Ilustrasi: Kampak Mas.

           Di sada tingki didapothon Nai Freddy ma Am. Freddy tu lapo na tongon marsatur amantana i di lapo i donot donganna. Didok Nai Freddy ma tu amantana i: "Eeeee.... amang ni gellengku Am. Ni Freddy, na boha nama hita. Ai tung lao ma ho marsoban. Ai ndang diboto ho nunga habis sobanta. Ai boi do pakkeon pat ni hodamuna i bahenon mangalompa? Na boha do amaama songon ho?”. “Olo omak ni Freddy... jolo mate jolo on”, ninna amanta i lambok mangalusi. “Jolo mate... jolo mate... manang na ho ma hupamate”, ninna inanta i mardongan muruk di lapo i. Maila do Am. Freddy umbege muruk ni inanta di lapo i, laos meret ma Am. Freddy sian lapo i mulak tu jabuna. Dung sahat di jabu dipareso ma tutu, na so adong be soban sipangkeonasida. Borhat ma Am. Freddy tu tombak naeng mambuat soban, diboan ma kampak laho marsoban. Alai di na mardalan i ibana tu tombak laho mambuat soban, sai dipingkirpingkiri ibana ma ila ni rohana ala ni parmuruk ni inantana i nangkin di lapo i. "Ai na so boi be ulaning denggan dihatahon parsonduk bolonkon tu ahu, pola manaon hailaon iba di lapo i?", ninna Am. Freddy di bagasan rohana.

Dung sahat di tombak i, di na naeng manaba sada hau Am. Freddy sambil maranganangan, gabe runsur (tergelincir) ma patna. Tuani do mintor hatop ditiop ibana sada hau na gelleng sitiopanna gabe ndang madabu ibana alai molo kampakna i laos malua sian tanganna jala madabu tu lombang i. Ala ni na masa i, lam mabiar do ibana. Sai dipingkiri Am. Freddy ma: "Boha ma banenonku mamboan soban hape kampak pe nunga mago, suda ma au annon remengan ni inantaku muse", ninna rohana.

Hape na so pamotoanna pintor ro ma sahalak natuatua , ninna ma: "Aha do na mambahen marsak roham amang?. Dialusi Ama. Ni Freddy ma: "I ma da ompung diboto ompung, diboto ho do na di bagas rohaku. Na marsak situtu do ahu, ala mago kampakku, naeng tarsulandit ahu nangkin gabe madabu kampak i tu lombang an. I do mambahen sai marsak ahu, gabe sai disonggahi inantakku ma ahu annon di jabu, molo mulak ahu hape ndang mamboan soban".

Huhut patuduhon kampak na sian Perak didok ompung i: "On do kampakmi?". Alus ni Am. Freddy: "Ndang ompung...!". Dipatudu muse kampak sian Perunggu: "On do..?". Diialusi Am. Freddy "Ndang ompung...”. Patoluhalihon, dipatudu ompung i muse kampak sian Mas: "On do kampakmi...?". Tong do dialusi Am. Freddy: "Ndang kampakku i ompung, ai sian bosi do kampakku...".

Halak na jujur do hape ho. “Na.. on do kampak mi, ala halak na jujur do ho, hulehon ma di ho parbue ni hajujuronmi: Boan ma dohot kampak na tolu on", ninna ompung i ma tu Am. Freddy jala las situtu ma rohana. Dungi marsoban ma ibana jala diboan ma deba soban i mulak tu huta.Dung sahat Am. Freddy di jabu dilehon ma tu inantana i kampak jala longang ma antong inantana i mangida kampak na tolu i lumobi kampak mas i. Disungkun Nai Freddy ma sian dia do asa adong kampak na binoan ni amantana i. Denggan jala jojor do dipatorang Am. Freddy sude na masa i dohot parjumpangannna tu sahalak natuatua na di tombak i. Umbege cerita i, marsogotna i, tibu di manogot ni ari lao ma inantana i tu tombak i, tujuanna laho manjumpai jala mangido arta tu natuatua i, ala gila harta do inanta i. Di na mangalului natuatua i Nai Freddy, hape lilu ma ibana di tombak i ai so hea didalani ibana i, laos ndang diboto be mulak tu huta. Hape amanta nunga sai paimahon di huta.

Sahat tu bot ni ari sai tarpaima amanta i, alai so marnamulak inanta i. Ujungna dilului Am. Freddy ma muse tu tombak i. Ndang sadia leleng laos pajumpang muse tu natuatua na jumpangna nantoari. Disungkun natuatua i ma muse A. Freddy: "Aha do na niluluanmu muse di son amang...?". Ninna Am. Freddy ma mangalusi : "Ro inantakku nangkin tu tombak on, hape laos lilu, ndang diboto ibana mulak tu jabu”. Huhut mamboan sahalak anakboru, ninna natuatua i ma: "On do inantami?". Hatop ma dialusi Am. Freddy : "I do, on ma ibana". Mansai songgot ma roha ni natuatua i di dok ma: "Bah... boasa songon i ho?, Nantoari jujur hian do ho tu ahu?". Didok Am. Freddy ma mangalusi: "Molo hudok, ndang i, lehononmu ma tu ahu 3 halak nai, songon kampak nantoari i. Sian jabu sada do huboan, hape mulak gabe opat. Ndang habalanjoan au sude i!". Hahaa...... hahaaaa.........