HKBP RESSORT AJIBATA DISTRIK IV TOBA
I.
PANGARADEON
(Andorang
so dimulai partangiangan dipagalak ma lilin 2 ro di 4, diparsiajari ma jolo
angka ende, inganan ni Pelean pe tangkas ma diparade).
II.
JOUJOU TU
PARTANGIANGAN (U=Uluan, R=Ruas (Anggota Keluarga), S=Sude).
U: Tapuji ma
Tuhanta na pataruhon hita tolhas tu taon na imbaru on. “SELAMAT TAON BARU” ma
di hita saluhutna...! Nunga tolhas be hita nuaeng tu sada taon na imbaru.
Tangkas ma tabilangbilangi pasupasu ni Debata di pardalanan ni ngolunta dohot di
keluarganta. Antong tapahibul ma rohanta, martangiang di bagasan rohanta be. (hohom satongkin martangiang di bagasan
roha).
III.
PARTANGIANGAN
1.
Marende BE. No. 70: 1
– 2 “Na Salpu Taon Na Buruk I”
Naung salpu taon na buruk i, Ho ma hupuji Tuhanki,
:,:Ai diramoti Ho tongtong tondinghu dohot daginghon:,:
O Jesus sai asi
rohaM, paima dengan ni basaM,
:,:Muse di taon na
imbaru on, di nasa huriaM tongtong:,:
2.
Tangiang Pamujian tu
Jahowa
U: Marhitehite Goar ni Debata Ama,
dohot Goar ni AnakNa Tuhan Jesus Kristus, dohot Goar ni Tondi Parbadia na
tumompa langit dohot tano on, Amen. Puji ma Jahowa, ale tondingku, jala nasa
rohangku di bagasan mamuji goarNa na badia i.
R: Puji ma Jahowa, ale tondingku, jala unang tung halupahon
denggan ni basaNa sudena.
U: Ibana do
manesa dosam sudena, Ibana pamalum angka sahitmu sudena. Parasi roha jala
pardengganbasa do Jahowa, lambat tarrimas jala parasi roha godang. Ndang tongtong Ibana manorui, jala ndang gotos rohaNa saleleng ni lelengna.
R: Ndang dibahen tu hita hombar
tu angka dosanta, jala ndang dibaloshon tu hita hombar tu angka hajahatonta. Ai
songon dao ni langit sian tano on do gogo ni asi ni rohaNa di angka na manghabiari Ibana.
U: Martangiang ma hita! Ale Jahowa sitompa
nasa na adong. Pujipujian hamauliateon ma dipasahat rohanami tu Ho. Di sude asi ni rohaM na
patariparhon hami tu taon na imbaru on. Ho do na paluahon hami sian ragam ni
angka parmaraan dohot na mangalehon
tu hami ragam ni pasupasuM saleleng taon 2016. Godang do hamaolon na hubolus
hami saleleng di taon na salpu i, alai andul umbalga do pangaramotionMu
marmahani hami di taon i. Manongtong ma Ho Tuhan mangaramoti hami di taon 2017
on, lehon ma di hami gogo mangulahon na denggan dohot mangadopi angka hamaolon
jala pangolu nang panghirimonnami. Sandok tu bagasan tanganMu ma hupasahat hami
saluhut ngolunami di bagasan Kristus Jesus Tuhannami. Amen.
3.
Marende BE. No. 753: 1
“Dipardalanan Jesus Di Jolonghu”
Di pardalanan Jesus di
jolonghu, holong ni tanganMi manogu au.
Nang di ngolungku Ho do
sombaonhu, tung sonang mardalan raphon au.
Huboto do tangkas panoguonMu,
diiringiring Ho do langkanghi.
Sahat ro di ujung ni
pardalanhu, togu ma au jonok tu lambungMi.
4.
Pangarimangon Di Ngolu
Dalan Pasesahon Dosa
U: Di naung tabolus taon na salpu
jala taripar hita tu taon na imbaru on, tama do ingotonta pangalaosionta tu
Debata. Ingkon parhatopotonta do jotjot ndang pos rohanta tu Ibana, jotjot gale
hita mangaradoti hataNa, gale mangulahon na denggan maradophon keluarga,
maradophon natoras, maradophon ianakhon, maradophon dongan jolma, maradophon
negara. Di godang ni angka hamaolon ditongatonga ni bangsonta diigil Debata do
hita gabe parhobas tu donganta, unang gabe sihobasan, asa gabe pangapuli, asa
gabe pangurupi, parholong, pardame. Hape lemba do hita mangulahon i. Marningot
sude dosanta i, dibagasan panolsolion ni roha, tapaunduk ma dirinta manopoti dosanta!
R: Mangendehon BE. No. 165: 3 “Na Basa Do Roham Di Au”
O Tuhan hutopoti ma, luhut na dosanghi, Asi rohaM sai sesama, di Ho ma
tondingki.
U: Hata ni Debata di Jesaya 1: 18 taringot
tu hasesaan ni Dosanta. “Tung sura rara dosamuna songon abit bunga dapdap,
bontar do bahenonHu songon itak, nang pe rara songon abit hasumba, gabe songon
hapas do muse”.
R: Mauliate ma di Ho ale Tuhan, na rade manesa
saluhut dosa nami.
U: Songon dia do parange ni halak na
manjalo hasesaan ni dosa? Di Epesus 4: 23 – 24 + 32: “Alai paimbaru hamu ma
dirimuna di bagasan tondi ni rohamuna! Jala solungkon hamu ma jolma na imbaru,
na tinompa suman tu Debata, dibagasan hatigoran dohot hapolinon na
marhasintongan. Alai gabe na basar ma hamu sama hamu, angka parasiroha;
masisesaan dosa ma hamu, songon panesa ni Debata di dosamuna di bagasan Kristus.”
Amen.
5.
Marende BE. No. 68: 5 “Masilelean Angka Taon”
O Jesus sai urupi
au, ditaon na ro mamboan,
Parbue angka na sai
tau padaohon hamagoan.
Sai pargogoi ma au
tongtong, pasangap Ho di ngolunghon.
6.
Jamita : Jesaya
63: 7 (Jumolo
martangiang)
“Sai baritahononhu do angka denggan basa ni Jahowa,
angka pujipujian ni Jahowa, ai i do na tama marningot sude na binahen ni Jahowa tu hita, dohot ala ni godang ni
denggan basaNa tu
pinompar ni Israel, na binahenNa tu nasida hombar tu angka asi ni rohaNa dohot tu godang ni denggan
ni basaNa”
Tama do tapasahat pujipujian ala asi dohot denggan basa ni Jahowa di
ngolunta sahat tu tingki on. Boi hita mamolus taon 2016 jala tolhas tu taon
2017 on. Molo tabilangbilangi, ndang hasuhatan pambahenan ni Debata tu
tongatonga ni keluarganta, luatta, nang bangsonta pe. Sai tongtong do asi ni
roha dohot denggan basaNa mandongani ngolunta.
Dongan sahaporseaon... hita na pungu nuaeng di bagas on, boi do
tapanghilalahon roha ni angka ianakhon molo mansohot holong ni roha sian
natorasna, songoni nang sabalikna. Hansit do molo so diparateatehon be, ndang
dipanghulingi be, ndang dipardulihon be. Sai hira na putus harapan ma ibana,
ndang be marpanatap tu jolo. Songoni ma dipanghilalahon Bangso Israel uju di
pembuangan Babel nasida, hira na so diantoi Debata be ngolunasida, hape nasida do
bangso na pinillit ni Debata. I do umbahen ditopoti nasa dosa naung
niulahonnasida mangalaosi patik ni Debata, huhut martangiang mangido asi dohot
denggan basa ni Debata, asa dapotan haluaon.
Diigil Debata do tu hita marhite turpuk on, bona ni taon 2017 on, naeng ma
nian tongtong marhaporseaon na hot holan tu Debata Pardengganbasa i. Tongtong
manghilala pandonganion ni Debata nang pe gok persoalan, pergumulan dohot
hamaolon na taadopi di ngolunta angka na porsea. Ingkon adong do prinsip di
hita, di ngolunta on ingkon adong las ni roha, adong nang arsak ni roha, jala
arsak i boi paubaonNa gabe las ni roha. Jumpa masa arsak ni roha i, unang mura
mandele manang marungutungut, alai tabahen ma i dalan “pa-tang” haporseaon
(proses pendewasaan iman). Tu angka sundut na umposo pe,: “Pasomalsomal ma dirim mangulahon hadaulaton”. Memang mansai mura
do mandok holong ni roha, alai mansai maol do mangulahon i. Holong na
marhasintongan ingkon patar do i di ngolu ni angka halak na porsea. Alai
tapasomalsomal ma mangulahon hadaulaton i.
Angka na pistar mandok: “Jangan mengutuki kegelapan yang terjadi, tetapi
jadilah menjadi cahaya bagi kegelapan itu. Janganlah menyalahkan orang lain
atas persoalan suatu, tetapi jadilah solusi atas persoalan tersebut”. Nunga
tangkas taboto, Parholong dohot Parasiroha do Debata, nda tama hita manjolo
pangurupionNa di ngolunta? Tajugulhon ma martangiang mangido pangurupion sian
Debata. Parholong dohot parasiroha do Debata tu angka jolma na pasolhothon
ngoluna tu Ibana, lumobi ma i laho mandalani taon na imbaru on. Asa boi hita
gabe solusi di angka permasalahan, unang gabe manambai persoalan.
Panurirang Jesaya pe di turpuk on, mansai las rohana ala asi dohot denggan
basa ni Debata, laho memasuki taon parasinirohaon. Laos on do dijamitahon,
dipaingot muse tu bangso i asa tongtong
marroha mauliate. Tama do nang hita pe saluhutna maniru pambahenan ni panurirang
Jesaya on, na tongtong manjamitahon Hata ni Debata tu angka generasi na umposo, tu angka keluarga,
pinompar naung pinalumehon ni Debata, asa marningot nasida di angka pambahenan
ni Debata na sai tongtong mangaramoti jala sumarihon ngolunasida.
Di Jesaya 63: 8, tangkas do didok “Tongon do, bangsoKu do nasida”. Na marlapatan,
Debata do nampuna hita. Mangula do Debata mamungka sian hatutubunta, di
ngolunta sahat tu sadari on. Ala ni i, halak na manghilalahon holong na sian Debata, ingkon
gabe parholong ni roha do ibana di ngoluna. Pos ma rohanta di pardalanan ni
ngolunta, ai Tuhan Debata do manjagai jala na mangaramoti hita. (Tangiang
simpul jamita).
7.
Marende BE. No. 763:
1 “ Molo Jesus Donganmi ”
Molo Jesus donganmi las roham,
Jesus i pangurupim las roham.
Hot haporseaonmi dohot pos ni rohami, mardonganhon Jesus i
las roham.
Las roham, las roham mardonganhon Jesus i las roham.
Marsinondang ma di ho bintang panghirimon i, mardonganhon
Jesus i las roham.
8.
Mandok Hata Masisesaan
Dosa.
(Marjojor sian na umposo
sahat tu na tumua; diaturhon hombar tu ringkotna)
9.
Marende BE. No. 66: 1
+ 3 “Debata Baen Donganmi” (P. Pelean)
Debata baen donganmi! Lao mangula ulaonmu, baen Ibana
haposanmu;
Sai paserep roham i, Debata baen donganmi! Debata baen
donganmi.
Debata baen donganmi! Sai na saut do ulaonmu, sai na
tulus do sangkapmi,
Jala sonang roham i. Debata baen donganmi! Debata baen
donganmi.
10.
Rap Mardalan Di Taon 2017
U: Nunga
tatadinghon taon 2016 i, nuaeng nunga bongot hita di taon 2017 on. Tahirim do
di taon na imbaru on, gabe rumatangga na marsada ni roha gabe pasupasu tu portibi
on marhite mambohali diri gabe keluarga sioloi Jahowa. Tatangianghonma, asa sude ulaon na tasangkapi marture di bagasan
hadameon.
R: Ale Tuhan, ajari ma hami mamilangi ariari ni ngolunami asa dapotan roha na
bisuk hami.
U: Di bona ni taon naimbaru on, ganup ma hita
manoarahon: “mangasahon asi ni rohaNa, marsitutu do ahu paimbaruhon ngolunghu
ganup ari asa lam hombar tu lomo ni roha ni Tuhan Debata”.
R: Ianggo ahu dohot
donganhu sajabu, ingkon Jahowa do oloannami.
U: Di na tabongoti jala tadalani taon
2017 on, tongtong ma hita marningot jala mameop huhut mangulahon Hata ni Debata
songon na tarsurat di Josua 1: 8 na mandok: unang meret buku ni patik on sian
pamanganmu, sai pingkirpingkiri ma i arian dohot borngin, asa diramoti ho, jala
dipatupa ho, hombar tu sude na tarsurat di bagasan i, asa maruntung ho di angka
dalanmu, jala marmulia parulaonmu. Amen. Antong
rap ma hita mangidohon tangiang Ale Amanami, rap ma hita mandok: .....
S: Ale Amanami na
di banua ginjang, . . . dst. (Mangendehon: Amen …. Amen …..
Amen).
IV. Acara Snack.
-------" ---------------------------------------------------------------------------"
--------------------------
PARTANGIANGAN TAON BARU KELUARGA
(Sipasahaton tu
Huria jala ditingtinghon).
Keluarga : ________________________________________________
Lingk./Sektor/Lunggu/Week : ____________________________
Godangna Rp ............................ (
...................................................................................................................................................................)
Komentar
Posting Komentar