MAMILLIT NA SINTONG DI BAGASAN TUHAN I

(Lukas 12: 49 – 56).

    1.  Hata ni Tuhanta Tuhan Jesus di ayat 49 i, na mandok: “Na ro do Ahu mandanggurhon api tu tano on”, lapatanna ndada naeng manurbu manang manutung portibi on. Ala ni i taparrohahon ma jolo pangantusion taringot tu api: Parjolo, Boi do api i songon tanda haroro ni Debata patuduhon hadirionNa tu angka naposoNa manang tu halak angka na mangihuthon Ibana. Di na pinarmahan ni si Musa birubiru ni si Jetro, simatuana i, sahat ro di dolok ni Debata, ima dolok Horeb, di bereng si Musa ma api marsigorgor di rambaramba, alai ndang olo suda manang ndang mosok ramba i (2 Musa 3: 2). Paduahon, songon simbol ni Tondi Parbadia do i. Di ari palimapuluhon, ima ari Pentakoste, pungu ma angka sisean ni Tuhan Jesus di sada inganan. Tompu tarbege jala masa ma soara songon  parngongos ni alogo na gogo na mamolus sian banua ginjang, gabe di gohi ma inganan ni angka sisean i. “Jadi tarida ma di nasida suman tu dila ni api na marjillamjillam, disonggopi ma ganup nasida. Gabe gok Tondi Parbadia ma nasida saluhutna...” (Ulaon 2: 3 – 4).

2.      Patoluhon, songon na di turpuk on api na nidokNa ima Hata Ni Debata na binoan ni Tuhan Jesus. Songon Api do Hata Ni Debata manang Barita Na Uli na binoan ni Tuhan Jesus laho papitahon haporseaon ni halak naung masuk tu harajaon ni Debata marhite Pandidion Na Badia i.  Olo mangihuthon Tuhan Jesus, ndada naeng gabe marsonangsonang, alai ingkon gabe manuhuk silang do mangihuthon pambahenan ni Tuhan Jesus. Laho mangadopi saluhut angka ragam ni parsorion i (Manuhuk silang), ingkon gabe tiruan do ngolu ni na porsea di habengetonna mangadopi ragam ni angka sitaonon i. Asa molo masa pe sitaonon, ingkon lam patoguhon haporseaonta ma i, jala asa maporus hita tu Debata di sitaonon i. Ingkon rajumanta do sitaonon i gabe laho papitahon haporseaonta do i, asa di si do tangkas taboto api na ni danggurhon ni Tuhan Jesus i, ima Hata Ni Debata na ingkon galak di tongatonga ni portibi on.

3   3.  Tarbarita do Tuhan Jesus “Siboan Hadameon manang Raja Ni Hadameon”. Jala i do na tingkos. Tutu situtu do siboan hadameon dohot haluaon do Tuhanta Jesus Kristus i, ai nunga dipadame Ibana hita jolma dohot Debata AmaNa pargogo na so hatudosan i marhite na manaon siak ni bagi dohot sumeahon hosaNa di na mate tarsilang Ibana di hau na pinorsilang. Hata ni Tuhanta Tuhan Jesus mandok: “Dame do hutinggalhon di hamu; dame na di Ahu, i do hulehon di hamu...” (Joh. 14: 27). Boi do kontroversi (Maralo) ayat tu ayat na adong di bagasan Bibel i, ala ni i unang tabahen pangantusion na harafiah laho mangantusi turpuk on.

4   4. Di bagasan turpuk on didok Tuhan Jesus do di ayat 51 i:  “Na dirimpu rohamuna do, na laho mangalehon dame Ahu tu atas tano on, umbahen na ro? Nda tung, hudok ma di hamu: Panirangon do tahe”. On ma pandohan na kontroversi tu pandohan “Siboan Hadameon” Tuhan Jesus. Panirangon na songon dia do na nidokNa di son? 1. God First, patujolohon Tuhan di bagasan ngolunta. Ndang na mandok na so ringkot keluarga, ai Tuhan Jesus pe ro tu portibi on marhite sada keluarga do. Sian pengalaman ni Tuhan Jesus, mansai jotjot do tinggal angka keluarga ala ni na manghalaputi angka ulaon na ringkot di harajaon ni Debata. 2. Haroro ni Tuhan Jesus gabe panirangon do di tongatonga ni keluarga na so boi sakeluarga i sarombang mangihuthon Jesus Kristus. Halak angka  na porsea i, taruli hangoluan na saleleng ni lelengna di Harajaon ni Debata, alai angka na so porsea i pataruonNa ma tu api na so ra mintop, i do panirangon na nidokNa. 3. Ingkon boi do saluhut angka na porsea di pardalanan ni ngoluna laho manirang hadirionna sian angka na adong di portibi on, unang gabe siula hajahaton. Ingkon gabe siulahon lamo ni roha ni Tuhan i ma.  Ala ni i do didok Tuhan Jesus di Lukas 9: 62, Alai ninna Jesus ma mandok ibana: “Na manjama ninggala, huhut mamereng tu pudi, tung na so tau ma i tu harajaon ni Debata.”  Molo maninggala na so jadi idaon tu pudi asa tulus do angka ulaon i. Unang diida sadia bidang naung niulana, alai asa diida jala ditatap do bidangna i angka na naeng siulaonna. Maninggala, sumansuman ni na mangula di harajaon ni Debata do i. Boasa ndang sai ringkot berengon tu pudi, tu bogas ni paninggalaan i? Alana, molo sai binereng naung tininggala i, molo so tingkos, pintor pangarimason do marnida horbo i dohot marnida hadirion ni paninggala i sandiri.  Jadi sapala naung tininggala, maninggala ma jolo. Dung sidung pe maninggala, asa pinature angka na so denggan di bogas paninggalaan i.