PARMINGGUON TAON BARU
01 Januari 2015
Sipangkeon di Huria Kristen Batak
Protestant
(HKBP) Distrik IV TOBA.
THEMA : SADA DO HITA DI BAGASAN KRISTUS JESUS.
Sub Thema: Parompuan HKBP tarjou gabe partogi dihaimbaruon,
pardamean dohot
panghehei di keluarga, huria dohot
masyarakat.
** Pangaradeon:
- Parhalado martangiang di konsistori
– borhat tu ruang ibadah
- Prosesi
- Jongjong sude parhalado mangadophon ruas ni huria.
1. Kebaktian
U: Selamat Taon Baru…, selamat taon baru…, selamat taon baru ma di hita saluhutna. Praeses HKBP Distrik IV Toba dohot sude pangula na gok
tingki rap dohot keluarga nang sude
sintua na adong di Distrik IV Toba on ro
mandok mauliate tu Debata siala asi ni rohaNa, na mangalehon taon na imbaru tu
huriaNa. Siala ni huulahi hami ma mandok: “Selamat Taon Baru” ma di hita saluhutna.
H: Selamat Taon
Baru ma tutu di hamu sude parhalado nami.
U: Hamu huria ni
Tuhanta, Ombas on tama marlas ni roha hita manghamauliatehon denggan basa ni
Tuhanta na mangaloas hita sahat tu Bona ni taon 2015 on. Tama endehononta
GoarNa na marmulia i, Jahowa do Raja, nunga marpahean tongon Jahowa. Nunga
dihohoshon hagogoon.
H: Jadi hot ma
portibion, ndang tagamon humuntal.
U: Hot do bangsoM sian na robi, sian saleleng ni
lelengna do Ho! Sintong situtu do angka panindangionmu.
H: Habadiaon do
na tama dibagasMu, ale Jahowa, rodi salelengna.
U: Ro be ma hita marlas ni roha marsomba mamuji
Partanobatoanta!.
H: Itaolophon ma tujolo ni BohiNa marhite
pujipujian.
U: Taolophon ma Ibana marhite ende; Taendehon ma :
S: Marende
BE. No. 70: 1 – 3 (parhalado hundul tu ingananna be). BL. 36
Naung
salpu taon na buruk i, Ho ma hupuji Tuhanki
Ai diramoti Ho tongtong
tondingku dohot dagingkon 2X
O Jesus sai asi
rohaM, paian denggan ni basaM
Muse di taon
na’mbaru on di nasa huriaM tongtong 2X
=
musik =
Sai
tong paian hataMi na mangapuli roha i
Alai
pangago sasude, padao ma sian hami be 2X.
2. Votum – Introitus – Tangiang
U: Marhitehite goar ni Debata Ama dohot AnakNa
Tuhan Jesus Kristus dohot goar ni Tondi Porbadia na tumompa langit dohot tano
on.
H: Amen.
U: Halomohon Jahowa, jadi lehononNa
ma tu ho na pinagido ni roham.
H: Pasahat ma dalanmu tu Jahowa jala haposi Ibana,
asa Ibana paturehon
U: Pahohom ma
roham maradophon Jahowa jala Ibana paimaima. Sai marhaposan tu Jahowa ma ho
jala ulahon na denggan. Ai holong do roha ni Jahowa mida uhum jala ndang
tagamon tadingkononNa angka na niasianNa.
Haleluya.
H: (mangendehon): Haleluya – haleluya – haleluya.
U: Martangiang ma
hita! Ale Tuhan Debata na so marmula na so marpansohoton; Ho do Bonana dohot
Ujungna. Na marsalpuan do ianggo taon nami alai na hot ro di saleleng ni lelengna do asi ni rohaM. Sian asi ni rohaM do umbahen sahat hami tu taon na
imbaru on; Ho do mangaramoti hami di bagasan taon na salpu. Sai asi ma rohaM,
sai unang tulak hami nuaeng, sai dongani ma hami di bagasan taon
na imbaru on. Godang do asi ni rohaM
naung hujalo hami di taon na salpu, di ragam ni
pasupasu di ngolu siapari, dipardongan saripeon, diparianakhonon, diulaon dohot dinasa
sipingkiran ni rohanami, jala dipargogoi Ho do hami mamolus parungkilon, pangunjunan ro di angka
haporsuhon. Alani, Ale Tuhan Debata, pasupasu hami ro di angka ulaon na denggan, na
huula hami marhitehite GoarMu. Alai na gumodang, pasupasuhon ma HataM na
badia i tu rohanami, asa gabe imbaru
rohanami, asa tarpamasuk Ho hami tu banua ginjang di hasusuda ni bohalnami.
Amen.
3. Marende
No. 65: 1 + 2 Majumpang Taon Na Imbaru On BL. 129
Majumpang taon imbaru on di au di bahen Jesus
Dibaen rohaNa di au on basaNa dipatulus
Ibana do manogu au, saluhut jea dipadao, mambaen las ni
rohangku
Dibahen i hupuji Ho, O Jesus Debatangku
Ai ndang hea mangulon Ho mambaen partuaonku
Rohangku panuratan ni godang ni denggan basaMi, ai Ho do
pangurupi
4. Patik Ni Debata : Patik 1 dohot lapatanna.
U: Ahu do Jahowa
DebataM, ninna Debatanta. Ndang jadi marangkup Ahu bahenonmu Debatam. Dia do lapatan ni i?
H: On do: Ingkon
umbiar rohanta jala humolong jala umpos mida Debata asa mida nasa na adong.
U: Ima sahat na. Rap mangido gogo ma hita sian Tuhan
Debata laho mangulaon patikNa!
H: Ale Tuhan Debata, sai pargogoi ma hami laho mangulaon
angka PatikMi. Amen.
5. Marende No. 265: 2 + 3 Naung jumpang
do muse sataon BL. 192
Tu Ho hulehon ma tondingku, sai baen ma i ingananMi
Sai suru ma TondiM tu ahu, manogunogu rohangki
Na jolo holong ni rohaM do, manaiti Ho tu tano on
Laos i mandasdas Ho nuaning, pangolu au na dangol on (Ay. 3 jongjong).
Urati ma, huhut tutungi Sude na jat di rohangki;
Marhite rante manang tali Tarihot au di dosa i,
Ndang dia imbar nii, o Tuhan, Boi do malua au
disi.
Hasian ni roham ma ahu, Pardosa na malua i,
6. Manopoti Dosa & Bagabaga Hasesaan Ni
Dosa
U: Ale Amanami
jala Debatanami na di banua ginjang. Parasiroha na sumurung mida hami!
Huparhatutu jala hutopoti hami do dosa dohot pangalaosionnami na godang i di joloM.
Dipardalanan ni ngolunami saleleng taon 2014 i, gok hagaleon do hami
jala mian dibagasan dosa. Jotjot do hami
marondolan tu gogo ni pikkiran, tu huaso ni portibi on nang tu gogo ni dongan jolma, jala ndang pos rohanami
marhaporseaon tu Ho. Gabe
mian do hami dibagasan haholomon, jala lam nalnal
tarida na marhagaleon hami masihaholongan, nunga gumodang hami mamingkiri na di
dirinami sandiri. Jotjot do hami
parhalado, ama, ina, naposobulung, lemba di angka ulaon di tonga ni
Huria, masyarakyat, nang keluarga. Ale Tuhan Debata parasiniroha na sumurung,
diudut Ho do hosangki paidaida ahu, manang na adong parbue ni na niulaM di ahu,
hape jotjot tarhirim Ho, parbue ni i ndang olo ro.
H: (mangendehon
no. 68: 3 BL. 93).
Ra naung tarrimas Debata marnida pambahenanhu.
Ra, naung didok: ”Tinaba ma hau
on na so dihangKu.
Ndang olo marparbue i, tu aha be hasea i.”
U: Ale Jahowa Amanami parasi ni roha na sumurung, Na
ro do hami tu joloM manopoti dosanami na godang i. Ndada alani pambahenan nami
na denggan umbahen na tolhas hami tu taon naimbaru on, ai jotjot do
hutulak hami panjounonMu jala tuminggil hami tu soara na di portibi on. Ramun jala hajahaton do maringanan di tonga ni ngolunami, jala hu
arsaki hami do Ho di ngolu nami siganup ari. Tung alani godang ni basaM dohot asi ni rohaM do
patariparhon hami tu taon naimbaru on. Tama do nian hona uhumMu hami siala ni
balga ni pangalaosionnami.
H: (mangendehon no. 68: 4)
Alai umbahen na niondihonMi do au umbahen na mangolu.
Ho do mandok tu Ama i, “Sai loas ma
mangolu hau on,
Asi ma rohaMi, taon i pe lalu
uhum i”.
U: Ale Amanami jala Debatanami na dibanua ginjang,
dipataripar jala dipangolu Ho do hami di taon na imbaru 2015 on. Tung Debata
parasi ni roha na sumurung do Ho, lambat do Ho tarrimas mida hajahaton nami. Di
hirim rohaM sian
hami asa marhamubaon ni roha dohot dapot
parbue sian ngolunami saleleng hami mangolu di tano on. Ndang tarparbuehon hami manang aha molo so Ho
do na mian di ngolu nami. Alani, asi ma rohaM di hami.
H: (mangendehon no. 68: 5)
O Jesus sai
urupi au, di taon na ro mamboan. Parbue angka na
sai tau padaohon hamagoan.
Sai pargogoi
ma au tongtong, pasangap Ho di ngolungkon.
U: Sai asi
ma roham, ale Debata, sai jangkon ma hami jala sesa ma dosanami di na ro hami
di bona ni taon on manopoti dosanami, ala ni Anak haholongan ni rohaM, Tuhan
Jesus Kristus, Tuhannami. Amen.
H: Mangendehon BE No. 432: 1-2 “Sian hurungan ni dosangki” BL.292
Sian hurungan ni dosangki, ro au tu Ho, ro au tu
Ho.
Tu haluaon di mudarMi, Jesus au ro tu Ho.
Nasa rohangku malum hipas, gabe mamora, nang pe
pogos.
Sian jeangku ro au tu Ho, Jesus au ro tu Ho.
U: Bagabaga ni Debata taringot tu hasesaan ni dosanta: Songonon do Hata ni Jahowa : unang
Ho mabiar, ai Ahu do siluluhon Ho; nungga pola hujou goarmu, Ahu nampuna ho.
Hasangapon ma di Debata na di ginjang.
H: Amen. (Hundul).
7. Koor :
8. Marende No. 64: 5 Naung moru
do muse sataon BL: 192
Dibahen i antong hupuji dengan basaM sadarion.
Ai pineakhon ruji-ruji i do na dapot sai tongtong.
O Jesus na marholong roha ingkon hupuji goarMi
Di baen saluhut denggan basa tu ahu pinasahatMi.
9. Epistel : Pangungkapon 21: 1-6
U: Dung i huida
ma banua ginjang na imbaru dohot tano na imbaru, ai nunga salpu banua ginjang na parjolo dohot tano na
parjolo i; laut i
pe ndang adong be.
H: Jala huida ma
huta na badia i tuat sian banua ginjang sian Debata, i ma Jerusalem na imbaru, na pinature songon oroan na
sinanggulan mandapothon harajaanna.
U: Jadi hubege
ma soara na gogo sian habangsa i, na mandok: On do joro ni Debata di tongatonga
ni angka jolma; na maringanan ma Ibana di tongatonganasida, jala nasida ma
bangsona, jala Debata sandiri saor tu nasida!
Ina:
Jadi apusan ni Debata ma nasa iluilunasida sian matanasida: Ndang adong be
hamatean nang arsak ni roha; nang angguhangguk, nang na hansit, ndang disi be;
ai nunga salpu na parjolo i!
Ama: Dung i didok na hundul di habangsa i ma: Ida ma, saluhutna do
hupaimbaru! Jadi didok ma:
Surathon ma i, ai haposan do angka hata on jala na sintong!
U: Laos didok ma
tu ahu: Nunga saut! Ahu do Parjolo jala Parpudi, Bonana jala Ujungna. Lehononku
ma tu na mauas sian mual aek hangoluan i, so pola tuhoron! I do sahatna. Martua do na tumangihon Hata ni Debata jala na umpeopsa.
H: Amen !
10. Koor :
11. Marende No. 69: 1+6 Jesus Sai
Urupi Hami Logu No. 84
Jesus sai urupi hami Dohot di taon baru on
Paimbaru
gogonami Mangihuthon Ho tongtong
Pasupasu ma muse Na porsea sasude
Sai ramoti au
Tuhanku Sipat taon naimbaru on
Usung ahu di tanganMu Molo suda
bohalhon
Asa las rohangku lao Ia ro
panjouM di au
12. Refleksi Taon Baru
U: Hamu dongan sahuria. Nunga taripar
hita di taon naimbaru on. Didok sijolojolo tubu : “Nilangka tu jolo, tinailihon
tu pudi”. Ala naeng mangalangka ma hita tu jolo, tama do jo tatailihon tu pudi,
i ma pardalananta manipat na sataon bolon naung tasalpuhon. Molo tatailihon pe
tu pudi, asa dapotan bisuk do hita sian angka na tabolus i, ai i do guru di
hita mangalangka tu jolo di taon 2015 sibongotanta on. Na di taon 2013 massai
hobas do huriaNa patupahon pangkobasion tu angka dakdanak sekolah minggu, jala
na di taon 2014 hobas do huriaNa
mangkobasi songon tahun remaja/pemuda HKBP
laho mangarade diri mangadopi angka tantangan ni zaman. Mansai borat do
tantangan ni zaman na ni adopan ni angka sundut naumposo, isarana
penyalagunaan narkoba, pergaulan bebas, persaingan na ketat, tarlumobi ma manghajongjonghon
haporseaonna di tonga ni ngoluna. Nunga salpu tahun remaja/pemuda 2014
di tonga ni hurianta, alai ndang laos salpu boti, alai parmulaan
do i jala paingothon hita laho paradehon
sundut na umposo laho mangadopi angka tantangan ni zaman tu angka tingki na
naeng ro. Antong angka natoras margogo ma laho manogunogu angka sundut na
umposo, jala hamu angka sundut na umposo sai tinggil ma hamu tu Hata ni Debata
dohot tu poda ni angka na tumua, jala unang hamu mabiar, ai Debata do
mandongani hamu.
H: (Mangendehon): BE No. 769: 2 “Tu Debata do pangkirimon”
Amporiki nang bungabunga i, ro di sude na
tinompaNa i.
Na metmet nang na
balga i, Ibana do na marmuduhon i.
Reff. Torop pe mara manahopi
au, Debatangki do sumarihon au,
pos
rohangki, sonang do au, Ibana do na mandongani au
U: Angkup ni, di taon 2015 on di sangkapi HuriaNa
HKBP do na gabe “taon Parompuan”
dohot thema “SADA DO HITA DI BAGASAN
KRISTUS JESUS”, dohot sub-thema : Parompuan HKBP tarjou gabe partogi di
haimbaruon, pardamean, dohot panghehei di keluarga, huria dohot masyarakat.
Marhite ulaon taon
parompuan HKBP i, mangondolhon asa hehe
jala parsidohot laho paradehon diri mambohali dakdanak sikkola minggu, sundut
na umposo di tonga-tonga ni ngoluna, nang perekonomian ni keluarga,tarlumobi ma
pangkorhon ni parnaik ni BBM tu
panggulmiton ni ngolu siganup ari. Alani, asa rap marsada ni roha ma angka ama
dohot ina di tonga ni bagasna laho mamingkiri angka naringkot di pargoluan
siganup ari. Lam jumpa ma angka ina soripada na marhuaso na andul argana
martimbangkon sian mutiha. Na pos do roha ni harajaonna di nasida, jala na girgir
tanggana marhobas,marbasa-basa, puhut mangula ulaonna, jala tongtong
mangkabiari Jahowa. Ndada be holan pelengkap sambing angka ina di tonga ni
bagasna, alai na ingkon do parsidohot laho mangkehei di keluarga, huria dohot
masyarakyat. Hamu angka ina unang mabiar
hamu ai Debata do mandongani hamu.
H: (Mangendehon) BE. No. 769: 1 “Tu Debata do pangkirimon”
Tu Debata do panghirimonki, di tano laut nang awang-awang i.
Ibana do haposanki tongtong do diramoti langkangki.
Reff. Torop pe mara
manahopi au, Debatangki do sumarihon au,
Pos rohangki, sonang do au. Ibana do na mandongani
au.
U: Masuhanta jala dalananta ma taon na imbaru
2015 on, jala taon 2015 on naeng masuk ma bangsonta tu pandohan na margoar
“masyarakyat ekonomi asean- AEC”. Alai taingot ma ai dibohali Debata do huriaNa
mangadopi angka parhusoran ni angka tingki di portibion, asa margogo jala unang
tahutan laho mangadopisa. Tongtong ma dungo huriaNa jala hehe paradehon diri
laho mangadopisa. Taingot ma songon endenta i “Torop pe mara manahopi au, Debatangki do sumarihon au, pos rohangki, sonang
do
au, Ibana do na
mandongani au. Alani i tabege ma hata ni Debata na tarsurat di Roma 1: 16-17, na mandok:
H: Ai ndang na huhailahon barita na uli i, ai hagogoon ni Debata do i,
paluahon nasa na porsea. Ai dipapatar do
disi hatigoran ni Debata, na sian haporseaon tu haporseaon;
U: Hombar tu na
tarsurat di Lukas 17:1 9 “Hehe ma ho, laho ma ho! Haporseaonmi do paluahon ho. Amen
13. Koor :
14. Marende No. 701 : 1 + 2 Tu Ho Do Au Marpadan
Tu Ho do au marpadan O Jesus Tuhanki, asa burju
haposan au diadopanMi
Sai Ho ma mandongani au di ulaonki, ajari pargogoi
ma au di dalanki (Ay. 2 jongjong)
Baen ma
pangkilalaan di au O Tuhanki, Donok do Ho O Tuhan mandopang musungki
Ragam do
pangunjunan dihasiangan on, Ho
partanobatoan di paraloankon
15. Manghatindanghon Haporseaon
16. Sunggulsunggul :
17. Acara Mandok Hata:
- Utusan Ruas ni Huria
- Utusan Pangaranto
18. Marende
No. 66: 1... “Debata baen donganmi” (Papungu Pelean. Ia+I b) BL. 52
Debata baen donganmi, lao mangula ulaonmu.
Baen
Ibana haposanmu sai paserep rohami
Debata baen donganmi Debata
baen donganmi
Debata baen donganmi molo Debata donganmu
Ndang
tarbahen ho be lilu sai ture do langkami
Debata
baen donganmi Debata baen donganmi
= musik =
Debata baen donganmi sai na saut do ulaonmu,
Sai
na tulus do sangkapmu jala sonang rohami
Debata
baen donganmi Debata baen donganmi
19. Jamita: Galatia 3: 26-28
20. Marende
No. 656: 1... (Pelean tu
Kategorial Naposobulung)
Parhahamaranggion i, lam hot jala togu, singhop ma
hasadaon i, di Jesus i burju.
Rap
sauduran hita be marholong na tutu, mardame, marlas
roha ma di Jesus i tutu.
Togu ma
hasadaon i; di ojahanna i, sada haporseaon i, di Tuhan
Jesus i.
Ai sada
pandidion i, ai sada Ama i, sada ma hita Kristen i, manomba Tuhan
i.
= musik =
Ai disagihon do ganup asiasiNa i, asa ringgas
huhut burju, di ulaonna i,
Sai lam serep ma rohamu hombar tu Hata i, parholong roha
ma hamu maniru Tuhan i.
21. Parsuruon Tu Ngolu Siganup Ari
U: Huria na hinaholongan ni Tuhan Jesus. Nunga marsaringar di
tongatonganta Hata ni Debata na pabotohon tu hita “na Anak ni Debata do hita
marhitehite haporseaonta di
Jesus Kristus”.
Alani i, naeng ma hita gabe jolma na imbaru, na tinompa
suman tu Debata dibagasan hatigoran dohot hapolinon na marhasintongan.
H: Mangendehon BE.No. 672: 1 “Tung
godang...” (ndang dohot refrain)
Tung godang situtu ulaonmu antong
dipasahat Tuhanta tu ho
Ndang adong be tingkim
marnalemba tahe ngolumi bahen tiruan tongtong.
U:
Songon anak ni Debata hita tung godang do siulaonta di portibion, nang
pe sai ro angka parungkilon dohot pangunjunan alai sai tongtong do pandonganion
ni Debata di ngolunta. Alani tongtong ma hita mian dibagasan Ibana, asa
marsiurupan, masitungkolan dohot masitangiangan, asa monang hita sahat rodi
ujungna maralohon ragam ni parungkilon dohot pangunjunan di portibi on. Dao ma pangalaho na masilatean, masihosoman, ai sada do hita
dibagasan Yesus dibagasan Asi ni RohaNa
i.
H: Mangendehon
BE.No. 672: 2 “Tung godang...”(ndang dohot refrain)
Ai lambok do soara ni Tuhanta i, ro ma ho
las ma nang rohami
Sai taingot tongtong Hata ni Tuhan i mangarahon
jolma tu Tuhan i.
U: Di bona ni Taon naimbaru on tarjou do hita
mamparbuehon angka na denggan di panggulmiton ni ngolunta di tongatonga ni
portibi on. Borhat ma hita, tabaritahon ma pambahenan ni Debata na songkal i,
asa gabe sira dohot panondang hita
marhitehite na mangolu hita dibagasan holong dohot las ni roha, dame dohot
lambas ni roha, habasaron, habasaon, haporseaon, halambohon dohot hatomanon.
H: Mangendehon BE.No. 672: 3 “Tung
godang situtu” (dohot Reffrein)
Alani boan ma sondang na tiur i, boan ma Hata ni
Tuhan i
Sai urupi na pogos na
mardangol i, asa ro tu Jesus
Tuhanta i
Reff…… Sai patupa ma i
alani Tuhan i, so mangkirim balosna
tu ho
Debata do marnida na niulami, manang na adong
parbueni i.
22. TANGIANG PANIMPULI
U : Tangiang Pelean (Sian
agenda HKBP)
H : (mangendehon) “Nasa na ni
lehonMi….
U : Tangiang Pangondianon
(sian Agenda HKBP)
23. Tangiang Ale
Amanami
H : (mangendehon) “Ai Ho do
nampuna harajaon….
24. Pasupasu.
Selamat Taon Baru ma di hita saluhutna.
Horas... Horas... Horas...
Pdt. A. Tambun, STh – HKBP Ressort Ajibata.
Komentar
Posting Komentar