POMPARAN RAJA TAMBUN –
RAJA PAGIRING.
1.
Patujolo.
Horas jala gabe
ma di hita saluhutna. Tama situtu do hita pasahathon pujipujian dohot
hamauliateon ni rohanta tu amanta Debata Pardenggan Basa i, na tongtong
mangalehon angka ragam ni pasupasuNa tu hita.
Diramoti jala diiringiring do hita ganup huhut dilehon hahipason tu hita
ganup marsadasada, lumobi hita Pomparan ni Ompunta Raja Tambun sian pinomparna
Raja Pagiring.
2.
Torsana.
Arga do bona ni
pinasa, di angka halak na bisuk marroha,
Sai ingot ma mulak tu huta, mulak tu bona ni pinasa,
Sai ingot ma mulak tu huta, mulak tu bona ni pinasa,
Ai i do poda ni
ompunta, tu hita angka pomparanna.
3.
Siargahononhon (Mansai Arga Situtu).
Martampuk do bulung,
marbona do sangkalan.
Marnata do suhut,
marnampuna do ugasan.
4.
Tarombo Si Raja Tambun.
Ia ompunta si Raja
Tambun ima anak siampudan ni Raja Silahisabungan, tubu ni ompung boru – Boru
Similingiling, ima boru ni Raja Mangarerak (Bagian Marga Nairasaon).
Uju i, tarbarita do ompunta Raja
Silahisabungan
sahalak pangubati jala
pardalandalan. Di sada partingkian mardalani do ompunta Raja Silahisabungan tu
huta na margoar Sibisa, ima huta ni marga Nairasaon. Di huta Sibisa pajumpa ma
ompunta Raja Silahisabungan dohot Raja Mangarerak na tongon boruna di bagasan parsahiton
ima Boru Similingiling. Dipangidohon Raja Mangarerak ma
Raja Silahisabungan laho
mangubati boruna na tongon di bagasan parsahiton i.
Ndang sadia leleng dung diubati Raja
Silahisabungan Boru Ni Raja
Mangarerak i, malum ma sian parsahitonna. Dungi disungkun Raja Mangarerak ma
Raja Silahisabungan: “Aha ma upam
lehononku, ala naung malum boruki diubati ho?”, ninna Raja Mangarerak i ma.
“Ndang siupaon ahu, ia i na huubati ima
di ahu”, ninna Raja Silahisabungan. Mansai borat jala maol do roha ni Raja
Mangarerak mangoloi pangidoan ni Raja Silahisabungan i ala nunga sanga
dipaorohon boruna Similingiling i tu anak ni halak jala nunga sanga marjanji ingkon
patuhon adat pardongansaripeon molo ro paranak i (ima Raja Turi) muse tu huta
Sibisa. Di bagasan roha na so tarjua dioloi Raja Mangarerak ma pangidoan ni
Raja Silahisabungan i. Gabe mardongan saripe ma Raja Silahisabungan dohot Boru
Similingiling hombar tu adat budaya na masa di hatiha i, jala tading di huta
Sibisa.
Dung dapot di bulanna dohot di tingkina, sorang ma sahalak posoposo baoa di
tongatonga ni parsaripeon ni Raja Silahisabungan dohot Boru Similingiling i.
Dung pigapiga minggu umur ni posoposo i diboan Raja Silahisabungan ma posoposo
i di bagasan hadanghadangan tu huta Silalahi Na Bolak, ima inganan parhutaanna,
ala naung tarbortik tu sipareon ni oroan ni Boru Similingiling i, naung malum do
hape ibana sian parsahitonna.
Dung sahat Raja Silahisabungan di Silalahi Na Bolak disuguthon/ditabunihon
ma Posoposo i di parapara. Ndang diboto manang ise i, ala ndang dipaboa Raja
Silahisabungan manang tu ise termasuk tu Pardihutana Pinggan Matio Boru Padang
Batang Hari. Alai ganup dung simpul mangan marsibuni do Raja Silahisabungan
mangalean mangan posoposo i. Songoni ma diulahon Raja Silahisabungan
marmudumudu dohot manghophop ngolu ni posoposo, anakna i. Dung piga leleng, di
sada tingki diparrohahon jala curiga ma ompungboru, Pinggan Matio Boru Padang
Batang Hari. “Boasa asal salpu mangan, sai lao amanta on, Raja Silahisabungan
tar tungkan parapara an”, ninna roha ni Pinggan Matio Boru Padang Batang Hari,
pardihuta ni Raja Silahisabungan.
Di sada tingki dipamanat jala disungkun ompungboru, Boru Padang Batang Hari
ma tu ompung Raja Silahisabungan. Didok ma tu Raja Silahisabungan: “Na saleleng
on, asal dung salpu mangan, huida sai lao damang dompak parapara an? Paboa ma,
aha do ulaning na masa”. Dungi dialusi ompung Raja Silahisabungan ma: “Ndang
muruk ho... molo hupaboa”, ninna ompung Raja Silahisabungan. “Ndang.. paboa
ma”, ninna ompungboru. Didok ompungdoli muse: “Hupaduahali... ndang muruk ho
molo hupaboa”. Dialusi ompungboru ma: “Ndang... paboa ma...”. Dungi hehe ma
ompung Raja Silahisabungan, dibuat ma posoposo i sian parapara i, jala diboan
ma tu ompungboru, jala didok ompung boru ma: “Nunga TAMBUN hape anakki”. Jadi
ma goar ni anak siampudan ni Raja Silahisabungan Si RAJA TAMBUN.
Lam magodang ma muse posoposo i jala lam holong do roha ni Raja
Silahisabungan dohot ompungboru Pinggan Matio Boru Padang Batang Hari tu
posoposo i. Humolongan do roha ni ompung Raja Silahisabungan dohot ompungboru
tu anakna Siampudan i, ima si Raja Tambun asa tu anakna na pituna i – haha ni
si Raja Tambun i. Hau na jonok do na marsiogosan. Bangkona do i. Dungi,
dilaonlaon ni ari dung magodang Si Raja Tambun masa ma parsalisian sian haha
doli si pitu turpuk maradophon anggidolina si Raja Tambun, ala humolong roha ni
Raja Silahisabungan dohot ompungboru tu anakna simpudan i, ima si Raja Tambun –
tarida do i sian panghataion nang sian pambahenan pe. Ala ni parsalisian i,
gabe dipaluhut jala dipodai Raja Silahisabungan ma sude angka ianakkonna i, ima
na ginoaranna Poda Sagusagu Marlangan (PSSM)1). Dung i, bungkas ma
si Raja Tambun sian huta ni natuatuana huta Silalahi na Bolak tu huta ni
tulangna Sibisa manaripari Tao Toba marsolu bulung Sungkit jala marhole bulung
ni ri. Sahat ma si Raja Tambun di huta ni tulangna ima, huta Sibisa jala
maringan di si. Dungi, manang dung sadia leleng di huta Sibisa dialap ma boru
ni tulang Manurung ima Pinta Haomasan Boru Manurung.
Raja Tambun
(Pinta Haomasan Br. Manurung)
Tambun Mulia
Raja Boang
Domean
Pagiring
(Dan selanjutnya...)
I.
Raja Tambun2), anakna:
1. Tambun Mulia
2. Tambun Holing
3. Tambun Marbun?
II.
Tambun Mulia, anakna:
1.
Raja Boang
2. Matanari
3. Sipinggan
4. Jonggolna
5. Umbuan
III.
Raja Boang, anakna:
1. Junambe
2. Wokna
3. Domean
4. Pausoan
5. Mulana
IV.
Domean, anakna:
1.
Pagiring
2. Runggabosi
(Sumber: Turiturian Ni: St. Djahammad
Tambun, Lahir: 5 Oktober 1927).
·
Kebenaran Tidak Ada Yang
Jelas, Kebenaran Hanya Milik Tuhan.
5.
Sangkap.
Dalan laho pasadahon dohot
pasolhothon roha parhahamaranggion
dohot angka partuturon na mansai uli jala denggan hombar tu adat budaya ni
ompunta na mandok: “Somba Marhulahula,
Manat Mardongan Tubu dohot Elek Marboru” tu saluhut angka pomparan ni
ompunta Raja Tambun, lumobi di pompoaran ni ompunta pomparan ni Ompu Domean na
adong di bona pasogit songoni nang na di tano parserahan i. Diuji hami3)
do manghatahatai taringot tu aha ma sipatupaon asa boi asa jumpang songon Hata
Ni Debata na mandok: “I da ma, dengganna i dohot sonangna i, molo tung pungu
sahundulan angka na marhahamaranggi” (Psalmen 133: 1).
Marhite i, hupangido hami ma tu
hita saluhutna manang di dia pe hita maringanan di angka inganan na marserak i
di desa na ualu, (anak, boru, bere dohot ibebere) laho pasadahon sangkap dohot dos
ni tahi ni rohanta laho patupahon sada partanda ni Ompunta Raja Pagiring, di
bona pasogit di Huta Pardenggaran – Desa Sinar Sabungan – Kec. Bonatua Lunasi –
Kab. Toba Samosir.
6. Panutup.
Songoni ma husangkapi hami angka na uli na
denggan tu angka Pomparan Ni Ompunta Raja Pagiring (Pomparan Raja Tambun). Sai
dipatulus jala dipasupasu Tuhan Debata ma saluhut angka na olo jala rade
manghalojahon patureturehon angka na pinungka ni ompunta sijolojolo tubu na so
maralo tu lomo ni roha ni Tuhan i. I ma panghirimon dohot pos ni rohanami. Di
bagasan haporseaon na tu Tuhan i parhatutuonta ma hata ni Debata na tarsurat di
Pilipi 1: 6, na mandok: “Apala
on ma pos ni rohangku: Naung umpungka
ulaon na denggan di bagasan hamu, patuluson ni I do i, sahat ro di ari ni
Kristus Jesus”.
1). Poda Sagusagu Marlangan (PSSM).
1. Ingkon Masihaholongan Hamu Sama Hamu Ro Di
Pomparanmuna Be. (Hendaklah Kamu Saling Mengasihi Satu Sama Lain
Hingga Kepada Seluruh Keturunanmu).
2. Naso Tupa Dohononmuna Naso Saama - Saina
Hamu Napitu dohot Si Raja Tambun. Jala Ingkon Sisada
Boru Do Hamu. (Janganlah
Menyebut Bahwa Kalian Bertujuh Tidak Mempunyai Satu Ibu Dengan Adikmu Raja Tambun. Dan Harus Sisada Boru).
3. Hamu Napitu dohot Angka
Pinomparmu, ingkon Humolong Rohamu di Boru
Nianggimuna Si Raja Tambun ro di Pomparanna. Jala
Ho Pe Raja Tambun dohot Sandok Pomparanmu Ingkon
Humolong Roham Di Boru Ni Angka Haham Ro Di Pomparanna. (Kalian Bertujuh Beserta
Keturunanmu,Harus Lebih Sayang Kepada Putri Adikmu Tambun Raja Dan
Keturunannya.Dan Kamu Pun Tambun Raja Dan Beserta Seluruhketurunanmu Harus
Lebih Sayang Kepada Putri Abangmu Beserta Keturunannya).
4. Naso Jadi Olion
Ni Napitu Pomparan Ni Anggim Si Raja Tambun On. Jala
Naso Jadi
Olion Ni Pomparan Ni Raja Tambun Pomparan Ni Sude Haham Napitu On. (Kalian Bertujuh Dan Seluruh
Keturunanmu Tidak Boleh Menikah Dengan Seluruhketurunan Adikmu Tambun
Raja,Demikian Juga Kamu Tambun Raja Besertaseluruh Keturunanmu Tidak Boleh
Menikah Dengan Seluruh Keturunan Abangmuyang Tujuh Ini).
5. Naso Tupa
Pungkaonmu Bada Manang Parsalisian. Ia Adong Parbadaan
Di Hamu
Napitu Sahat Ro Di Pomparanmuna, Sandok
Ingkon Anggimuna Ma Manang Pomparanna Sibahen Dame Di Hamu, Mambahen
Uhum Na Tingkos Jala Naso Boi Mardingkan. Ingkon Oloan Jala
Tung So Jadi Juaonmuna. Laos Songoni Ho Raja Tambun, Ia
Adong Parbadaan Di Pomparanmuna, Sandok Ingkon Sian Pomparan
Ni Haham
Napitu On Ma Sibahen Dame Jala Sidabu Uhum Na Tingkos. Naso Tupa Mardingkan, Jala
Naso Jadi Juaonmuna. Jala Molo Adong Parbadaan Di Hamu Naso Tupa Dohot Halak
Naasing Laho Pasaehon.
(Tidak Boleh Memulai Pertengkaran Dan
Perselisihan.Bila Ada Perselisihandiantara Kalian Bertujuh Dan Seluruh
Keturunanmu,Yang Menjadi Juru Damaiadalah Dari Tambun Raja Dan Dari
Keturunannya.Membuat Suatu Hukum Yangadil Dan Tidak Memihak Dan Harus Kalian
Patuhi.Demikian Juga Kamu Tambunraja ,Bila Ada Perselisihan Diantara
Keturunanmu ,Dan Sebagai Juru Damaiharuslah Dari Ketujuh Abangmu Ini Atau Dari
Keturunannya Yang Memberikanhukum Yang Adil Dan Tidak Memihak Dan Harus Kamu
Patuhi.Dan Bila Adaperselisihan Diantara Kalian Dan Keturunan Mu,Tidak Boleh
Marga Lain Ikutcampur Untuk Menyelesaikannya).
Poda on,
dihatahon ompunta Raja Silahisabungan di huta Silalahi Nabolak. Di huta i
adong do “Batu Gadap dohot Batu Jongjong”, lapatanna ima lambang pengadilan na
binahen ni ompunta Raja Silahisabungan. Molo adong na marsual di huta jala
diboan tu batu gadap i, dung diadili (disidang) na marsala i gabe gadap ma
songon batu gadap i, ala na tingkos jongjong ma songon batu jongjong i.
2) Taringot Tu Tarombo.
Godang Versi ni Tarombo
Raja Tambun, alai on ma na hubege jala na hujalo sian na tuatuaku, bapa na
hinanan St. Djahammad Tambun, sorang jala magodang di Siborongborong. Marsikola
SGB di Tarutung, taon 1956 ditempathon ma di sada Parsikolaan SD HKBP Batang
Ari. Kec. Sumbul. Marujung ngolu taon 2015.
3) Hami Na Manghatahatai:
1. Hisar Tambun (Op. Dewi) : Pardenggaran.
2. Sintong Tambun (Am. Androni) : Balige.
3. Pdt. Ahab Tambun, STh (Am. Sofhia) :
Lumban Julu.
Na manggurithon,
Lumban Julu, 12 Januari 2019.
Pdt. Ahab Tambun, STh.
Komentar
Posting Komentar