ACARA PARTANGIANGAN KELUARGA HKBP BONGBONGAN

(Minggu I, Oktober 2020).

& Ev.:  2 Musa 18: 17 – 23                                                                        & Ep.: Markus 10: 35 – 45

Topik:   Naposo Na Gabe Pangoloi.

I.     Pangaradeaon:

1.      Partangiangan on diuluhon Ama manang Ina.

2.      Dipillit na mambaen tangiang jala diparade hian ma: Bibel dohot inganan ni pelean.

 

II.    Acara Partangiangan:    (Andorang So Masuk: Martangiang na hohom ma hita).

1.      Marende Sian BE No. 222: 1 + 4 Tu Jolo Ni Tuhanku

v  Tu jolo ni Tuhanku, huboan diringkon

Ibana do Rajangku, sigomgom rohangkon

Sai guru di Ibana, sudena langkangki

Sai asi ni rohaNa, pature bogashi.

 

v  Ditiop do tanganku, sai dihehei do au
Sai tong jonok Tuhanku, ndang dung Ibana dao
TondiNa patorangkon, tu au holongNa i
Sai lam huhadengganhon hansit ni silang i.

 

2.      Votum – Introitus – Tangiang: (U = Uluan, R = Ruas, S = Sude).

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on. Amen. Pos situtu do rohangku, manang hamatean, manang hangoluan, manang angka surusuruan ni Debata, manang harajaon, manang hagogoon, manang angka na masa nuaeng, manang angka na ro sogot, ndang tarbahen i manirangi hita sian haholongon ni roha ni Debata, na marhitehite Kristus Jesus Tuhanta i. Haleluya. Martangiang ma hita: Ale Tuhan Debata, Pargogo na so hatudosan jala Parasiroha na sumurung! Dipangido rohaM, naeng mangolu jala martua hami sogot; nunga ragam dalanna dibahen Ho manungguli rohanami, asa hutanda hami hatuaon sogot. Dibahen i hupaserep hami ma nuaeng rohanami mangido sian Ho: Sai lehon ma TondiM na badia i tu hami, asa porsea hami di holong ni rohaM di hami. Sai hutangihon hami ma soaraM, na mangapoi hami di tingki parasirohaon nuaeng, asa sampang hami tu hangoluan, na pinaradeM i di hami marhitehite Tuhan Jesus Kristus, Tuhannami. Amen.

 

Manjaha Turpuk: Markus 10: 35 – 45

U: Hata ni Debata na gabe turpuk Epistel di partangianganta, dienet sian           Markus 10: 35 – 45. Songon on ma di dok di si: Dung i ro ma mandapothon Ibana si Jakobus dohot si Johannes, angka anak ni si Sebedeus; ai hatanasida: Gurunami, adong do pinangido ni rohanami, silehononmu tu hami nian.

 

R: Gabe ninna ma mandok nasida: Ai aha do pinangido ni rohamu sibahenonku tu hamu?

U: Dung i didok nasida ma tu Ibana: Naeng bahenonmu hami hundul di hasangaponmi, na sada tu siamunmu, na sada nari tu hambirangmu.

R: Alai ninna Jesus ma mandok nasida: Ndang diboto hamu na pinangidomuna i. Tung tarinum hamu ma siinumonki? Tung tarparidi hamu ma paridion siparidionki?

U: Gabe didok nasida ma tu Ibana: Tarbahen hami do! Dung i ninna Jesus ma mandok nasida: Tutu do nian, inumonmuna do siinumonki, jala paridionmuna do paridion siparidionki.

R: Alai na mambahen hundul tu siamunhu dohot tu hambirangku, ndang guru di Ahu i; di angka naung dirade hian do i.

U:  Alai dung tarbege i tu na sampulu i, gabe sogo ma rohanasida di si Jakobus dohot Johannes.

R: Jadi dipapungu Jesus ma nasida, ninna ma mandok nasida: Diboto hamu do, dirajai angka sigomgomi bangso do parripenasida jala dipaksa angka na sangapna do nasida.

U:  Alai unang ma songon i, anggo di hamu! Manang ise hamu na giot sangap, i ma gabe pangoloi di donganna!

R: Jala manang ise hamu, na naeng parjolo, i ma gabe naposo ni donganna saluhutna.

U:  Ai nang Anak ni jolma i pe, ndada asa dioloi halak Ibana, umbahen na ro; Ibana do balik pangoloi jala mangalehon hosana bahen tobus ni torop jolma. I do sahat ni turpuk i. Martua do angka na tumangihon hata ni Debata jala na umpeopsa.

S:  Amen.

 

3.        Marende BE No. 670: 1             Tarbege Soara Na Joujou

v  Tarbege soara na joujou, tongos ma sondangmi

Tung torop parbegu di na holom i, tongos ma sondangmi

Tongos ma Barita na uli, mandungoi na modom i

Tongos ma Barita na uli, mandungoi na modom i.

 

4.       Jamita: 2 Musa 18:  17 – 23 (Dung Martangiang: Dijaha turpuk,responsoria sian Bibel).

 

Dongan sahaporseaon na hinaholongan di bagasan Jesus Kristus Tuhanta i...

Manguluhon bangso ni Debata ima bangso Israel ndada ulaon na mura i. Si Musa ima sahalak partogi (pemimpin) na dipabangkit Debata laho mamboan bangso Israel ruar sian parhatobanon ni halak Misir tu tano na pinarbagabaga ni Debata tu si Abraham, ompu nasida. Marhite angka ulaon na pinatupa ni si Musa, naeng patar huaso dohot hagogoon ni Debata ala pambahenanNa di naposoNa si Musa manguluhon bangso i. Marragam do cara na binahen ni Debata laho mamillit naposoNa. Tanda halongangan pe marragam do di patupa Debata laho patandahon huasoNa, asa anggiat jolma i gabe pangoloi di hataNa. Panjouon ni si Musa, secara khusus: Laho mamboan ruar bangso Israel sian tano parhatobanon Misir, mangondihon bangso Israel di halongonan Sinai. Nian, ndang pintor di jalo si Musa ulaon na pinasahat ni Debata tu ibana, ala tubu di bagasan rohana: So tung ditulak bangso on ahu. Nian Debata do na mamillit dohot na manjou ibana gabe partogi di tongatonga ni halak Israel. Alai tagamonna do ro hata tu ibana sian bangso Israel na mandok: Ndang porsea hami, Debata mamillit jala manjou ho. “…Ndang tutu diida ho Jahowa” (Bnd. 2 Musa 4: 1). Dibahen Debata do dalan laho paposhon roha ni si Musa marhite na patupahon angka tanda halongangan. Di turpuk 2 Musa 18: 17 – 23:  “Debata Papatarhon huaso dohot hagogoonNa di parhorsihan Sinai”. Lobi hurang 40 taon bangso Israel di parhorsihan Sinai. Sian saluhut angka tanda halongangan na pinatupa ni Debata, holan sada do diigil Debata sian nasida di pardalanan na mansai ganjang i, asa anggiat lam porsea nasida tu Debata jala ingkon marsihohot marsomba polin holan tu Debata Jahowa.

 

Dongan sahaporseaon na hinaholongan di bagasan Jesus Kristus Tuhanta i...

Dipajojor si Musa do tu si Jetro, simatuana i, angka pambahenan ni Debata tu bangso Israel. Denggan do panuturion ni si Musa i di roha ni si Jetro jala diparhatopot ibana do habalgaon ni Debata Jahowa. Tarida do i di pambahenan ni si Jetro, mintor hehe do ibana pasahat pelean situtungon tu Jahowa. Dungi marsogotna, dimatamatahon si Jetro ma pangulaon ni si Musa songon sahalak partogi ni bangso i. Songon sahalak simatua doli ni si Musa, tangkas do dilehon si Jetro angka sipaingot dohot parsagi ni angka ulaon di tongatonga ni bangso i. Ulaon ni natoras do laho mamodai ianakkonna asa tongtong mardalan hombar tu lomo ni roha ni Debata. Sian ulaonna songon sahalak malim di Midian, diantusi do ruhutruhut ni panghobasion di bagas joro ni Debata. Impola ni poda na pinasahat ni si Jetro tu si Musa: Patupahon parsagi ni ulaon hombar tu balga dohot bidang ni ulaon sihobasanna. Dijamothon si Jetro do tu si Musa asa dipamanat pangalaho ni angka halak na naeng sipabangkitonna na gabe uluan mangurupi ibana: Baoa angka na marsihohot marroha jala angka na mangkabiari Debata. Baoa parroha na sintong, angka na mangkagigihon pangomoan na so turut (na so patut), i ma pabangkit bahen induk gumomgon nasida marsasaribu, marsasaratus, jala marsasampulu. Diigil do ingkon dapot di angka partogi (pemimpin) roha na tang jala togu, marsihohot jala polin marhaporseaon tu Debata. Halak na so olo patujolohon pikiranna sandiri, alai tongtong mangido paniroion sian uluanna. Dioloi jala diulahon si Musa do na ni dok ni si Jetro, simatuana i laho marsagi ulaon. Denggan jala atur do parsagina ni ulaon i hombar tu torop dohot balga ni ulaon i. Tujuan Parsagi ni ulaon na si songon i patulushon angka ulaon na pinasahat ni Debata tu nasida songon partogi ni bangso i, asa mananda jala lam marsihohot porsea tu Debata Jahowa.

 

Dongan sahaporseaon na hinaholongan di bagasan Jesus Kristus Tuhanta i…

   Bangso ni Debata tudos do i dohot huria ni Tuhan i di partingkian si nuaeng on. Bangso ni Debata manang huria, ima parpunguan ni angka halak na porsea di Debata. Mangulahon angka ulaon di bagasan unduk dohot biar mida Debata patauhon hita tongtong manghalaputi ulaon na hombar tu lomo ni rohaNa. Tarjou do huria nang saluhut halak na porsea laho patupahon angka ulaon songon na pinatupa ni si Musa. Patupahon parsagi ni angka ulaon di tongatonga ni huria, mambahen huria i lam dasip mangulahon saluhut ulaon panghobasion mansai denggan jala uli. Ndang masana be huria pagukgukhon ulaon panghobasion holan di sasahalak, alai ingkon rap manghobasi do hombar tu parsagi ni angka ulaon. Marsiadu patupahon angka ulaon na denggan di tongatonga ni huria, i do dalan laho mangoloi parsuruon ni Debata na sahat tu hita ganup. Lam tu toguna jala lam tu denggan na do proses panghobasion di sadasada huria molo dipatupa parsagi ni angka ulaon di tongatonga ni huria. Marhite i, marsangap ma Debata jala lam tarpasupasu saluhut angka parhalado nang angka ruas ni huria pe. Amen.

 

5.      Marende BE No. 723: 1             Tu Jolom O Tuhan

v  Tu joloM O Tuhan sahat ma diringkon, pangke ma au hombar tu lomoM

Molo ndang Ho Tuhan maringanan di au, diringkon ndang mararga be i

Tung pogos pe di son manang sonang tahe, marsigantung tu Ho sasude

Holan Ho huihuthon ndang be diringkon, togutogu ma tu na ture.

 

6.      Tangiang: Sian Sahalak

 

7.      Marende BE No. 690: 1 Hibul Rohangku Tu Tuhan Jesus    (P. Pelean)

v  Hibul rohangku tu Tuhan Jesus, sude ngolungku di Tuhan Jesus
Ihuthononku do Tuhan Jesus, ndang olo au sumurut be.

 

v  Sai hutundalhon haportibion, silang ni Kristus ma hudapothon
Sai hutundalhon haportibion, ndang olo au sumurut be.

 

8.      Tangiang Ale Amanami +  Amen, Amen, Amen.

(Molo parhalado do manguluhon: Dibaen ma Tangiang Pasupasu).

 

 

 

 Pelean Partangiangan Keluarga (Minggu I, Okt', 2020)  :……………………………….

 Godangna                   : Rp..……………………………………………………………….

 

“Tuhan Memberkati”.