PARTORDING NI ACARA PARMINGGUON

           MINGGU TAON BARU, 01 JANUARI 2017.

& Ev: Jesaya 63: 7 – 9.                                     & Ep: Heber 2: 10 – 18.

           

              TEMA:

MANGHATINDANGHON DENGGAN BASA NI DEBATA

                                                                                 

   (Jesaya 63: 7 – 9).

HURIA KRISTEN BATAK PROTESTAN

DISTRIK  IV TOBA

 I.     PANGARADEON:

        -  Parhalado martangiang di Bilut Parhobasan – borhat tu inganan parmingguon.

         -  Prosesi, laos jongjong ma sude  Parhalado di jolo (huhut mangkuling giringgiring).

 II.  PARMINGGUON (U= Uluan, H= Huria, S= Sude, A= Ama, I =Ina, N= Naposo Bulung).

1.   Jojou Parsombaonn Tu Debata

U:   Huria na hinaholongan di bagasan goar ni Tuhanta Jesus Kristus. Sadari on, tanggal 01 Januari 2017, ima Bona ni taon on. Molo ojak pe ngolunta sadari on, tu sada taon na imbaru muse, asi ni roha ni Debata do na patariparhon hita sian taon 2016 boi tolhas di bona ni taon na imbaru on. Dipataru Debata hita di bagasan dame dohot hasonangan. Ala ni i, hupasahat hami tabe Selamat Taon Baru sian hami saluhut Parhalado tu hamu ruas ni hurianta.

       Parhalado: Selamat Taon Baru ma di hita saluhutna!

      

R: Selamat Taon Baru ma nang di hamu amanami dohot inanami parhaladonami.

U:   Songon tanda las ni rohanta sadari on, laho mambongoti bona ni taon on, tapuji ma Debata Jahowa. Marende ma hita sian Buku Ende No. 14: 1 – 3 “Puji Hamu Jahowa Tutu”                                           BL. 57

                (Hundul ma ruas - Parhalado masibuat hundulanna be)

1.  Puji hamu Jahowa tutu, pardengganbasa,

     Parasiroha salelengna i.

      Pardengganbasa i, parasiroha i.

2.   Ingot tongtong, ale tondingkon,

      Sude na denggan na dipasonggop Debata tu ho.

      Denggan basaNa do na pangoluhon ho.

                                    = musik/ay. 3 jongjong =

3.   Nda tung adong, pargogo tongon,

      Na martudosan, tu Tuhan Debata di surgo i.

      Sun hinagogo, sun hinagogo i.

    

2.  Votum – Introitus – Tangiang

U:  Marhitehite goar ni Debata Ama dohot goar ni Anak-Na Tuhan Jesus Kristus dohot goar ni Tondi Porbadia na tumompa langit dohot tano on. Amen. Sai mangaranapi do matangku dompak angka dolok, sian dia do ulaning ro pangurupion tu ahu?.

H:   Sian Jahowa sitompa langit dohot tano on sambing ro pangurupion ianggo tu ahu.

U:  Ndang tagamon loasonna tarsulandit patmu, ndang tagamon nok mata ni sijaga ho. Ida ma, ndang olo nok mata jala ndang olo modom ianggo sijaga Israel. Sai jagaon ni Jahowa do ho sian nasa parmaraan; Sai jagaonna do tondim. Sai jagaon ni Jahowa do ho laho ruar dohot bongot olat ni on ro di saleleng ni lelengna.       Haleluya.

H:  (mangendehon): Haleluya – haleluya – haleluya.

U:  Martangiang ma hita. Ale Tuhan Debata! Sian asi ni rohaM do umbahen na sahat hami tu taon na imbaru on; Ho do na mangaramoti hami di bagasan taon naung salpu i. Sai asi ma rohaM, sai unang tulak hami nuaeng, sai dongani ma hami di bagasan taon na imbaru on. Ho do Bonana dohot Ujungna. Namarsalpuan do ianggo taonnami alai na hot ro di saleleng ni lelengna do angka taonMu. Sai pahot ma haporseaonnami tu Ho, asa margogo hami mambongoti dohot mamolus taon 2017 on, ala ni  AnakMu Tuhan Jesus Kristus, Tuhannami. Amen.

 4.   MARENDE No. 65 : 1 + 2        Patimbul Be Ma Sangap

       1.  Majumpang taon imbaru on, di au dibahen Jesus

            Dibaen rohaNa di au on, basaNa dipatulus

            Ibana do manogu au, saluhut jea dipadao, mambaen las ni rohangku

           

       2. Dibahen i hupuji Ho, O Jesus Debatangku

            Ai ndang hea mangulon Ho, mambaen partuaonku

            Rohangku panuratan ni, godang ni denggan basaMi, ai Ho do pangurupi

 5.   Patik Ni Debata:

       U:   Patik ni Debata di bona ni Taon 2017 on ima  sian  Patik  Parjolo dohot lapatanna. Songon on ma didok di si:  Ahu do Jahowa Debatam! Ninna Debatanta. Ndang jadi marangkup Ahu bahenonmu Debatam.

H:  Lapatanna. Ingkon umbiar rohanta jala humolong jala umpos mida Debata asa mida nasa na adong.  

U:  I do sahatna. Antong rap mangido gogo ma hita sian Tuhan Debata laho mangulahon PatikNa!

S:  Ale Tuhan Debata, sai pargogoi ma hami mangulahon na hombar tu PatikMi. Amen.

 6.  Koor         :

 7.  Marende No. B.E. No. 69: 2 + 3             Ungkap Bahal Na Ummuli  Bl. 84

2.   Pingkiranku ulaonku, tau pasangap Ho ma i

      Dungo manang modom ahu, Ho tongtong di lambungki

      Nang lao ruar msuk pe, Ho ma donganki muse                    (ay. 3 jongjong)

3.  Taon parasinirohaon,  baen di au sandok  taon  on

     Lam pahot ma hasesaan, ni dosangku di au on

     Holan Ho do Jesuski, tuk pasaehon dosangki

 8.  Manopoti Dosa Dohot Bagabaga Tu Hasesaan Ni Dosa

U: Ale Amanami jala Debatanami, na di banua ginjang, Pargogo na so hatudosan! Pardengganbasa do Ho, jala ro di salelenglelengna do asi ni rohaM. Sai marpamuati ma rohaM di hajahatonnami, jala sai unang be ingot angka dosanami.

H:   (Mangendehon) B. E. No.182: 2       Haholongan Na Badia            BL. 24

2. Husolsoli do rohangku, na gok dosa i tongtong

    Ai godang ariaringku, na hubahen ambolong

U:   Ai jotjot do hami mardosa maradophon Ho, jala jotjot do husungguli hami rimasMu marhite sian pangalaosionnami, di hataM, Ale Tuhan Jahowa. Sai unang paingotingot pangalaosionnami, unang alang asi ni rohaM, sai urupi ma hami, Ho ale Tuhan Debata hatuaonnami.

H:  Palua hami, jala sesa dosanami, ala ni AnakMu, Tuhan Jesus Kristus, Tuhannami. Amen.

S:   (Mangendehon) B. E. No.182: 3       Haholongan Na Badia    BL. 24

3. Sai jotjot do hutadingkon, dalanMi na tigor i

    Kristen au hape  hutondong,  dalan hamagoan i.

U: Bagabaga ni Debata taringot tu hasesaan ni dosa. Parasi roha jala pardengganbasa do Jahowa, lambat tarrimas jala Parasiroha godang. Ndang dibahen tu hita hombar tu angka dosanta, jala ndang dibaloshon tu hita hombar tu angka hajahatonta. Songon asi ni roha ni amaama mida angka anakna, asi ni roha ni Jahowa di angka na manghabiari Ibana. Hasangapon ma di Debata na di ginjang!

S:   Amen.                                                                                         (Hundul)

 9.  Koor         :

10.  Marende No. 68: 4 - 5                Ihuthon Au Sude Hamu                   BL. 93

4.  Alai na niondihonMi, do au umbaen mangolu .

      Ho do mandok tu Ama i,  sai loas ma mangolu.

      Hau on, asi ma rohami, taon i pe lalu uhumMi.

5.   O Jesus sai urupi au, di taon na ro mamboan.

      Parbue angka na sai tau, padaohon hamagoan.

      Sai pargogoi ma au tongtong, pasangap Ho di ngolungkon.

11.  Epistel      :   Heber 2: 10 – 18.

U:   Ai Ibana, hapatean jala parmulaan ni nasa na adong, dung jolo ditogihon Ibana torop anak tu hasangapon, tama Ibana, parmulaan ni haluaonnasida i, dipajongjong sun denggan marhitehite sitaonon.

H: Ai marharoroan sian na Sada do saluhutna, na pabadiahon dohot na pinabadiana i; ala ni i ndang dihailahon Ibana, manggoar nasida angka anggina.

U: Ai ninna do: “Baritahononku do Goarmu tu angka anggingku; di tongatonga ni huria i do endehononku Ho!”

A:   Dung i muse: “Ibana do bahenonku haposanku!” Jala muse: “Di son do Ahu dohot dakdanak i, angka na nilehon ni Debata tu Ahu!”

I:    Asa songon dakdanak partohap di mudar dohot di sibuk, gabe suman do dohot Ibana partohap disi, asa marhitehite hamatean i dipasohot Ibana sibolis i, na marhuaso mambahen mate`

N:  Asa dipalua sasude na pinarhatoban ni biar ni roha managam hamatean, saleleng mangolu.

A:  Ai apala angka surusuruan disarihon, pomparan ni Abraham i do!

I:    Ala ni i, ingkon gabe dos situtu Ibana tu angka anggina asa gabe parasiroha Ibana jala sintua ni malim haposan maradophon Debata, laho pasaehon angka dosa ni bangso i.

N:  Ai intap naung marsitaonon Ibana di na tarunjun i, haurupan Ibana do angka na tarunjun i.

U:   I do sahatna. Martua do na tumangihon Hata ni Debata jala na umpeopsa.

S:    Amen.

 12.  Koor       :

 13.  Marende B. E. No. 70: 5 – 6     Naung Salpu Taon Na Buruk I       BL. 36

5.   Urupi hami mangoloi, patikMu jala pargogoi

      Lao manundalhon dosa i, nang nasa jat ni rohangki

      Lao manundalhon dosa i, nang nasa jat ni rohangki

6.   Lam jonok taiti hami on, tu hangoluan na tongtong

      Pahot ma di huriaMi, jambarna na sumurung i

      Pahot ma di huriaMi, jambarna na sumurung i                  (ay. 6 jongjong)

 14.  Mangh. Haporseaon                 :

                                                 

 15.  Tingting/Sunggulsunggul         :

 16.  Mandok Hata                            :   (Diatur Ma Ise Utusanna)

            1.   Sian Sikola Minggu                       4.   Sian Ama

            2.   Sian Naposo Bulung                     5.   Sian Anak Ranto

            3.   Sian Ina                                         6.   Sian Parhalado

 17.  Tangiang  Pangondianon         :

 20. Marende B. E. No. 64: 1....        Naung Moru Do Muse Sataon        BL. 192

                                                (Papungu Pelean  Ia & Ib)

  1.  Naung moru do muse sataon huhut lam suda bohalhi

       Beha do au na sai laon ture do pangalahongki

       Lam ganda haporseaonku nang holong ni rohangku pe

       Di Jesus dohot Debatangku nang di donganku sasude

  2.  Aut alusanku Debatangku ra tung maila au di si

      Marningot salpu ni rohangku  ro di sude ulaonki

      Ai dosa do binaen ni tangan gok dosa nang rohangku pe

      Nang pat nang mata nang pamangan luhut marsala do hape

                                           ===  musik  ===

3.   Aut nunga mate au nuaeng di dia tondingki tahe?

      Di hasonangan do ulaning rap dohot na badia i?

      Mamuji Debata do ahu dibaen asi rohaNa i

      Manang na hona uhum ahu di api na so mintop i?

4.   Ndang dapot bilanganku dosa naung huulahon na sailaon

      Huhut ndang harajuman basa  ni Tuhan Jesus na sailaon

      Ndang dibaloshon Ho, Tuhanku tu au hombar tu dosangki

      Sai dipalambas  Ho rohaMu marnida pangalahongki

                                           ===  musik  ===

5.   Dibahen i antong hupuji denggan basaM sadari on

      Ai pineakkon rujiruji,  i do na dapot sai tongtong

      O Jesus na marholong roha, ingkon hupuji goarMi

      Dibaen saluhut denggan basa, tu ahu pinasahatMi

6.   Antong asi rohaM dongani, ma au tongtong tu jolo on

      Pasahat ma au musengani, tu surgo dung tos hosangkon

      Na olo do au mangihuthon, hataM asal mangolu au  

      Naeng las rohangku pararathon, baritaMi lam tu na dao.

 21.  Jamita : Jesaya 63: 7 – 9

 22.  Marende No. B. E. No. No. 66: 1...      Debata Baen Donganmi   BL. 52

                                                (Papungu Pelean II)

1.   Debata baen donganmi, lao mangula ulaonmu.

      Baen Ibana haposanmu, sai paserep rohami

      Debata baen donganmi, Debata baen donganmi

2.   Debata baen donganmi, molo Debata donganmu

      Ndang tarbahen ho be lilu, sai ture do langkami

      Debata baen donganmi, Debata baen donganmi        

                             ===  musik  ===

 3.   Debata baen donganmi, sai na saut do ulaonmu,

       Sai na tulus do sangkapmu, jala sonang rohami

       Debata baen donganmi, Debata baen donganmi

 23.  Parsuruon.

 U: Dongan sahaporseaon, huria na hinaholongan ni Tuhan Jesus Kristus. Nunga tajalo bohal ni partondionta ima hata ni Debata. Jala i do na pabotohon tu hita naung dipatulus Debata bagabagaNa tu hita sian taon na salpu sahat tu bona ni taon on. Alani i, gabe na tinompa na imbaru ma hita, suman tu Debata di bagasan Jesus Kristus.

H:  Sai dipargogoi Tuhan Debata dohot AnakNa Tuhan Jesus Kristus dohot Tondi Parbadia ma saluhut parhalado nang ruas ni huria pe, laho mandalani dohot mamolus taon 2017 on.

U:  Sai donganan ni Tuhan i do saluhut angka na porsea, rasi rasa ro ajal ni hasiangan on. Amen

 24.  Tangiang Pelean – Tangiang Taon Baru – Ale Amanami – Pasupasu.

  

           ** Praeses, Pandita Dohot Sude Parhalado HKBP Distrik IV Toba **

                                                                   Pasahathon:

SELAMAT TAHUN BARU  01 JANUARI 2017.

TUHAN YESUS MEMBERKATI.

Syalom...

Pdt. Ahab Tambun, STh .