ACARA PARTANGIANGAN KELUARGA HKBP BONGBONGAN
(Minggu III, September 2020).
&
Ev.: Lukas 14: 12 – 14 &
Ep.:
2 Samuel 9: 1 – 8
Topik: Marasi Roha Tu Angka Na Martihas.
I.
Pangaradeaon:
1. Partangiangan on diuluhon Ama
manang Ina.
2. Dipillit na mambaen tangiang jala
diparade hian ma: Bibel dohot inganan ni pelean.
II. Acara Partangiangan: (Andorang So Masuk: Martangiang na hohom ma
hita).
1.
Marende Sian
BE No. 205: 1 – 2 Ale Jesus Tuhannami
1. Ale
Jesus Tuhannami, bereng hami na di son
PinarmahanMi do hami, saluhutna
na di son
Sai asi rohaM di hami, sai
pangolu hami on.
2.
Ale Jesus, togu hami, asa unang mago be
Manang ise sian hami, sai porsea ma
sude
Sai na hot di Ho ma hami, dao
ma jea sasude
2.
Votum
– Introitus – Tangiang: (U = Uluan, R
= Ruas, S = Sude).
U: Marhitehite Goar ni Debata
Ama dohot Goar ni AnakNa Tuhan Jesus Kristus dohot Goar ni Tondi Parbadia, na
tumompa langit dohot tano on. Amen. Songon on do Hata ni Tuhan Jesus: Martua ma
angka na mauas male mida hatigoran, ai pabosuron do nasida. Martua ma angka na
ias tondi, ai idaonnasida do Debata. Haleluya. Martangiang ma hita: Ale Tuhan Debata, Pargogo na so hatudosan!
Sai lehon jala patubu ma di hami haporseaon na sintong. Tambai ma
haporseaonnami ganup ari, asa lam togu. Lehon ma di hami holong ni roha na so
marpangansi asa holong rohanami di Ho dohot di dongannami jolma. Lehon di hami
pangkirimon na mangolu, asa rnarlas ni roha hami mambahen lomo ni rohaM i. Sai
oloi ma pangidoannami ala ni AnakMu, Tuhan Jesus Kristus Tuhannami. Amen.
Manjaha Turpuk: 2 Samuel 9: 1 – 8
U: Hata ni Debata na gabe turpuk Epistel di partangianganta, dienet
sian 2 Samuel 9: 1 – 8. Songon on ma tarsurat di si: Dung i ninna si Daud ma manangkasi: Adong dope ulaning
jolma tadingtadingan ni raja Saul, asa hubahen asi ni roha tu ibana, ala si
Jonatan?
R:
Jadi adong ma sada naposo isi ni bagas ni si Saul nahinan, na margoar si
Siba, gabe tarjou ibana tu jolo ni si Daud. Dung i ninna rajai ma mandok ibana:
Atehe ho do si Siba? Naposom do ahu, ninna ibana.
U: Dung i didok
rajai ma: Atehe adong dope jolma tadingtadingan ni si Saul, asa hubahen tu
ibana asi ni roha sian Debata? Jadi ninna si Siba ma mandok rajai: Adong dope
sada anak ni si Jonatan, pangpang patna duansa.
R:
Dung i ninna rajai ma mandok ibana: Didia ibana? Gabe didok si Siba mandok
rajai: Ida ma, di Lodebar do ibana, sorang tu si Mahir, anak ni si Ammiel.
U: Dung i disuru raja Daud suruanna mangalap ibana sian bagas ni si Mahir,
anak ni si Ammiel di Lodebar.
R: Jadi dung sahat si Mepiboset, anak ni si
Jonatan, tubu ni si Saul, tu jolo ni si Daud, manungkap ma ibana tu tano
marsomba. Alai ninna si Daud ma: Ale Mepiboset! Gabe didok ibana ma: Dison do
ahu naposom.
U: Dung i didok si Daud muse tu ibana:
Unang ho mabiar, ai ingkon bahenonku tu ho asi ni roha, ala ni si Jonatan
amangmu, ingkon paulahonku tu ho sude golat ni si Saul, ompumi, jala ingkon
tongtong ho sapanganan dohot ahu.
R:
Jadi marsomba ma ibana, huhut didok: Tung ise ma pola ahu naposom, umbahen pola
dompakkononmu biang na mate songon ahu on?
U: I do sahat ni turpuk i. Martua do
angka na tumangihon hata ni Debata jala na umpeopsa.
S: Amen.
3.
Marende BE
No. 467: 1 + 4 Asi Ni RohaM Hupuji
1.
Asi ni rohaM hupuji, ala Ho manobus au
Dipaias Ho rohangku, gabe soranganMu au
IngananMu rohanami, TondiMi manggohi i
Pangke dohot ngolunami gabe ulaulaMi.
4.
Sai papulik rohanami gabe pangoloi di Ho
Asa marsahala hami lao manghatindangkon Ho
IngananMu rohanami, TondiMi manggohi i
Pangke dohot ngolunami gabe ulaulaMi.
4. Jamita: Lukas 14: 12 – 14
U : Didok ma huhut
tu na mamio Ibana: Jumpa dibahen ho pesta manang haroan, unang ma pio tu si
angka alealem, manang hahaanggim, manang hulahulam, manang hombar bagasmu pe,
angka na gabe, asa unang nasida muse mamio ho, gabe dibalos i tu ho.
R: Alai jumpa mambuat sipanganon ho, pio ma angka na
pogos, angka na martihas, na pangpang dohot na mapitung.
U: Jadi martua ma ho disi, ai ndang tarbalos
nasida i tu ho; alai marbalos do i
Dongan sahaporseaon na hinaholongan di bagasan
Jesus Kristus Tuhanta i..
Tarbarita do halak hita Batak
taringot tu partamueon. Boi do i taboto marhite pandohan: “Paramak So Balunon”,
“Partataring Na So Ra Mintop”, “Parsangkalan So Ra Mahiang”. Molo masa ulaon
pesta di hita halak Batak dipabotohon do i tu angka situan na torop, tu aleale,
tu tondong lumobi tu angka sisolhotna marhite “Gokkon dohot Joujou”.
Ulaon Partamueon, ulaon na raja do i. Di Heber 13: 2 didok: “Unang halanggushon hamu partamueon; ai marhite sian i hea do ditamuei
halak angka surusuruan, so pamotoanna”. Ulaon partamueon ulaon na denggan do i, patupahon dohot mangalehon
angka sipanganon tu angka halak na niontangna. Di bagasan turpuk on, na dipio
sahalak Parise do Tuhan Jesus tu ulaon pesta di bagasna. Sasintongna, ndang
apala adong paraleaelon ni Tuhan Jesus dohot halak Parise on, hubungan
parpamilion pe so adong, apalagi dongan saulaonna pe ndang. Boi dohonon,
diontang pe Tuhan Jesus tu pesta i, dalan laho manulingkiti hadirion ni Tuhan
Jesus do. Alan i i, pintor dipatupa Tuhan Jesus ma sada ulaon asi ni roha di
inganan i, ima pamalum sahalak na marsahit sigurbahon.
Dungi dihatahon Tuhan Jesus ma sada umpama, na mansai tangkas laho maminsang
pangalaho ni halak na ro tu pesta, na sai olo manggulut inganan na sumangap.
Marnida na masa i, dilehon Tuhan Jesus ma pangantusion na imbaru asa tongtong
mangolu di bagasan serep ni roha, marhite na didok: “Ai nasa na patimbohon dirina, sipaoruon do; jala na paoru dirina, i do
sipatimboon (ay. 11).
Dongan sahaporseaon na hinaholongan di bagasan
Jesus Kristus Tuhanta i..
Mamungka dung ojak huria di portibi on, ulaon
ni huria patupahon ulaon Asi Ni Roha. Boasa didok ulaon asi ni roha? Alusna: Mangulahon angka ulaon
pangurupion tu angka na patut siurupon so pola hirimon balosna tu angka na patupahon
i. Dipatupa ulaon asi ni roha i (pangurupion), hinorhon ni panandaon naung
tangkas mananda dipanarihonon ni Debata di bagasan ngoluna. Molo
taurupi angka donganta na patut siurupon, alai tahirim do adong balos ni i sian
na taurupi i, ndang ualon asi ni roha be goaron. Sisolisoli nama i. Lehon
di ahu, asa hulehon di ho. Ro au tu pestam, asa ro do ho tu pestaku. Nunga
jumolo Debata mangasii hita, ala ni i, patut do saluhut halak naung jumalo asi
ni roha ni Debata, ingkon patupahon ulaon asi ni roha tu angka na pogos (angka
na patut siurupon). Ndang sala halak mambahen angka na denggan tu angka na
sangap, tu parpangkat, tu paradongan. Alai, dao dumenggan do patupahon angka
ulaon pangurupion tu angka na pogos, na so mardihadiha, na tading maetek, na
tading di lampin, na pangpang, na mapitung (difabel)
ala ndang tarbalos nasida i. Gabe Tuhanta i ma mambaloshon i tu hita muse, i do
umbahen na didok Tuhan Jesus: “Jadi martua
ma ho di si, ai ndang tarbalos nasida i tu ho; alai marbalos do i tu ho sogot
di haheheon ni angka partigor”.
Dongan sahaporseaon na hinaholongan di bagasan
Jesus Kristus Tuhanta i..
Marhite turpuk jamita on,
dipatuduhon do tu hita poda manang pangajarion na mangondolhon hinaringkot ni
na mangulahon na denggan so pola manghirim balos na denggan sian angka na
tabahen i. Hasil penelitian ni Stephen Post dohot Jill
Neymark di bukuna na marjudul: “Why
Good Things Happen to Good People” (Ind:
Mengapa hal-hal yang baik terjadi dalam diri orang yang baik? Batak: Boasa
angka na denggan masa di ngolu halak na mangulahon na denggan?). Penelitian
nasida saleleng 25 taon, taringot tu “Na
Marsilehonlehon” boi paubahon ngolu ni sasahalak tu ngolu na dumenggan.
Gabe jumpa ma pangarimpunan, halak na ringgas marsilehonlehon (mangurupi na
pogos = na martihas) dao dumenggan hahipasonna di pamatang dohot mentalna
dibandingkon tu halak siholit mangging.
Di Ulaon Ni Apostel 20: 35 didok: “Sandok
hupatuduhon tu hamu, ingkon songon i do iba mulaulaon laho mangurupi angka na
so margellok, marningot hata ni Tuhan Jesus, ai Ibana do mandok: “Martuaan do
na mangalehon sian na manjalo!”. Amen.
5.
Marende BE
No. 802: 2 – 3 Pangke Tingkim Saonari
2. Suan ma holong ni roha, tiru ma
Tuhanta i
Las ma roham di gotilon, jalo ma
balos ni i
Nunga rade hasonangan, di Surgo i,
di Surgo i
Unang adong nanggo sada naso
parjambar di si.
3.
Molo taida donganta, na sai marungkil tongtong
Unang pasombu sai susa, togu
urupi antong
Nunga rade hasonangan, di
Surgo i, di Surgo i
Unang adong nanggo sada naso parjambar
di si.
6.
Tangiang:
Sian Sahalak
7.
Marende BE
No. 716: 1 Di Na Mamolus Sandok Ngolu On (P.
Pelean).
1. Di na mamolus sandok ngolu
on, gok do na marsak gale
Boan sinondang tu na holom
i, asa margogo muse
Bahen ma ahu parhiteanMu, pasupasuM
mabaor ma i
Ale Tuhanhu patupa ma au, baen
pasupasu tu dongan sude.
8. Tangiang Ale Amanami + Amen, Amen, Amen.
(Molo parhalado do manguluhon: Dibaen ma Tangiang
Pasupasu).
Pelean Partangiangan Keluarga (Minggu III,
Sept, 2020) :……………………………….
Godangna :
Rp..……………………………………………………………….
“Tuhan Memberkati”.
Komentar
Posting Komentar