Ende 2: 8 - 13 (Diboto Debata Do Na Di Roham).
Dongan Sahaporseaon di bagasan Jesus Kristus Tuhanta i...
Saluhut do hita adong halak na gabe haholongan ni
rohanta. Somalna, molo didok haholongan ni roha mansai tangkas do panandaonta
tu si. Isara ni soarana. Nang pe dao dope ibana, alai molo nunga tarbege
soarana botoonta do i, ala tangkas tatanda ciri khas ni soara i. Nang pe dao
dope alai molo nunga tarida botoonta do ciri khas ni pardalanna manang na
songon dia pangeolna, dohot angka na asing. Di turpuk on digombarhon do, sahalak
pangoli pajumpang dohot oroanna di sada porlak
na mansai bidang jala uli. Adong piga-piga hal na mansai arga sian
tongatonga ni turpuk jamita on:
Parjolo, marlas ni roha manomunomu haholongan ni rohana.
Sasahalak gabe haholongan ni rohanta marsiala ma i, ala na burju, ala holong
rohana tu hita, ala bagak, ala ganteng dohot lan angka na asing. Ndang mungkin
olo hita manghaholongi sasahalak i molo jungkat do tu hita. Sude do halak
marlas ni roha molo naeng pajumpang dohot haholongan ni rohana, ala marhite parjumpangan i gabe sombu ma sihol ni roha. Las ni roha naeng pajumpang
di angka na marsihaholongan digombarhon songon hije manang ursa na ro maringkat
sian dolok marhujingjang manang marlas ni roha di atas ni angka robean. Naeng
songoni ma nian saluhut halak na
manghaporseai Debata Jahowa, ingkon tangkas
mananda jala manghasiholi soara ni Debata Jahowa laho padasiphon
parsaoran na rosu tu Ibana di bagasan panggulmiton ni ngolunta siganup ari.
Paduahon, bege jala ulahhon ma joujou ni Tuhanta i. Nunga
dipatupa joujou sian hasudungan ni rohanta i ima Tuhan i, marhite hata naung
pinatolhas nii anngka panurirang dohot saluhut angka naposoNa dohoot marhite TondiNa, na manjou
hita asa hehe sian ngolu na robi jala bongot tu
ngolu na imbaru, ai didok do: ”Dung i mangkuling ma hasudungan ni rohangku, didok ma mandok ahu: Hehe
ma ho, ale hasoloan ni rohangku, na mauliutus, jala ruar ma ho! (Ay. 10). Jala on ma na gabe
jaminan di saluhut halak na porsea, asa haruar sian angka ragam ni hamaolon,
angka parungkilon nang angka ragam ni ulaon na jat ala panghorhon ni dosa i.
Molo dditaringoti pe di ayat 11 i, “Ai ida ma, nunga salpu partaonan ngali ni ari, nunga
mansohot dohot ari udan”.
Nunga
salpu sada partingkian na mansai maol diadopi jala disalpuhon. Nunga salpu
partingkian mandalani paruhuman, jala ingkon bongot tu sada partingkian las ni
roha. Nunga salpu partingkian hadadabu ni jolma tu bagasan dosa. Nunga salpu
partingkian hinaparir dohot hinadangol ala pangontak ni dosa na pataruhon
saluhut jolma tu hamatean. Nunga bongot tu sada partingkian na gok las ni roha
ala panobusion ni Tuhan Debata di saluhut hajolmaon nang tu portibi on marhite
AnakNa Tuhan Jesus Kristus. Boha do nuaeng di masa Covid-19 on? Marhite
haporseaonta ala parsaoranta na rosu tu Tuhan Debata ingkon dohononta ma: “Ingkon salpu do angka hamaolon dohot parunngkilon na
taadopi ala ni Pandemi Covid—19 on, jala ingkon boanon jala pataruon ni Tuhan
Jahowa hita tu sada partingkian na gok las ni roha dung salpu pandemi on”.
Ingkon porsea jala ingkon pos do rohanta
di si.
Dongan
sahaporseaon Di bagasan Kristus Jesus Tuhanta i...
Patoluhon, jumpang hita do saluhut na taparsinta i marhite nasa na tinompa. Sude do
jolma na mangolu adong na dipinarsinta
ni rohana uju mangolu ibana. Tanda naung salpu tingki hamuruhon ni Tuhan Jahowa jala ingkon bongot nama tu sada
partinngkian jumalo angka ragamm ni las ni roha. Tarida do i sian pandohan: ”Nunga pola mullop angka bungabunga di
ladang, nunga jumpang tingki parendeon, nunga pola tarbege suara ni anduhur
titi di tanonta i”. Tingki las ni roha nama
na naeng masa. Saluhut angka bagabaga na sian Tuhanta i, ndang hea sundat,
ingkon masa do i.
Patar do saluhut ddi adopan ni Debata gariada tahe “Diboto Debata Do Na Di Roham”, sonngon topik ni minggunta di minggu XIII Dung Trinitatis. Molo dibagasan parungkilon dohot hamaolon pe nuaeng ala na masa di sandok portibi on, nang di luatta on, tangkas do i diboto Tuhan Debata. Diboto Tuhan i do angka na pinangido ni rohanta be ganup marsadasada di hamamasa ni Sorimago Covid-19 on. Diramoti Tuhan Debata ma hita saluhutna dohot angka na hiinnaholongan ni rohanta sian panahit soriimago i. Molo adong pe na terpapar Covid-19 dipasupasu Tuhann Debata ma anngka obat nang angka sipanganon dohot siinumon na bongot tu pamatangna gabe obat ma i, asa naik imunna asa margogo mangadopi dohoot mangalo panahit, asa jumpang hamamalum ni parsahiton. Angka keluarganta, sisolhot nang aleale na tahaholongi naung marujung ngolu ala terpapar Covid-19, didongani jala diapuli Tuhan Debata ma saluhut keluarga na tininggalhonna, margogo ma hamu ppinargogoan ni Tuhan i mangadopi na masa i, ala sirang ala ni hamatean. Tahaporseai ma Tuhan i jala tongtong ma ibana tajouhon di bagasan ngolunta siganup ari. Satongkin do Tuhan Debata holang sian hita ala ni dorpi parholangan i, hinorhon dosa na ni ulahon ni jolma i. Alai ala ni asi dohot holong ni roha ni Tuhan Debata na sun badia tu hita jolma umpatonNa do muse dorpi parholangan i ala Anak haholongan ni rohaNa i, ima Tuhan Jesus Kristus naung ro tumopot hita jolma na hinaholonnganna. Amen.
Pdt. Ahab Tambun, S.Th.
Komentar
Posting Komentar