Jamita Minggu II Dung Ephipanias, tanggal 19 Januari 2025.

Jesaya 62: 1 – 5.

Topik: Saluhut Bangso Marnida Hatigoran dohot Hamuliaon Ni Jahowa

 

Patujolo.

Dung salpu arsak ni roha olo ma soluk ro las ni roha. Sebalikna, dung salpu angka las ni roha tagamonta do ro angka arsak ni roha. Di turpuk jamita on boi do taboto manang na songon dia panghilalaan ni bangso Israel hombar tu na masa di ngolu nasida. Uju haruar bangso ni Debata ima bangso Israel sian habuangan Babel tu Jerusalem gok las ni roha jala marolopolop do nasida salahutna ala ndang diparhatoban be nasida, ala haruar sian hasusaanna sian habuangan Babel jala ingkon mulak tu Jerusalem ala nunga salose uhuman nasida 70 taon lelengna. Dung sahat nasida di Jerusalem putor ma muse panghilalaan nasida, ala nunga malengse Jerusalem. Huta Jerusalem na nidapot nasida dung mulak sian hubuangan Babel ndang songon Jerusalem uju tarbuang nasida tu Babel. Mangida halelengse ni huta Jerusalem gabe marsak situtu jala mansai jut ma roha nasida.

 

Hombar tu si tapaihutihut ma sangkap dohot pambahenan ni Tuhan Debata tu halak Israel nang tu saluhut halak na porsea di sadok liat portibi on:     

Parjolo: Ndang tarbahen sip jala ndang olo pompoman manang mauhom...

            Taparhatutu jala tahaporseai do ia hamumulak ni bangso Israel sian habuangan Babel tu huta Jerusalem dipamasa do i hombar tu sangkap dohot hagogoon ni Tuhan Debata do patupahon i tu halak Israel. Di bagasan las ni roha do bangso i mulak sian habuangan Babel. Jala saleleng di pardalanan pe nasida sian habuangan Babel manuju huta Jerusalem gok las ni roha do nasida songon las ni roha ni angka halak na manggotil mamboan tibalanna. Dihirim nasida do lam singkop las ni roha nasida molo dung sahat tu huta Jerusalem na dihasiholi jala dihalungunhon nasida saleleng tarbuang di Babel. Hape balik do panghirimon nasida ala nunga malengse huta Jerusalem, huta na dihalomohon jala dihasiholi nasida nunga tarulang songoni nang angka ladang nasida tong do tarulang. Las ni roha nasida di na mulak sian habuangan Babel gabe tompu muba gabe arsak ni roha dung sahat nasida tu huta Jerusalem ala nunga tarulang huta i jala bagas joro na gabe inganan nasida na sai laon mamuji Tuhan Debata ndang adong be, tinggal puing-puing nama. Roha na mandate dohot panghilalaan na magopu, ima  na masa di halak Israel hatiha di na sahat i nasida tu huta Jerusalem. Hombar tu na masa na ni adopan ni bangso Israel i marsoara ma Tuhan Debata marhite Panurirang Jesaya, mandok: “Ala ni Sion ndang tarbahen ahu sip, jala ala ni Jerusalem ndang olo ahu pompoman...” (Ay. 1).  Adong angka pande bisuk na mandok: “Tuhan Debata ndang olo sip jala ndang olo mauhom laho patupahon angka nauli na denggan di parngoluon ni halak Israel”. Ingkon marsoara jala mangula patupahon angka na denggan. Adong muse mandok: “Panurirang Jesaya do na so olo sip jala ndang olo mauhom laho paturehon huta Jerusalem naung tarulang i”. Nian, ndang apala ringkot gabe siparsoalhononhon i, alai na pasti manongtong do Tuhan Debata sumangkapi jala mangula mambahen na denggan tu halak Israel nang tu saluhut na porsea nang tu na tinompaNa pe. Songoni ma nang saluhut angka naposo ni Tuhan i pe ingkon di bagasan parsitutuon laho mammingkiri dohot manghobasi angka na ringkot di ngolu ni angka na porsea di Tuhan Debata. Nang saluhut angka hajolmaon pe ingkon olo patureon.

 

Paduahon: Hinaringkot ni Dolok Sion dohot Huta Jerusalem.           

Dolok Sion dohot huta Jerusalem manggombarhon inganan ni  habadiaon ni Tuhan Debata jala inganan ni halak na porsea marsomba tu Tuhan Debata. Boi do muse talapati ia Sion dohot Jerusalem i ima huta ni Debata jala inganan nampuna ni Debata. Adong pamingkirion naung somal di halak Israel: Ia Debata na tahaporseai jala na tasomba i maringanan di dolok na timbo. Dolok Sion dohot huta Jerusalem mangihuthon turpuk on ima inganan na binahen ni Tuhan Debata gabe inganan ni halak na porsea asa gabe inganan habibinsar ni hatigoran na sipatupaon ni Tuhan Debata tu saluhut angka na porsea nang tu sandok liat portibi on. Ai di si do dibagabagahon Tuhan Jahowa binsar hatigoran ni Jahowa songon sondang ni mata ni ari jala hatuaon (hamuliaon) na marharoroan sian Tuhan Jahowa songon sulusulu na marsigorgor. Hatigoran sipabinsaron ni Tuhan Debata Jahowa dipatudos do songon mata ni ari. Boasa? Tangkas do taboto ia parbinsar ni mata ni ari ndang hea tarlambat. Binsar do mata ni ari mamungka sian buhabuha ijuk sahat tu bot ni ari. Dungi ditaringoti do di turpuk on hatuaon (hamuliaon) sipasahaton ni Tuhan Debata tu halak Israel nang tu angka sandok liat portibi on songon sulusulu na marsigorgor. Molo nunga saut na pinarbagabaga ni Tuhan i, binsar hatigoran ni Debata di tongatonga ni portibi on mansai godang ma masa angka haimbaruon ima angka hamubaon tu hadengganon.   

 

Patoluhon: Masa haimbaruon (transformasi) ala ni hatigoran na sian Debata.

            Molo nunga binsar hatigoran na sian Tuhan Debata, masa ma di tongatonga ni halak Israel nang di ngolu ni halak na porsea di sandok portibi on, halongangan gabe hasoloan, tubu ma angka las ni roha di tongatonga ni halak na porsea songon las ni roha ni pangoli mida na niolina. Somalna hata halongonan martudutudu do i tu tano bakalbakal manang tano na tungil. Huaso dohot hagogoon ni Tuhan Debata do manarihon jala marmudumudu ngolu ni angka na hinaholonganNa, hombar tu si ma di turpuk on jumpang hita tanda halongagan na pinatupa ni Tuhan i, “tano halongonan manang tano tungil dipauba Tuhan i do gabe tano na napu (tanah yang subur) asal ma marsihohot angka na porsea i manongtong marhaporseaon holan tu Tuhan Debata. Proses pertanian ni angka halak na porsea i marparbuehon angka na denggan ala tano inganan ni hatubuan ni angka suansuanan nasida nunga dipauba Tuhan Debata sian tano na tungil gabe tano na napu. Gabe denggan angka suansuanan nasida jala boi dihalashon nasida sian angka parbue ni angka suansuananna. Nian di tongatonga angka natuatuanta pe nunga tangkas manghangoluhon falsafah ni habatakon na mandok: “Sinur ma na pinahan jala gabe na niula”. Taringot tu son pe ringkot do pahantuson. Adong do halak na olo mandok: “Gabe na niula jala sinur ma na pinahan”. Sasintongna, angka na pipatupa ni angka sinajolonta i (leluhur orang batak), ima marmahan angka dorbia sipahanon (Beternak). Sian angka kotoran ni angka dorbia na pinarmahanna i ma dibahen gabe napu manang pupuk ni angka suansuanan di juma manang di ladang. Sian i, gabe tubu ma pandohan: Sinur ma na pinahan jala gabe ma na niula. Marhite pandohan on, tapahombar ma muse ngolunta on tu “Kearifan Lokal” songon naung dihangoluhon angka ompunta sijolojolo tubu i. Unang muramura tubu angka panahit jolma mulak ma tu “alam”. Angka pahanpahananta i unang ketergantungan tu pellet, jala angka suansuanan na di ladangta i pe unang ma ketergantungan tu pupuk kimia. Hombar tu si dohohonon ma sada umpasa na mandok: Asa tinaruan ma angka rihit, binahen ma gabe bahan bangunan. Sai dao ma angka sahit, jala masa ma angka hahisaron. Emma tutu. Antong manongtong ma hita marhaporseaon holan tu Tuhan Debata ala nunga dipatupa di ngolunta angka nauli na denggan marhite na patupahon pardengganan dohot pardamean sian hadirion ni Tuhan Debata tu angka jolma pardosa i dibagasan AnakNa Jesus Kristus. Nunga dilehon Tuhan Debata, AnakNa na sasadai bahen tobusta sian dosa dohot hamatean, pola ingkon mate tarsilang Tuhan Jesus i di dolok golgata ala ni dosanta. Ala ni i, mangasahon gogo sian Tuhan i, taharinggashon ma patupahon “tranformasi” di bagasan ngolunta siganup ari asa tubu jala masa ma angka las ni roha di saluhut halak na porsea tu Tuhan Debata, songon dolidoli laho mangaririt na marbaju, lumobi songon las ni roha ni pangoli mida na niolina. Amen.