek. Sada do roha
di hami aek, ndang olo hami masibolatbolatan. Ala ni hasadaonnami antong, gabe
hami do na umbolon manang umbidang, ai toluparopat ni sisik ni tano on do
husirnip hami inganannami, gabe saparopat nama anggo darat. Nang taringot
haserepon ni aek pe tangkas dipatorang. Sai mangalului inganan na tumoruk do
hami, so olo hami sumuhar dompak dolok. Manang di dia pe hami aek, sai tu na
humolbung do mardalan, manuju dompak rura, sai i do hueahi hami. Tarida sian i
hasereponnami. Haserepon ni roha i do antong rahutrahut ni parsaoran dohot
dongan, na patoguhon paralealeon; i do na parohon haholongon ni roha ni dongan
tu iba. Anggo holan hasangaponna, hatimbulonna, hamoraonna manang hapistaronna
dipangasahon halak maradophon halak na dangol, na lea, na pogos dohot na oto di
tano on, tung tagamon ma piga halak na manghaholongi ibana? Debata
Jahowa do silehon aek hangoluan manang mual ni hangoluan. Ala ni i, hahalongi
ma Tuhan Debata silehon aek hangoluan di ngolum. Taargahon ma hangoluanta dohot
hangoluan ni donganta, lumobi tapasangap ma silehon hangoluan i, ima Debata
Jahowa. Unang ma taulahon ulaon na parohon mara tu ngolunta manang tu ngolu ni
donganta.
2.2. Hasonangan Do Jambar Ni Na Porsea.
Na
mangolu jala na mardalan do na porsea i di portibi on, alai ndada marharoroan
jala mian di portibi on saluhut angka na porsea i (Patudos Joh: 17: 16: Ndang na sian
portibi on nasida, songon Ahu na so sian portibi on). Salelang di
portibi on, tagamon do ro angka hasusaan jala marhoi angka na porsea i. Boasa?
Ala ni haporsuhon na mangonai tu nasida, panghorhon ni dosa i. Angka sitaonon
i, songon hataridaan ni hamamate ni Jesus do i di daging ni na porsea i. Lam
jonok do saluhut tu hamatean i, lam tunduk tu habusuhon (Rom 8: 20), alai dalan
manang proses na pinatupa ni Debata do i paubahon dagingta na lea i asa gabe
badia. Jala marhite naung pinaubaNa hita gabe badia: Gabe Boi Hita Pajumpang Dohot Ibana Na Badia. Ai ndang boi
pajumpang na lea dohot na badia. Ingkon jumolo do diparbadia na lea i asa boi
pajumpang dohot Ibana Na Badia i. I do asa didok di turpuk on ay. 4 i: “Idaonnasida
do Bohina...”. Na sian portibi on do daging i, sian tano jala ingkon
mulak do gabe tano, alai na sian ginjang do anggo tondi i, na marharoroan sian
Debata Jahowa na badia. Saleleng ngolu ni jolma i, na maringanan do tondi i
bagasan daging na olo busuk i. Ala molo, tujuan akhir ni tondi i, ingkon
tanggal jala malua sian hurungan ni daging i, dung i mulak tu Debata haroroanna
hian, jala i ma na ginoaran haluaon ni tondi. Nang par-Psalmen dihatindanghon
do di Psalmen 23: 6, “Tongon tahe denggan basa dohot asi ni roha
mangihutihut ahu saleleng ahu mangolu, jala dung mulak ahu masuhanku ma bagas
ni Jahowa salelenglelengna”. Bagas ni
Jahowa, ima inganan na sun denggan, bagas na so olo matapor. Bagas ni Jahowa
inganan hangoluan na so ra suda. Di si ndang
adong be na hona bura (ay. 3), jala ndang
masa be di si borngin, ndang ringkot be di nasida palito manang sondang ni mata
ni ari, ai sondangan ni Tuhan Debata do nasida (ay. 5). Ndang
diharingkothon hatiuron sinondang. Holan di portibi on do adong haholomon, jala
mansai diharingkothon angka jolma i do panondang di haholomon i. Di inganan
situjuan ni halak na porsea i, ndang adong di si haholomon ala sondangan ni Tuhan Debata do nasida.
2.3. Pasomalsomal Ma Marsaor Dohot Debata.
Saluhut
halak na porsea do manghirim jala manghasiholi, ia dung maarujung ngoluna sian
portibi on asa sahat ibana tu sambulo ni tondina ima surgo hasonangan manang
hangoluan na so ra suda na pinarade ni Debata di hajolmaon. Na gabe persoalan
boha do asa sahat jolma tu angka na hinirim ni rohana dung hasusuda ni bohalna?
Alus na jempek boi dohonon: Pasomalsomal
Marsaor Dohot Debata Uju Di Ngolum. Parsaoran ni halak na porsea maradophon
Debata uju di pardalanan ni ngoluna, i do na gabe gombaran (sorminan) tu ari
marsogot. Na so mungkin do boi marsaor ho, hamu, hita tu Debata di harajaonNa
i, molo di tingki ngolum pe ndang hea hita marsaor dohot Debata marhite
partangiangan dohot parsaoran na badia di bagasa joro i. Ngolu na manghasiholi parsaoran
tu Debata, di halak si songoni do adong panghirimon di parsaoran di Paradeiso.
Halak na masihol pajumpang dohot marsaor tu Debata ima halak na marhatopothon
angka pambahenan ni Debata di bagasan ngoluna siganup ari. Tung so adong do
halak mangadopi jala mamolus partingkian di ngoluna so sian pangantoion ni
Debata. Nang pe tutu sipata mangadopi ragam ni angka hamaolon hita, alai ingkon
talapati do i gabe patubu panandaon na lam tangkas tu Debata pardenggan basa
jala na gok asi ni roha i. Pamujian, parsaoran dohot parsombaon tu Debata, i do
na gabe hangoluan dohot haluan di saluhut angka na porsea.
3. Panutup.
3.1. Ngolu
ni saluhut halak na porsea ingkon patuduhon ngolu na sinondangan ni Tuhan
Debata Jahowa maniru pambahenan ni Tuhanta
Jesus, Anak ni Debata nasasada i na patuduhon sondang dohot hamuliaon ni Debata
tu angka siseanNa nang tu angka saluhut jolma na marhite panghobasionNa. Ai di
hadirion ni halak na porsea do talpe ulaon manghatindanghon pambahenan ni Tuhan
Debata, jala naeng ma songon i tongtong ngolu ni hita ganup jolma na porsea
naung dipillit jala diain gabe anak ni Debata (Patudos: Rom 8: 14). Tahalaputi
jala girgir ma hita patuduhon jala pataridahon sondang hamuliaon ni Debata di bagasan
ngolunta, marhite na mangharingkothon dohot manghangoluhon ngolu partondion.
3.2. Hadirion
ni halak na porsea ingkon gabe hahisaron songon bulung ni hau di turpuk on (ay.
2). Dihalomohon dongan dope haroronta di sada punguan? Manang molo dung ro hita
gabe mandao jala bubar halak. Marhite turpuk on di ajari do hita asa gabe
dilului jala dihalomohon halak hadirionta. Antong aha ma sipatupaonku asa
dihalomohon jala dihasiholi halak au? Gabe
hahisaran ma hita tu angka dongan. Ingkon boi do gabe obat di angka
humaliangna, boi mambahen lam tu sehatna angka parsaoran. Boha do
mambahen halak na di lambungmi asa gabe marlas ni roha molo di lambungna ho. I
do sipatupaonta ganup, asa gabe hahisaran tu halak. Biar roha gabe baliksa do
na ro, molo ro hita mandapothon sada punguan gabe didok tu hita: “Nunga ro
babiat i panoro”. Molo tung so boi dope hita gabe hahisaran tu na humaliang
hita, pinomat unang gabe patubu sahit ni dongan. Molo tung so tuk dope gabe pasupasu
tu halak, pinomat unang mambuat pasupasu na tu halak i jala unang ambati halak manjalo
pasupasu sian Tuhan i.
3.3.
Jamothon jala radoti Haulion Na Tinompa Ni Debata. Sian
mula ni panompaon i pe, nunga dipasahat Debata Jahowa mandat tu jolma asa diula
jala diramoti jolma i nasa na tinompa ni Debata. Molo holan laho na ringkot di
jolma i do angka na tinompa ni Debata, sadia leleng ma tahan marparbue hau na
di porlak i, sadia leleng ma asa habis angka dorbia/angka binatang na gabe sipangan
ni jolma i? Saluhut na tinompa ni Debata, ringkot sijamothononta asa adong udut
ni ngolu ni jolma i. Diparade Tuhan Debata saluhut angka na ringkot di ngolu ni
jolma i marjite jadijadian ni tanganNa, ndada holan na ringkot di ho i, ndada
holan na ringkot di generasinta i, alai pingkorhon jala sarihon tu generasi na
di pudim marhite na menjaga kelestarian alam, ai dohot do nang nasida na
niasian ni Debata Jahowa. Dilehon Debata Jahowa do parbinotoan, asa mamake
pasupasu ni Debata di bagasan biar maradophon Jahowa, ndang boi pintor
sipahabis (Mokus). Molo dilehon Ho di
nasida, dijomputi nasida, molo dipatedek Ho tanganmu, butongan nasida di na
denggan i. Molo
ditabunihon Ho bohim, holsoan ma nasida, ditait Ho ma hosanasida, monding ma
nasida, jala mulak nasida tu orbuknasida hian (Psalmen 104: 28 – 29).
Amen.
Komentar
Posting Komentar