BARITA
JUJUR TAON (BERICT)
HKBP LUMBAN
JULU, RESSORT LUMBAN JULU
DISTRIK IV TOBA
Dipasahat
di Parpunguan Bodari Ujung Taon
Minggu, 31 Desember 2017.
I. PATUJOLO
Tama do tapasahat mauliate ni rohanta tu
Debata Jahowa Pardenggan basa i, siala panarihononNa di bagasan ngolunta
siganup ari. Tarajumi jala ingkon hatindanghononta do ala ni asi ni roha dohot
denggan basa ni Debata Jahowa do na tongtong paihutihut ngolunta
ganup marsadasada umbahen na boi hita marpungu di borngin on. Tongtong do
diramoti Ibana pardalanan ni huriaNa, gabe boi mardalan
dibagasan hadameon dohot las ni roha manipat sataon bolon,
ima 2017 on. Didongani jala dipargogoi do Parhalado laho pararathon
harajaonNa di hurianta on. Dijagai Tuhan i do huriaNa sian
nasa ragam ni angka parmaraan. Ala ni i, rap dohot par Psalmen i
ingkon dohononta ma: “Sai jagaon ni Jahowa do ho sian nasa
parmaraan, sai jagaonna do tondim” (Psalmen 121: 7). Ingkon
las do rohanta, ala nunga dipatongon Tuhanta angka na uli na denggan
di hurianta on. Hataridaan las ni rohanta i, ndang apala di minar ni
pardompahan, alai diparsitutuon mangoloi dohot manghaposi
Tuhani do, sian tulus dohot bulus ni roha. Angkup ni i,
ingkon lam serep ma nian rohanta di adopan ni Debata
jala ingkon lam marsihohot hita parhalado dohot rap dohot ruas ni
huria laho paturehon ngolu dohot
pangkobasion na dumenggan tu taon 2018. Mansai bidang
do angka sihobasan di huria on. Tahamauliatehon do
tu Tuhan i, ala boi do mardalan dohot denggan angka ulaon di
tongatonga ni hurianta on di bagasan taon 2017 on.
II. PANGHOBASION DI HURIA TAON 2017.
1. Parmingguon.
Hombar tu haputusan ni pucuk pimpinan ni
hurianta HKBP, di ari Minggu, tanggal 08 Januari 2017 ojak ma hami gabe pandita
Ressort di hurianta HKBP Ressort Lumban Julu on manggantihon amanta Pdt. Same
Siahaan, STh ala marhite Sinode Godang HKBP di taon 2016 tarpillit nasida gabe
praeses jala ditempathon tu Distrik V Sumatera Timur Pematang Siantar.
Denggan do mardalan parmingguon
di hurianta on saleleng taon 2017, ima Tahun Pendidikan dan Pemberdayaan. Jala ndang hea mansohot
parmingguon ala ni angka na masa, songon na niadopan ni huria di luat
asing. Sihalashononta do di taon 2017 on ala nunga lam tu toropna na bilangan
ni angka parminggu. Sihamauliatehononhon do tu Tuhan i, ala sian 8 punguan
parende di hurianta on, tongtong do dipatubegehonnasida ende pujipujian ganup
ari minggu. Hataridaan ni haporseaon do i jala sada dalan mandok mauliate tu
Tuhan i ala ni panarihononNa di pardalanan ni ngolu ni ruas ni hurianta marhite
angka punguan i.
2.
Parmingguon Sikola Minggu.
Parmingguon
ni ianakonta Sikola Minggu ni hurianta on, masuk pukul 7.30 WIB. Taparungkilhon
do parmingguon tu angka iankkonta Sikola Minggu, ala gedung Sikola Minggu na
gabe inganan nasida kebaktian “kurang atau tidak layak dipakai”. Ala ni di
Rapot Huria na tapatupa di bulan di tanggal 05 Maret 2017 tapabangkit do
“Panitia Pembangunan Ni Hurianta”, jala termasuk do “Renovasi Gedung Sikola Minggu”
i sada songon ulaon na prioritas di hurianta on. Nunga tarida pangulaon ni
“Panitia Pembangunan”, ala songon na tangkas taboto nunga rampung jala denggan
be Gedung Sikola Minggu i, jala nunga boi angka ianakkonta denggan patupahon
parmingguon di si. Hupasahat hami mauliate tu hamu. Sai dipasupasu Tuhanta ma
hamu marhite hahipason nang ganjang ni umur dohot ragam ni pasupasu angka na
asing pe.
Sipareahan: Di Rapot Huria di tingki na salpu,
taprogramhon do laho patupahon sada unit perangkat Infocus di Gedung Sikola
Minggu, alai sahat ro di tingki on ndang tarpatulus hita dope. Tatangianghon ma
asa anggiat tu tingki na mangihut boi tapatupa i marhite dos ni roha.
1.
Partangiangan
a.
Partangiangan Lunggu
Dalan marsaor
dohot Tuhan i, lumobi laho patubegehon hata ni Debata di tonga ni bagasta be,
dipatupa hurianta do partangiangan lunggu di ganup ari Selasa, Rabu bodarina
masuk pukul 8.00 WIB. Mansai otik dope bilangan ni angka na ro mandohoti
partangiangan i molo dibandighon torop ni ruas ni huria na adong di lunggu i,
lumobi angka ruas na sian horong ama, tung mansai humuruang do parsidohoton
nasida.
b.
Partangiangan Remaja
Dipatupa
hurianta do PHD tu angka ianakkonta Remaja/Naposobulung. Dipatupa ma i, ganup
ari sabtu bodari, masuk pukul 08.00 WIB maringanan di gareja, na ni uluhon ni
pandita Ressort, pandita Huria, Bibelvrow dohot Dewan na membidangi Kategorial
Remaja Naposobulung. Tasosoi ma angka ianakkonta mandohoti ulaon i.
2.
Ulaon Sakramen
a.
Pandidion Na Badia
Pandidion
na badia dihobasi hurianta do 3 hali di bagasan taon on, i ma di ari Minggu
tanggal 02 Juli 2017, tanggal 17 Desember 2017 dohot di Pesta Natal Paduahon tanggal
26 Desember 2017.
b.
Ulaon Na Badia
Tanda
huria na mangolu di tongatonga ni portibi on ingkon patupaon ni huria i do “Ulaon
Na Badia”. Dalanta do i manjalo hasesaan ni dosanta sian asi ni roha ni Tuhan i
jala gabe parningotan do tu saluhut na porsea di hamamate ni Jesus Kristus na
palua hita sian lisok gambo ni dosa. Dipatupa hurianta do ulaon Parpadanan Na
Badia di bagasan taon 2017 on 3 hali. Parjolo, di Pesta Paskah I (Parjolo)
tanggal 16 April 2017, paduahon, minggu 02 Juli 2017 tu angka ianakkonta na
manghatindanghon haporseaon rap dohot natorasna, patoluhon di Pesta Natal I
(Parjolo), 25 Desember 2017.
3.
Ulaon Parmahanion.
Mangihuthon pambahenan ni
Tuhan Jesus Parmahanion jala songon tanda ni Huria na mangolu ingkon sipatupaon
do Parmahanion di tongatongo ni huria. Dalan marsaor dohot Panogunoguon tu ruas
ni huria. Tapatupa do manopot dohot mamanghuli angka keluarag na marungkil ala
ni sitaonon, nang angka dongan na tongon di bagasan na marlas ni roha. Suang
songon i nang Ruhut Parmahanion dohot Paminsangon (RPP), tu angka donganta na
mangula angka ulaon na maralo tu ruhutruhut na maralo hombar tu na ni aturhon
ni Hurianta. Laos sadalan tu parmahanion i mardalan do angka panjanghonon tu
angka ruas ni hurianta na hona Ruhut Parmahanion Paminsangon dung jolo gabe
ruas parguru nasida dohot angka proses na marpardomuan tu si.
4.
Pangobasion kategorial
a.
Punguan Ina
Holan
tu punguan ina Parari Kamis dohot Punguan
Remaja/ Naposo-bulung do dipatupa panghobasion na rutin di tonga ni
hurianta marhite ulaon PHD. Ndang sude punguan i patupahon PHD.
b.
Punguan Ama.
Mamungka di bulan Pebruari mardalan do dohot denggan
punguan Ama patupahon mangguruhon ende pujipujian sipatubegehonon ni punguan i
di ganup minggu, marhite manopot bagas ni angka anggota ni punguan i.
c.
Angka Punguan Parende
Punguan
Parende na nadong di hurianta :
Punguan
Ama, Punguan Ina Parari Kamis, Punguan Parende Gabungan, Punguan Parende Naposo
dohot Remaja, Punguan Lunggu Pasar, Punguan Parende Lunggu Kampung Kristen,
Punguan Parende Lunggu Sion.
5.
Pargururu Manghatindanghon Haporseaon
Mardalan do Panghobasion
tu ianakkonta na marguru malua, jala di tanggal 02 Juli 2017 dipatupa hurianta
do ulaon manghatindanghon haporseaon tu nasida dung jolo mandalani parguruan +
sataon lelengna, torop nasida 12 halak. Jala mamungka di bulan September 2017
nunga mardalan parguruan tu angka ianakhonta angka na naeng manghatindanghon
Haporseaon. Na ni ajaran ni Pandita Ressort, Pandita Huria dohot Bibelvrow.
6.
Administrasi Huria
a.
Administrasi Huria
Tongtong do dihobasi
Hurianta, asa lam tu dengganna andministrasi ni huria, asa tung boi pangheonta
mandukung panghoasion ni huria, ima na marpardomuan tu Data haruason,
Parhepengon, buku,buku Huria dohot surat menyurat.
b.
Pelean Taon
Mauliate
ma tapasahat tu ruas ni hurianta na tongtong mangalehon roha na manarihon angka
na ringkot di tongatonga ni huria i. Nangpe sai adongon Peean taon hombar tu
naung niaturhon ni Huria.
7.
Parhalado
Tahamauliatehon do
panghobasion ni angka parhalado ni Hurianta di bagasan na sataon on.
Sitangianghononta ni hurianta do parhalado ni Huria asa tongtong margogo jala
marbisuk laho manghobasi huria.
Dihasiholi roha so asa lam
tu tambana nia dongan parhalado sintua, tarlumobi na manghobasi di lunnguLumban
Batu dohot Lumban Harnagan, Tatangianhon ma asa adong ruas na ra gabe parhalado
sian lunggu tamba ni naung adong hian.
Torop ni Parahalado di
Hurianta:
Pandita
: 2 Halak
Bibelvrow : 1 Halak
Sintua : 14 Halak
8.
Pembangunan.
Na di tanggal 05
Maret 2017 marhite rapot huria, tapabangkit do Panitia Pembangunan ni Hurianta
on. Jala tatotophon do di si:
1.
Siulaon ni Panitia: - Renovasi Kamar Mandi, Renovasi
Gedung Sikola Minggu, Mancet Pagar dohot Mancet Gareja.
2.
Gugu toktok ripe : Rp. 100.000/kk.
9.
Statistik
Na sorang : 23
halak, (baoa 16 halak, boru 7 halak)
Na tardidi : 32
halak
Na marbagas : 14
halak
Na monding : 10
Halak
Na Pinda : 10
KK
Na Tamba : 7 KK
10. Panimpuli.
Songoni ma Barita jujur taon ni hurianta na
boi tarpajojor hami. Di angka na lobihurang
pamaritahononnami, Tuhanta ma na pasingkopponsa. Di angka naung boi
dihobasi Hurianta di taon 2017, tapuji ma Tuhanta siala pandonganion
dohot denggan ni basaNa do umbahen na boi tulus i. Di angka program na so
boi mardalan dohot denggan, sai dipargogoi Tuhanta ma Parhalado rap
dohot Ruas ni HuriaNa patulushon i tu taon
na naeng ro, asa lam jumpang angka panghobasion na ummuli di
Hurianta, lam majuna hurianta di partondion nang di pembangunan fisik pe.
Pasahaton nami do tu sude ruas ni Huria,
pengurus Dewan, seksi Huria, na sai tongtong mangalehon rohana di nasa
panghobasion di Hurianta on marhite tangiangsumbangan pemikiran, nang
sipatupaon pe laho patulushon nasa na ringkot di Huria
on. Gabe pelean na hushus jala na
badia ma i di adopan ni Debata, taingot jala tahaporseai ma:
“Sian Tuhan Debata Pardenggan Basa jala Parasi Roha i” do jaloonta
balos ni i marlimpat ganda marhite angka ulaonta siganup ari na so maralo
tu lomo ni rohaNa, nang marhite parianakhononta dohot tu
saluhut pinomparta pe.
Na parpudi....
Naeng salpuhononta ma taon 2017 on, bongotanta
ma sada taon na imbaru, ima taon 2018. Tuhanta ma na mandongani hita manalpuhon
taon na buruk on, laho mambongoti mambongoti sada taon na imbaru, i ma
taon 2018 na naeng sibasabasahonon ni Tuhan Debata tu hita. Di bagasan
haporseaon dohot pos ni roha ma hita saluhut parhalado nang ruas ni huria
pe, di taon 2018 jaloonta angka na dumenggan di hurianta on nang di
tongatonga ni bagasta pe.
Syalom.... Horas.....
Lumban
Julu, 31 Desember 2017.
Pdt. Ahab Tambun, STh.
Komentar
Posting Komentar