Jamita Minggu, Reminiscere, tanggal 13 Maret 2022

 

1 Musa 15: 1 - 6

 

Topik: Marguru Tu Lomo Ni Roha Ni Debata.

 

Ditompa Tuhan Debata jolma i bahen hasangapon dohot hamuliaon ni Tuhan Debata do marhite pabotohon dohot patulushon sangkap ni Tuhan Debata marhite jolma na tinompaNa i. Ndada angka na sinangkapan ni jolma dipatulus marhite hadirion ni Debata, alai marhite jolma na tinompaNa ingkon tulus angka na sinangkapan ni Tuhan Debata di portibi on. Ala ni i pardalanan ni ngolu ni hajolmaon ingkon “Marguru Tu Lomo Ni Roha Ni Debata”. Ndang boi jolma i mangolu hombar tu lomo ni rohana sandiri. Hata ni Debata di Poda 16: 9 na mandok: ”Roha ni jolma marsangkap dalanna, alai Jahowa do patontu langkana”.  Lapatanna, nang pe godang angka na sinangkapan ni sasahalak jolma di bagasan ngoluna ndang manjadi saluhut na sinangkapanna i. Molo adong pe manjadi sian angka na sinangkapan ni sasahalak i ndada ala ni hagogoonna sandiri i, alai Tuhan Debata do na mambahen i manjadi, Debata do na patontuhon i. Di bagasan turpuk on, 1 Musa 15 on, jumpang hita do parpadanan ni Debata tu bangso Israel marhite si Abram. Di bagasan parpadanan i, Debata do manontuhon halak na porsea i gabe hasahatan ni pasupasu ni Tuhan Debata tu saluhut hajolmaon. Di bagasan turpuk Debata sandiri marpadan naeng mangalehon pinompar tu si Abram, nang Sara ripe ni si Abram nunga targoar na hol ala nunga matua nasida. Sarupa do halak Jahudi dohot halak Batak taringot tu parpinomparan. Garis keturunan Patrilineal, garis keturunan didasarkan kepada ayah bukan ibu. Muse, mansai ringkot hian do pinompar, ala pomparan i gabe tumean angka na adong di angka natorasna. Di parngoluan ni hita batak pe jumpang hita do pengakuan bahwa anak itu adalah harta yang paling berharga. Diondolhon do i marhite ende ni legendaris Nahum Situmorang na mandok: “Anakkonki Do Hamoraon Di Ahu”. Keturunan adalah harta yang paling berharga dari segala harta yang dimiliki orangtua.    

Dongan sahaporseaon….

Saluhut jolma do mangadopi ganggu ni roha manang adong biar ni roha di bagasan pardalanan ni ngoluna. Songoni do si Abram di turpuk on, ala nunga mansai leleng si Abram dohot si Sara naung marrumatangga i, jala umurnasida pe nunga matua jala nunga targoar jolma ni si Abram naung hol manang mandul, gabe tubu ma ganggu ni roha di si Abram. Umur ni si Abram hatiha i 85 taon. Ala ni i do didok Tuhan Debata di ayat sada i tu si Abram: “Unang ho mabiar ale Abram. Ahu do lombulombum, upam mansai balga”. Tubu roha na mabiar di si Abram ala ndang adong dope pinomparna dilehon Debata hatiha i. Di ngolu ni hajolmaon, molo so adong pomparanna, mintor tubu do tu pikiranna: “Tu ise ma angka na husari i? Biar rohana, gabe halak na asing ma anon sitean isi ni bagasna. Di kondisi roha biar ni si Abram dipangkulingi Debata Jahowa ma si Abram: “Unang ho mabiar. Ahu do lombulombum”. Marlapatan do i, Debata Jahowa sandiri na mangalehon alus di holso ni roha ni si Abram taringot tu na so adong pinomparna. Debata Jahowa mangalehon di si Abram upa ni parsihohotonna manghaporseai Tuhan Debata. Ihut tu si didok Debata ma: ”Upam mansai balga”. Naeng dohononna, ndang adong harugian ni si Abram molo olo porsea jala mangihuthon Debata Jahowa, alai angka paruntungan do di si. Ai Debata Jahowa, ndada songon jolma olo mandok: “Tidak ada makan siang yang gratis”.  Ai so adong na pinagido Debata Jahowa songon pangidoan ni jolma, ia so holan gabe halak na porsea tu Debata Jahowa.

Respon ni si Abram di bagabaga ni Debata Jahowa, tong dope hira so adong kepastian di si Abram selaku hasahatan ni bagabaga i, gabe didok ibana ma songon on: Oe.. ale Tuhan Jahowa, aha ma lehononmu di ahu?  Diuji si Abram do laho manulingkiti aha do tutu na naeng sipatupaon ni Tuhan Debata tu ngolu ni si Abram. Tong dope hira na hurang pos roha ni si Abram di hata ni Debata Jahowa i. Hombar tu situasi na ni adopan jala na hinolsohon ni si Abram tontu boi do patubu angka pikiran na marragam di ibana sandiri.

Nian marhite pengalaman ni si Abram di tano Misir, mansai tangkas do diparhatutu ibana: Tuhan Debata do na na mangaramoti jala na manjagai si Abram uju naeng bongot nasida tu tano Misir (1 Musa 12), jala uju maringan Abram dohot keluraga di tano Misir disarihon Tuhan Debata do si Abram marhite na dilehon Debata godang angka arta di ibana. Asa dohonon ma singkop do pangaramotion dohot pasupasu ni Tuhan Debata dijalo si Abram. Alai ndang apala arta i huroa na manggohi roha ni si Abram, alai lobi sian arta na pinalumehon ni Tuhan Debata di si Abram, mauas si Abram asa dilehon Tuhan Debata di ibana pinompar. Ai tangkas do diboto si Abram, gabe hira na marisuang do angka arta na nilehon ni Tuhan Debata tu ibana, molo so adong pinompar na laho manean i.  Hape padan ni Tuhan Debata tu si Abram: “Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho” (1 Musa 12: 2), tu saluhut bangso. Di roha ni si Abram, mate punu nama ahu, ai so adong pomparanku. Hira hurang marlapatan do di roha ni si Abram angka pasupasu na pinalumehon ni Tuhan Debata tu si Abram ala so adong ianakonna laho mamparsulihon arta i. Hatiha i, adat hasomalan di nasida molo so adong keturunanna, gabe tu hatobanna do saluhut arta teanteanan i. Asa unang maon madabu tu hatobanna si Elieser arta teanteanan i molo dung marujung ngolu ibana.

Alus ni Tuhan Debata diganggu ni roha na sai maringan di hadirion ni si Abram, didok Tuhan Debata ma tu ibana: Ndang ibana tumean ho, na ruar sian butuham, ibana tumean ho. Dipaos jala dipatogu Tuhan Debata roha ni si Abram asa anggiat mago ganggu ni roha jala tubu dohot marurat pos ni roha di si Abram. Unang be masa  hagangguon di ibana di hata ni Debata. Mansai timbo do ganggu ni roha di si Abram di bagabaga ni Debata taringot, na naeng mangalehon pinompar tu si Abram na ruar sian butuhana. Ala marasing situtu do na nidok ni Debata dohot situasi parngoluon ni si Abram hatiha i. Boasa marasing, ala umur nunga lam ganjang jala daging nunga lam matua. Boi dohonon, sian sudut pandang ni hajolmaon ndang masuk akal be. Ndang mungkin keluarga naung matua jala naung targoar inanta i mandul, boi tubuan anak. Secara ratio, na so mungkin do boi masa sisongoni, ala ndang hea dope masa. Alai ala bagabaga ni Tuhan Debata do i, na boi masa do i. Ingkon porsea do hita di hata ni Tuhan Debata. Ai ndang ndong na so tarpatupa ni Debata (Lukas 1: 37). Marhite huaso dohot hagogoon ni Tuhan Debata masa do i di ngolu ni si Abram songon upa ni parsitutuonna manghaporseai Tuhan Debata. “Dung i ditogihon Tuhan i ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot”, (ay. 5).

Si Abram naung sanga tubu ganggu ni roha di ibana taringot tu angka haadongon ni pompoaranna gabe porsea situtu ala ni hata ni Debata. Haporseaon ni si Abram gabe manghorhon ngolu na imbaru di si Abram dohot keluarga. Haporseaon ni si Abram gabe pita ala nunga teruji di adopan ni Tuhan Jahowa. Di ayat 6 di turpuk on didok: Jadi porsea ma si Abram di Jahowa, gabe hatigoranna do i dietong Jahowa. Ala porsea si Abram tu Tuhan Jahowa gabe dipasahat Debata ma tu ibana alus na hinalungonhon ni rohana. Ndang ditulak si Abram padan ni Debata, jala ndang ganggu be rohana di si. Diauhon ibana do i jala dihaporseai. Muba roha dohot pikiran ni si abram: Ndang si Eliezer na sian Damaskus i be na tumean ibana alai anak na sian butuhana sandiri do manang anak kandung, sitagamonna sipalumehonon ni Tuhan Jahowa tu ibana. Hata pandohan: “Jadi porsea ma si Abram di Jahowa…”. Hata porsea dos do i di hata Heber mandok “aman” manang amen. Lapatanna sai saut ma na nidokMi. Alus laho manolopi pandohan ni sasahalak dohot manjalo dibagasan bulus ni roha. Hata “gabe hatigoranna do i dietong Jahowa”, boi gabe hatigoran dietong Debata ala ungkap do roha ni si Abram manjalo jala manjanghon Hata ni Debata dibagasan ngoluna.

Dongan sahaporseaon…

Porsea di hata ni Tuhan Debata jala olo hita marguru tu lomo ni roha ni Debata, pos ma rohanta sai na tulus do angka na sinangkapan ni rohanta ganup marsadasada, tu rumatangganta be, tu huria nang tu bangsonta pe, bahkan tu sandok portibi on. Diramoti jala disarihon Tuhan Debata do angka na porsea i jala dilehon Tuhan i do hombar tu hita hombar tu angka na taparsinta bahkan lobi sian angka na hinirim ni rohanta dilehon Tuhan I tu hita, asal ma sai tongtong hita porsea di hataNa na Badia i. Na gabe persoalan, olo sipata tubu ganggu ni roha di hita. Ganggu rohanta dipanarihonon ni Tuhan Debata, ala hurang tatanda jala tahaporseai hadirion lumobi hagogoon ni Debata laho sumarihon na ringkot di bagasan ngolunta. Ganggu rohanta dipanarihonon ni Tuhan Debata, mabiar hita ndang adong si panganon, siinumon, parabiton, hamamalum ni angka parsahiton, parianakhonon, parkarejoan, dohot lan na asing. Hinorhon ni roha biar na sai maringan di hita, gabe sangsi hita dohot dihagogoon dohot huaso ni Tuhan Jahowa. Hape, Tuhan Jahowa na tasomba i, Ibana do pargogo na so hatudosan (Yang maha kuasa), mual ni nasa na uli na denggan na taharingkothon di bagasan ngolunta. Jangan karena sesuatu penderitaan yang kita hadapi, jadi mempengaruhi otoritas kuasa Tuhan Allah dalam segala hal. Tuhan yang kita sembah itu adalah maha pengasih dan maha pengampun. Huaso ni Tuhan Jahowa, tuk mangalehon angka na ringkot di ngolunta gariada tuk mangalehon tu hita lobi sian na tapingkiri dohot na tahirim.

 

Goar ni mingunta, ima minggu Reminiscere lapatanna: Sai ingot ma angka denggan ni basaM. Denggan basa ni Tuhan Debata do sai tongtong sai olo jala rade Ibana laho sumarihon angka na taharingkothon. Monongtong do holong ni Debata di saluhut hajolmaon lumobi ma di angka na porsea tu hataNa ni Debata.  Ndang hea mansohot holong ni roha ni Tuhan Debata laho manghaholongi hita jala ndang hea tarambat asi ni roha ni Tuhan Debata ala ni angka dosanta, alai tutu unang be sai tatuntun laho mangulahon angka ulaon na so dihalomohon Ibana. Ala ni Porsea ma di Tuhan Debata Jahowa jala porsea ma di angka bagabagaNa na pinasahatNa marhite angka hataNa na Badia i. Tahalaputi ma mangharinggoshon marsaor dohot hata ni Tuhan Debata, asa taruli hita diangka hangoluan dohot angka ragam ni pasupasuNa. Molo sai marguru hita tu lomo ni roha ni Tuhan Debata gabe taruli hita di angka ragam ni pasupasu sipalumehononNa tu hita ganup marsadasada, songon na binahen ni Tuhan Debata tu naposoNa si Abram di turpuk on.  Dao andul do sinangkapan ni jolma tu lomo ni roha ni Tuhan Debata. Tahaporsea ma hata ni Tuhan Debata na tarsurat di Jesaya 55: 8, na mandok: “Ai ndada pingkiranku pingkiranmuna i, jala ndada dalanmuna angka dalanku, ninna Jahowa”. Sai olo ma hita marguru tu lomo ni roha ni Tuhan Debata di ngolunta, asa taruli pasupasu hita sian Ibana. Amen.