Bahan Sermon HKBP Distrik IV Toba
Jamita tu Minggu, XXI
Dung Trinitatis
21 Oktober 2018.
Dipasahat di Konvent HKBP Distrik IV maringanan di
HKBP Maranatha Marom.
&Ev.: Rom 12: 1 – 3. &
Ep.: Josua 24: 14 – 24.
Hadaulaton Na
Rimpas/Ibadah Yang Sejati.
1.
Pamuhai.
Tinallik bulung sihupi, pinarsaung bulung sihala. Unang sumolsol
dipudi ndada sipaingot na so ada. Hata ni angka natuatua sijolojolo tubu do i.
Asa saluhut horong natuatua manghalaputi mamodai angka ianakkonna dohot
denggan, asa anggiat gabe jolma na denggan jala hasea angka ianakkon na
pinalumehon ni Debata tu tongatonga ni keluarganta ganup. Ndang adong angka na
tuatua na so manghalomohon denggan parngoluan ni angka gellengna. Gariada tung
so barani do angka natuatua najolo paborhathon ianakkonna marsikola manang
mangaranto tu tano parserahan i molo so jolo dipodai angka ianakkonna i. Di
bagasan turpuk on pe, mansai tangkas do dipaingot Apostel Paulus asa mangulahon
haserepon dohot holong ni roha (Rom 12: 1 dab = ff).
2.
Hatorangan.
2.1.
Pandohan: “Na huapoi ma hamu angka dongan, marhitehite asi ni roha ni Debata”
(Bhs. Indonesia: Karena itu,
saudara-saudara, demi kemurahan Allah aku menasehatkan kamu...) patuduhon
keseriusan lumobi tanggung jawab ni sasahalak parmahan tu na pinarmahanna. Ise
do na targoar gabe parmahan? Holan Tuhan
Jesus Kristus do Parmahan Na denggan, ai diseahon parmahan na denggan i do
Hosana humongkop angka birubiruNa (Joh. 10: 10). Alai targoar do Parmahan sude parhalado maradophon angka
ruasna. Parmahan do pamarenta tu masyarakatna, Parmahan do guru tu angka muridna, Parmahan
do natoras tu angka
ianakkonna, Parmahan do abang tu angka anggina = Parmahan
do Siahaan tu Siagian. Diapoi di bagasan
asi ni roha ni Debata, diapoi marhite asi ni roha ni Debata, diapoi holan ala
ni asi ni roha ni Debata. Somalna na
taboto, ala ni na marsala do asa diapoi manang dipaingot. Hape ndada ala ni na
marsala justru asa unang marsala do. Adong do hata ni na tuatua na mandok: Tingki
metmet do hau i, boi sihorsihoron. Lapatanna: Tingki metmet do angka ianakkon i
boi ajarajaron. Na gabe persoalan: Rade dope angka sundut na tumua laho
mamodai angka sundut na umposo, dohot sihol dope roha ni angka sundut na umposo
manjalo poda manang sipaingot ni angka natuatua?. Dungi, ise dongan… na ni dok ni
Apostel Paulus di bagasan turpuk on? Ndada secara umur manang kategoarial, alai
na ni dokna: I ma dongan sahaporseaon. Parnampunasa di Harajaon ni Debata.
2.2.
Diapoi Apostel Paulus Huria na di Rom, asa:
1.
Pasahat Pamatang bahen pelean na mangolu.
Tauhal ma jolo panompaon ni Debata
taringot tu pamatangta on. Luar biasa do panompaon ni Debata di pamatangta. Mauliate
ma tadok tu Debata, ala di ginjang do dibahen simajujungta, ndang di toru.
Autsugari di toru simajujungta on…, ra nunga jotjot hona vitamin kuning manang kotoran.
Tuani do di jolo dibahen Debata simalolongta, autsugari di pudi ingkon mardalan
mundur ma hita. Jala ndang dibahen Debata simalolongta i di ujung ni jarijari,
autsugari dibahen di si… tabo ma si ….. da.
2.
Pasangap Debata marhitehite dagingmu.
Mansai tangkas do taboto marhite haporseaonta, Debata Jahowa do na
jumadihon saluhutna. Debata do nang na manompa pamatangta jala Ibana do nampuna
hita. Songon dia do pasangaphon Debata
marhitehite pamatangta on? Bahen pelean na hushus di adopan ni Tuhan Debata na
sun badia i? Sasintongna, sederhana do. Dilehon Debata do di hita Tangan, molo
tapake tanganta i martangiang tu Tuhan i, na pasangaphon Debata do i. Molo
tapake tanganta i, jamajama na patulus sangkap ni sibolis do hita di si. Molo
tahalaputi mangalangkahon simanjojakta i laho marbarita na uli, na pasangaphon
Debata do hita di si. Alai molo tapake do simanjojakta i, tu café remang-remang
alias Agogo (Acara golapgolap) na pamokmokkon sibolis do i di
rohanta.
3.
Unang gabe Sarombang dohot Portibi On.
Songon dia do huroha portibi on? Didok Apostel Paulus tu Huria
Epesus, songon on: “Angka parroha haholomon
do nasida, angka na holang sian ngolu ni Debata, binahen ni haotoon ni
rohanasida, ala naung gabe pir rohanasida” (Epesus 4: 18).
Gabe halak siula lomo ni roha ni Debata. Unang sarupa, unang
sapangalaho dohot na di portibi on. Unang angka na di portibi on, mempengaruhi
hita alai ingkon hita do na manogunogu nasida mananda Tuhan Jesus Kristus,
Sipalua i.
4.
Gabe Imbaru ma hamu, dung muba pingkiran.
Ndang hea marganti orderdil/organ ni pamatangta on. Ala ni i songon
dia do halak naung gabe imbaru? Tanggali hamu ma jolma na buruk i, isara di
pangalaho najolo, ai laho mago do i hinorhon ni angka hisaphisap sipaotooto
(Epesus 4: 22).
5.
Tau manimbangi lomo ni roha ni Debata.
Manimbangi jala mangulahon lamo ni roha ni Debata, i do na gabe halobian ni jolma sian angka na tinompa ni
Debata na asing i.
6.
Unang torbang rajumi dirim, lobi sian na patut.
Olo do ala ni angka kepentingan dohot angka jabatan gabe lupa hita
di hadirionta. Didok Apostel Paulus: Saluhutna do tahe huetong harugian
tumimbanghon hamuliaon ni panandaon di Kristus Jesus, Tuhanki. Ala Ibana
huseangkon saluhutna i, jala orbukorbuk do i huetong, asa huomo Kristus i
(Pilipi 3: 8). Orbukorbuk di hata
Batak, Yun.: Skubala. Ind.: Sampah,
lapatanna angka na so hasea/na so marguna be. Ala ni i, unduk ma hita ganup di
toru ni silang ni Kristus i. Saluhut na porsea ingkon mangihuthon Kristus i do.
Saluhut siihuthon Kristus ndang mangarajumi dirina tumimbo sian halak na asing,
manang halak na asing dirajumi tumoru sian dirina. Saluhutna do sarupa di
adopan ni Tuhan i. Ndang songon na ni dok ni na deba: “Sa-Stambuk, alai ndang
Sa-kalas”. Hata ni Tuhanta mandok: “Ndang
mardia imbar di si Jahudi manang Junani, hatoban manang anak mata, baoa manang
parompuan, ai sada do saluhutna di bagasan Kristus Jesus” (Gal. 3: 28).
3.
Panutup.
Mangulahon na denggan di bagasan ngolunta siganup ari, ndada i na
pataru hita tu bongot tu haluaon na niigil ni Debata, alai holan ala ni
haporseaon tu Tuhan Sitolu Sada (Trinitatis) i do di bagasan Tuhan Jesus
Kristus. Alai gabe tanggung jawab ni halak naung pinalua ni Debata marhite
Jesus Kristus do laho mangulahon na denggan di bagasan ngoluna siganup ari. Jala
i do na gabe “Hadaulaton Na Rimpas” atau “Ibadah Yang Sejati”. Ndada
partangiangan Lunggu/Lingkungan dohot Parmingguon siganup minggu “Hadaulaton Na
Rimpas”, alai marhite ulaonta dohot ngolu siganup ari ro di nasa na adong di
ahu ingkon bahen sangap dig oar ni Tuhan i: I do: “Hadaulaton Na Rimpas”
atau “Ibadah
Yang Sejati”. Amen.
Komentar
Posting Komentar