Sermon Parhalado HKBP Bongbongan Ressort Bongbongan

Jumat, 26 Mei 2023. Jamita Partangiangan, Minggu Trinitatis.

 

 

Mateus 11:25-27

 

DEBATA SITOLUSADA PANOMPA SALUHUT NASA NA ADONG

 

1.Patujolo

Turpuk jamita on manaringoti ni panghobasion ni Tuhan Jesus ditongatonga ni portibi on na patandahon hasadaonNa dohot Debata (Allah yang menyatakan diriNya di dalam Yesus Kristus). Boi do tong jumpang hita turpuk hadosanna di Lukas 10: 21-22. Konteks ni turpuk on ima legalisme Jahudi taringot tu namangulahon patik pola do sahat tu 613 patik napinajongjong nasida, na ingkon ulahononhon, ndang boi laosan, ai uhuman do na ro. Borat jala sorat do mangulahonon, lumobi ma angka horong na metmet, napogos, nagale na so mardihadiha.  Soratan do nasida laho mangihuthon patik na sampului tamba 613 patik tulisan dohot lisan. Alanii do turpukon songon gokkon paposhon roha ni angka metmeti asa tongtong marhaporusan tu Debata na papapatar diriNa dibagasan Jesus parholongi. Holan dibagasan Jesus do ungkap nasa hahomion dohot dalan tubanua ginjang, na ro pasonanghon angka na loja jala na sorat boi pei ala ni patik dohot ala niangka na masa diportibion. Ditongatonga ni halak Jahudi do nasailaon Anak ni jolmai, marbarita nauli, mangajari, patupahon angka tanda halongangan alai tung so tarjalo roha nasida do Jesus, baliksa ditulak jala diporso do hadirion ni Jesus Anak ni Debata.

 

 

2.Hatorangan ni turpuk

1. Ayat 25: Patujolo/pendahuluan di tangiang puji-pujian hamauliateon ni Jesus tu Debata sigomgom banuaginjang dohot tano on  ( mengucapkan doa syukur puji-pujian) ala olo Debata papatarhon hadirionNa sitompa langit dohot tano on jala olo mamparrohahon angka na metmet angka  na so mardihadiha na rade manjanghon haroro ni Jesus, na sai tongtong marhaporusan tu Debata. Martangiang puji-pujian Jesus ala dipapatar hahomion ni hatai  tu angka siondihonon na so margogo,  jala ditamondinghon sian jolo ni angka na pistar dohot na marroha (Bapa surgawi mewahyukan rahasiaNya kepada orang-orang kecil dan menyembunyikannya bagi orang bijak dan orang pandai).  Hata  naminaksud dison ima Jesus naung gabe Hatai, gabe daging maringanan ditonga-tonga ni portibion. Hata hangoluan na mamboan haluaon,i do na ditulak niangka  nagogo, na pistar jala na bisuk intelektual Jahudi, gabe buni ma sian nasida hangoluani. Songoni do Apostel Paulus paingothon huria Korint na mandok haooton do taringot tu silangi, didok ibana ma na oto diroha ni portibion dipillit Debata laho pailahon angka na bisuk, jala na gale diportibion dipillit Debata laho pailahon nagogo (1 Korint 2:27). Dipapatar Debata do diriNa tuangka na olo manjangkon haroroNa dibagasan Jesus Kristus, dipatandahon do diriNa marhite tabe/sapaan holong laho pabotohon balga ni pambahenan/karya keselamatan ditonga-tonga ni portibion. Halak na manghilala dirina bisuk, pistar jala marhagogoon maol do manjangkon hadirion ni Jesus na ro dibagasan haleaon dohot hapogoson. Ndang tarjalo rohana Jesus Sipalua ingkon manaon, nda songon raja ma nian, na sangap, na bonggal, na marmulia. Tu angka sisongonima buni hahomion ni Debata ujungna gabe lam maoto jala ndang marroha.
2.  Ayat 26-27 : torang jala tangkas do dihatahon Jesus, asa ndang adong na mananda Anak i dungkon ni Ama i, Ama i pe ndang ndang adong namananda I, ia so holan Anak i. Sada do Debata dohot Anaki, ditogutogu do angka napinodaanNa mangihuthon lomo ni rohaNa. Dipatupa Jesus pe angka ragam ni pangajarion, barita na uli dohot tanda halongangan dalanNa laho papatarhon habalgaon ni Debata. Anggo ditanda hamu Ahu, tandaonmuna do nang Amai. Olat ni on ma ditanda hamu Ibana jala diida hamu Ibana. Porsea ma hamu di Ahu, dibagasan Amai do ahu, jala dibagasan Ahu do Amai (Johanes 14:7-11). Pasupasu ni Debata do umbahen na mananda jolmai di Debata nang Anaki (pengenalan akan kesatuan Allah dengan Yesus adalah sebuah anugerah besar bukan hasil usaha manusia), ndang ala habisuhon manang ala marroha jolmai. Olo Debata papatarhon diriNa dibagasan  Jesus, pasupasu nabalga  do on na ingkon sijangkonon ni angka na porsea namarhaporusan tu Debata. Na mananda jala manjanghon dapotan haluaon dohot hangoluan, na so porsea, na manulak ndang manjanghon dapotan jea (Mat.11:20-24).

 

 

3.Hahonaan ni turpuk tu jamita

1. Epistel di Minggu Trinitatis minggu Hasitolusadaon ni Debata do turpukon. Na manjuhon hita asa tangkas manjanghon jala manghaporseai Debata Sitolu sada: Ama, Anak dohot Tondi Parbadia. Tangkas do hadirion ni Debata sitolu sadai dibagasan panompaon, panobusion dohot pangondihonon. Pangarimpunan ni haporseaonta do Trinitatis, hombar tu nasurat dibukku na badiai dohot angka naung hea dihatahon jala diajarhon Jesus uju diportibion Ibana. Ndang hata-hata habisuhon nijolmai, alai panindangion ni Haporseaonta doi. Ende tangiang mauliate ni Jesus di Debata panompa langit dohot tano on, ende patangkashon hasitolusadaon ni Debata.

 

2. Turpukon mangajarhon tu hita asa maniru Jesus hita na sai tongtong martangiang, marende mamuji Debata songon tanda mauliate ni rohanta tu Ibana. Na sai adong do na mambahen loja jala sorat hita namangoluon, marragam siadopanta, alai asa neang panghilalaanta mamujimuji ma hita tu Debata, disima lam tangkas panandaonta dihadirion ni Debata, pasupasuhononNa ma roha namananda dihita. So tung tarippu na bisuk na marroha hita taringot tu pambahenan ni Debata, ndang tuk hapistaran dohot hamaloonta manangkasi habalgaon ni Debata, bagasnai antong hamoraon, hapistaran dohot parbinotoan ni Debata. Na so hasigatan do angka uhumNa, jala na so habogasan do angka dalanNa (Rom 11:32-33). Molo ungkap rohanta manjanghon dohot manghaporseai Tuhantai, nda pasupasu doi/anugerah, silehon-lehon ni Debata, asa diungkap tu hita angka pambahenanNa, gabe mangarti jala marroha hita disaluhutna.