Jamita Minggu, Okuli, tanggal 20 Maret 2022 

Lukas 13: 1 - 9

Topik: Marhamubaon Ni Roha Asa Unang Mago.

13: 1 Adong ma na ro uju i paboahon tu Ibana taringot tu angka halak Galilea, na

         didurushon si Latus do mudarnasida, gabe saor tu na pinelehonnasida.

13:2 Jadi ninna Jesus ma mangalusi nasida: Na diagam rohamuna do pardosaan

      halak Galilea i martimbangkon saluhut halak Galilea, ala songon i diahap nasida?

13:3 Hudok ma di hamu: Ndang; anggo so muba rohamuna, laos songon i do hamu

        mago muse!

13:4 Manang na dirimpu hamu, anggo na sampuluualu halak, na mate ditinggang

        palaspalas na di Siloam, parsalaan sian sude pangisi ni huta Jerusalem?

13:5 Hudok ma di hamu: Nda tung; anggo so muba rohamuna, laos songon i do

        hamu mago muse!

13:6 Dung i dihatahon ma umpama on: Adong ma di sada halak hau ara na

        sinuanna tu porlak anggurna; jadi ro ma ibana mangalului parbuena, hape

        ndang adong jumpangsa.

13:7 Gabe ninna ma mandok siula porlak anggurna: Nunga pola patolutaonhon ahu

        ro mangalului parbue di hau ara on, laos so jumpang. Taba ma i; aha pola

        magopo tano i bahenonna!

13:8 Alai didok i ma mangalusi: Tuannami, loas ma i disi sataon on, asa sanga

        hupangkur humaliang bonana, mambahen napa tusi,

13:9 anggiat olo marparbue tu jolo on; alai anggo soada, tabaon ma!

Dongan Sahaporseaon….

Ndang hea disangkapi Tuhan Debata laho manompa jolma asa mangadopi hamaolon, sitaonon, parsahiton apalagi ingkon mangadopi hamatean. Tangkas do i boi tajaha di Jeremia 29: 11 didok hata ni Tuhanta: “Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.” Sangkap hasonangan, hatuaon dohot las ni roha i do disangkapi Tuhan Debata di ngolu ni hajolmaon. Molo masa pe angka hamaolon, parsahiton dohot hamatean ndada bagian sangkap ni Tuhan Debata i, alai ala naung dilaosi jolma i do patik ni Tuhan i gabe madabu jolma i tu bagasan dosa. Ala ni dosa, gabe bagian ni ngolu ni hajolmaon nama hasusaan, parsahiton bahkan ingkon sahat tu hamatean. Nang pe sai diusahahon jolma laho manghaishon hamaolon, parsahiton dohot hamatean sian ngoluna ternyata ndang berhasil. Alai ala ni haporseaonta tu Tuhan Debata ingkon marasing do pangantusionta sian halak na so tumanda Debata taringot tu hamaolon, hasusaan, parsahiton dohot hamatean. Tahaporseai do di ragam ni angka sitaonon tongtong do didongani jala dipargogoi Tuhan Debata angka na porsea i laho mangadopi saluhutna na masa i.  

Boi dohonon molo masa ragam ni angka siataonon, parsahiton bahkan hamatean di ngolu ni hajolmaon angka na wajar nama i, alai ingkon taulahon do ulaon asi ni roha tu angka halak na mangadopi sitaononon i jala ingkon tapataridahon do i marhite angka pangurupionta. Ingkon patupaonta do angka ulaon sosial, dalanta laho marsiurupan manang marsitumpahan. Nuaeng tauji ma jolo mangida hasomalon na masa di halak Jahudi hombar tu turpuk on. Molo masa sitaonon manang molo diida halak Jahudi sasahalak marsitaonon, mintor didok nasida do “ala ni dosana do i”. Jala na jumorbut mangihuthon hasomalan ni halak Jahudi, na diuhum Debata do halak na marsahit apalagi halak na martihas. Na diuhum Debata do halak na mate tompu, ai upa ni dosana do i. Mangihuthon poda dohot hasomalan ni halak Jahudi, molo masa sitaonon, parsahíton, harmatean tu sasahalak i, “ala ni dosa do i”. Ala ni i, molo balga dosa ní sasahalak, balga ma sitaononna, molo metmet dosana metmet ma sitaononna. Pangantusion na songon i ma na pininsang ni Tuhan Jesus di bagasan turpuk on.  Ndang dihalomohon Tuhan Jesus poda dohot hasomalan ni halak Jahudi na mandok molo adong na marsitaonon, na marsahit manang na marujung ngolu, ”ala ni dosana do i”.

Antong tapabagas ma panguhalonta taringot tu na masa di turpuk on. Di na ro halak tu Tuhan Jesus laho pabotohon taringot tu halak Galilea na dibunu si Latus di Jerusalem; Gabe didok Jesus ma tu nasida: "Na diagam rohamuna do pardosaan halak Galilea i martimbangkon saluhut halak Galilea, ala songoni diahap nasida?” Pandohan ni Tuhan Jesus on marlapatan do i: Na dirimpu hamuna do gumodang dosa ni halak Galilea na pinamate ni si Latus i sian hamu?. ”Hudok ma tu hamu: Ndang, anggo so muba rohamuna, laos songoni do hamu mago muse”.  Marhite alus ni Tuhan Jesus i, lumobi marhite umpama na pinasahat ni Tuhan Jesus di turpuk on, nunga ingkon masa hamubaon ni roha manang pertobatan di halak Jahudi dohot di saluhut jolma na umbege barita on, ai so adong nanggo sahalak pe tigor di adopan ni Tuhan Debata, tung saluhut do jolma mardosa.

Dongan sahaporseaon….

Mangihuthon ahli sejarah Jahudi  na margoar si Josephus, masa do uju i gerakan pemberontakan sian kelompok fanatik halak Jahudi maradophon pamarenta Romawi. Alai diparsinta  si Latus  do sian angka pemberontak i ro pasahathon peleanna tu Jerusalem. Jala sian kelompok ni pemberontak i do na dipamate si Latus di Jerusalem. Asing ni i, mate do 18 halak parkarejo na paturehon dalan ni aek tu luat Jerusalem. Ala dipangke si Latus hepeng ni bagas joro laho padengganhon dalan ni aek i, masa ma persoalan di Jerusalem. Ala ni persoalaan i, tubu ma parbadaan pola sahat tu marumpak palaspalas di Jerusalem, jala ditipa palaspalas i 18 halak toropna parkarejo na paturehon dalan ni aek i.

Dipabotohon halak Galilea i ma na masa i tu Tuhan Jesus laho mangido dukungan sian Tuhan Jesus asa lam margogo jala semangat pemberontakan ni Jahudi mangalo pemerintahan ni si Latus, halak Romawi i. Di sisi na asing, boi do sangkap ni na paboahon na masa i, laho pahantushon aturan na berlaku di halak Jahudi na mandok, ala dosana do i umbahen mate.

Dongan sahaporseaon…

Saluhut jolma do mardosa, ndang adong na tigor di adopan ni Tuhan Debata. Ala ni i do didok hata ni Tuhanta na tarsurat di Rom 3: 23, “Ai ndang adong imbar ni i: Tung saluhut do nasida mardosa jala ndang dapot pujion ni Debata nasida.” Saluhut jolma nunga madabu tu bagasan dosa jala ingkon mangadopi ragam ni hamaolon di bagasan pardalanan ni ngoluna. Alai tutu sebagai halak na porsea ndang boi marsisombu hita mangida donganta na tongon mangadopi sitaonon. Marhite sitaonon ni angka donganta i  pe, ingkon bo i do i  gabe parsiajaran laho paubahon rohanta, ai boi do masa tu hita songon na ni adopan ni angka donganta i. Molo masa angka sitaonon tu angka donganta, unang ma hita manguhumuhumi asa unang hona uhum hita, unang ma hita paiasias diri ai so adong na tigor, jala unang ma sai tahalomohon mangulahon angka ulaon na so hinalomohon ni Tuhan Debata di ngolunta. 

Na diagam rohamuna do pardosaan halak Galilea i martimbangkon saluhut halak Galilea, ala songon i diahap nasida? On ma alus ni Tuhan Jesus berupa sungkunsungkun laho mangajari jala paingothon halak Jahudi dohot halak na muramura manguhumi ala selalu merasa benar. Molo masa tu donganmu sitaonon, unang rajumi dirim tumingkos sian ibana, alai pareso jala patangkas ma dirim, pauba ma roham, bertobatlah, ai ho pe halak pardosa do. Ai sitaonon na masa di donganmi songon piala bergilir do i, tongkinna i olo do i masa tu ho. Ala ni i, paima so sahat tu ho angka sitaonon i pauba ma roham asa unang sahat ampe tu ho sitaonon i.  Unang dokkon halak na tingkos hadirionmu ala so dohot ho manghilala sitaonon na tinaon ni donganmi. Unang rajumi dumenggan ho sian halak na tongon mangadopi sitaonon nuaeng. Unang dokkon tu halak na hona Virus Omicron ala ni balga ni dosana, umbahen na terpapar. Unang dokkon tu halak na hona Covid-19, ala ni balga ni dosana do i, umbahen na terpapar. Ndang, hudok ma tu hamu, hita pe, hamu pe, boi do muse terpapar sahit i, molo so tajamothon dirinta sian panahit na jorbut i. Molo terpapar virus omicron ho? Molo terpapar virus omicronhamu? Aha ma dohononmu jala aha ma tagamon dohonon ni halak tu ho? Unang dokkon sumintong dirim sian ibana ala so dohot ho manaon sahit i. Molo mangadopi hamaolon tetanggam unang dokkon ala ni dosana i, jala unang dok tu ibana, mate ho taon…

Dongan sahaporseaon…

Molo dipasahat angka natuatua poda manang sipaingot, tontu ingkon margogo jala marparbue do poda i, lumobi asa adong hamubaon ni roha, i do umbahen na dilehon. Asa ampit sipaingot na pinasahat ni Tuhan Jesus di bagasan turpuk on, dipasahat Tuhan Jesus ma sada umpama taringot tu sada halak na manuan hau ara di porlak anggurna. Di sada tingki disuru nampunasa porlak ma asa disuan hau ara di porlak anggurna, jala manghirim do nampunasa porlak i di parbuena na denggan sitapuonna. Tontu, asa marparbue hau ara i, marusaha do nampunasa i marhite pangulana mambahen denggan suansuananna i. Mambahen napuna secukupnya, paiashon bonana, maniram di tingkina jala patupahon perawatanna denggan. Tolu taon lelengna parsitutuonna, hape ndang olo marparbue. Tarhirim nampunasa porlak i, ala so olo marparbue hau ara i. Dung patolutaonhon disuru nampunasa porlak i ma tu na mangula porlak i laho manaba hau ara i. Ai dumenggan nama ditaba hau ara i, ala ndang olo marparbue jala asa unang terganggu partubu dohot perkembangan ni angka hau anggur na di lambungna.  

Alai dipangido na mangula porlak i ma asa unang jolo ditaba. Dipaloas ma jolo ibana apala sataonnari laho paturehon, paiashon, mamangkur bonana jala mambahen napu manang kompos tu bonana. Dilehon nampunasa porlak i do dope antong tingki tu pangula porlak i laho paturehon, atik boi dope denggan marparbue tu angka tingki na mangihut. Molo so olo be marparbue dung pe sataonnari asa ditaba.

Gambaran do i, gambaran asi ni roha ni Tuhan Jesus maradophon hita jolma naung madabu tu dosa. Nampuna porlak i, ima Tuhan Debata. Na tubu di porlak i, ima saluhut jolma. Jala pangula ni porlak i, ima angka napaso ni Tuhan Debata. Saluhut jolma do mardosa di adopan ni Tuhan Debata. Saluhut jolma do ndang adong na tigor di jolo ni Tuhan Debata. Saluhut do jolma managam uhum hamatean ala ni dosa. Alai ala pardenggan basa jala parasi roha do Tuhan Debata, dilehon do pe tu hita jolma pardosa tingki parasian laho paubahon roha jala marparbuehon angka na denggan, parbue na hombar tu lomo ni roha ni Tuhan Debata. Molo mangolu dope hita sahat tu tingki on, tahaporseai ma tingki parasian na sian Debata do i, asa sanga hita paubahon roha jala marparbue na ramos jala tonggi.

Dongan Sahaporseaon…

Na hinirim ni Tuhan Debata sian saluhut hajolmaon, gabe halak na marparbue na denggan nian saluhut jolma i di angka pardalanan ni ngoluna saleleng diloas Tuhan i dope mangolu. Ai molo dung mate ndang boi be marhamubaon. Hombar tu si, asa marparbue na denggan angka suansuanan na di porlak ni Tuhan i, ai hita do porlak ni Tuhan i, olo jala rade ma hita marsaor dohot HataNa na badia i. Unang sanga didok Tuhan i tu hita: “Nunga pola patolutaonhon Ahu tarpaima di parbue ni hau ara on, laos so jumpang. Ala ni i tinaba ma, unang gabe magopo tano i bahenonna”. Tauji ma mangido tu Tuhan i di bagasan parsitutuon: Paloas ma jolo sataon nari tuan, asa hupature, hubahen pe napuna denggan asa anggiat boi marparbue di taon na ro. Molo so marparbue be ditaba pe taho. Molo nunga dilehon tingki laho pauliulihon hape tong ndang olo marparbue ndang adong be sisolsolon. Lehon ma jolo partingkian di ahu tuan, lehon ma jolo partingkian di hami tuan asa sanga manangkasi dia do na sala, dia do na hurang umbahen na so olo marpabue di bagasan Tuhan i. Pandohan ni pangula ni porlak i, patuduhon haradeonna manangkasi ulaonna, aha do sasintongna sialana umbahen na so olo marparbue.

Mansai ringkot do patupaonta manangkasi hadirionta nang angka parulaonta. Mansai ringkot pangkeonta tingki parasian na ni lehon ni Tuhan Debata laho manulingkiti harohaonta, hadirionta dalan laho paturehon, dalan laho pauliulihon: Boasa ndang marparbue ngolunta, boasa ndang marparbue hakristenonta. Muba ma ma hita, taulahon ma angka ulaon na pahinsathon ngolu haporseaonta asa anggiat boi marparbue na denggan.  Taharinggashon ma mambahen napu di ngolunta siganup ari asa boi marparbue na denggan, ramos jala tonggi. Napu na mansai ringkot di hita bahen hangoluanta ima hata ni Tuhan i, ai hata ni Tuhan Debata do na gabe mual ni hangoluonta. Masa ma marhamubaon ni roha di hita asa unang mago hita. Asa unang hamagoan na gabe jambarta, alai hangoluan na saleleng ni lelengna na pinatupa ni Tuhan Debata marhite Anak-Na Tuhan Jesus Kristus sipartumpalhononNa tu hita sogot. Amen. 

                                                                                     Pdt. Ahab Tambun, S.Th. 

                                                                    HKBP Ressort Bongbongan Pematang Siantar.