1. Joujou Tu Parsaoran Dohot Debata    (P: Paragenda; R: Ruas; S: Sude).

P:   Hamu angka dongan, punguan ina Parari Kamis ni hurianta na adong di HKBP Lumban Julu on. Mauliate ma tapasahat tu Tuhanta Debata na patolhashon hita taripar tu taon na imbaru on, i ma taon 2019. Tahaposi jala tahaporseai do: Molo Debata donganta, manahan do hita mangadopi angka ragam ni hamaolon na tabolus di taon 2018 naung tasalpuhon i. Didongani jala diramoti Tuhan i do hita. Ala ni i, di na pungu hita di Bona ni Taon on, tama ma tapasahat hamauliateon ni rohanta tu Debata.

R:   Mauliate ma rohanami di Ho ale Tuhan Debata. Hot do holong ni rohaM dohot asi ni rohaM di hami na hinophopmon.

P:    Bongotanta ma parsaoranta dohot Debata. Tapasada jala taparade ma roha dohot pingkiranta laho marsaor dohot Ibana na badia i.

R:    Ale Tuhan, bahen ma rohanami, bagas inganan habadiaonMu.

P:    Tabongoti ma parsaoran habadiaon ni Debata, tausung ma saluhut nasa ragam ni angka parsorion ni ngolu, asa tapasahat tu Tuhan i.

R:   Mauliate rohanami di Ho Tuhan, na rade manjalo angka pardosa na olo ro tu Ho. Nuaeng, nunga ro hami di bagasan unduk dohot serep ni roha.

P:   Marende ma hita sian BE. No. 392: 1 + 4    Sai Pasiat Tuhan Jesus

Ø  Sai pasiat Tuhan Jesus tu bagasan rohami.

Sai ma imaima Jesus, bege panuktukNa i.

Sai pasiat Tuhan Jesus, jangkon i tu rohami,

Nunga tingki parasian, sotung jolo salpu i.

Ø  Lehon ngolumi tu Jesus, ai hatop do salpui.

        Sai pasiat ma Tuhanmu tu roham na loja i. Sai…

 2. Votum – Introitus – Tangiang.

P:   Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Pinuji ma Tuhan i ganup ari, ai ro di salelenglelengna do asi ni rohaNa.

R:   Martua ma ganup na manghabiari Jahowa, na marparange di angka dalanNa.

P:   Angka na marhaposan tu Jahowa, songon dolok Sion do nasida, ndang tagamon humordit, hot do tahe ro di salelenglelengna.

R:  Martua ma ganup na manghabiari Jahowa, na marparange di angka dalanNa.

P:   Sai marhaposan tu Jahowa ma ho jala ulahon na denggan, inganhon ma tano i jala radoti haburjuon.

R:  Martua ma ganup na manghabiari Jahowa, na marparange di angka dalanNa.

P:   Oloi hamu ma Jahowa marhitehite las ni roha, ro be ma hamu tu joloNa marhitehite olopolop. Ai Pardenggan basa do Jahowa, ro di salelenglelengna do asi ni rohaNa, jala marsundutsundut do hasintonganNa. Haleluya! Martangiang ma hita. Ale Tuhan Debata Parasi roha jala pardenggan basa na sumurung! Mauliate ma dipasahat rohanami tu Ho, ala asi dohot holong ni rohaM naung hujalo hami sahat ro di sadari on. Di bagasan hahipason do hami dipaojak Ho tu taon 2019 on. Na marpungu do ina Kamis  ni huriaM laho mamuji pasangap GoarMu huhut pasahathon hamauliateon ni rohanami ala  asi ni rohaM na godang i. Antong, sai jalo ma pamujionnami dohot tangiangnami. Asa di bagasan unduk ni roha hami mangoloi Ho di ngolunami siganup ari. Ala ni Anak haholongan ni rohaM Tuhan Jesus Kristus. Amen.

 3.  Koor         :

 4.  Marende BE. No. 581: 1 Sangap Di Jahowa

Ø  Sangap di Jahowa na sun timbul i, balga ni holongNa ndang tarasam i.

Dilehon AnakNa na sasada i, manobus hita jolma pardosa i.

Puji ma Debata ale manisia, las roham, las roham, somba ma Debata.

Dapothon Jahowa na sun timbul i, marhite AnakNa Tuhan Jesus i

 5. Manjaha Hata ni Debata: Lukas 4: 16 – 21

P:  Tabege ma Hata ni Debata na gabe turpuk di Partangiangan Bona Taon on,  ima na nienet sian Lukas 4: 16 – 21. Jadi ro ma Ibana tu Nasaret, tu huta hagodanganna. Mangihuthon hasomalanna laho do Ibana tu parguruan i jumpa ari Sabbat; jadi jongjong ma Ibana, naeng manjaha.

R: Gabe dilehon ma tu Ibana pustaha ni panurirang si Jesaya, diungkap ma i jadi dapot matana ma na tarsurat songon on:

P:  “Songgop do tu ahu Tondi ni Tuhan i, ai dimiahi do ahu, mamboan barita na uli tu angka na pogos.

R: Disuru do ahu, mamaritahon tu angka na tarhurung asa malua, tu angka na mapitung asa marnida, paluahon angka na ginosagosa, mamaritahon taon parasinirohaon ni Tuhan i”.

P:  Ditutup ma pustaha i, dipaulak ma tu parhobas; laos hundul ma, gabe nolnol ma dompak Ibana mata ni sude na di parguruan i.

R: Jala dihatahon ma tu nasida: Sadari on do jumpang na tarsurat ondeng, di na binegemuna i.

P: I do sahatna. Martua do angka na tumangihon hata ni Debata, jala na umpeopsa.

S: Amen.

 6.  Tangiang Pangondian: 

 7.  Marende Sian BE.No.  403: 1     Pos Rohangku Di Tuhanku.               BL. 402.                  

Ø  Pos rohangku di Tuhanku, ndang  tarbaen tarhirim au.

On do tongtong tangiangku, tu lambungmu au patau.

Lobi pos do rohangki, sai patulusonna i, boanonNa au tu si.

 8.  Renungan            :

 9.  Marende Sian B.E No. 730: 1… Sai Patau Ma Au Tuhan (P. Pelean)

Ø  Sai patau ma diringku ale Tuhan, papatarhon hinauliMi Tuhan.

Suru ma TondiMi saor tu rohangki, lao papatar holongMu tu donganhi.

Ø  Sai patau ma diringku ale Tuhan, papatarhon hinauliMi Tuhan.

Suru ma TondiMi saor tu rohangki patariparhon basaM tu donganhi.

 10. Mardalan Mangasahon Debata Jahowa Di Taon 2019 (U: Uluan; R: Ruas)

P:  Di hamu angka inanami, nunga dipaloas Debata hita mamasuhi taon 2019 on. Basabasa jala silehonlehon ni Debata do i tu hita, na ingkon  sihamauliatehononta. Antong tadalani ma taon 2019 on di bagasan haburjuon maradophon Tuhan ni nang tu dongan jolma.

R: Mauliate ma di Ho Tuhan. Paborhat, dongani jala ramoti ma hami mandalani Taon Parasinirohaon on hombar tu lomo ni rohaM.

P: Ala ni i, marsihohot jala so mubauba ma hita, jala lam sumurung ma di bagasan Tuhan i, ai ndang magopo halojaonta di bagasan Tuhan i. Amen.

 11. Tangiang Pelean

 12. Tangiang Ale Amanami + Pasupasu.

SELAMAT TAHUN BARU 2019.

TUHAN MEMBERKATI.

Doc. Acara: Pdt. A. Tambun, STh – HKBP Ressort Lumban Julu.