PHD Ama:  Minggu Misericordias Domini, tanggal 15 April 2018.  

                                   

Dipodai, Diapuli Dohot Diapoi Songon Pangapoi Ni Ama Di Ianakkonna.

(1 Tesalonik 2: 11 – 12).

1. Marende No. 24: 1 + 5
2. Tangiang Pamuhai
3. Manjaha Turpuk      :  1 Tesalonik 2: 11 – 12
4. Hatorangan.

            1.    Pamuhai.

Saluhut do angka natuatua mamodai jala mangajari angka ianakkonna. Tujuanna, asa anggiat anakna i gabe anak na burju, anak sioloi poda, siboan goar jala asa gabe anak na hasea i tu joloan ni ari di adopan ni jolma lumobi di adopan ni Debata. Sada hasomalan di angka natuatua najolo, tung sabarani do angka na tuatua paborhathon angka ianakkonna tu tano parserahan laho marsikola manang mangalului parkarejoan molo so jolo tangkas dilehon angka poda tu nasida. Deba sian poda i, na mansai tangkas dope ni ingot sahat tu nuaeng on ima: Pantun Do Hangoluan, Jala Tois Do Hamagoan. Molo pantun do marpangalaho angka anakna i, adong panghirimon dapotan hangoluan (dalan ni ngolu) di tano parserahan. Jala molo tois do marpangalaho hamagoan ma na gabe upana. Hombar tu si ma jotjot didok angka natuatua: Tinallik Bulung Sihupi Pinarsaung Bulung Sihala, Unang Sumolsol Di Pudi Ndada Sipaingot Na So Ada.

2.    Gogo Ni Poda dohot Pergeseran Ni Zaman.

Hagogoon ni sada poda na pinasahat ni natuatua tu ianakkonna tergantung tu karakter ni silehon poda i do (Kekuatan suatu nasehat tergantung kepada karakter dari si pemberi nasehat). Lapatanna, molo dipodai sahalak natuatua ianakkonna “Remaja asa unang marisap”, alai molo silehon poda i pe tolu bungkus sigaretna sadari, ndang margogo poda na nilehonna i. Jala aha ma tagamonta naeng dohonon ni ianakkonta i tu hita: “Pa so ma hatahatami bapa, bapa pe songon kereta api do, torus martimus, ndang olo so”.

Dungi na mangihut, molo dipodai sahalak orangtua ianakkonna “Remaja asa unang parjuji”, alai molo silehon poda i pe parjuji na utusan do, tong do ndang margogo poda na ni lehonna i. Gariada dohononna do ra: “Nunga ma bapa, dolokdolok i pe molo sai di turturi habis do ujungna. Ala ni i, rap pahabishon ma hita. Sadihari parhabisna di si ma hita so”. Hombar tu si ingkon jumolo do tapajongjong dirinta selaku silehon poda ingkon gabe tiruan asa margogo poda angka na tapasahat i.

Adong parasingan na mansai tandi di dakdanak na jolo dohot di angka dakdanak nuaeng. Aha do tahe parasingan/perbedaan ni dakdanak na jolo dohot dakdanak nuaeng? Sada na pasti ima, dakdanak na jolo nunga matua nuaeng jala mungkin nunga adong naung jumolo marujung ngolu sian nasida. Molo dakdanak nuaeng, hot dope nasida dakdanak. Sian pengalaman, uju dakdanak molo marsala iba olo dope halak na asing (na so orangtua niba) maminsang jala paingothon. Jala molo diboto natuatuaniba pe i, taringot tu na pininsang ni halak iba di hasalaan niba i, didok natuatuaniba do: “Mauliate ma ba, ala olo do ho pasingothon anakta i. Berarti na holong do roham di ibana”. Molo nuaeng on, nunga mansai marmanat halak laho paingothon angka na so ianakkonna. Ala ni aha? Asa unang tubu persoalan. Ala nunga gumodang nuaeng on mangampini angka ianakkonna nang pe marsala. Jala molo dipinsang manang dipasingot orangtua sahalak ianakkon na so anakna, nunga olo natuatua ni dakdanak i mandok: “Anakmu ajar”.  

Sai tadok do hurianta on, ingkon gabe pasupasu tu saluhut na di hamuliangta bahkan tu sandok portibi on. Songon dia do hita dohot angka ianakkonta gabe pasupasu, ia hita pe so tarpasupasu. Molo tapamanat di partingkian si nuaeng on jala marpanatap hita dao tu jolo: Songon dia ma muse generasi ni hita batak on dohot generasi ni hurianta on?. Molo taparhatutu do nuaeng generasi on manang sundut na umposo nunga hurang denggan, songon dia ma muse tu joloan on? Ise do na bertanggung jawab jala ise do na laho paturehon i? Ndang mungkin halak na asing ro laho paturehon hita. Ingkon hita do mangarade diri laho paturehon i. Sian horong ni angka natuatua ingkon rade jala unang marnaloja laho mamodai, paulihon dohot mangapoi angka sundut na umposo. Sundut na umposo pe ingkon rade jala sihol ma nian rohana di angka poda ni angka natuatua. Asa tongtong gabe halak na tarpasupasu hita jala ingkon gabe pasupasu di tongatonga ni keluarga, masyarakat nang tu sandok portibi on.       

3.    Ilustrasi.

Adong ma sahalak dakdanak na marsikola di sada SD di sada huta, goarna si Dogol. Goarna ma daina, goarna pe antong si Dogol, nda hombar do goar tu pangalaho. Goarna pe si Dogol, pingkiranna pe ra tong do dogol. Sasintongna, si Dogol on ndang pola masuk tu horong ni na oto. Di ngolu siapari sahalak dakdanak na ligat jala na lincah do ibana, pingkiranna pe ndang pola di toru ni ratarata. Na hurang ringgas do ibana marsiajar dohot manjaha gabe berpengaruh ma tu nilai ni raporna. Ganup manjalo rapor ndang hea denggan nilaina raporna, sai adong torus nilai merah, i do asa dibahen angka donganna gelarna si Dogol.

Di sada tingki diparateatehon guruna ma ibana, laos diparhatutu guru i do, ndang apala na oto si Dogol manjalo angka parsiajaran di sikola. Dungi,  lam dibahen guruna i ma “Perhatian Khusus tu si Dogol”, gabe adong ma kerja sama ni guru tu natoras ni si Dogol i. Marjanji do guruna dohot natoras ni si Dogol asa paturehon nilai ni si Dogol asa lam meningkat parbinotoanna termasuk dohot nilai raporna marhite na ingkon lam tu ringgasna si Dogol marsiajar dohot manjahai angka buku parsiajaran.

Tingki kalas opat semester sada, nilai raporna adong tolu ikan mas alias nilai merah. Dipatuduhon ibana ma i tu natorasna jala marsak do natorasna mangida nilai rapor ni anakna si Dogol i, ndang apala muruk natorasna alai didok natorasna i ma tu ibana: “Lam paringgas ma manjaha dohot marsiajar da anakku asa malo ho jala asa denggan nilai rapormu”. “Olo bapa, olo oma”, ninna ibana mangalusi natorasna i. Tutu do nian, tarida do na adong perubahan di hadirion ni si Dogol ala ni parsitutuonna dohot ala ni pangajarion ni guruna di sikola, nang dohot natorasna di jabu. Alai perubahan i ndang apala drastis.

Uju kalas opat semester dua, manjalo rapor ma muse, jala nilai rapor ni si Dogol i adong dope nilai merah alai holan dua nama. Dung salpu mangan bodari, dung simpul partangiangan keluarga nasida di sungkun omakna ma si Dogol: “Di dia rapormu anakku?”, ninna omakna I manungkun si Dogol. Murhusori ma roha ni si Dogol jala di bagasan biar ni roha dibuat si Dogol ma raporna i jala dilehon ma tu omakna. Dungi dipatuduhon omakna i ma tu amantana, bapak ni si Dogol i. Diida jala dipanotnoti bapa ni si Dogol ma nilai raporna ni anakna i, marsak situtu ma bapakna jala muruk ala adong dope nilai merah, dungi didok amanta i ma tu anakna si Dogol i: “Nunga tung mansai loja gurum dohot hami natorasmu mangajari ho… alai sai tong dope adong angka merah di rapormu. Ala ni i, molo manjalo rapor ho muse tu tingki na mangihut molo sai adong dope nilai merah di rapormu unang be jou bapa tu ahu”, ninna amanta i. Dungi dibujuk (dibulani) amanta dohot inanta i ma anakna i, asa lam tu ringgasna marsiajar.

Dung onom bulan muse, dung kalas lima semester sada dijalo si Dogol ma raporna, jala dibereng ibana tong adong nilai merah alai holan sada nama. Anggo nilai ni mata pelajaran na asing meningkat do ala ni parsitutuonna. Pintor diingot Si Dogol ma hata ni bapakna i: “Molo manjalo rapor ho muse tu tingki na mangihut molo sai adong dope nilai merah di rapormu unang be jou… Bapa tu ahu”. Sai dipikiri si Dogol ma hata ni bapakna i, alai dihudus ibana ma mulak tu jabu, “jolo hapataru ma bukuku tu jabu tibu, dungi lao ma au marmeami, asa unang pajumpa dohot bapa”, ninna rohana. Hape, dung jonok si Dogol tu teras ni jabuna diida si Dogol ma natorasna doli dohot boru hundul sambil manghataihatai di teras i. Dungi, dibaranihon si Dogol ma manghatai tu bapakna: “Nunga Hancur be au lae…”, huhut dijalang bapakna i. “Bah… boasa lae nimmu tu ahu Dogol?”, ninna amanta i. Dungi dialusi si Dogol ma: “Bapa do mandok tu ahu onom bulan na salpu, molo adong dope di rapormu nilai merah unang be jou… Bapa tu ahu, nimmu tu ahu. Ai adong dope angka merah sadana i di raporhu”, ninna si Dogol. Ndang tardok ni natorasna i be manang aha, gabe mengkel margakargak nama nasida.

4.    Panutup.

Marhite cerita/ilustrasi na di ginjang, tahalaputi jala taharingkothon ma mamodai angka ianakkonta asa lam tu dengganna generasi na mangihut. Lumobi asa diboto nasida hormat manghatai tu angka natuatua dohot tu saluhut halak. Angka natoras pe unang ma “asal puas hata”, denggan ma dimemehon angka hata na uli hata na denggan tu nasida.  

5. Diskusi

1.      Songon dia do bahenon mamodai angka ianakkonta di partingkian sinuaeng on?

2.      Molo marsala ianakkon ni donganta, olo dope hita maminsang i?

6. Marende No. 458: 1 – 2
7. Tangiang Pangondianon
8. Marende No. 701: 1 + 3                    (Papungu Pelean).
9. Tangiang Panutup.

                                                                                                        Pdt. Ahab Tambun, STh.

(Pandita HKBP Ressort Lumban Julu).