PHD Ama: Minggu
Jubilate, tanggal 22 April 2018.
Ditangihon Tuhan I Do Angka Na Joujou
(Pilipi 2: 25 – 30)
- Marende No. 112: 1 – 2
- Tangiang Pamuhai
- Manjaha Turpuk : Pilipi 2: 25 – 30.
- Hatorangan.
Di bagasan turpuk on dipatorang do parsorion manang parungkilan ni
Apostel Paulus, ala sahalak donganna mangula dohot donganna saparungkilon na
margoar si Epaproditus tongon di bagasan parsahiton. Di ayat 25 i: “…si Epaproditus donganku mangula jala
marungkil…”. Saluhut do umbotosa ia
si Paulus sahalak Apostel na mansai luar biasa, na mambaritahon Barita Na Uli di
bagasan parsitutuon sahat ro di ujung ni portibi on jala nunga godang angka
gareja dipajongjong ibana. Boasa didok Apostel Paulus donganna rap mangula jala
marungkil si Epaproditus? Si Epaproditus ima sahalak “Na mamboan na ringkot di Apostel Paulus = Pembawa Titipan” (Bd. Ay.
25). Sian huria Pilipi tu huta Rom diebati si Epaproditus do Apostel Paulus
na tongon di bagasan hurungan (Penjara) laho pasahathon angka na ringkot di
Apostel Paulus na tinongos ni huria Pilipi, jala dungkon ni i mamboan barita ni
Apostel Paulus tu huria Pilipi. Ulaon on gabe ulaon rutinitas do di si
Epaproditus. Mansai las do roha ni Apostel Paulus di si, ala pas di tingkina (Pertolongan Datang Tepat Pada Waktunya).
Jala dipanghilalahon Apostel Paulus do holong ni roha ni huria Pilipi tu ibana
marhite angka tongosan na pinasahat ni
si Epaproditus. Na niula ni si
Epaproditus mansai arga do i di adopan ni Debata. Di Mateus 10: 41 – 42 didok: “Na manjangkon panurirang, ala targoar
panurirang, dapotan upa ni panurirang; na manjangkon partigor, ala targoar
partigor, dapotan upa ni partigor. Na painumhon aek tabar santahu tu sahalak
sian angka na metmet on, ala targoar siseanku ibana: Na tutu situtu do na hudok
on tu hamu, ndang na mago upana”.
Ndang apala dipatorang di turpuk on aha do sahit na songgop tu si
Epaproditus. Alai na pasti, si Epaproditus na sinuru ni huria Pilipi mandapothon
Apostel Paulus madabu tu bagasan parsahiton. Jala tutu do ibana marsahit pola
matemate ne. Dung tarbortik Parsahiton ni si Epaproditus tu huria Pilipi,
marsak do huria Pilipi umbege barita i jala si Epaproditus pe humasusa do ala
diboto ibana sahat barita parsahitonna i tu huria Pilipi. Ndang apala haru
tangkas sadia leleng si Epaproditus na di bagasan parsahiton i, alai marhite asi ni roha ni Debata malum do
sahitna i (ay. 27). Mansai tangkas
do dihatindanghon Apostel Paulus ia hamamalum ni parsahiton ni si Epaproditus
donganna i, holan ala ni asi ni roha ni Debata do. Jala i do, nang
haporseaonta. Hamamalum ni angka ragam ni sahit marharoroan sian Debata do i,
Ibana do Pandaoni Bolon i. Molo tung pe talului jala tapangke angka obat holan
parhitean do i, anggo hamamalum ni parsahiton sian asi ni roha ni Debata do.
Pengusaha Na Marsahit Stroke.
Di sada tingki marsahit stroke ma sahalak ama pengusaha ala tinggang di
kamar mandi. Nunga pola saminggu (7 ari) amanta i menginap di ruang UGD di sada
ruma sakit. Papitu bornginhon uju tarlalap modom sude angka na manjaga ibana,
ro ma sahalak Surusuruan di bagasan nipina mandok tu ibana: “Molo di bagasan 2 ari on adong 40 halak na
manangianghon ho asa malum, mangolu ma ho. Alai molo di bagasan 2 ari on ndang
sahat 40 halak na manangianghon ho, marujung ngolu ma ho”. Dungi dialusi
amanta na marsahit i ma Surusuruan i: “Molo
holan 40 halak do, mura do i Tuhan”. Marjanji do Surusuruan i ro mandapothon
amanta i muse 1 jam andorang so habis tingki naung binuhul nasida. Dungi
ditinggalhon Surusuruan i ma amanta i.
Pasia (9) arihon, boho di pukul 23.00 WIB ro ma muse Surusuruan i
mandapothon amanta i. Di bagasan panghirimon disungkun amanta i ma Surusuruan
i: “Tuhan… molo marsogot pagi, nunga boi
ahu mulak sian Ruma Sakit on dibagasan hahipason? Alana pasti do godang halak
na manangianghon ahu, holan angka pangurupi/karyawan di perusahaanku pe marribu
halak toropna. Molo mangalului holan 40 halak do na manangianghon ahu asa malum
ndang apala na maol i”. Di bagasan soara na lambok dialusi Surusuruan i ma:
“Nunga hulului angka halak na tulus
manangianghon ho amang, alai rasi rasa nuaeng holan 4 halak do, hape tingkim
holan 60 menit nama. Jala hira na so mungkin do di partingkian na jompok i
adong 36 halak laho tumangianghon ho”.
Dungi dipabotohon Surusuruan i ma tu amanta na marsahit i, angka ise ma
si opat halak na so mansadi manangianghon hamamalum ni parsahiton ni amanta i.
Parjolo, ima ina pardihuta ni pengusaha na marsahit i, dungi tolu halak
ianakkonna. Mulai dung masuk amanta pengusaha i tu Ruma Sakit ndang mansadi
nasida martangiang, arian dohot borngin mangido hamamalum ni parsahiton ni
amanta i. Didok amanta i ma tu Surusuruan i: “Molo sian angka naposongki (karyawan), manang sian alealengku ndang
adong na manangiangkon ahu Tuhan?”. Alus ni surusuruan i: “Adong do na martangiang sian nasida, alai
ndang sian bulus dohot tulus ni roha, gariada adong do sian nasida las rohana
marsahit ho ala hea dipecat ho karyawanmu na so marsala. Saleleng on ndang parduli ho di keluargam
dohot tu angka donganmu pe lomolomom do manghatai, jala ndang di haringkothon
ho ngolu ni partondionmu”.
Umbege hata ni Surusuruan i sumolsol bagi ma amanta i. Sai dirimangrimangi
amanta i ma saluhut angka pangalahona na saleleng on na so tama maradophon
keluargana, donganna lumobi maradophon Tuhan i, huhut maraburan ma ilu sian
simalolong ni amanta i. Sai dipingkirpikiri huhut sai dirimangi amanta i ma di
borngin i, jala dibereng ibana jam dinding nunga pukul 23.30. Dipanotnoti
amanta i ma humaliang, diida amanta i anakna dua halak modom di kursi ni Ruma
Sakit i, dungi dibereng ibana ma muse inantana tarpodom di kursi ni Ruma Sakit
i huhut mangabing anaknasida siampudan ala naung loja mangurus amanta na
marsahit i. Laos tamba doras ma ilu ni amanta na marsahit i mangida saluhutna
i. Di bagasan ilu na maraburan dipatulus amanta i ma martangiang: “Ale Tuhan…, nunga marsala ahu dompak Ho
songoni nang maradophon keluarga. Ndang hupajongjong diringku gabe tiruan di
tongatonga ni keluarga, nang tu angka donganku pe olo do sipata ndang marantan
ahu manghatai. Marpamuati ma rohaM Tuhan mida hahuranganki, lehon ma tingki di
ahu laho paubahon roha dohot pangalaho, amen”.
Tompu songgot ro ma hata ni Surusuruan i tu amanta i: “Ndang jadi ho mate di borngin on, ala adong
do lobi sian 40 halak na tumangianghon ho asa malum sian parsahitonmi”. Tarsonggot
jala heran ma amanta i. Angka ise do i ulaning, na olo jala na marsitutu
martangiang mangido hamamalum ni sahithi, ninna roha ni amanta i. Didok
Surusuruan i ma tu amanta i: “Sabulan
naung salpu laho do ho manjumpai angka na sopot so marama, so marina (Panti
Asuhan). Jala dipasahat ho do pangurupionmu tu nasida”. Memang dipasahat
amanta i do bantuanna tu Panti Asuhan i, alai ndada sian asi ni rohana laho
pasahathon i, holan naeng mangalului popularitas do amanta i. Menarik perhatian
ni pamarenta dohot mambuat roha ni angka investor do amanta i. “Hape na sogot pagi adong ma sahalak sian
anggota Panti Asuhan i manjaha barita taringot tu parsahiton ni sahalak
pengusaha, nunga pola 7 ari di ruang UGD di Ruma Sakit. Jala tangkas do ditanda
nasida rupa pengusaha na marsahit i, i ma ho. Dungi sepakat ma saluhut angka
anggota ni Panti Asuhan laho tumangianghon ho asa malum sahitmi, torop nasida
lobi sian 40 halak”, ninna Surusuruan i ma tu amanta na marsahit i. Gabe
malum ma amanta pengusaha i. Didok hata ni Tuhanta di Jakobus 5: 16 songon on: “Antong, masitopotan dosa ma hamu dohot
masitangiangan, asa malum hamu. Na margogo situtu do tangiang ni partigor, molo
dihaburjuhon”.
- Diskusi
1. Hea dope hita manangianghon angka na ringkot
di donganta? Manang na ringkot di hita pe, olo sipata ndang taingot manangianghon.
2. Marguna manang marlapatan dope hita tu na
humaliang hita? Marojahan tu Mateus 5: 13 – 14: Hamu do sira ni tano on! Hamu do Panondang ni portibi on!
- Marende No. 167: 1 – 2
- Tangiang Pangondianon
- Marende No. 669: 1 … (Papungu
Pelean).
- Tangiang Panutup.
Pdt. Ahab Tambun, STh.
(Pandita HKBP Ressort Lumban Julu).
Komentar
Posting Komentar