Sermon HKBP Ressort Ajibata.

Sabtu, tanggal 24 Mei 2014.

1 Petrus 3: 13 - 22

Patujolo

Tujuan ni Surat 1 Petrus on laho mangapoi dohot margogoihon angka huria na mangadopi sitaonon di tongatonga ni huria. Sitaonon i ro sian angka na Kristen, na so manghalomohon harararat ni Barita Nauli. Di bagasan Kristus naung hehe i, naung ditubuhon Debata do nasida paduahalihon asa tu panghirimon na mangolu (1: 3-4). Apala i do na parjolo na ingkon sihalashonon nasida. Molo dapot i di huria i, ndang gabe mandele be nasida nang pe ingkon manaon ragam ni angka parungkilon ala ni haporseaonnasida. Di tingki i, nunga masa pangaleleon tu halak Kristen, jala lam leleng lam manosak do nang tu huria angka na gabe alamat ni surat 1 Petrus on. Hombar tu si dipaingot ma tu nasida paboa parungkilon na tinaon marojahan tu Kristus i do i (2: 21), dalan laho patoguhon haporseaon do i, ndada na mangagohon. Marhite jala di bagasan sitaonon i, gabe sangkambona do angka na porsea tu Kristus (Rom 6: 5), asa gabe donganNa hita sogot di hasangaponNa.

Hatorangan
Dibuhai do turpuk on marhite sungkunsungkun: “Jala ise do na manjahati hamu molo diringkoti hamu na denggan?” Sungkunsungkun on sasintongna holan sada do alusna, i ma: “Ndang adong”. Manang na di dia pe di portibi on, di masyarakat dohot bangso dia pe i ndang adong hukuman tu halak namangulahon na denggan. Alai kenyatanna tutu , sai adong do halak na manjahati tu halak na mangulahon na denggan. Na marbonsir do i sian angka ragam ni pangantusion taringot tu na denggan. Nang pe songon i ndang sai malua siula na denggan i sian panjahati. Persoalanna, ndang holan hukum moral suhatsuhat ni sasahalak laho menyikapi sadasada ulaon, adong dope na asing, isara selera, kepentingan manang sentimen. Unang be di pardomuan antar masyarakat, gari di tongatonga ni sada masyarakat na maniop sistem nilai na dos gari boi dijahati halak angka siula na denggan holan ala ni sentimen pribadi manang kelompokna. Songon i do pengalaman ni halak Kristen di torop inganan na melatarbelakangi 1 Petrus on. Maniru Jesus Kristus i, dihangoluhon nasida do parange hatigoran, isara halambohon, haserepon, haburjuon, dohot angka na asing; alai dijahati halak do nasida.

“Alai molo tung manaon na porsuk hamu ala ni hatigoran, na martua do hamu disi”. Dia ma hatuaon i? Marhite na manaon sitaonon i gabe siihuthon (meneladani) Kristus do angka na porsea i, gabe sangkambona ma rap dohot Kristus, jala ala ni i gabe donganNa nasida (saluhut na porsea) nang di hasangapon na naeng sipapataronNa sogot. Ala ni i ma mansai tangkas dipaingot marhite turpuk on: “Unang ma gaor rohamuna bahenon ni biar ni roha mida nasida”. Unang umbiar mida jolma panggunturi sian Kristus i. “Alai parbadiai hamu ma Kristus, Tuhan i, di bagasan rohamuna”.  Na badia do Kristus i, Anak ni Debata (Luk. 1: 35). Ndang diparbadiai jolma pe Ibana, tongtong do badia Ibana. Dipaingot do asa tongtong nasida hobas mangalusi nasa na manungkun nasida taringot tu na hinirim ni rohanasida.

Mangalusi angka sungkunsungkun: “Unang ma pola marlobok taroktokmuna.” Marlobok, lapatanna tahutan. Taroktok, denyut jantung. Jadi, marlobok taroktok, lapatanna jantung berdebar-debar karena ketakutan. Di na mangalusi sungkunsungkun manang mangadopi panginsahi ingkon radotan ni halak Kristen do dirina asa tongtong di bagasan panggora ni roha na denggan. Mansai torop do halak na manginsahi halak Kristen uju i. Didok do rupani, angka parjahat do halak Kristen i; sibunu jolma do nasida, dung i diallang nasida ma dagingna jala diinum mudarna di angka parpunguannasida. Sala mangantusi nasida taringaot tu Parpadanan na Badia, di na ni dokna: “Pangan ma, dagingHu do on; inum ma, mudarHu do on”. Mangadopi si songon i, boi tarila sipanginsahi i. Alai molo tung so diboto pe maila, sai tong didatdati manginsahi, unang ma gabe ditadinghon na porsea i panggora ni rohana na denggan i gabe madabu tu tondi pamaloson (balas dendam).

“Ai tagonan do hamu manaon na porsuk ala ni ulaon na denggan, molo tung i lomo ni roha ni Debata; unang ma ala ni ulaon na roa”. Boi masa do na songon i tu angka na porsea, manaon na porsuk ndang ala ni ulaonna na roa, tung holan ala ni na Kristen do ibana. Sebagai Kristen, diulahon do angka na denggan, alai sai diinsahi jala dimusui. Molo masa na songon i, ndang sian lomo ni roha ni Debata i, sangkap sian sibolis do i. Ndang adong sipujion di angka na hona uhum ala ni hasalaanna, alai na manaon na porsuk ala ni haporseaon i do na dapotan tua sian asi ni roha ni Debata.

Panutup
Angka sitaonon ndang tarsirang i sian jolma na mangolu. Arsak dohot las ni roha i do na marganti sorin soluk tu ngolu ni hajolmaon. Godang do ragam ni sibonsiri ni sitaonon. Adong do i na marhahonaan tu hagaleon ni jolma, isara haotoon manang hapogosonna; adong do ala ni pambahenanna na manjahati manang hajungkaton. Adong do ala ni angka na di ruar jangkauanna, ima bencana alam. Manang na ala ni aha pe i, sarupa do anggo panghorhonna, porsuk jala dangol. Turpuk on, manaringoti sitaonon ni angka na porsea ala ni ulaon na denggan. Boha do bahenon ni halak Kristen mangadopi i?

1.       Mangalapati jala manjalo sitaonon i gabe parhitean asi ni roha ni Debata. Molo masa pangaleleon, hamaolon ndang ringkot gabe gaor roha ni huria i. Ingkon las do tahe rohanasida, ai asiasi ni Debata do i molo tau nasida manaon lealea ala hatigoran i. Na martua do nasida ala ni i, ai marhite i gabe sangkambona nasida tu Kristus di bagasan sitaonon asa gabe donganNa nasida di hasangapon sogot.

2.      Mamparbadia i Kristus sian sandok roha. Molo manaon na porsuk pe angka na porsea ingkon si parbadiaan do Kristus, Tuhan i. Ai na badia do Kristus i. Ingkon parhatopotonta do habadiaonNa i, ingkon haporseaan jala hatindanghononta Ibana Tuhan jala Debatanta. Dihalomohon Tuhanta i do parsitutuonta mangalo dohot mamorangi hajahaton. Ndada marhite angka na pangarimason alai marhite paraluson dohot panindangion na torang do dohot alus na lambok, na marhaporseaon/marhabisuhon. Ai alus na lambok do paombun rimas, alai anggo hata na koras mambahen marsijongjong ateate.

Pdt. A. Tambun, STh.