Jamita Minggu XIV Dung Trinitatis. (05 September 2021).

 

Jesaya 35: 4 – 10

(Pir ma tondim unang ho tahutan)

 

Dongan sahaporseaon na hinaholongan di bagasan Jesus Kristus Tuhanta i...

Ia turpuk on, masuk tu horong Proto Jesaya (Bindu 1 – 39). Panurirang Jesaya mangula patolhashon hata ni Debata tingki abad 8 SM. Uju i masa pangondamon manang ancaman tu bangso Israel sian angka bangso na asing na adong di humaliangna, lumobi sian bangso Assur laho pabidanghon “daerah kekuasaanna”. Bangso Assur hatiha i bangso na balga jala na gogo, na maju di bidang politik dohot mengandalkan kekuatan militer. Molo dihatai laho pabidanghon “daerah kekuasaan”, somalna bangso dia na gumogo i do na monang, bangso na metmet jala gale talu jala dijajah. Uju naeng masa parporangan, bangso na metmet mangido pangurupion tu bangso na balga jala na gogo. Ima na pinatupa ni raja Israel di  hatiha i, uju gomgoman ni Raja Ahaz, laho mangalo bangso Assur dilului jala dijalo nasida do pangurupion sian bangso na asing na di humaliangna, ima angka bangso na gogo dietong nasida. Hape halak na so tumanda Debata do nasida manang targoar halak sipelebegu (didok di Bahasa Indonesia orang Kafir). Jala on ma so sasintongna na so dihalomohon Debata Jahowa. Uju i, nunga tangkas tarida, masa krisis haporseaon nasida, nunga hurang diargahon nasida parsombaonna tu Debata Jahowa, gariada ndang porsea be nasida di hagogoon ni Debata Jahowa na sinomba nasida nasailaon.

 

Di na hona ondam manang uju diancam bangso Assur halak Israel, ndang tu Debata Jahowa be nasida mangalualu dohot mangido gogo, alai lao do nasida mangido pangurupion tu angka bangso na adong di humaliangnasida. Ndada holan i, secara menyeluruh masa do kemerosotan moral. Ngolu ni angka jolma lam lumlam tingki i, cenderung madabu tu bagasan ngolu na materialisme dohot hedonisme. Masa manindos dongan na pogos. Masa manggulut huaso dohot jabatan. Hinorhon ni angka ngolu na lumlam na masa di tongatonga ni halak Israel hatiha i, naeng masa ma uhum ni Jahowa tu nasida. Alai andorang so ro uhuman i, jumolo ma dilumbahon Debata Jahowa bangso i marhite naposoNa panurirang Jesaya. Molo dung dipalumbahon tu nasida angka hahuranganna i, diigil Debata Jahowa ma adong hamubaon ni roha sian bangsoNa i. Molo adong do hamubaon ni roha sian bangso i, olo jala rade mandapothon Debata Jahowa manopoti hasalaanna, sundat ma uhuman i. Alai molo ndang adong hamubaon ni roha sian bangso i, ingkon masa do paruhuman i. Molo masa pe paruhuman tu bangso Israel ala na so adong hamubaon ni roha sian bangso Israel, ndada sangkap hamagoan i, alai sada paminsangon dohot dalan mangajari do i asa tu angka tingki na mangihut muse olo marhamubaon ni roha jala asa tubu muse angka silas ni roha singkat ni sitaonon i.           

 

Dongan sahaporseaon na hinaholongan di bagasan Jesus Kristus Tuhanta i...

Bangso Israel, ima bangso na pinillit jala na pinasupasu ni Debata Jahowa madabu tu sada parungkilon na mansai dokdok. Di bagasan hamamasa ni parungkilon na niadopan ni bangso Israel i, ro ma hata ni Debata Jahowa mandok: “Pir ma tondimuna, unang hamu mabiar”. Jala ndada holan hata sambing dipasahat Debata Jahowa alai dohot do marhite pambahenan ni dipatupa Debata Jahowa pungurupionNa tu bangso i. Tindakan nyata na binahen ni Debata Jahowa boi tangkas taboto marhite pandohan: “Debata martubolhon dohot mamaloshon, jala ro do Ibana tongon paluahon” (Ay. 4). Asa pangurupion na pinatupa ni Debata Jahowa, ndada holan di hata, alai dohot do marhite pambahenan na tangkas boi dipanghilalahon bangso Israel di bagasan ngoluna uju mangadopi parungkilonna i. Naung gale hian gabe margogo pinargogoan ni Tuhan i.  

 

Molo tapamanat di ayat 5 -7 didok di si: “Buha mata na mapitung jala marbinege na nengel. Marhajingjang napangpang songon ursa, mariaia dila ni na ngungu, marbuhalbuhal aek di halongonan jala sunge di adaran. Tano hasang situtu gabe tao, tano bangkalbangkal gabe parmualan aek...”. Hata ni Debata na pinatolhas ni panurirang Jesaya on: “Gombaran ngolu ni bangso Israel naung jonok tu halelengse ala ni parange nasida na so  porsea be tu hagogoon ni Tuhan Debata”. Tudos tu parhorsihan na mansai maol situtu mual hangoluan alai dibagabagahon Tuhan Debata “tano tungil i manang bangkalbangkal” gabe haroroan ni aek mual. Hagogoon dohot pangurupion ni Debata Jahowa boi dipanghilalahon bangso i tu sada panghirimon haluaon dohot hangoluan na dumenggan. Haluaon na jinalo ni bangso i, marharoroan holan sian asi ni roha ni Tuhan Debata laho patupahonsa. Ndada ala ni hadirion ni bangsonai, ndada ala ni haburjuon ni bangso i marparange di adopan ni Tuhan Debata, alai hadirion ni Tuhan Debata na badia jala parasi roha i laho sumangkapi dohot patupahon haluaon dohot hangoluan siparsaulihonon ni bangso i, nang nasa bangso di sandok potibi on.

 

 

 

 

Dongan sahaporseaon na hinaholongan di bagasan Jesus Kristus Tuhanta i...

Topik ni minggunta sadari on, ima minggu XIV Dung Trinitatis mandok: ”Pir Ma Tondim Unang Ho Tahutan”. Hata on somalna dipasahat tu halak na tongon di bagasan hagaleon, halak na magetem rohana ala ni parungkilon na ni adopannna. Tujuanna, laho mangalehon gogo dohot semangat na imbaru anggiat unang sai tahutan jala biahaton, alai asa togu rohana jala boi haruar sian parungkilon na niadopanna i. I pe, ndang boi holan hata sambing alai ingkon adong do pambahenan, pinomat panogunoguon na boi di panghilalahon ni na mangadopi parungkilon i. Molo holan hata sambing do, magopo do i. Molo olo jala rade do hita tumangihon dohot manghilalahon angka na ponjot na di bagasan roha ni angka donganta na mangadopi parungkilon i, i do na gabe gogo dohot panogunoguon di nasida. Jala sai tongtong ma tausahahon, asa unang tapaboaboa tu halak na asing parungkilon na ni adopanna i. Ai molo tahatahatahon tu halak na asing persoalan na niadopanna i, ndada na mangurupi ibana be hita di si alai nunga gabe na manambai manang paborathon boban ni ibana hita. Ingkon boi do hita mangorom unang paboahon angka hahurangan ni dongan. Hamba Tuhan, haruslah menjadi penyimpan “rahasia” sejati. 

 

Uju masa sonson di adopanta angka ragam ni hamaolon i, mansai borat do tahilala, gulut nang angka pingkiran, ndang binoto manang aha na naeng siulahononhon. Keadaan si songon on ma mambahen sasahalak i mambahen gabe stress, frustrasi deba olo mada tu bagasan pandelean. Saluhut jolma do hea mangadopi parungkilon, mamungka sian na tubu sahat ro di ujung ni ngoluna pasti hea masa do i di ngoluna. Di bagasan na mangadopi parungkilon i ma gabe tubu biar ni roha manang tahutan. Ndang adong jolma na so hea mabiar manang tahutan uju mangadopi angka parungkilon, baoa manang parompuan, na pogos nang na mora, naposo manang na matua ndang mardia imbar. Ndang sala halak na tahutan, di sada sisi denggan do i ala dihorhon roha na tahutan i do gabe tubu pangarimangion di ngoluna, gabe marmanat mangalangka dohot mungula angka siulaon tu joloan ni ari.  Dihorhon roha na tahutan i do gabe mangalului gogo dohot pangurupion di luar ni hadirionna. Alai tutu unang sala hita mangalului gogo dohot pangurupion uju mangadopi parungkilon hita. Unang talului hagogoon na sian portibi on. Unang laho hita mangalului huhut manjalo gogo dohot pangurupion tu angka sipelebegu songon na masa di turpuk on. Alai tajalo ma gogo dohot pangurupion sian Debata Jahowa Pargogo Na so hatudosan i. Ai dao gumogo do Tuhan Debata Jahowa na tahaporseai jala na tasomba i, sian saluhut hagogoon na adong di portibi on.

           

Ndang dipasombu Debata Jahowa saluhut angka na porsea manongtong mangadopi parungkilon manang sitaonon. Molo tung pe ingkon songgop parungkilon i, tapangido ma gogo dohot pangurupion sian Debata Jahowa. Hotang Binebebebe Hotang Pinulospulo. Unang Ho Mandele Ai Godang Do Tudostudos. Jala ingkon marasing cara ni halak na porsea laho mangalapati dohot mangadopi parungkilon i. Dalan ni Debata do i paingothon, maminsang dohot mangajari saluhut halak na porsea jala dalan ni Tuhan Debata do i, asa tongong marsihohot  manang laho patoguhon haporseaon ni halak na porsea do i tu Tuhan Debata. Taingot jala tahangoluhon ma hata ni Debata na tarsurat di Rom 5: 3 – 5, didok songon on di si: “...itahalashon do nang angka haporsuhon, ala taboto, dihorhon haporsuhon i do habengeton ni roha. Jala dihorhon habengeton ni roha i do hatauon, jala hatauon i do manghorhon panghirimon. Alai ndang na murak hita bahenon ni panghirimon i, ala nunga diusehon tubagasan rohanta holong ni roha ni Debata marhitehite Tondi Parbadia, naung nilehonna i tu hita”. Amen. 

 

Pdt. Ahab Tambun, S. Th

HKBP Bongbongan Pematang Siantar.