Sermon & Arisan
Sermon
& Arisan Parhalado HKBP Ajibata, 13 Januari 2013.
1.
Marende
B.E No. 672: 2 TUNG GODANG
SITUTU
2. Ai lambok do soara ni Tuhanta i, ro ma ho las ma nang rohami.
Sai taingot tongtong hata ni Tuhan i, mangarahon jolma tu Tuhan i.
Sai patupa ma i ala ni Tuhan
i, so mangkirim balosna tu ho.
Debata do marnida na niulami, manang na adong parbue ni i.
2.
Tangiang Pamuhai
3.
Manjaha
Turpuk : 5 Musa 6: 10 – 19
10 Ia dung masuk ho ditogihon
Jahowa, Debatam, tu tano na niuarihonna tu ompum, tu si Abraham, si Isak dohot
si Jakkob mangalehon tu ho huta, angka na bolon dohot na denggan, angka na so
pinungkam.
11 Tole bagas angka na gok dohot
na denggan marragamragam, angka na so niisianmu dohot sumur angka na so
hinalianmu, tole porlak anggur dohot hau Jetun angka na so sinuanmu, jala
mangan ho sian i pola bosuran.
12 Sai marjaga ma ho di dirim,
asa unang dihalupahon roham Jahowa, naung manogihon ho ruar sian tano Misir,
sian bagas parhatobananmu.
13 Tama ingkon habiaranmu Jahowa,
Debatam, jala oloanmu Ibana jala maruari ho tu Goarna.
14 Ndang jadi ihuthononmuna angka
debata sileban, sian debata ni bangso angka na humaliang hamu.
15 Ai Debata parrimas do Jahowa,
Debatam, di tongatongamu, asa unang marpiarpiar rimas ni Jahowa, Debatam, mida
ho, gabe siaphononna ho maon sian sisik ni tano on.
16 Ndang jadi unjunanmuna, Jahowa
Debatamuna i, songon naung niunjunanmuna Ibana di Massa.
17 Ingkon burju hamu mangaradoti
angka tona ni Jahowa, Debatamuna i, ro di panindangionna dohot aturanna, angka
naung tinonahonna tu ho.
18 Asa ulahononmu na tigor dohot na
denggan di adopan ni Jahowa, asa marhasonangan ho, jala asa masuk ho jala teanonmu
tano na denggan i naung niuarihon ni Jahowa tu angka ompum.
19 Ingkon Ibana mangeak saluhut
musum sian adopanmu, songon naung pinorbagabaga ni Jahowa hian.
4.
Hatorangan
Ni Turpuk
Unang HalupahonJahowa
(5 Musa 6 : 10 – 19)
(5 Musa 6 : 10 – 19)
I. Patujolo.
Adong
do pandohan di hata Indonesia “Lupa Kacang akan Kulitnya”. Pandohan on
manggombarhon pangalaho ni sasahalak dung dapot na sinangkap ni rohana gabe
dihalupahon do angka halak naung mangurupi ibana. Songon i do tutu kacang:
dipangan do borasna i, jala tung mansai tabo. Hape ianggo kulitna pintor
diambolongkon do i huhut di degei. Hapedi tingki proses pertumbuhan ndang boi
denggan boras ni kacang i molo so dibalut kulitna i. Suman tu si ma na ni dok
ni Jahowa tu halak Israel songon na di turpuk jamita on jala tung mansai hona do
sahat ro tu tingki saonari. Tingki
manjalahi pasupasu ni Tuhan i jolma, sai di haringgashon do martangiang mangido
tu Debata. Alai, godang halak dung dilehon angka pangidoanna i; gabe dilalapi
parsaulionna i ma ibana. Marlas ni roha do jolma molo dung mamora, gabe lupa tu
Ibana silehon hamoraon i. Ai dung lam tamba hamoraon, tamba do nang aleale, martamba
muse sangapna. Ala ni i tung ringkot situtu do dibohali Jahowa bangso di na laho
manjalo dohot marsaulihon tano Kanaan i, habaoran ni situak ni loba dohot susu.
II. Hatorangan.
1.
Debata Mangalehon. Di
falsafah ni halak hita Batak na digurithon di ende ‘Marragamragam Sintasinta’ di hatahon do 3 ragam na sininta ni jolma
manisia: hamoraon, hagabeon, hasangapon,
na deba asal ma tarbarita goarna! Borhat
do torop halak batak manombang sian bona pasogit, tar tungkan timur manang tu
angka luat na asing laho mangeahi ngolu na dumenggan. Ditaon loja, bungkuk
tanggurung tahe ninna natuatua, manaon las ni ari, ditinggang udan asa dapotan
ngolungolu na dumenggan. Dihalojahon jolma i do gabe pola sipata so diingot
tingki laho maradian, sudena asa dapotan ngolu na dumenggan. Songon i do nang halak Israel, ditaon do pardalanan
saleleng 40 taon bungkas sian Misir laho mandapothon tano Kanaan: huta habaoran
ni susu dohot situak ni loba, di ulohon jala diiringiring Debata. Tung tangkas
do pangiringon ni Debata tu nasida, jala Debata do nanaeng mangalehon tano i di
nasida asa marhasonangan nasida. Sian
hatorangan na di ayat 10: tung tangkas do, ia huta i dohot saluhut isina
silehonlehon ni Debata sambing do. Huta i, nunga marisihon huta angka na bolon
dohot na denggan, angka na so pinungkanasida, tole bagas angka na gok dohot na
denggan marragamragam, angka na so niisinasida dohot sumur angka na so
hinalinasida, tole porlak anggur dohot hau Jetun angka na so sinuannasida, jala
mangan nasida sian i pola bosuran. Saluhut tahe angka naringkot diparngoluan
siapari, angka naringkot di ngolu ni bangsoNa diparade Debata. Molo mamereng i
boi dohonon nunga lobi sian na ringkot di parngoluon siapari, nunga dohot
hamoraon (arta na suksuk) diparade Debata di nasida. Tarpatupa Debata do tahe
mangalehon saluhutna i, ai Debata do nampunasa (pat. Poda 3:16). Sian on boi
dohonon, ndang sala na mamora; alai naeng ma nian hamoraon i bahenon hasangapon
tu Debata marhite na olo mangurupi angka dongan na gale.
2. Dapotan hasonangan sian Jahowa. Sai adong do jolma, mulai dung sorang tu portibi on
nunga mamora; ala nunga adong hian arta ni natorasna. Alai gumodang do jolma i,
ingkon loja mula ulaon pasarisari ngoluna pola gabe so adong tingki laho
mangulon. Dohot do ari minggu di pangke laho mula ulaon, ai didok rohana: molo
so hinalojahon, sian dia harorona? Alai na deba, huhut do dipasahat dirina tu
Debata, jala martangiang mangido asa dipasupasu ulaonna asa dapotan sian halojaonna
i.
Debata do mual ni nasa pasupasu, jala
Ibana do mangalehon saluhut angka pangomoan na hinalojahon ni hajolmaon. Tangkas do i di halak Israel, sahat pe nasida di tano
Kanaan jala taruli di saluhut isi ni tano Kanaan silehonlehon ni Debata sambing
do i. Masuhan nasida ma sada partingkian na imbaru: ndang pola be halojahonon
ni nasida mardalan di halongonan, pajongjong undungundung di pardalanan,
mangalului aek paima udutan nasida muse mardalan, songon uju di parhorsihan.
Mian nama nasida di sada huta, jala mangingani huta i, mangula porlak, adong
sumur dohot angka na ringkot tahe di parngoluan siapari nunga rade. Holan
mengolah nama nasida, nunga neang sude; malua sian haberniton songon na masa di
pardalanan sian Misir i.
3. Jaga
dirim. Dipaingot Debata do bangso i di na laho manjalo hasonangan ni
ngolu: Sai marjaga ma ho di dirim, asa unang dihalupahon roham Jahowa (Bhs. Ind:
“Dan apabila engkau sudah makan dan menjadi kenyang, maka berhati-hatilah,
supaya jangan engkau melupakan Tuhan”). Olo do tutu ala naung jumpang na
jinalahan jala boi marhasonangan gabe lupa tu na mangalehon/tu mual ni pasupasu
i, ima Debata. Hape anggo di tingki na mangido sipangidoan i, songon i ma
parsigulutonna tu Debata asa sahat nian na sinangkapan ni rohana. Tarpatupa
Debata do mangalehon manang aha pe na pinangido ni jolma i, ala Ibana do
nampuna jala namarhuaso di sandok portibi on. Alai, olo dope marserep ni roha
jolma i dung gok arta (singkop napinarsinta nirohana i)? manang gabe ginjang do
rohana jala papulikpulik parsaoran mamereng rupa manang (membedakan orang
berdasarkan status ekonomi)? Jala na umporsuk muse gabe manghalupahon Tuhan i,
sai hira holan ala ni gogonas andiri boi dapot saluhutna i? Deba, ala ni hamoraon (huaso) na di ibana gabe so mabiar
be mida Debata. Jotjot arta/huaso na adong i tarpangke gabe paporsukporsuk
angka na gale, sai hira naeng mangurupi alai ujungna gabe mangahut. Hamoraon
jotjot do mamboan tu dosa, lam muse molo nunga holong roha di arta i (pat. 1
Tim.6:10). Tabereng do do angka masa nuaeng di bangsonta on, godang angka jolma
i naung tarjorat tu na mangulahon korupsi. Godang do halak mamora, alai lam
martamba do nang na pogos. Adong na bisuk mandok: “Kelaparan terjadi karena
sebahagian orang makan terlalu banyak”. Boasa masa songon i? Ala ndang mabiar
namangulahon i tu Debata, jala ndang unduk ibana tu Debata. Hape didok Tuhan
Jesus mangalusi sungkunsungkun ni soldadu i: “Unang ma susai, unang ma dobo
hamu halak! Hasabamhon hamu ma gajimuna! (Luk.3:14)
4. Habiari jala Oloi Jahowa. Ndang songon na jolo i be godang ni kesempatan na
denggan di partingkianta sinuaeng on. Najolo, dielekelek do halak asa olo gabe
parkarejo di negara on. Nuaeng tarbalik, marsiadu halak asa gabe parkarejo ni
negara on maradu manggadis tano maraek dohot tano mahiang. Ala ni maol ni
parngoluon jala ala ni otik ni lapangan kerja dibandinghon tu na mangalului
karejo, marsiadu do jolma mambahen angka ulaon na parohon pangomoan. Dibagasan
i ma tongtong, tarela jolma i mambahen angka ulaon nang gabe mangihuthon hata
ni debata sileban manang songon dia pe tahe ulaon i: mangotootoi, manghorus
hodok ni dongan, mangomo so sian dalan nasintong, mambuat ugasan ni dongan,
dna. Na penting: dapotan! Lam holom pingkiran marnida lomo ni roha manang golap
diida dalan ni Debata hinorhon ni panosak ni parngoluan on. Godang do halak
mangomo tutu sian i, jala idaon marsonangsonang do soada mara. Godang angka
halak Kristen partigatiga mamangke “pelaris”, angka pejabat “mardatu”,
pardalandalan mamangke “bajubaju partahanan”. Torop jolma i ndang mabiar be
mangulahon hajahaton pasarisari ngolu siapari, ala ndang songon daion lasiak uhum ni Debata di ngolu on.
Hape tangkas do didok Debata songon na diturpuk on: “Ai Debata parrimas do
Jahowa, Debatam, di tongatongamu, asa unang marpiarpiar rimas ni Jahowa,
Debatam, mida ho, gabe siaphononna ho maon sian sisik ni tano on.” (ay.15).
Didok par-psalmen : Martua ma halak na so
olo mangihuthon tahi ni parjahat ... sai patik ni Jahowa do lomo ni rohana,
jala sai i do dipingkiri rohana arian dohot borngin.
III. Sipahusorhusoron.
Andorang so ditompa Debata jolma i, jumolo do di tompa
Debata portibi on dohot nasa isina, dungi dipasahat ma i tu jolma i asa
dirajai. Mandok, nunga diparade Debata na ringkot diparngoluon ni jolma. Di
namangalului ngolungolu siapari ingkon rajumanta do panarihonon ni Debata di
hita, haru pidong namartongatonga langit disarihon Debata. Alani i, unang
pintor gotap rohanta molo tung pe so pintor songon na deba na boi marlobilobi.
Didok di I Timotius 6: 8 “Alai molo adong di hita sipanganon dohot parabiton, tahasabamhon
ma i!” Adong do halak na ringgas mula ulaon
pola gabe lupa marparsaoran dohot Tuhan i. Pa padothu nasida di angka ulaonna
gabe lupa manang ndang tarbahen tingki laho marsaor tu Debata. Umbahen didok
Tuhan Jesus: Sai jumolo ma lului hamu harajaon ni Debata dohot hatigoranna,
dung i tambahononna do sude angka ondeng tu hamuna! (Mat.6: 33). Na deba, tung marsigorgor marparsaoran dohot Debata
gabe so mula ulaon. Di dok rohana, namarpasaoran dohot Tuhan on do di ginjang
ni sude. Gabe sude ariarina holan namartangiangi (beribadah) jala ndang olo
mula ulaon. Pangalaho na sala do sisongon i. Molo
nunga dapotan hita di ngolungolu siapari, boi gabe mamora, hata ni Debata
mandok: “unang dihalupahon roham Jahowa, habiari jala oloi Debata”. Amen.
5.
Diskusi
6.
Marende
B.E. No. 188: 1, 2 JAHOWA SIPARMAHAN
AU
1. Jahowa Siparmahan au, ndang hurang manang aha.
Ai nasa jea dipadao do sian dorbiana
Tongon dibaen na lomak i, lao pangoluhon tondingki,
dibaen asi rohaNa
2. Ditogu au tu na tio aek mata hangoluan, dibaen do tondingki sio
di dalan hasonangan
Sabam rohangku do tongtong, saleleng au di
tano on, baen sangap di goarNa.
7.
Tangiang
Panutup
Komentar
Posting Komentar