Sejarah Singkat HKBP Sigapiton Dolok

Gareja HKBP Sigapiton Dolok maringanan di topi ni Tao Toba, di huta Sigapiton. Jarak ni huta Sigapiton sian Pelabuhan Ajibata hirahira 1 (sada) jam pardalanan daona, naik kapal. Taon 1925 jongjong ma parpunguan na niuluhon ni sahalak Evanggelis na sian Janjimatogu Porsea, maringanan di bagas ni Ompu Tiori Sirait. Di taon 1928 pinda ma parpunguan i tu Dolok ni jabu Ompu Parida Situmorang, dibahen ma di si pajokpajok manang parlapelapean na tong do na niuluhon ni Evanggelis. Di taon 1931 pinda ma parpunguan i tu Lumban Manurung tu toru ni sopo ni Op. Tauria Manurung na niuluhon ni Evanggelis rap dohot Sakarias Manurung, Ernatus Butarbutar dohot A. Pirdoling Butarbutar. Di Taon 1935 pinda ma muse tu huta Lumban Pea, ima hajongjongan ni Gareja sinuaeng, laos gareja i ma dipake gabe parsikolaan laho mangajari angka dakdanak na di huta i na niajaran ni amanta guru Kalaulus Naiborhu na sian Lumban Rang.

            Taon 1938 mulak ma Evanggelis i tu Janjimatogu, alai andorang so mulak dipabangkit ma Sakarias Manurung gabe Vorhanger (Uluan ni Huria), alai hot dope gareja dipake gabe parsikolaan na niuluhon ni amanta guru Kalaulus Naiborhu. Taon 1940 mulak ma amanta guru Kalaulus Naiborhu tu Lumban Rang. Hot dope gareja dipake gabe parsikolaan na niuluhon ni amanta guru Mangelek Sirait. Taon 1945 St. Sakarias Manurung ma na gabe Vorhanger, jala on ma goar ni angka parhalado di tingki i: St. Ernatus Butarbutar, St. A. Pirdoling Butarbutar, Ompu Bumbunan Situmorang, kerkerat ma Op. Herlina Nadapdap dohot A. Marolop Nadapdap.  Taon 1950 dipillit ma St. A. Marolop gabe Vorhanger, jala dipabangkit ma gabe sintua A. Pirden, A. Tiambun Gultom dohot Op. Bumbunan Situmorang. Taon 1955 ndang be di gareja inganan ni parsikolaan ala nunga adong inganan na asing gabe parsikolaan. Taon 1956 dipillit ma A. Tiambun Gultom gabe Vorhanger. Taon 1957 dipillit ma amanta guru Karmiden Samosir gabe Vorhanger, jala dipabangkit ma gabe sintua amanta Jahim Gultom, A. Jamatar Sijabat, A. Bahastan Sitinjak, A. Apen Gultom dohot A. Holongan Butarbutar. Taon 1959 dipillit ma A. Asper Gultom gabe Vorhanger. Sahat tu taon 1974 hot dope A. Asper gabe Vorhanger jala tamba ma parhalado A. Resmi Sirait. Di taon 1974 – 1980 hot dope amanta A. Asper Gultom gabe Vorhanger jala tamba ma sintua Am. Master, A. Ulina, A. Juminter, A. Apera dohot Maraden manurung (A. Anita). Taon 1980 tarpillit ma amanta St. Jabangun Sirait (A. Resmi) gabe Vorhanger jala priode nasida sahat tu taon 2002. Parhalado di tingki i, St. Kasianus Sitinjak (Am. Bahastan), St. Osner Sijabat (Am. Jamatar), St. Japar Butarbutar (Am. Holongan), St. Oberlin Butarbutar (Am. Pirden), St. Jaliter Samosir (Am. Master), St. Levi Gultom (A. Jumintar), St. Kanoser Sitinjak (A. Apen), St. Maraden Manurung (A. Anita), St. Jamuda Situmorang (A. Bumbunan), St. Marben Situmorang (A. Sunggul), St. Pasiman Gultom (Am. Jusmar), dohot St. Madihon Sirait (Am. Romada).

            Di taon 2002 dipillit ma St. Marben Situmorang (Am. Sunggul) na gabe Uluan ni Huria (Vorhanger), angka sintua: St. Kasianus Sitinjak (Am. Bahastan),  St. Kanoser Sitinjak (A. Apen), St. Jaliter Samosir (Am. Master), St. Pasiman Gultom (Am. Jusmar), St. Junus Butarbutar (Am. Dormian), St. Jaliter Samosir (Am. Master), St. Rudin Sinaga (Am. Hermita), St. Jamuda Situmorang (A. Bumbunan), St. Paeman Siboro (A. Lasredi), St. Mangisi Sidabalok (Am. Swaty), St. J. Epentus Gultom (Am. Okto), St. Marulak Nainggolan dohot St. Saor Tampubolon.

Songoni ma jolo na boi hupatupa hami sejarah ringkas ni hurianta on. Anggiat ma marguna sejarah na hupatupa on.

Sigapiton, Pebruari 2013.

Op. Melita Sirait.

Tu amanta T. V. Situmorang di Kalimantan:

Hurang lengkap dope sejarah on amang, hudok pe muse asa dipature nasida. Dung pe lengkap asa tapamasuk tu proposal (Pdt. A. Tambun, STh).