2. “Molo mambonceng anakboru mintor hatop”

 

Saluhut do hita halak batak manghatindangkon, ama i do na gabe kepala ruma tangga. Alai angka ama pe tutu unang ma dipake ama i hakepalaonna sebagai kekuasaan. Molo didok, ama do kepala ruma tangga ingkon cenderung tu tanggung jawab do i di tongatonga ni keluarga.

Na so pola situdu goar. Adong ma sahalak ama di tongatonga ni keluarga ingkon siladenon mangan dohot siladenon minum. Ra na sala mangantusi do amanta i, taringot “ama i do kepala keluarga”. Dirajumi ibana do dirina sebagai kepala keluarga seabagai tuan manang mandor. Mansai timbo hian do dirajumi amanta i huasona sebagai kepala keluarga. Molo mangan nasida, partambuan naung jonok di jolona i pe ingkon ro do inanta i laha manenduk tu piringna.

Adong do kendraan nasida, ima Vespa, allai tung so hea do dohot inanta i menikmati hinatoba ni na markendraan dibonceng sahalak amantana. Hape angka perhiasan ni inanta i do digadis laho manuhor Vesva i. Molo adong angka ulaon tu pesta, sasintongna ingkon rap borhat do nian nasida laho mangadopi ulaon i. Molo adong masa ulaon pesta torus do amanta parjolo borhat, dengan alasan; Parjolo ma ahu da, adong dope ulaonku. Lalap ma i alasan ni amnata i. Hape sidalianna do i asa unang rap borhat nasida dohot inantana i. Alai molo adong halak mangido tolong asa ditaruhonon, mintor hatop do amanta mandok: Tu dia taruhonoku amang? Tu dia taruhononku inang? Tarlumobi anak boru hemmm… pintor hatop do i. Gariada mintor sampulu patna naeng manaruhon (Lapatanna, dihalaputi).

Tongon ma tutu, di sada tingki adong ma pesta ni keluarga na ingkon rap borhat nasida suami-isteri tu pesta i. Diuji inanta i do nian hatop marhobas asa unang ditinggalhon amanta i. Arop situtu do roha ni inanta i ingkon rap nasida borhat mandohoti pesta i. Hape… aha ma na masa. Tong do dipatibu amanta i, didok amanta i ma: Jumolo ahu borhat da, pajumpa di pesta i ma hita, adong dope ulaonku. Didok inanta i do nian: Paima ma ahu asa rap borhat hita, alai gabe gogo do soara ni amanta i mangalusi inantana i: Nunga hudokkon adong dope ulaonku, ningku. Ujungna borhat ma jumolo amanta i, ai tumagon do di rohana halak na asing boncengonna sian mambonceng inantana sandiri.

Dung borhat amanta i parjolo sian jabu, toho ma tutu di tongan dalan adong ma sahalak anak boru mangambat amanta i mangido tolong asa ditaruhon tu hutana. Burju hian do antong amantai mangoloi pangidoan ni anakboru i. Ninna amanta ma: Beta ito, sanga dope jolo hutaruhon ho asa lao ahu tu pesta ninna amanta i. Dungi di engkol ma Vespana i. Dronn… Laos borhat ma nasida.

Angka dongan na umbege barita na marimpola on, burju hian do amanta i tu halak na asing alai molo tu ripena tung i nama maolna, so dipardulihon. Sai unang ma masa sisongon on di rumatangganta be. Ingkon sai jumolo do tahaholongi angka keluarganta marhite angka ulaon na denggan. Jumolo do angka keluarganta manghilalahon hinadenggan ni pambahenanmu sian halak na asing. Tahasomalhon ma jumolo taruli angka keluarganta sian angka ragam ni pasupasu ni Tuhanta marhite hita, dungi pe asa tu halak na asing.

Molo dipangido inanta tu ho amang asa rap borhat, oloi ma, ai bagian ni tanggung jawabmu do i songon kepala ruma tangga. Ndang mungkin amanta ni halak manaruhon inantami tu pesta. Gabe asing anon… Manang molo dipangido ianakkonmu haradeonmu laho manaruhon ibana tu sikola, taruhon ma, bagian ni tanggung jawabmu do i. Unang godang sidalianmu, unang molo tu halak na asing mangido tolong tu ho, apalagi anakboru mintor hatop ho manaruhon i. Maradu tarlambat ho tu pesta…. Syalom… Salam Sehat ma di hita saluhutna. Horas.