Jamita Minggu, tanggal 12 Januari 2025.

Ulaon Apostel 8: 14 – 25.

(Manghatindangho Hata Ni Debata)

Hamu angka dongan na hinaholongan ni Tuhan Jesus Kristus.

Ia turpuk jamita on, manaringoti ulaon ni angka apostel pararathon harajaon ni Debata, mangasahon goar ni Tuhan Jesus di huta Samaria. Nunga parjolo si Pilippus mamaritahon manang manghatindanghon Barita Nauli di huta Samaria. Dipatuduhon si Pilippus do huaso dohot hagogoon ni Debata di tongatonga ni halak Samaria. Dipatupa ibana do tanda halongangan mangasahon goar ni Tuhan Jesus Kristus di jolo ni halak Samaria. Dipaharuar ibana do angka tondi na hodar sian angka halak na sinonggopan ni tondi na hodar, angka na sarion dohot na lumpuon dipamalum. On ma na mambahen gabe las roha ni halak Samaria marnida si Pilippus. Gabe pos ma roha ni halak Samaria tu si Pilippus songon naposo ni Debata ibana na mamaritahon harajaon ni Debata marhite goar ni Tuhan Jesus Kristus. Gabe torop ma halak gabe porsea tu Tuhan Jesus Kristus jala tardidi.

Adong ma di si sahalak na margoar si Simon, sahalak parsibalik mata manang ahli sihir. Tung mansai godang halak marlomo ni roha mida si Simon i, ala ni sahalak ahli sihir ibana. Alai dung dibege jala diida ibana huaso ni Debata na pinatuduhon ni si Pilippus, longang ma ibana jala diakui ibana ma di hadirion ni si Pilippus hagogoon ni Debata na umbalga. Humebat do hogogoon ni Debata na pinataridahon ni si Pilippus i sian na adong di si Simon.

Ala nunga lam torop na porsea jala tardidi di Samaria, gabe ditongos ma si Petrus dohot si Johannes manopot nasida tu Samaria. Hape, diida nasida ma, holan tardidi sambing dope nasida, ndang digohi Tondi Parbadia dope. Gabe diampehon apostel i ma tanganna tu nasida, gabe disonggopi Tondi Parbadia ma nasida. Gabe dapotan sileholehon ni Tondi ma nasida (manang Karunia Roh), gabe boi patupahon tanda halongangan, marjamita dohot pamalumhon angka na marsahit.

Hinorhon ni i, lam longang ma si Simon. Gabe ro ma ibana mamboan hepeng tu apostel i. Tujuanna, naeng manuhor huaso ni Debata na adong di angka apostel i, asa gabe ugasanna, asa boi ibana dohot mangampehon tanganna tu angka jolma gabe digohi Tondi Parbadia nasida. Gabe muruk ma si Petrus, didok ma: Mago ma ho rap dohot hepengmi, ai dirimpu ho tartuhor silehonlehon ni Debata. Ipe, pauba ma roham sian hajahatonmi, jala pangido ma tu Tuhan i anggiat tarsesa tahitahi ni rohami.

 

Hamu angka dongan hinaholongan ni Tuhan Jesus Kristus.

Gabe siihuthon Tuhan Jesus na sejati ndang sae hape holan tardidi. Jala ndang holan intap ni na targoar gabe halak na porsea songon si Simon na di turpuk on. Alai, ingkon tangkas do mangambolongkon hajolmaon na buruk (cara hidup lama harus ditinggalkan), jala ingkon mangolu di hajolmaon na imbaru (harus memasuki hidup baru), ingkon gabe sorminan hadirion ni Tuhan Jesus do angka naung porsea i. Nang pe naung tardidi jala didok na porsea si Simon, alai tong dope di hajolmaonna na leleng ibana, songon sahalak ahli sihir. Ndang dipamate ibana dope roha diri, ndang mangolu di bagasan ngolu na imbaru na pinarade jala na binoan ni Tuhan Jesus. I do, umbahen naeng tuhoronna huaso ni Debata songon naung diida ibana di hadirion ni si Pilippus.

Taparhatutu ma, haporseaon na paluahon ima haoporseaon na polin tu Tuhan Jesus na patupahon ngolu na imbaru di saluhut jolma na porsea tu Ibana, ngolunta on ingkon ngolu na marhamubaon ala ni Tuhan Jesus (Hidup yang bertransformasi secara total). Manadinghon bako ni ngolu na leleng jala bongot tu ngolu na marhaimbaruon na tubu sian Tondi Parbadia na marojahan tu Tuhan Jesus Kristus.

 

Hamu angka dongan hinaholongan ni Tuhan Jesus Kristus.

Marhite na masa na di turpuk on dipaingot ma tu hita: Unang ma targantung tu angka tanda halongangan ngolu ni halak na porsea, ala ingkon tartuju ma ngolunta tu Tuhan Jesus mual jala na mangalehon angka “tanda halongangan i”.  Na mansai ringkot siingotonta, ndada malua hita bahenon ni angka tanda halongangan, alai holan ala haporseaon tu Tuhanta Jesus do umbahen na malua angka na porsea i. Ala ni i, unang ma marhaporseaon tu tanda halongangan hita, alai ingkon marhaporseaon tu Tuhan Jesus na patupahon tanda halongangan i ma.

Dipaingot turpuk on do hita saluhut na porsea, ia hogogoon ni Tondi Parbadia ndada ilmu sihir (Bukan kekuatan magic). Tondi Parbadia bagian hasitoluasadaon ni Tuhan Debata na mangula di hadirion ni angka jolma na olo porsea. Tondi Parbadia do na manjou saluhut halak na porsea tu hangoluan na saleleng ni lelengna. Hogogoon ni Tondi Parbadia paubahon halak parjahat na sumalin, gabe marhamubaon bahkan gabe halak parbarita Nauli songon Apostel Paulus. Ala ni i, ndang pasarupahononta hagogoon ni Tondi Parbadia tu ilmu sihir, tung marasing situtu do i. Ai molo ilmu sihir boi do i dipake hombar tu lomo ni na umpeop i, alai molo Tondi Parbadia ndang boi pakeonta hombar tu lomo ni rohanta, alai ingkon hita do mangolu saguru tu lomo ni roha ni Tondi i. Asa dipauba Tondi i roha, pingkiran nang parngoluonta pe.    

 

Hamu angka dongan na hinaholongan ni Tuhan Jesus Kristus.

Pangulaon ni si Pilippus, si Petrus dohot si Johannes, i ma ulaon pahembanghon harajaon ni Debata tu huta Samaria. Papatarhon huaso dohot hagogoon ni Tuhan Debata, jala patuduhon holong ni roha ni Debata tu saluhut hajolmaon di sandok portibi on. Molo si Pilippus, si Petrus dohot si Johannes manghatindanghon huaso dohot hagogoon ni Tuhan Debata tu angka jolma na so tumanda Debata dope. Antong dipartingkian nuaeng on, tahalaputi jala taharingkothon ma laho mangarahon torop jolma tu harajaon ni Debata tu angka na so mananda Depata dope nang tu angka naung targoar halak na porsea di sandok partibi on. Taingot jala tahaporseai ma tona ni Tuhan Jesus (Amanat Agung Tuhan Yesus), na mandok: ”Laho ma hamu, podai hamu ma saluhut bangso, didi hamu ma nasida tubagasan Goar ni Ama. Anak dohot Tondi Parbadia! Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!”. Alai molo tung so boi pe hita laho tu liat portibi on, pinomat di humaliangta ma tahatindanghon huaso dohot hagogoon ni Tuhan i. Isarana ni molo di rumahtangga, angka natoras manghatindanghon pambahen ni Debata marhite na manghaholongi ianakhonna. Songon i nang angka parjamita manang parhalado ni huria manghatindanghon Debata marhite na manghaholongi saluhut ruas ni huria, gabe siboan jala sibahen dame di rumatangga nang tu humaliang pe. Ndang terbatas holan manghaholongi angka dongan sahaporseaon, alai dohot do nang tu angka na so sahaporseaon. Tutu ndang apala tarbahen hita ingkon sarupa hita dohot angka apostel na parjolo i laho pararathon hata ni Debata. Jala ndang na ingkon gabe apostel hita asa tahatindanghon hata ni Debata. Aha ragam ni angka ulaonta be, boi do hita manghatindanghon hogogoon dohot huaso ni Debata dohot pararathon harajaon ni Debata. Alai ingkon jumolo do hita manjalo dohot manghangoluhon hata ni Debata di bagasan ngolunta siganup ari dungi pe asa tu angka dongan na di humaliangta. Amen.