Sermon Parhalado HKBP Bongbongan Ressort Bongbongan.

Jamita tu Partangiangan. Epistel Minggu Palmarum, 02 April 2023

 

 

"Pinuji Ma Na Ro Di Bagasan Tuhan I"

(Jesaya 50: 4 -9a)

1.        Di bagasan pardalanan ni ngolu on, mansai godang do angka na masa na ingkon siadopanta. Olo do i, angka na mambahen marsak, na mambahen hita olo sahat tu na naeng mandele hita, alai ndang pola sahat tu pandelean. Lapatanna, angka na taadopi i mansai borat situtu. Olo do sipata songgop tu pikiranta; ndang tolap ahu laho mangadopi na masa on. Jala dung salpu taadopi olo ma gabe longang situtu rohanta, gabe olo ma tadok: Ndang hurimpu tolap ahu mangadopi i. Molo sian hadirionku, ndang taradopi ahu i jala ndang mungkin boi husalpuhon i. Hinorhon ni i, gabe tubu ma panindangion  na mansai arga situtu tubu di rohanta: Masa pe hape saluhut angka na masa na huadopi i laho patoguhon haporseaonku do i, asa lam marsitutu ahu manghaporseai hagogoon dohot pangaramotion ni Tuhan Debata di bagasan pardalanan ni ngolungku.

 

2.        Marhite turpuk on, dipaingot Debata do bangso Israel na sai holsoan jala sai olo manalahon Debata ala ni angka parungkilon  na ni adopan nasida uju tarbuang tu habuangan Babel. Memang,  diuhum Debata do nasida ala ndang olo mangoloi hata ni Debata. Nian sada do sangkap ni Tuhan Debata, asa gabe pangoloi jala olo nasida gabe naposo ni Debata na disuru laho mangulahon lomo ni roha ni Debata. Dioloi nasida do gabe naposo ni Debata, alai ndang adong parsitutuon di nasida. Ndang dipatuduhon nasida hadirionna songon naposo ni Debata, marhite angka panghataion nang marhite angka pambahenan pe. Mansai asing do nasida sian angka naposo ni Tuhan Debata songon nasailaon. Di bagasan turpuk on,  mansai tangkas do dipatorang hadirion ni naposo ni Debata na olo gabe sisean na marroha pangoloion tu Debata. Sasintongna, molo olo gabe naposo ni Debata, ingkon ganup ari, ganup tingki jala di ganup inganan do angka naposo ni Debata ingkon rade marguru tu Debata. Ingkon olo jala diparade do sipareonna laho tumangihon saluhut angka pangajarion na na marharoroan sian Debata. Diharadeon laho tumangihon jala manghatahon hata na pinasahat ni Debata, lumobi laho manghatahon i tu angka jolma na torop,  i do na targoar naposo na tutu situtu jala manghatindanghon, “Nunga dilehon tu ahu dila sisean laho pasabam roha ni na loja.

 

3.        Pandohan dila sisean di son boi do dilapati songon “hata” manang “parbinotoan laho manghatai”, na marharoroan sian Debata. Dilehon Tuhan Debata do “dila sisean” lapatanna diajari Debata laho manghatahon aha naung binegena sian Tuhan i. Gabe boi ma pasabam roha ni na loja marhite sian hata i. Pasabam roha ni angka na gale dohot tu angka jolma na di bagasan sitaonon. Holan Tuhan Jesus do na targoar gabe Naposo ni Debata na tutu. Na hibul rohaNa laho mangoloi Ama i. Hombar tu si, pandohan 'dila sisean' lapatanna Mesias ingkon do manghatai songon naung manjalo Hata ni  Debata laho mangalehon gogo tu angka jolma na gale ala ni dosa i. Ndang na mansohot dila sisean i laho manghatahon Hata ni Debata asa dipargogoi angka roha na gale jala dipasabam angka roha na gale i.

 

4.        Di ayat 7 dohot 9 adong do didok hata 'mangurupi'. Pandohan on, i ma hata ulaon manang kata kerja. Didok 'mangurupi' paboa i ma pambahenan ni Debata. Di tongatonga ni angka parungkilon, somalna sai dipasahat do tangiang mangido pangurupion sian Debata. Di turpuk on di bagasan pos ni roha do didok, 'sai na urupan ni Tuhan Jahowa do ahu' jala di bagasan pos ni roha do ibana paimahon haroro ni pangurupion na sian Tuhan i. Di na manaon angka parungkilon dohot angka pangalelean angka Naposo ni Debata ndang porlu mabiar jala gabe maila laho manghatahon na sintong i. Ai taboto do Hata ni Debata, hasintongan ni Debata, i do pinasahat ni naposo ni Debata. Jangan pernah ragu untuk menyatakan kebenaran Allah. Dihaporaeai ibana do sai na donganan ni Debata do ibana jala sai na paluaonNa do ibana jala papataronNa do hasintonganNa i.

 

5.        Marhite turpuk epistel di Minggu Palmarum on, boi do idaonta songon dia Tuhan Jesus naung pataridahon tu hita, i ma bagabaga ni panurirang Jesaya, ndang holan hatahata, manang holan na tarsurat, manang panghirimon na so tutu. Digohi do sudena i di bagasan Jesus Kristus Tuhanta i na mamboan haluaon tu ganup jolma na porsea. Taingot ma saluhut pambahenan ni Tuhan Debata marhite Tuhan Jesus di bagasan ngolunta. Ingkon marsitutu do hita manghamauliatehon pambhenan dohot pangurupion lumobi haluaon na pinatupaNa di bagasan ngolunta. Ndang ganggu be haporseaonta di si jala na so jadi be hita mabiar, manang gabe ganggu haporseaonta. Molo tung pe ro angka ragam ni hamaolon di bagasan ngolunta, tahaporseai ma dalan ni Tuhan Debata do i laho patoguhon haporseaonta. Ai dihorhon haporuhon i do benget ni roha. Dihorhon benget ni roha i do hatauon (tahan uji). Jala dihorhon hatauon i do panghirimon na mangolu di bagasan Tuhan Jesus Kristus, Sipalua i. Amen.

Pdt. A. Tambun, STh.