1. Mabiar Ala Digas, Pos Roha Ala Ni Jas (Jas Mambahen Pos Ni Roha).

Di sada tingki borhat do amang pandita tu sada huria pagaranna, ala marujung ngolu sahalak sintua di huria pagaran i. Jarak tempuh ni inganan i sian bagas ni amang pandita on, lobi hurang sajom pardalanan naik Honda. Pola sajom di pardalanan ndang ala ni daona, ala ni maol ni dalan do deba (satonga dalan). Amanta sintua na monding i sari matua dope, ala adong dope 2 ianakkonna na so marrumatangga dope. Alai nang pe ulaon sari matua, antar leleng do asa dipataru tu udean ala ni angka acara ulaon paradaton hombar tu adat Batak na pinungka ni ompunta na parjolo i.

Dung simpul penguburan i, hirahira pukul 7 botari mulak amang pandita i sian huta i. Di tongan dalan, ala nunga borngin ingkon marlampu nama ai nunga mulai mangholom. Di pangolu amanta pandita i ma lampu ni karetana, baru pe asa songon na tiur parnidaanna. Dung hirahira 10 meter dung haruar sian dalan na sega i (persimpangan) adong di jolo ni amang pandita i sahalak markareta, jarakna hira 12 meter. “Asa boi hira na beriringan hami dohot parkareta na di jolongkan hupahatop ma”, ninna roha ni amang pandita i. Di gas amang pandita i ma karetana, asa humatop. Hape ala ni biar ni roha ni parkareta i, lam dipadoras ibana ma muse pardalan ni karetana on. Lam digas amang pandita i muse karetana padorashon pardalan ni karetana... lam digas parkareta na di jolona i muse... Songoni ma amang pandita i dohot amanta parkareta na di jolona i, gabe hira pembalap “di bot ni ari” ma nasida, alai ndang masitadaan jala masibotoan. Adong do 10 menit nasida songoni. Dungi manirpang ma parkareta na di jolona i tu sada jabu, di ihuthon amang pandita on ma jala so di jolo jabu i. Secara spontan didok parkareta i ma: “Sanga mabiar au, dung pe hubereng marjas asa songon na pos rohangku, ai amang pandita do hape”. Didok amang pandita i ma tu ibana: “Ai dung kaluar au nangkin sian simpang i nunga huida adong markareta di jolongku, alai ndang apala haru tangkas hutanda, i do asa ndang pola hujou. Alai asa boi hami rap tahe huadu ma ibana ninna rohangku, hape lam dibalap hamu do muse”. Didok parkareta i ma: “Ima da amang panditanami, sai diihuthon au sian pudi jala lam jonok. Ala ni biar ni rohangku, lam hupadoras ma pardalan ni kareta on, hape tong do lam dihojot sian pudingku. Ai hurimpu do perampok ala sai diihuthon au. Dung pe so di alaman i nangkin hubereng ma parkareta na mangihuthon au i mamake jas lengkap mardasi. Baru pe songon na tompu lao biar ni rohangki. Ai ndang mungkin perampok marjas ninna rohangku”, ninna amanta i.

Hamu angka dongan panjaha, jotjot do hita songoni di pardalanan ni ngolunta on, sai jumolo hita mabiar jala biahaton. Mabiar hita mandalani ngolu on, ai tarimpu do perampok na ro, hape siboan Barita na Uli do. Sai tarimpu do arsak ni roha na naeng songgop, hape angka silas ni roha do. Taingot jala tahaporseai ma hata ni Tuhanta na mandok: “Unang ho mabiar maradophon nasida, ai sai ahu do donganmu, paluahon ho, ninna Jahowa”, Jeremia 1: 8.