Jamita Minggu 04 Oktober 2020: 1 Musa 2: 18 – 25.

Dongan sahaporseaon di bagasan Jesus Kristus Tuhanta i…

Sangkap ni ni Debata Jahowa tu angka na tinompaNa i lumobi tu jolma sangkap hatuaon do. Sian mulana i pe, ndang hea disangkapi Debata asa masa hamaolon tu hajolmaon. Boi do botoonta i, sian panompaon ni Debata tu saluhut angka na di portibi on. Jumolo do ditompa Debata angka suansuanan, angka pahanpahanan, angka dorbia dohot nasa na adong. Dungi ditompa Debata ma jolma i. Lapatanna, jumolo do diparade Tuhan Debata angka na ringkot di jolma i bahen hangoluan ni angka jolma na tinompaNa i. Dungi di ari paonomphon (6) ditompa Debata ma jolma i. Di 1 Musa 1: 27 didok: “Jadi ditompa Debata ma jolma i tumiru rupaNa, rupana ditiruhon Debata laho manompa ibana, baoa dohot boruboru nasida ditompa”. Ndang rap ditompa Debata baoa dohot boruboru. Gabe legitimasi (ojahan) ni panompaon ni jolma i taringot tu pangalaho dohot sifat ni jolma tudos tu Debata, ima na somal didok: IMAGO DEI. Sian saluhut na tinompa ni Debata holan tu jolma do didok IMAGO DEI, tu angka natinompa ni Debata na asing na i ndang didok i, jala ndang marlaku i (Sifat keilahian Allah hanya ada dalam diri manusia, dari semua ciptan-Nya).

Dongan sahaporseaon di bagasan Jesus Kristus Tuhanta i…

Kronologis panompaon ni Debata di jolma na parjolo i, boi do tangkas botoonta di 1 Musa 2: 7 (Panompaon ni Debata di si Adam) & 1 Musa 2: 21 – 22. (Panompaon ni Debata di si Haoa). Panompaon ni Debata di si Adam:”Dungi dijadihon Debata Jahowa ma jolma i sian orbuk ni tano on jala diullushon hosa hangoluan tu bungbung ni igungna hosa hangoluan i, gabe martondi na mangolu jolma i.”Uju digana Debata Jahowa tano/orbuk marrumanghon jolma ndang digoari Debata Jahowa dope i jolma. Dung pe diullushon Debata Jahowa hosa hangoluan tu bungbung ni igung ni tano na pinauli ni Debata songon jolma, asa martondi na mangolu jala digoari Debata Jahowa jolma. Jala on ma jolma na parjolo, na margoar si Adam. Hosa hangoluan ni jolma i, langsung do i sian Debata Jahowa, ala ni i, saluhut jolma ingkon mangargahon hosanna ala marharoroan sian Debata do i. Panompaon ni Debata tu si Haoa: Dungi tarlalap modom ma si Adam dibahen Debata Jahowa, jadi dienet ma sada sian rusukna, jala dilangkophon sibuk tu pambuatanna i. Dungi dipauli Debata Jahowa rusuk na binuatna i sian si Adam, bahen boruboru, jala ditogu ibana tu si Adam. Jala digoari Debata Jahowa ma i, si Haoa. Si Haoa ma boruboru na parjolo adong di portibi on, na gabe dongan pangurupi bahen dongan ni si Adam. Molo didok pangurupi ni si Adam, ndada na gabe pembantu ni si Adam boruboru i. Jala ndada na gumogo si Haoa sian si Adam. Molo somal pe tabege, sai gumogo do na mangurupi sian na niurupan, tingkos do i. Alai di turpuk on ndang marlaku i, molo sai tapamanat pe ndada gumogo si Haoa sian si Adam. Pangurupi, lapatanna di angka ulaon marsirupan. Adong do angka ulaon i, ndang suman molo ama mangulahon. Sebalikna, sai adong do ulaon i, ndang suman molo ina mangulahon (Saling melengkapi). Ndang hatimboon ni derajat sipingkiron. Bahen donganna, lapatanna gabe dongan saripe ni si Adam (Menjadi Pasangan Suami-Isteri).

Dongan sahaporseaon di bagasan Jesus Kristus Tuhanta i…

Topik ni Minggunta sadari on: Dos Do Hita Di Adopan Ni Debata. Dia do naeng dohononta tu hita. Ndang na mandok gabe dos baoa dohot boruboru. Sian panompaon ni Debata pe nunga tangkas taboto tung marasing situtu do. Si Adam ditompa Debata sian tano. Si Haoa ditompa Debata sian tulang rusuk ni si Adam. Marasing do rumang ni panompaon ni Debata tu baoa dohot tu boruboru. Hata ni Tuhanta pe mandok: ”Ai baoa i do ulu ni pardihutana, songon Kristus ulu ni huria i; laos Sipangolu daging i do Ibana. Alai songon pangoloion ni huria di Kristus i, songon i ma angka parompuan maradophon baoana be di na saluhutna (Epesus 5: 23 – 24). Tahamauliatehon ma tu Tuhan i, baoa manang boruboru rap na tinompa ni Debata do i. Baoa marparange ma hombar tu hadirionna songon baoa jala boruboru pe marparange ma hombar tu hadirionna songon boruboru. Ndang boi baoa gabe boruboru jala ndang boi boru gabe baoa. Baoa, ba baoa ma. Boruboru, ba boruboru ma. Tu angka boruboru, unang salahon Tuhan na manompa ho gabe boruboru. Tu angka baoa pe, unang salahon Tuhan i, ala ndang ditompa Debata ho gabe boruboru. Di 1 Petrus 3: 7 didok: “Angka baoa pe songon i ma; marroha ma hamu mangangkupi nasida, ala pardaging na gumale do ina i. Sangap ma bahen hamu nasida, ala dohot do nasida dongan panean di asiasi hangoluan, asa unang tarambat tangiangmuna”. Antong molo dos do hita di adopan ni Debata, dia ma naeng dohononna tu hita: Parjolo, rap na tinompa ni Tuhan Debata do hita. Paduahon, rap nampunasa di haluaon na pinatupa ni Debata di bagasan Jesus Kristus. Patoluhon, rap nampunasa di hangoluan na saleleng ni lelengna. Paopathon, molo dihata pe “Kesetaraan Gender”: Ndang na ingkon gabe dos baoa dohot boruboru. Alai, dia ma na patut na gabe hak ni angka boruboru dilehon ma i tu nasida. Unang be masa “penindasan” tu angka boruboru. Amen.