1. “Unang be jou bapa tu ahu”
Adong ma sahalak dakdanak na marsikola di sada SD di
sada huta, goarna si Tabo. Goarna ma daina, goarna pe antong si Tabo (alai
ndang tabotabo), nda hombar do goar tu pangalaho. Goarna pe si Tabo, pingkiranna
dohot panghataionna, dohot pangalahona tong do angka na tabo. Sasintongna, si
Tabo on ndang pola masuk tu horong ni na oto..
Di ngolu siapari sahalak dakdanak na ligat jala na
lincah do ibana, pingkiranna pe ndang pola di toru ni ratarata. Na hurang
ringgas do ibana marsiajar dohot manjaha gabe berpengaruh ma tu nilai ni
raportna. Ganup manjalo raport ndang hea denggan nilai raportna, sai adong
torus nilai merah manang ikan mas, i do asa dibahen angka donganna gelarna si
Tabo, ala ni tabo ni ikan mas i do.
Di sada tingki diparateatehon guruna ma si Tabo on,
laos diparhatutu guru i do, ndang apala na oto si Tabo manjalo angka
parsiajaran di sikola. Dungi, lam dibahen guruna i ma “Perhatian Khusus tu si
Tabo”, gabe adong ma kerja sama ni guru dohot natoras ni si Tabo.
Di sada tingki, marjanji do guruna dohot natoras ni si
Tabo asa rap paturehon nilai ni si Tabo marhite na patimbohon (meningkatkan)
parbinotoanna termasuk dohot nilai raportna marhite na ingkon lam tu ringgasna
si Tabo marsiajar dohot manjaha angka buku parsiajaran.
Tingki kalas opat semester ganjil, nilai raportna
adong tolu ikan mas alias nilai merah. Dipatuduhon ibana ma i tu natorasna jala
marsak do natorasna mangida nilai raport ni anakna si Tabo i, ndang apala muruk
natorasna alai didok natorasna i ma tu ibana: “Lam paringgas ma manjaha dohot
marsiajar da anakku asa malo ho jala asa denggan nilai raportmu”. “Olo bapa,
olo oma”, ninna ibana mangalusi natorasna i. Tutu do nian, tarida do na adong
perubahan di hadirion ni si Tabo i ala ni parsitutuonna dohot ala ni
pangajarion ni guruna di sikola, nang dohot natorasna di jabu. Alai perubahan i
ndang apala tompu manang drastis.
Uju kalas opat semester genap, manjalo raport ma muse,
jala nilai raport ni si Tabo i adong dope nilai merah alai holan dua nama. Dung
salpu mangan bodari, dung simpul partangiangan keluarga nasida di sungkun
omakna ma si Tabo: “Di dia raportmu anakku?”, ninna omakna i manungkun.
Murhusori ma roha ni si Tabo jala di bagasan biar ni roha dibuat si Tabo ma
raportna jala dilehon ma tu omakna. Dungi dipatuduhon omakna i ma tu amantana,
ima bapak ni si Tabo i. Diida jala dipanotnoti bapana i ma nilai raportna ni
anakna i, marsak situtu ma bapakna jala muruk ala adong dope nilai merah.
Dungi didok amanta i ma tu anakna si Tabo i: “Nunga tung
mansai loja gurum dohot hami natorasmu mangajari ho, alai sai tong dope adong
angka merah di raportmu. Ala ni i, molo manjalo raport ho muse tu tingki na
mangihut molo sai adong dope nilai merah di raportmu “unang be jou bapa tu ahu
da”, ninna amanta i. Dungi lam marsitutu ma amanta dohot inanta i paingothon si
Tabo, asa lam tu ringgasna marsiajar.
Dung onom bulan muse, dung kalas lima semester ganjil,
jumpa manjalo raport dijalo si Tabo ma raportna, jala dibereng ibana tong adong
nilai merah alai holan sada nama. Anggo nilai ni mata pelajaran na asing
meningkat do ala ni parsitutuonna (Parsitutuonna jotjot terganggu ala ni
pengaruh ni donganna marmeam). Pintor diingot si Tabo ma hata ni bapakna i:
“Molo manjalo raport ho muse tu tingki na mangihut molo sai adong dope nilai
merah di raportmu “unang be jou bapa tu ahu da”. Sai dipikiri si Tabo ma hata
ni bapakna i, alai dihudus ibana ma mulak tu jabu, “Jolo hapataru ma bukuku tu
jabu tibu, dungi lao ma au marmeami, asa unang pajumpa dohot bapa”, ninna rohana.
Hape ketepatan, dung jonok si Tabo tu teras ni jabuna
diida ibana ma natorasna duansa hundul sambil manghataihatai di teras i. Dungi,
dibaranihon si Tabo ma manghatai tu bapakna: “Nunga Hancur be au lae”, huhut
dijalang bapakna i. “Bah… boasa lae nimmu tu ahu Tabo?”, ninna amanta i. Dungi
dialusi si Tabo ma: “Bapa do mandok tu ahu onom bulan na salpu, molo adong dope
di raportmu nilai merah: “unang be jou bapa tu ahu da”, nimmu tu ahu. Ai adong
dope angka merah sadanai di raporthu”, ninna si Tabo. Ndang Tardok.... Ndang
tardok ni natorasna i be manang aha, gabe mengkel margakargak nama nasida.
Komentar
Posting Komentar