ACARA PARTANGIANGAN

BUHABUHA IJUK

HKBP  RESSORT AJIBATA  -  DISTRIK  IV  TOBA

Minggu,  05  April  2015

Thema:

MARPARANGE DI BAGASAN NGOLU NA IMBARU

Rom  6: 3 – 11

01. Marende No. 96: 1 + 3   “Nunga talu hamatean”       BL. 101

Nunga talu hamatean dibaen Tuhan Jesus i.

Ai na hehe do Ibana songon na nidokNa i.

Haleluya, haleluya, nunga hehe Jesus i.

Haleluya, haleluya, nunga hehe Jesus i.

 Ia angka boruboru lao do tu tanoman i.

 Ndang disi be Tuhan Jesus, nunga hehe sian i.

 Haleluya, haleluya, nunga hehe Jesus i.

 Haleluya, haleluya, nunga hehe Jesus i.

02.  Votum – Introitus – Tangiang

U   :  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano on. Amen. Unang ho mabiar, Ahu do bonana dohot ujungna! Na mangolu do, jala naung mate do Ahu na jolo, jala ida ma, Ahu do na mangolu ro di saleleng ni lelengna. Jadi di Ahu do anakhinsu ni banua toru dohot hamatean.

H   :  Nunga hehe Tuhan i, nunga tutu hehe Ibana. Ari on do na jinadihon ni Jahowa, marolopolop jala marlas ni roha ma hita disi! Batu naung binolongkon ni angka pande bagas, i ma gabe batu parsuhi. Pinamasa ni Jahowa do i, halongangan do i anggo di matanta.

U   :  Naung tartanom do hita rap dohot Ibana marhitehite pandidion i tu bagasan hamatean, asa marparange hita di bagasan ngolu na imbaru, songon Kristus naung hehe sian angka naung mate hinorhon ni hasangapon ni AmaNa.

H   :  Ai anggo nunga sangkambona hita dohot Ibana, di na rap mate hita dohot Ibana I, suang songon i ma hita nang taringot tu haheheon.

U   :  Ai taboto do, nunga tarsilang hadirionta na buruk i raphon Ibana, asa pinasohot daging pardosaon, asa unang be hita mangadop di dosa.

H   :  Alai molo naung mate hita rap dohot Kristus dihaporseai rohanta, rap mangolu ma hita dohot Ibana.

U   :  Timbul situtu do siamun ni Jahowa; siamun ni Jahowa do sibahen hamonangan. Martangiang ma hita! Ale Tuhan Debata, Amanami Parasiroha! Mauliate ma rohanami jala pujionnami Ho, ala naung ditubuhon Ho hami paduahalihon sian godang ni asi ni rohaM tu pangkirimon na mangolu marhitehite haheheon ni Tuhan Jesus sian na mate. Na marlas ni roha do hami nuaeng marningot haheheonNa i. Nunga talu hamatean, talu banua toru. Ndang mabiar be hami mida hamatean dohot soropna, ai nunga monang Tuhannami. Alani i umbahen hupangido hami: Sai asi ma rohaM, patogu ma haporseaonnami maniop Barita Nauli, asa unang ganggu rohanami di na hubolus hami hamatean i. Sai pasabam jala pamalum ma rohanami. Tompa ma roha na ias dohot tondi na marsihohot di bagasan hami, asa tarhajongjonghon hami naung pintor hami ala ni hatigoran na pinatupa ni AnakMu, Tuhan Jesus Kristus. Sai sungguli ma panghirimon na mangolu di hami, asa tarapul rohanami marningot angka dongannami naung jumolo nialapMi, jala asa tarapul rohanami manaon sitaonon di hasiangan on. Marhitehite Goar ni AnakMu Tuhan Jesus Kristus, Tuhannami. Amen.

03. Marende No. 94: 2 - 3                 “Ale tondingku, naung hehe”                      BL. 44

Talu sibolis dibahen Tuhanta. Nang hamatean nang dosa sudena.

Sai dihalashon rohanta ma i. PangoluonNa do hita sude.

PangoluonNa do hita sude.

Tahaburjuhon mangalo dosanta, jala tabaen Tuhan Jesus donganta.

Pos ma rohanta di Tuhanta i. PamonangonNa do hita sude.

PamonangonNa do hita sude.

04. Epistel: Jesaya 12: 1 – 6

U   :  Turpuk Epistel di hita di Partangiangan Buhabuha Ijuk di tingki on, tarsurat di Jesaya 12: 1 – 6. Tajaha ma marsorinsorin!  Jadi dohononmu ma di ari na sasada i: Mauliate ma ahu tu ho, ale Jahowa, ala dirimasi ho ahu, alai nunga marpamuati rimasmu, jala nunga diapuli ho ahu.

H   :  Ida ma, Debata do hatuaonku, Ibana huhaposi, jadi ndang mabiar ahu, ai Tuhan Jahowa do hagogoonku dohot pujipujianku dohot manjadi hatuaon di ahu.

U   :  Jadi marlas ni roha hamu manahui aek sian mual ni hatuaon.

H   :  Jadi dohononmuna ma di ari na sasada i: Puji hamu ma Jahowa, jala jou hamu ma goarna, pabotohon hamu angka jadijadianna di tongatonga ni angka bangso, jamitahon hamu goarna na timbul i.

U   :  Endehon hamu ende pujipujian tu Jahowa, ai nunga dijadihon halongangan, sibotoon ni liat portibi on sogot.

H   :  Marolopolop jala mariaia ma ho, ale isi ni Sion, ai timbul do di parsitongaanmi na badia ni Israel.

U   :  I do sahatna. Martua ma angka na tumangihon Hata ni Debata, jala na umpeopsa!

Sude:  Amen.

05. Marende No. 91: 1                     “Hatuaon do”                                                BL. 55

Hatuaon do, las ni roha do, hangongot ni Tuhanta i.

Mago do hita, ngot ma Tuhanta, las be, las be ma rohanta i.

Mago do hita, ngot ma Tuhanta, las be, las be ma rohanta i.

06. Jamita :    Rom 6: 3 – 11.

07. Marende No. 118: 2...                 Paian Ma Di Hami                                        BL. 6

      Paian Tuhannami, hataM di hami be

      Asa martua hami, nuaeng nang sogot pe

        Paian sinondangMu, ale panondang i

        Ambati ma na lilu, di parjalangan i

   Paian ale Tuhan, di hami burjuMi

   Sai lehon hatongtongon, padao ma jea i

08. Tangiang Panutup

U   :  Ale Tuhan Jesus, Tuhannami! Na mandok mauliate do hami tu Ho, ala ditaluhon Ho dosa dohot hamatean i, marhitehite hamamate dohot haheheonMi.

H   :  Mauliate ma Tuhan, ala disondangi Ho tanomannami, asa marpanghirimon na mangolu hami, ala ni haheheonMi. Ndang pola be mabiar hami mida hamatean i, ai Ho do Ulunami, ruasMu do hami.

U   :  Dipaunsat Ho do hami sian haholomon tu hatiuron, sian hamatean tu hangoluan. Antong pargogoi ma hami mamuji dohot mangoloi Ho ganup ari, pasangaphon Ho di bagasan haporseaon na mangolu, paima sahat hami di lambungMu.

H   :  Ale Tuhan Debata! Suru ma TondiM, Tondi Parbadia tu rohanami, asa tarapul situtu rohanami marhitehite haheheon ni AnakMu, Tuhan Jesus Kristus, jala asa lam ganda haporseaonnami marhitehite panghirimon na mangolu.

U  :  Asa tongtong huingot hami, na hehe do hami muse sian na mate songon Tuhan Jesus Kristus, Tuhannami, naung hehe sian na mate i.

09. Tangiang Ale Amanami

U   :  Rap martangiang ma hita di tangiang Hatopanta i!

Sude:         Ale Amanami na di banua ginjang…….du.

10.  Pasupasu.

U   :  Asi ni roha ni Tuhanta Jesus Kristus, dohot holong ni roha ni Debata Ama, dohot parsaoran ni Tondi Parbadia ma, na mandongani hamu (hita)!

H   :  Mangendehon: Amen… Amen… Amen…